Luk 3 - Tampulma

Jɔn Fun Mɔɔli Nyabaan Ni

¹ Jɔn naa funɛ ya Zɛkaraya be, funɛ la zu nyabaan di o biksi nara Koosa wɛ, kaŋkoor zen naa ba funɛ yir Tibɛrias, funɛ kani o kor ni bun fidanyuunwa. Baal naa funɛ dɔ Galili pulum, chen sɔn funɛ ya Hɛrɔd. O niinbe, naa ba funɛ yir Filip chen, ka fun dɔ Ituria pulum awa Trakɔnaitis pulum. Baal naa funɛ dɔ Abilini pulum, chen sɔn funɛ ya Lisanias.

² Koosa dam kɔkɔɔrsa nihɛɛta nara balɛ, ba naa funɛ nyɛn Jɛrusalɛm ni, chen sɔna funɛ ya Anas awa Kaifas. Chen saha ti, Koosa fun tum Jɔn nyabaan ti ni di o la biksi nara o wɛ.

³ Jɔn fun gba a go nyabaan naa duglɛ mɔɔga naa ba funɛ yir Jɔɔdan chen jibaŋa. O funɛ biksi nara a ŋɔ ba, “Ma bur a li ma tum tagna ni, chen ni mu zi kotiu a chaksi ma wa ni ni. Ma ya chen, Koosa zi gil ma tum tagni tau a nyɛ ma.

⁴ Koosa witiin naa ba funɛ yir Azaaya fun sɔbi a li Koosa sɛm tɔn ti ni saha digi a ŋɔ, ‘Nandigi la tɛsi nyabaan ti ni a ŋɔ, ya kunyana wau. Maa saksi ka o zi wa. Maa kɔɔri o nyinbaan o deŋli.

⁵ Maa su bar nɛŋɛ awa hɛɛra ni a teŋ nyinbaan a burigi kuŋkulsa nyuuna a mak dɔŋa. Ba naa vɛ zim Koosa nyinbaan deŋli, nyɛ ba bur a tiŋ un. Ba naa tiŋ ba tutɔ daŋnɛ, nyɛ ba bur a tiŋ o tutɔ.

⁶ Ba naa maga tum chen, Koosa zi gil ba tum tagnau a nyɛ ba.’ ”

⁷ Zɛmɛ kinkan fun wa Jɔn wati di o chaksi ba wa ni ni. O fun ŋɔ ba, “Ma naa chi duma. Anti ŋɔ ma di Koosa na paan a du ma naa yaa tum tum tagna ni a la zi wa lɛrgi ma diŋsa ka ma chɔ?

⁸ Ma gil ma tum tagna a ka la tum tum were a biksi nara chenani ma bambe burgi. Ma ta lisi di chenani ma ya Abraham bi lulɛ, chen zi chiŋi ma tum were bar chiŋi niu. Ma nyɛ mu ŋɔ ma di Koosa koti a kpa buŋkul nama a burgi Abraham bi lulɛ.

⁹ Ma chi bugila naa vɛ nɔnirɛ. Koosa piin zer o saan zenu a teŋsi ma a du din ni.”

¹⁰ Ba naa funɛ nu chen nidigi fun pɛɛsi un, “Yɛrɛ i daŋni ya tum?”

¹¹ O fun ŋɔ un, “Nara maga kpak taktasa lɛ, o lawa ba yisi digiu a nyɛ naa vɛ kpaki ni. Nara maga kpak diwe, o lawa ba purigi a nyɛ naa vɛ kpaki ni.”

¹² Lampo nilalɛ bɔnɛ fun wa di Jɔn chaksi ba wa ni ni. Ba fun pɛɛsi un, “Ya kunyana, yɛrɛ i daŋni ya tum?”

¹³ O fun ŋɔ ba, “Ma ta la lampo ti a kaali chenani ma zi la.”

¹⁴ Lanjimasa bɔnɛ ka fun wa pɛɛsi un, “Yɛrɛ ya gbanko kaa tum?” O fun ŋɔ ba, “Ma ta kpak kpok a la nara malɛ a kisuni ba nɔɔni ni. Ma nyɛ ma tusa sɔɔni awa ma bɔta ni.”

¹⁵ Zɛmɛ ta funɛ lisi ba bambe niu a gbaari di Jɔn funɛ ya Kristo naa Koosa fun ŋɔ di o zi tumu.

¹⁶ Jɔn funɛ zim chenani ba lisiu a ŋɔ ba, “N kpa ni a chaksi ma bara. Naa nyɛn n gantɛl ni aa wa, o ka zi wa kpa Koosa siim weri tiu a du ma ni a chaksi ma a chi din zaamsi salma. Waa ya nihɛɛ a kaali min. N purɛu di mu ur a natausa a nyɛ un.

¹⁷ O zi kpak o tundau di o tuk o mɛ a kpa a a du o zuŋkɔr ni. O ka zi kpa munzɔtau a du din naa nara vɛ koti a dusi ni.”

¹⁸ Jɔn funɛ kpa nyinbaan damatarɛ a biksi Koosa laaboor weri ti a nyɛ nara ni.

