Luk 6 - Tampulma

Chenani Yesu Fun Tum Ju Tim Hiisi Wuzu

¹ Hiisi wuzu digi Yesu wa o gantɛl tiŋsi ta fun la zu kiparɛ tuha aa la. Ba funɛ la chene, lɔsa fun kpak o gantɛl tiŋsi ta ba pini kiparɛ ta a se.

² Farisi tim ta bɔnɛ funɛ na chenani ba tum, ba fun ŋɔ Yesu ni, “Yɛrɛ i gantɛl tiŋsi ta chɔk ya chiili wuzu hiisi?”

³ Yesu fun burgi a pɛɛsi ba, “Ma yaa karimi koor Devid wɛ a li Koosa sɛm tɔn ti ni chen, ma wa zim o munn?

⁴ Wuzu digi lɔsa funɛ kpak Devid awa o dɔŋtima, o fun kaali a la zu Koosa bar jɛɛmi dam ti a la zer boroboro a chɔk a se a kpa nyɛ o dɔŋtim ta ni ba gbanko fun se. Nan boroboro nɔ funɛ chi wa seeliu, see Koosa dam kɔkɔɔrsi ta duŋduŋ funɛ se.”

⁵ Yesu fun bu ŋɔ ba, “Mu waa nibine be dɔ hiisi wuzu ti gbanko.”

Yesu Fun Tiibi Baal Naa Nin Siwɛɛ

⁶ Hiisi wuzu digi funɛ bu wa tel, Yesu fun la zu ba bar lagmi dɛ di o biksi nara. Baal digi funɛ nyɛn doon. O nin fun sou.

⁷ Farisi tim ta awa Koosa chiksɛ nibiksɛ ta bɔnɛ funɛ nyɛn dooni a nyini Yesu di ba na o zi tiibi baal ti hiisi wuzu tiu koo o wa zi tiibi. Ba funɛ nyiniu di ba na Yesu galimsa a koti a fiksi un.

⁸ Yesu funɛ zim chenani ba lisiu a ŋɔ baal naa nin funɛ sou chen, “Si a wa,”

⁹ a ŋɔ nara tima ni, “Ma zim Koosa chiu. Hiisi wuzu ti ma ya chi di ma ya wu werewa a nyɛ nara ni, akoo ma ya chi di ma ya wu tagniwa a nyɛ nara nii? Ma nyɛ nara miisa koo ma kpu nara, o leemawa maa chi?”

¹⁰ Yesu fun nyini a go a ŋɔ baal ti ni di o tuuni o nin ti. O fun tuuni o nin ti. O nin ti fun vaan peti.

¹¹ Farisi tim ta awa Koosa chiksɛ nibiksɛ ta, ba paan fun si ba ni kinkan. Ba funɛ na dɔŋa chenani ba zi ya Yesu.

Yesu Fun Lisi O Nitumɛ Nara Fidalɛ

¹² Yesu fun li dooni a kaali kuŋkule nyuha a sumi Koosa dusum maga.

¹³ Chɔɔsa funɛ wa pisi, o fun yir o gantɛl tiŋsi ta ba wa o wati. O fun lisi ba nara fidalɛ ba tuhu ni a vɔti ba o nitumɛ.

¹⁴ Ba naa o fun lisi chen sɔna funɛ ya Simɔn (Yesu fun du un sɔn fali Pita), awa o niinbe Andiru, Jems, Jɔn, Filip, Bartɔlɔmi,

¹⁵ Matiu, Tɔmas, Jems, Alfius be, awa Simɔn naa o pulum wa fun nyɛn o bambi ni,

¹⁶ Judas, Jems be, awa Judas Iskariɔt naa funɛ li Yesu gantɛl chen.

Yesu Funɛ Biksi A La Tiibi Wichɔɔrsa

¹⁷ Yesu wa o gantɛl tiŋsi ta fun li kuŋkule nyuhu ti a wa tu. Ba naa funɛ nyɛn o wati dooni funɛ iiu kinkan. Ba funɛ la tel tɛɛnɛ doonani mak dɔŋa, ba fun chem zɛmɛ kinkan a li Jɛrusalɛm awa Judia pulum maga ni awa tɔsi naa ba yir Taaya awa Saidɔn a naa funɛ nyɛn teku nɔ ni.

