Luk 4 - Tampulma

Sintana Fun Zaamsi Yesu

¹ Yesu funɛ li Jɔɔdan mɔɔga ti ni, Koosa siim weri ti fun si un ni a kpa un kaali kɔha.

² Sintana fun zaamsi un dooni wuzu fumnaasi ka o vɛ di kundɔŋ. Wuzu fumnaasi ti gantɛl nɛɛ, lɔsa fun kpak un kinkan.

³ Sintana fun wa zaamsi un a ŋɔ, “I sir ya Koosa be, nyɛ buŋkul na burgi diwe i di.”

⁴ Amaa Yesu wa fun la nɔɔni a ŋɔ un, “Ba funɛ sɔbiu a li Koosa sɛm tɔn ti ni saha digi a ŋɔ, ‘Nibinsa wa kise boroboro duŋduŋ a nyɛn.’ ”

⁵ Ba fun li dooni, ka sintan ti fun kpa Yesu a zini bi ziŋziŋi nyuha a biksi un tɛɛnɛ nɔ maga koorsa awa a jirima kinkan.

⁶ Sintan ti fun ŋɔ un, “A maga jirima nyɛn mu nin ni. Mu kpak kpok a la zi kpa kin naa maga a nyɛ naa mu lisi ni.

⁷ I gbiree a jɛɛmi min, n zi nyɛ i wa dɔ a magau.”

⁸ Yesu fun ŋɔ un, “Ba funɛ sɔbiu a li Koosa sɛm tɔn ti ni a ŋɔ, ‘Kijɛɛmi i kunyan Koosa a tum aa nyɛ o duŋduŋ ni.’ ”

⁹ Ba fun bu li dooni ka sintan ti fun kpa Yesu a la zɔŋ Koosa bar jɛɛmi dam ti mampil nyuhu ni a li Jɛrusalɛm ni a ŋɔ un, “I sir ya Koosa be, li mampil nɔ nyuhu ni a chel tɛɛnɛ ni.

¹⁰ I zimu di ba funɛ sɔbiu a li Koosa sɛm tɔn ti ni a ŋɔ, ‘Koosa zi ŋɔ o malaikasi ta niu di a nyini hin.’

¹¹ Ba gbanko funɛ sɔbiu a ŋɔ, ‘A zi kpa a nisau a chak hin, chen ni i chiksi tɛɛnɛ ni, i naŋgere wa zi huusi.’ ”

¹² Yesu fun ŋɔ un, “Ba gbanko funɛ sɔbiu a li Koosa sɛm tɔn ti ni a ŋɔ, ‘O wa lawa i zaamsi i kunyan Koosa.’ ”

¹³ Sintan ti fun zaamsi Yesu hali o wa peti, o fun kaali a ya tama.

Yesu Fun Piili A Biksi Nara

¹⁴ Yesu fun li dooni a bur kaali Galili pulum. O bur waali laaboora fun mɔɔli tɔsi naa nyɛn doon maga ni. Koosa siim weri ti kpok funɛ nyɛn un ni.

¹⁵ O fun la zu ba bar lagmi dɛɛna aa biksi ba Koosa wɛ. Nara maga yaa fun a nyɛ un jirima.

Chenani Nazarɛt Tima Fun Vɛ Yesu

¹⁶ Wuzu digirɛ Yesu fun kaali o tɔha Nazarɛt. Ju tima hiisi wuzu funɛ wa tel, o fun la zu ba bar lagmi dɛ a chiŋi a karimi Koosa sɛm tɔn.

¹⁷ Nara tima nidigi fun puk tɔn naa Koosa witiina Aizaya fun sɔbi chen bar digi a nyɛ Yesu ni. O fun karimi a ŋɔ,

¹⁸ “Ya kunyan Koosa siim weri ti nyɛn min ni. Waa funɛ lisi min di mu biksi Koosa laaboor weri ti a nyɛ ba naa la nɔɔni di Koosa suŋi ba. Waa funɛ tum min di n wa yisi nara a li ba tum tagna awa ba namsi kinkan ni a lɛli nyuluma se.

¹⁹ O gbanko funɛ tum min di n wa mɔɔli nara saha naa Koosa tuha sɔɔni di o suŋi o nara telu.”

²⁰ Yesu funɛ karimi peti, o fun tɔ tɔn ti a kpa un bur nyɛ a kani. Ba naa maga funɛ nyɛn ba bar lagmi dɛ ti ni se fun tɛ un ni.

²¹ O fun bukoo ŋɔ ba, “Sɛm naa n karimi a nyɛ ma zinan nan, min nyɛ a ya wuti.”

²² Yesu sɛm were fun ya ba lɛmlɛm ka alaazibu fun kpak ba kinkan. Ba bɔnɛ ka fun ŋɔ dɔŋ ni, “Baal nɔ, o wa ya Josɛf beree?”

²³ O fun ŋɔ ba, “Ma zi ŋɔ min ma jɛɛgɛu naa ŋɔɛɛ, ‘Lure tiina tiibi i titi.’ Ma gbanko zi ŋɔ minu di n tum alaazibu tuma bar nɔ a chi chenani mu funɛ tum a li Kapɛrnaum ni.