¹⁹ Koor Hɛrɔd fun kpa o niinbe haan naa ba yir Hɛrɔdias, a la tum tum tagna kinkan. Chendaha Jɔn fun a galimi un.

²⁰ Wuzu digirɛ Hɛrɔd fun kpak Jɔn a la tɔ un dɛ o funɛ zulimi un daha.

Jɔn Fun Chaksi Yesu Wa Ni Ni

²¹ Nan gantɛl nɛɛ, Yesu fun wa Jɔn wati di o chaksi un wa ni ni. O funɛ sumi Koosa chene, o fun vaan na buudaha ka o puk,

²² ka o na Koosa siim weri ti. O funɛ chi komne a tu wa a zɔŋ un ni. Ba fun nu ta a li buudaha ni ka o ŋɔ, “Mu be daŋni nɛɛnɛ. Mu si su nara chen.”

Yesu Kristo Nawaalsa Sɛmi

²³ Yesu funɛ wa dugli bun fumtora, o fun piili a gba a biksi nara. Nara fun sɛm di o ya Josɛf bere. Josɛf nyana sɔn funɛ ya Hɛli.

²⁴ Hɛli nyana funɛ ya Matat. Matat nyana funɛ ya Livai. Livai nyana funɛ ya Mɛlki. Mɛlki nyana funɛ ya Janai. Janai nyana funɛ ya Josɛf.

²⁵ Josɛf nyana funɛ ya Matatayas. Matatayas nyana funɛ ya Amos. Amos nyana funɛ ya Nahum. Nahum nyana funɛ ya Ɛsli. Ɛsli nyana funɛ ya Nagai.

²⁶ Nagai nyana funɛ ya Mat. Mat nyana funɛ ya Matatayas. Matatayas nyana funɛ ya Sɛmɛin. Sɛmɛin nyana funɛ ya Josɛk. Josɛk nyana funɛ ya Jɔda.

²⁷ Jɔda nyana funɛ ya Jɔanan. Jɔanan nyana funɛ ya Rɛsa. Rɛsa nyana funɛ ya Zɛrubabɛl. Zɛrubabɛl nyana funɛ ya Sialtiɛl. Sialtiɛl nyana funɛ ya Nɛri.

²⁸ Nɛri nyana funɛ ya Mɛlki. Mɛlki nyana funɛ ya Adi. Adi nyana funɛ ya Kɔsam. Kɔsam nyana funɛ ya Elmadam. Elmadam nyana funɛ ya Er.

²⁹ Er nyana funɛ ya Jɔsua. Jɔsua nyana funɛ ya Elieza. Elieza nyana funɛ ya Jɔrim. Jɔrim nyana funɛ ya Matat. Matat nyana funɛ ya Livai.

³⁰ Livai nyana funɛ ya Simɛɔn. Simɛɔn nyana funɛ ya Juda. Juda nyana funɛ ya Josɛf. Josɛf nyana funɛ ya Jɔnam. Jɔnam nyana funɛ ya Ilayakim.

³¹ Ilayakim nyana funɛ ya Mɛlɛa. Mɛlɛa nyana funɛ ya Mɛna. Mɛna nyana funɛ ya Matata. Matata nyana funɛ ya Natan. Natan nyana funɛ ya koor Devid.

³² Devid nyana funɛ ya Jɛsɛ. Jɛsɛ nyana funɛ ya Ɔbɛd. Ɔbɛd nyana funɛ ya Bɔaz. Bɔaz nyana funɛ ya Salmɔn. Salmɔn nyana funɛ ya Nasɔn.

³³ Nasɔn nyana funɛ ya Aminadab. Aminadab nyana funɛ ya Admin. Admin nyana funɛ ya Arni. Arni nyana funɛ ya Hɛzrɔn. Hɛzrɔn nyana funɛ ya Pirɛz. Pirɛz nyana funɛ ya Juda.

³⁴ Juda nyana funɛ ya Jakɔb. Jakɔb nyana funɛ ya Aizik. Aizik nyana funɛ ya Abraham. Abraham nyana funɛ ya Tɛra. Tɛra nyana funɛ ya Nahɔr.

³⁵ Nahɔr nyana funɛ ya Sɛrug. Sɛrug nyana funɛ ya Riu. Riu nyana funɛ ya Pɛlɛg. Pɛlɛg nyana funɛ ya Ɛber. Ɛber nyana funɛ ya Sila.

³⁶ Sila nyana funɛ ya Kenan. Kenan nyana funɛ ya Arpaksad. Arpaksad nyana funɛ ya Sɛm. Sɛm nyana funɛ ya Nowa. Nowa nyana funɛ ya Lemɛk.

³⁷ Lemɛk nyana funɛ ya Mɛtusɛla. Mɛtusɛla nyana funɛ ya Ɛnɔk. Ɛnɔk nyana funɛ ya Jarɛd. Jarɛd nyana funɛ ya Mɛhalalɛl. Mɛhalalɛl nyana funɛ ya Kenan.

³⁸ Kenan nyana funɛ ya Inɔs. Inɔs nyana funɛ ya Sɛt. Sɛt nyana funɛ ya Adam. Koosa funɛ te naami Adamnɛ.