¹⁸ Ba maga funɛ lagmi doon niu di ba nu o sɛma ka o tiibi ba wichɔɔrsa. Ba naa alizin tagna fun nyɛn ba nyuuni ni aa muksi ba, ba gbanko funɛ wau. Yesu fun tiibi ba maga.

¹⁹ Koosa kpok ti funɛ nyɛn un ni o kpa tiibi ba. Chendaha nara tima maga funɛ kpaŋi ba titiu di ba gbaŋsi un.

Tu Sɔɔna Awa Tu Chɔka

²⁰ Yesu funɛ tiibi wichɔɔrsi ta peti, o funɛ burgi a ŋɔ o gantɛl tiŋsi ta ni, “Ma naa zimɛɛ di ma daŋni Koosa suŋi ma, o zi wa dɔ mau a nyɛ ma tu sɔɔna.

²¹ Ma naa la daŋni kinkan di ma tiŋ Koosa tutɔ, o zi nyɛ ma tu sɔɔna lalaknɔ. Wuzu digi ma zi wa koti a tiŋ un hali a wa peti. Ma naa tusa chɔkɛɛ ma tum tagna daha, Koosa zi nyɛ ma tusa sɔɔniu lalaknɔ. Wuzu digi ma tusa zi wa sɔɔniu a la gali.

²² “Nara ha ma a vɛ ma a pini ma zoma a ŋɔ di ma ya tum tagna timawa domi maa tiŋ n waa nibine be daha, ma tusa zi sɔɔniu.

²³ Koosa funɛ kpa o papaha zenu a chiŋsi o tɔha ni di o nyɛ ma. Chendaha ma nyɛ ma tusa sɔɔni kinkan a la gali. Chene Ju tim nawaalsa funɛ muksi Koosa witinsa, ba naa funɛ nyɛn saha digi, kinkan.

²⁴ Yɛrɛ o kaa wa du ma naa vɛ daŋni Koosa suŋi ma lalaknɔ. O wa zi koti a wa dɔ ma.

²⁵ Yɛrɛ o kaa wa du ma naa tiŋ ma tutɔ daŋnɛ lalaknɔ. Ma nisa kin naa ma kpa ma bambe a tiŋ, a zi wa petiu wuzu digi. Yesu o kaa wa du ma naa tusa sɔɔnɛ ni lalaknɔ. Ma tusa zi wa chɔku ka ma wi.

²⁶ “Nara maga yaa nyɛ ma sɔn weriu saha maga, yɛrɛ o kaa wa du ma ni. Ju tim nawaalsa yaa nyɛ witinsa ba naa vɛ zim Koosa sɔn were saha maga.”

Chenani Ya Zi Daŋni Ya Dɔma

²⁷ “Maa nu mu sɛm na nɛnɛ. Maa daŋni ma dɔma. Maa tum tum were a nyɛ ba naa ha ma ni.

²⁸ Ma sumi Koosa di ba naa ŋɔ nɔɔsa a nyɛ ma na alaafɛ a sumi un a nyɛ ba naa la namsi ma.

²⁹ Nandigi mo ma nindil lɛha, ma nyɛ o mo ma ningal lɛha gbanko. Nar zer i takta wewe, ma nyɛ un ma takta zenzen a gbaari.

³⁰ Nandigi sumi ma kundɔŋ, ma nyɛ un. Nandigi zer ma kin, ma ta nyɛ o kpa bur waali.

³¹ Ma tum wu were a nyɛ ma dɔŋtim ni a chi chenani maa daŋni ba tum kinyɛ ma.

³² “Ma daŋni ba naa la daŋni ma duŋduŋ, chen zi ya Koosa wa lɛmlɛmuu? Hali ba naa la tum tum tagna gbanko daŋni chene.

³³ Ma tum tum were a nyɛ ba naa tum tum were a nyɛ ma, chen zi ya Koosa wa lɛmlɛmuu? Hali ba naa la tum tum tagna gbanko tum chene.

