Luk 8 - Tampulma

Nihaan Ba Naa Funɛ Gba A Suŋi Yesu

¹ Wuzu bile wuzu Yesu wa a gantɛl tiŋsa fidalɛ ta fun gba a zu tɔ damata awa tɔ wisa a biksi Koosa laaboor weri ti di o daŋni o dɔ narawa.

^2-3 Nihaan ba naa o fun a tiibi wichɔɔrsa a duŋni alizin tagna a li ba ni chen bɔnɛ, ba waa funɛ tiŋ un a suŋi un a li ba kin ni. Ba nara batora sɔna funɛ ya Meri, naa ba funɛ yir Magdala, Joana, awa Suzana. Joana baal naa ba funɛ yir Kuza, funɛ ya koor Hɛrɔd dam nihɛɛ.

Yesu Fun Ŋɔ Ba Nipari Naa Zaasi Kiduha Wɛ

⁴ Nara kinkan fun li tɔsi naa go dooni a wa Yesu wati. Zɛmɛ kinkan funɛ lagmi dɔŋ ni, o fun jɛɛgi jɛɛgi a ŋɔ ba,

⁵ “Baal digi funɛ nyɛn doon a fun si a kaali o ŋmaha di o la zaasi kiduha. O funɛ zaasi chene, kiduhu ti bɔnɛ fun chesi nyinbaan ni ka o nɔsi a ni. Zimebisa fun wa pini a naa chesi nyinbaan ti ni chen maga a di.

⁶ Bɔnɛ fun chesi buŋkula tuhu ni. Doon hɛɛri ta wa fun kpak sɔnsɔn. Chendaha kiduhu ti fun nyu a fiimi a siti.

⁷ Kiduhu ti bɔnɛ ka fun chesi sɔta bar nyɛni ni a nyu a zini. Sɔti ta gbanko fun nyu a si a tɔ a. Chendaha a wa fun koti a lul.

⁸ Bɔnɛ ka fun chesi tɛɛn weri ni a nyu a zini a lulsi kɔkkɔkwa a bi nɛnɛ.” Doonee Yesu fun ŋɔ ba, “Ma naa kpak diŋsa aa nu, maa nu nɛnɛ.”

Chenani Yesu Fun Jɛɛgi Jɛɛgɛ A Nyɛ Nara Ni

⁹ O gantɛl tiŋsi ta fun ŋɔ Yesu ni di o ŋɔ ba jɛɛgi ti mun.

¹⁰ O fun ŋɔ ba, “Koosa funɛ kpa o koor ti kin naa o fun kpa a sogli chen a chiŋsi a nyɛ ma a li gbampulim ni di ma zim a muna. Ba naa ka la nu mu wati, ba kpak seu a vɛ naali. Mu ŋɔ bau, ba ka wa zim mu sɛm ta mun. Chendaha mu jɛɛgi jɛɛgɛ a nyɛ ba.”

Yesu Fun Ŋɔ Ba Nipari Naa Zaasi Kiduha Chen Mun

¹¹ “Ma nyɛ mu ŋɔ ma jɛɛgi ti mun. Kiduha ti chi Koosa laaboor weri tirɛ.

¹² Kiduha naa funɛ chesi nyinbaan ti ni chen chi o laaboor weri naa nibinsa nurɛ. Sintana fun si lalaga a wa yisi laaboor ti a li ba bambe ni, chen ni ba se wa zi su un. Koosa wa zi koti a yisi ba a li ba tum tagna ni.

¹³ Kiduha naa funɛ chesi buŋkul ta tuhu ni chen chi ba naa nu laaboor weri ti ka ba tusa sɔɔni. Amaa laaboor ti wa fun ta lur ta ba ni. Ba funɛ tiŋ tamnɛ, amaa saha naa namsi wa kpak ba chen laaboor weri ti daha, ba vɛ un a bu vɛ tiŋi.

¹⁴ Kiduhu naa funɛ chesi sɔti ta bar nyɛni ni chen chi ba naa nu laaboor ti, amaa tɛɛnɛ maga wi yaalɛ awa ba malɛ daŋni kinkan wa zu ba bambe ni a chɔk laaboor weri ti, chen ni o wa koti a lul ba tusa ni.

¹⁵ Kiduha naa funɛ chesi tɛɛn weri ni chen chi ba naa nu laaboor weri ti ka ba bambe kpak un a tiŋ un nɛnɛ. Ba waa kpak kanyita a lulsi kinkan.”

Nar Suk Fitina, Leene O Kpa Un A Chiŋsi?

¹⁶ Doone Yesu fun pɛɛsi ba, “Nar suk fitina, o zi bu kpa tempile a chik un niu koo o zi kpa un a chiŋsi o bar chiŋsi niu o chaani kinkan?

