Luk 7 - Tampulma

Yesu Fun Tiibi Lanjima Nihɛɛ Tumtumna

¹ Yesu funɛ sɛm sɛm ta maga a peti, o fun li dooni a kaali Kapɛrnaum.

² Lanjima nihɛɛ funɛ nyɛn dooni. O tumtum naa o daŋni kinkan, funɛ wi a daŋni siwi.

³ Lanjima nihɛɛ ti funɛ nu di Yesu wa tel tɔhɔn tiu, o fun tum Ju tim nihɛɛti bɔnɛ o wati di ba la ŋɔ un o wa tiibi o tumtumna.

^4-5 Ba fun wa Yesu wati a sumi un nɛnɛ a ŋɔ un, “Lanjima nihɛɛ nɔ daŋni ya walɛu a fun sa ya bar lagmi dɛ a nyɛ ya. Adaha i kpaŋi i titi a wa suŋi un.”

⁶ Doone Yesu fun a tiŋ ba. O funɛ dugli dam tirɛ, o fun chem lanjima nihɛɛ ti chɛnsa nyinbaan ni. Ba fun ŋɔ un, “Ta namsi i titi. Lanjima nihɛɛ ti tum ya di ya wa ŋɔ hin di o wa ya nibin weri naa i zi zu o dama,

⁷ koo o wa i wati o titi. Doonani ya nyɛn nan, i wa sɛm sɛma, o tumtumna na alaafɛu.

⁸ O kpak nihɛɛ zeneu ba naa la zi ŋɔ un chenani o zi tumu. O gbanko kpak lanjimasa ba naa o zi ŋɔ di ba tum tumau. O yaa ŋɔ digi ni di o la. O kaali. O yaa ŋɔ digi ni, kuwa. O wa. O yaa ŋɔ o yom ni, tum nan. O tum chen.”

⁹ Ba sɛm ta fun jɛri Yesu kinkan. O fun burgi a ŋɔ zɛmɛ naa funɛ tiŋ un chen, “Wutirɛ n ŋɔ ma, n funɛ pu Ju tim nidamatau ba naa se su min. Baal naa vɛ ya Ju nan si suuli kaali ma.”

¹⁰ Yesu funɛ sɛm chen, nitumɛ ta fun bur kaali lanjima nihɛɛ ti dam ti a fun la na ka o tumtum ti na alaafɛ.

Yesu Fun Lɛli Luhaan Be A Li O Sou Ni

¹¹ Wuzu naa sakɛɛ, Yesu wa o gantɛl tiŋsi ta awa zɛmɛ kinkan fun li dooni a kaali tɔhɔn naa ba yir Neen.

¹² Ba funɛ la tel tɔhɔn ti bulzɔɔnɔ, nara kinkan fun li tɔhɔn ti ni a chuŋi nibin siwi. Nibaal naa funɛ sou chen, niina funɛ ya luhaannɛ. O funɛ lul nibabichɛl duŋduŋnɛ. O wa zɛmɛ kinkan fun li tɔhɔn ti ni aa la di ba la sogli un.

¹³ Yesu funɛ na luhaan ti, o fun kpak un siki ka o tuha chɔk a gbaari. O fun ŋɔ un, “Ta wiili.”

¹⁴ O fun kaali a la gbaŋsi waga naa ba kpa fɔu un chen. Ba naa funɛ chuŋi un chen toŋ un dau. Yesu fun ŋɔ baal naa sou chen ni, “Bunɔɔn, si.”

¹⁵ Bunɔɔn ti fun vaan si a kani a sɛm sɛma. Yesu fun kpa un a bur la nyɛ o niin ti ni.

¹⁶ Zɛmɛ ta funɛ na chenani Yesu fun tum, hansura fun kpak ba kinkan. Ba funɛ pɛgi Koosa a ŋɔ, “Hin ya witiin zen ti.” Ba gbanko ŋɔ, “I wau di i wa suŋi i nara.”

¹⁷ Laaboor naa Yesu tum wɛ fun li a mɔɔli Judia pulum maga awa tɔsa naa go un.