³⁴ Ma kpa ma kina a pɛŋ ba nawara ma zim di ba zi kpa bur wau, chen zi ya Koosa wa lɛmlɛmuu? Hali ba naa la tum tum tagna, gbanko tum chene.

³⁵ Ma ta tiŋi a chi ba. Maa daŋni ma dɔma aa tum tum were a nyɛ ba. Ma kpa ma kina a pɛŋ ba, a ta lisi di ba zi kpa bur wau. Ma ya chen, Koosa naa zenee, zi nyɛ ma burgi o titi bisau a kpa o papaha zen a nyɛ ma. Oo suŋi ba naa vɛ zaami un awa ba naa la tum tum tagna. Maa tiŋ a chi un.

³⁶ Waa la ɔm nara maga siki. Chendaha ma gbanko kiɔm nara maga wa siki.”

Ma Ta Na Ma Dɔŋtima Galimsa

³⁷ “Ma ta na ma dɔŋtima galimsa, chen ni Koosa gbanko wa zi na ma galimsa. Maa gil ma dɔŋtima tum tagna a nyɛ ba, Koosa gbanko zi gil ma tum tagna a nyɛ ma.

³⁸ Maa nyɛ ma dɔŋtima kina nawara ba daŋni, chen ni Koosa zi nyɛ ma gbanko kina nawara ma daŋniu. Koosa kpa o kina a nyɛ ma, o wara nyɛ ma kilok. O ka ya nyɛ mau a su hali a la gali. O zi tiŋ chen nyinbaanu a chi chenani maa tiŋ ma dɔŋtima chen.”

³⁹ Doone Yesu fun jɛɛgi jɛɛgi a ŋɔ ba, “O bɔmu di nyuluma lɛ lɛrgi dɔŋa. Ba ya chen, ba maga zi chel bɔ niu.

⁴⁰ Nibuksi wa to aa la zi zim kaali o nibiksi. O wa buksi peti, o nyɛ o tuha sɔɔni ka ba mak dɔŋa.

⁴¹ “O chi danugil nyɛn ma dɔŋtiin se ni ka dagume nyɛn ma se ni. Yɛrɛ ma kaa ya a na danugil ti ma dɔŋtiin ti si ni?

⁴² Yɛrɛ ma ya a ŋɔ ma dɔŋtiin ni, ‘Nyɛ ya lisi danugil ti a ta i si ni ka ma kpak dagume a li ma se ni?’ Ma mur ma titirɛ. Ma te a lisi dagume ti a ta ma se ni, a zi koti a na a lisi danugil ti a ta ma dɔŋtiin si ni.”

Bugil Nɔni Awa Naa Vɛ Nɔni Wɛ

⁴³ “Bugil weri wa kinɔn nɔn tagna. Bugil tagin wa kinɔn nɔn were.

⁴⁴ Bugil nɔn nɛɛ, ma ya kpa a zim bugil ti. Koom bugil wara nɔn soom nɔɔna. Kpaglim bugil wara nɔn maŋgo nɔna.

⁴⁵ Nibine bambi chi o kina bar chiŋsirɛ. Kiwere nyɛn dooni, o zi kpa a li sɛmu. Nibine sɛm a li chenani o bambi du nɛɛ.”

Nara Balɛ Sa Ba Damsa

⁴⁶ “Yɛrɛ maa yir min ‘ma kunyana’ a vɛ tum chenani mu ŋɔ ma?

⁴⁷ Nara maga nu mu sɛm na aa tiŋ a, n zi biksi ma chenani ba bambe duu.

⁴⁸ Ba chi nibine naa funɛ hur o dam sɛchik a li gbɛntɛl nyuhu ni a sa zɔŋ. Wuzu digi pula fun su a pal a la mo dam ti. Amaa o wa fun chel, domi o sɛchik ti funɛ kpoku.

⁴⁹ Nara maga nu mu sɛm na aa vɛ tiŋ a, ba waa chi nibine naa vɛ hur o dam sɛchik bar saali. Wuzu digi pul ta fun su a pal a la mo dam ti. O fun vaan chel. Baŋ namsirɛ dam ti tiin namsi ka o chel nan.”