¹⁷ “Kin naa maga soglee, a maga zi wa li gbampulimu, chen ni ma zi na au.

¹⁸ “Ma doso a kinu mu biksi nɔ nɛnɛ. Nar la nu nɛnɛ, Koosa zi suŋi unu o zim a gbaari. Nar ka vɛ nu nɛnɛ, tam naa o zim chen, Koosa zi yisi au o wati.”

Yesu Nitiŋɛ Ya O Wuti Walɛ

¹⁹ Yesu funɛ sɛm chene, o niina awa o niinbisa fun wa tel a wa chiŋi dam ti dentil ni. Ba wa fun koti a wa o wati zɛmɛ ta daha.

²⁰ Nandigi fun wa ŋɔ un di o niina awa o niinbisa nyɛn dentil ni a pɛɛsi o wɛ.

²¹ Yesu fun ŋɔ ba naa nyɛn doon maga ni, “Ba naa maga nu Koosa laaboor weri ti a tiŋ un, ba waa ya mu numa awa mu niinbisa.”

Yesu Fun Jiŋ Peha

²² Wuzu digi Yesu fun ŋɔ o gantɛl tiŋsi ta ni, “Ma nyɛ ya zu arŋa a la ji bɛɛŋ ti jibaŋ kinkin ti.” Ba fun zu aa la.

²³ Ba funɛ la chene, pe kpok fun wa si aa viigi. O fun a mo arŋ ti kinkan, a teŋ ni ti a du arŋ ti tuhu ni o daŋni o lim. Ba funɛ nyɛn bar tagin nɛɛ kinkan. Amaa Yesu funɛ chɔ dore.

²⁴ O gantɛl tiŋsi ta fun a laasi un a ŋɔ, “Ya kunyana, yaa daŋni ya sou. La ya a ta.” Yesu fun si o do ti ni a ŋɔ pehe ti ni di o chiŋi a ŋɔ ni ti ni di o du balimm. Pehe ti fun chiŋi. Ni ti gbanko fun a du balimm, hali o wa fun a dam tama.

²⁵ O fun ŋɔ ba, “Ma se wa su minn?” O fun ya ba alaazibu kinkan ka hansura zu ba. Ba funɛ pɛɛsi dɔŋa, “Baal nɔ, baŋ nibine ya un? Hali o koti a sɛm sɛma peha awa ni wati a nu o nɔ.”

Yesu Fun Tiibi Alizin Tagna A Li Nar Ni

²⁶ Ba funɛ la ji bɛɛŋ jibaŋ kinkin ti, ba fun wa tel Gadaria tima pulum.

²⁷ Baal digi funɛ nyɛn doon a kpak alizin tagna o nyuhu ni. Kundɔŋ wa fun tɔ o bara. O fun nyɛn hugilsa bar nyɛn nɛɛ.

^28-29 Nara yaa fun kpa zɔglɛ a vɔti o naŋgere awa o nisa hali ba wa ku, amaa alizin tagni ta yaa fun siu a kasi a maga a duŋni un o kaali nyabaan. Yesu funɛ wa li arŋ ti ni, baal ti fun chɔ a wa gbiri o suwachak ni a zaami un. Yesu fun ŋɔ alizin tagin ti ni di o li baal ti ni. O fun tɛsi kinkan a pɛɛsi un, “Baŋnɛ ii daŋni n wati, i waa Yesu, Koosa zen be? Kinyini Koosa a gil mu muksi.”

³⁰ Yesu fun pɛɛsi un, “I sɔn ya baŋa?” O fun ŋɔ di o sɔn ya ‘zɛmɛ’. Alizin tagna damata funɛ nyɛn un ni. Chendaha o fun ŋɔ chen.

³¹ Alizin tagni ta fun sumi Yesu di o wa zi tum a a li a bar leli ti ni.

³² Kurchusa funɛ nyɛn kuŋkule nyuhu ni a di diwe. Alizin tagni ta fun a sumi Yesu di o nyɛ ba la zu kurchusi ta ni. O fun nyɛ a nyinbaan.

³³ A fun li a la zu a ni. Kurchusi ta fun si a chɔ a la wilsi a chesi bɛɛŋ ni ti ni. Ni ti fun di a maga.

³⁴ Ba naa funɛ nyini kurchusi ta chen, ba fun chɔ kaali dama a la ŋɔ ba naa nyɛn dooni awa ba naa ba pu kɔha ti ni.

³⁵ Tɔhɔn ti tima fun li a wa Yesu wati di ba la na kin naa yɛɛ. Ba fun wa na baal naa alizin tagna kinkan fun kani un ni chen laari gar a kani Yesu suwachak ni. O wa fun bu a zu galɛŋa. Hansura fun kpak ba.