²⁴ Ma nyɛ mu ŋɔ ma di Koosa witiina tɔhɔn walɛ wara zaami un.

²⁵ Maa nu mu wati nɛnɛ. Saha naa Koosa witiina Ɛlaija fun nyɛn saha digi chen, doon wa funɛ mi bunsa tora awa pɛnsa nɔra. Lɔsa fun chel pulum ti ni kinkan. Chen saha ti luhaan damata funɛ nyɛn Ju tim pulum ni.

²⁶ Amaa Koosa wa fun tum Ɛlaija di o la suŋi hali Ju tim ta luhaan digi. O ka funɛ tum un di o la suŋi luhaan naa nyɛn tɔhɔn naa ba zir Zarɛfat. I funɛ nyɛn Saidɔn pulum nɛɛ.

²⁷ Saha naa Koosa witiina naa ba yir Ɛlisa fun nyɛn saha digi chen, zagum damata funɛ nyɛn Ju tim pulum ni. Amaa Koosa wa fun tum un di o la tiibi hali Ju tim ta zagum digi. O ka funɛ tum un di o la tiibi zagum naa ba funɛ yir Nɛɛman. O funɛ nyɛn Siiriya pulum nɛɛ.”

²⁸ Ba naa funɛ nyɛn ba bar lagmi dɛ ti ni nu Yesu sɛma, ba fun na paan kinkan a du un ni.

²⁹ Ba fun si lalaga a kpak un a lɛrgi un li tɔhɔn naa funɛ zɔŋ kuŋkule nyuhu ni. Ba wa un funɛ la tel bar wilsi, ba daŋni ba kpa un a yo du.

³⁰ Amaa Yesu funɛ na o titiu a val zɛmɛ ta bambaan ni a kaali.

Yesu Fun Duŋni Alizin Tagin A Li Baal Digi Ni

³¹ Yesu funɛ kaali Kapɛrnaum a li Galili pulum ni. Ba hiisi wuzu ti funɛ wa tel, o fun la zu ba bar lagmi dɛ a biksi nara Koosa wɛ.

³² Ba naa funɛ nu o biksi ti chen, o ya ba alaazibu. O sɛm ta fun kpak kpok kinkan.

³³ Doone baal naa alizin tagin fun kani o nyuhu ni chen digi fun wa ba bar lagmi dɛ ti a tɛsi kinkan a ŋɔ,

³⁴ “Hee, Yesu Nazarɛt nar, baŋnɛ ii daŋni ya wati? I wa bar nɔ di i wa chɔk yaa? Min zim di i ya tu chaan tiina. I ya Koosa bere.”

³⁵ Yesu fun ŋɔ alizin tagin ti ni, “Gil chɛɛma a kili baal ti ni.” Alizin tagin ti fun zer baal ti a lɔ ba suwachak ni a li un ni a vɛ huusi un.

³⁶ Nibinsa ba naa funɛ nyɛn dooni chen, o ya ba alaazibu kinkan. Ba fun ŋɔ dɔŋ ni, “Baŋ biksi fali nɛɛnɛ? Ma wa na chenani o kpak kpok di o koti a ŋɔ alizin tagna di a li nara ni a laa?”

³⁷ Ba naa maga funɛ nyɛn doon pulum ti ni fun nu chenani o tum.

Yesu Fun Tiibi Nidamata

³⁸ Yesu fun si a li ba bar lagmi dɛ ti ni a la zu baal naa ba yir Simɔn dama. O hila funɛ wi. Kabilima funɛ kpak un ka o fun chɔ dam ti ni. Saha naa Yesu fun la tel doon chen, ba ŋɔ un haan ti wɛ.

³⁹ Yesu fun zu o dɛ ti a ŋɔ un, “N daŋni i na alaafɛu.” O funɛ ŋɔ chen, o kabilima ti peti. O fun vaan si a piili a ya diwe di o nyɛ ba.

⁴⁰ Nha funɛ chel chen, ba naa wichɔɔrta funɛ kurgi, ba walɛ fun kpa ba a wa Yesu wati. O fun kpa o nisa a saksi ba maga ni a tiibi ba.

⁴¹ Yesu funɛ duŋni alizin tagni ta a li nara ta ni. A fun a tɛsi a ŋɔ, “I ya Koosa bere.” A funɛ zimu di waa ya Kristo naa Koosa fun ŋɔ di o zi wa tumu wuzu digi. Yesu fun ŋɔ a di a gil chɛɛma.

Yesu Fun Biksi Judia Tima Koosa Wɛ.

⁴² Chɔɔsa funɛ wa pisi, Yesu fun si a li tɔhɔn ti ni a kaali bar digi o duŋduŋ. Nara tima funɛ nyini di o wa to, ba fun li dɛu un. Ba funɛ na un, ba fun a sumi un di o ta li ba tɔhɔn ti ni.

⁴³ Yesu fun ŋɔ ba, “O lawa mu si a la suwachak tɔ wisa a naa kaɛɛ, chen ni n zi la ŋɔ ba Koosa wɛu ba nu. Chendaha n fun wa.”

⁴⁴ O fun si a gba aa go Judia pulum a la biksi nara Koosa wɛ a li ba bar lagmi dɛɛni ni.