Jɔn Fun Tum O Gantɛl Tiŋsa Yesu Wati

¹⁸ Jɔn gantɛl tiŋsa fun ŋɔ un chenani maga Yesu fun tum. O fun yir ba nara balɛ,

¹⁹ a tum ba Yesu wati di ba la pɛɛsi un, “Hin ya baal naa ya kunyana fun ŋɔ di i kaa wa chen, akoo yaa nyini nandigi nyinbaan nii?”

²⁰ Ba funɛ wa tel Yesu wati, ba fun ŋɔ un, “Jɔn naa kpa ni a chaksi nara chen, funɛ tum ya di ya wa pɛɛsi hin, ‘Naa hin ya baal naa Koosa fun ŋɔ di i kaa wa chen, akoo yaa nyini nandigi nyinbaan nii?’ ”

²¹ A wuzu ti Yesu funɛ tiibi wichɔɔr damatau a duŋni alizin tagna a li ba bɔnɛ ni a nyɛ nyulum damata se lɛli ba na.

²² Yesu fun ŋɔ ba naa Jɔn tum chen ni, “Ma bur kila gantɛl a la ŋɔ Jɔn ni chenani ma nu a na. Nyuluma bukoora nau, gbarigisa val, ka mu tiibi zaguma gbanko. Diŋgbiti tima gbanko nuu, ka n fun lɛli nara a li ba sou ni. Fara timnɛɛ mu gbanko fun sɛm Koosa laaboor weri ti a nyɛ.

²³ Ba naa vɛ beeli mu wɛ, ba tusa sɔɔnɛu.”

²⁴ Jɔn gantɛl tiŋsi ta funɛ bur a la o wati, Yesu fun burgi a ŋɔ zɛmɛ ta ni Jɔn wɛ. O fun ŋɔ ba, “Ma funɛ li a kaali Jɔn wati nyabaan ni chen, baŋnɛ ma funɛ daŋni ma na? Ma funɛ daŋni ma na bambi bilɛ tiinnɛɛ?

²⁵ Ma funɛ daŋni ma li na baal digi ka o laari kilaarɛ weree? Ba naa la laari kilaarɛ were a chi chen, nyɛn koor damsi nɛɛ.

²⁶ Ma funɛ daŋni ma li na, Koosa witinsi ta digirɛɛ? Mu funɛ ŋɔ mau di ma funɛ na nibine naa kaali Koosa witinsi ta magau.

²⁷ Ba funɛ sɔbi Jɔn wɛu a li Koosa sɛm tɔn ti ni saha digi di Koosa ŋɔ, ‘Mu nitumi nɛɛnɛ. Mu zi te tum unu i suwachak ni o la kɔɔri nyinbaan a nyɛ hin.’

²⁸ Wutirɛ mu sɛm ma, Jɔn kaali nara maga ba naa funɛ nyɛn o piili ti ni. Amaa naa ya gantɛl tiŋna a li Koosa koor ti ni, waa kaali Jɔn.”

²⁹ Nara maga awa lampo nilalɛ, ba naa funɛ nu Yesu sɛmau, ba funɛ piin na ba galimsau a li Koosa wati a nyɛ Jɔn chaksi ba wa ni ni.

³⁰ Amaa Farisi tim ta awa Koosa chiksɛ nibiksɛ ta ka funɛ vɛu di ba wa zi nu Koosa nɔ a nyɛ Jɔn chaksi ba.

³¹ Yesu fun bu ŋɔ ba, “Mu daŋni n ŋɔ ma chenani zinan nara du.

³² Ba chi bichɛsa ba naa lagmi a kani yau ni a yir ba dɔŋtima a ŋɔ ba, ‘Ya funɛ mo guro a du ma, amaa ma ka wa funɛ gɔ. Ya funɛ lɔ zɛɛm boolau, amaa ma tusa ka wa fun chɔk.’

³³ Jɔn naa funɛ chaksi nara wa ni ni chen, funɛ wa a vɔu o nɔ, nara maga fun ŋɔ di alizin tagin kanɛ o nyuhu ni.