³⁶ Ba naa funɛ nyɛn dooni a na chenani funɛ ya alizin tagni ta awa kurchusi ta, ba fun ŋɔ ba naa wa chen.

³⁷ Ba funɛ nu ba sɛm chen, hansura fun kpak ba maga kinkan. Ba fun wa sumi Yesu di o li ba pulum ni. Saha naa o fun si a la zu arŋ ti chen,

³⁸ baal naa funɛ kpak alizin tagni ta chen, fun wa sumi Yesu di o nyɛ o tiŋ un ba la. Yesu fun ŋɔ un, “Aai.

³⁹ Kila i dam walɛ wati a la ŋɔ ba chenani Koosa suŋi hin.” O fun kaali a la ŋɔ tɔhɔn ti maga nara ni chenani Yesu fun ya nyɛ un.

Yesu Fun Tiibi Ju Tim Nihɛɛ Nihabichɛla

⁴⁰ Yesu fun la ji bɛɛŋ ti jibaŋ kinkin ti. O funɛ la tel dooni, zɛmɛ kinkan fun piin chiŋi dooni a pɔ un. Ba tusa fun sɔɔni kinkan ba na un chen.

⁴¹ Ba bar lagmi dɛ nihɛɛ digi funɛ gbaari zɛmɛ ta ni. O sɔn funɛ ya Jairus. Saha naa o fun wa na Yesu, o fun la gbiri o suwachak ni a sumi un,

⁴² “Mu kpak nihabichɛl bɛgim duŋduŋnɛ. O ya bun fidalɛwa. O wiu a daŋni o sou. Kuwa mu dama a wa suŋi min.” Yesu fun tiŋ Jairus a kaali. Nara kinkan gbanko funɛ tiŋ un aa zaksi un.

⁴³ Nihaan digi funɛ nyɛn doon a kpak wichɔɔr digi bun fidalɛ. O fun ya nin ka o vɛ peti. O fun a chɔk o malɛ maga a nyɛ luri tim ni, amaa nandigi wa fun koti a tiibi un.

⁴⁴ O fun zu zɛmɛ ta ni a la pu Yesu a gbaŋsi o kilaarɛ gantɛl. O funɛ la gbaŋsi o kilaarɛ ti chen, o nin ti fun vaan teŋ.

⁴⁵ Yesu fun a burgi gantɛl a pɛɛsi zɛmɛ ta, “Anti gbaŋsi mu takta nan ni?” Ba maga fun tɔ ka Pita ŋɔ, “Mu kunyana, i waa na zɛmɛ ta la ŋmurgi nan ni ka i pɛɛsi nan nii?”

⁴⁶ Yesu fun ŋɔ un, “Nandigi gbaŋsi min, domi mu kpok ti bar digi li min ni.”

⁴⁷ Haan ti wa fun bu koti a sogli o titi a li zɛmɛ tima ni. Hansura fun a kpak un kinkan. O bara fun a jigiri. O fun wa gbiri o suwachak ni a ŋɔ un chenani o gbaŋsi o takta a vaan na alaafɛ. Zɛmɛ ta maga fun chiŋi a go un a nu chenani o sɛm Yesu ni.

⁴⁸ Yesu fun ŋɔ un, “N be, i si suuli nyɛ i na alaafɛu. Kila dama awa tu sɔɔn ni.”

⁴⁹ Yesu ha funɛ vɛɛn a sɛm, baal digi fun a li ba bar lagmi dɛ nihɛɛ ti dama a wa nihɛɛ ti wati a ŋɔ un, “I be nihabichɛl ti sowu. Ta bu muksi nibiksi ti di o waali.”

⁵⁰ Yesu fun nu chenani ba sɛm chen a ŋɔ nihɛɛ ti, “Ta nyɛ o muksi hin. Nyɛ i si su min ka o zi o sou ni.”

⁵¹ O funɛ la tel nihɛɛ ti dama, o fun nyɛ Pita, Jɔn, Jems awa be ti nyana awa o niina duŋduŋ gbaari un ni a zu.

⁵² Ba naa funɛ nyɛn dam ti ni chen, fun a chɛɛmi a la wi kinkan. Yesu fun ŋɔ ba, “Yɛrɛ ma wi nan? Be ti wa sou. O chɔ dore.”

⁵³ Ba funɛ zimu di be ti sou. Chendaha ba fun a mɔmsi un.

⁵⁴ O fun la zu be ti dɛ chɔɔli ti a kpak o nin a ŋɔ un, “N be nihabichɛla, kisi.”

⁵⁵ Nihabichɛl ti fun vaan si o sou ni. Yesu fun ŋɔ di ba ya diwe a nyɛ un.

⁵⁶ O fun ya o nyana awa o niina alaazibu kinkan. Yesu fun ŋɔ ba kpok ni, “Ma ta nyɛ nandigi zim kinkin naa yɛɛ.”