³⁴ N waa min nibine be funɛ wa a vɛ vɔu n nɔ, nara maga fun ŋɔ di, ‘Ma nyini baal nɔ. O ya pumpo tiinnɛ a la nyɔ sin kinkan. O ya lampo nilalɛ chɛnnɛ awa ba naa la tum tum tagna gbankore.’

³⁵ Koosa biksi nara o wuti nyinbaan a naa kurgɛu.”

Yesu Fun La Di Diwe Farisi Tim Dam Ni

³⁶ Wuzu digi Farisi tim ta nidigi fun ŋɔ Yesu ni di o wa o dama o wa un di diwe. Yesu fun kaali a la lagmi un ni ba di.

³⁷ Haan digi funɛ nyɛn tɔhɔn ti ni a ya tum tagna tiina. O funɛ nu di Yesu wa Farisi tim ta nidigi la di diwe, o fun zer nu naa sɔɔra weree ka o nyɛn luluk ni a la zu dam ti.

³⁸ O fun wa gbiri Yesu chakpal ni. O fun a wi ka o sini chesi a pɔr Yesu naŋgere. O fun kpa o nyuk ziŋɛ a fiisi a a hul. O fun mɔksi a a biti nu naa sɔɔra weree a du o naŋgere ta ni.

³⁹ Farisi tim ta baal naa funɛ yir Yesu di o wa ba di diwe chen, funɛ na chenani nihaan ti tum, o fun lisi o bambi ni, “Baal nɔ sir ya Koosa witinsa ta digirɛ, o fu zi zim di haan naa la gbaŋsi un nan, ya tum tagna nitumirɛ.”

⁴⁰ Yesu fun ŋɔ un, “Simɔn, n daŋni n ŋɔ hin wu digirɛ.” O fun ŋɔ, “Mu kunyana, ŋɔ min.”

⁴¹ Yesu fun bukoo a ŋɔ un, “Nara balɛ funɛ nyɛn dooni. Ba fun wa pɛŋ malɛ a li malɛ tiin wati. Digi funɛ pɛŋ sidi tusugsa nyuunwa, digi ka pɛŋ sidi tusuga.

⁴² Nara balɛ ta maga wa fun koti a bɔ un malɛ ta, adaha malɛ tiin ti fun gil malɛ ta a nyɛ ba. Nara balɛ ta tuhu ni, anti funɛ daŋni un kinkan?”

⁴³ Simɔn fun ŋɔ un, “Naa funɛ pɛŋ sidi tusugsa nyuun ka malɛ tiin ti fun gil a nyɛ un chen.” Yesu fun ŋɔ un, “I sɛm wutirɛ.

⁴⁴ Kina haan nɔ nyɛn bar nɔ. N funɛ wa zu i dam ti, i wa fun kpa ni a nyɛ min di n sɛm n naŋgere, amaa waa ka funɛ kpa o sini a sɛm mu naŋgere ta a fiisi a a hul awa o nyuk ziŋɛ ta ni.

⁴⁵ N funɛ wa zu i dam ti, i wa fun zaami min wa mɔksi ni, amaa o waa ka wa fun gil mu naŋgere ta mɔksi.

⁴⁶ I wa fun biti nu a du n nyuhu ni di i nyɛ min jirima, amaa o ka wa tɔ mu naŋgere ta maga wa nu naa sɔɔra were ni.

⁴⁷ N ŋɔ hinu di mu gil o tum tagna a nyɛ un. Chendaha o biksi di o daŋni minu kinkan. Ba naa la tum tum tagna tama ka n gil nyɛ ba, ba gbanko daŋni min tamnɛ.”

⁴⁸ Doone Yesu fun burgi a sɛm haan ti ni, “N gil i wu tagnau a nyɛ hin.”

⁴⁹ Ba naa maga awa Simɔn wa Yesu funɛ kani a di diwe chene, ba fun ŋɔ dɔŋ ni, “Anti ya baal nɔ o koti a gil nara wu tagna a nyɛ ba nan?”

⁵⁰ Amaa Yesu funɛ ŋɔ haan ti niu, “Kila dama. I si suuli nyɛ mu gil i tum tagna a nyɛ hin.”