Luk 24 - Tampulma

Chenani Yesu Fun Si A Li O Sou Ni

¹ Chɔɔsa funɛ pisi chɔsa, nihaana fun si a zer kin nawara sɔɔra weree chen a kaali Yesu hugil ti.

² Ba funɛ la tel dooni, buŋkul naa ba fun kpa tɔ hugil ti zɔɔnɔ chen, fun bilimsi a ka zɔɔnɔ ti.

³ Ba fun la zu hugil ti a vɛ na Yesu bara.

⁴ Ba fun chiŋi a nyini dɔŋ se ni a la lisi chenani ba zi sɛm. Nara balɛ fun vaan chiŋi a dugli ba a laari gar chaanɛ.

⁵ Hansura fun kpak nihaan tima kinkan ka ba wa gbiri ba suwachak ni. Ba naa laari gar chaanɛ ta chen digi fun ŋɔ ba, “Yɛrɛ ma wa siwɛ bar sogli nɔ a wa dɛu naa kpak miisa?

⁶ Yesu wa bu to bar nɔ. O si o sou niu. Ma lisi chenani ma wa un fun nyɛn Galili ni ka o sɛm ma chen.

⁷ O fun ŋɔ di nara zi wa kpa o wa nibine be a du ba naa la tum tum tagna nisa ni. Ba zi wa kpa unu a la kpaasi a mari daakakli ti ni o sou. Wuzu butora wuzu, Koosa zi wa lɛli unu a li o sou ni.”

⁸ Nihaan tima fun lisi chenani Yesu fun sɛm chen,

⁹ a li hugil ti ni a kaali dama a la ŋɔ o gantɛl tiŋsa nara fi di nibɛgim awa ba naa maga nyɛn dooni chenani yɛɛ.

¹⁰ Ba bɔnɛ sɔna funɛ ya Mɛri Magdala, Joana, awa Mɛri, Jems niina. Ba waa funɛ ŋɔ nitumɛ ta ni chenani ba na.

¹¹ Nitumɛ ta se wa fun su chenani nihaan tima ŋɔ ba chen. Ba funɛ lisiu di ba sɛm ta wa kpak nyuha.

¹² Amaa Pita funɛ siu a chɔ kaali hugil ti a la kugili nyini o tuhu ni a na Yesu gar mɛɛsɛ ta ka a chɔ a duŋduŋ. O fun bur kaali dama a la beeli kinkin naa yɛɛ.

Yesu Gantɛl Tiŋsa Nara Balɛ Fun Bu Chem Un

¹³ A wuzu ti vɛɛna, nara balɛ ba naa funɛ tiŋ Yesu chen, fun li Jɛrusalɛm a la tɔ we naa ba funɛ yir Ɛmɛus. O wa Jɛrusalɛm funɛ ya maalisa nɔpɛwa.

¹⁴ Ba funɛ sɛm dɔŋ ni chenani maga yɛɛ.

¹⁵ Ba funɛ nyɛn nyinbaan ni a la chene, Yesu titi fun gbaari ba ni. O wa ba tiŋ dɔŋa.

¹⁶ Amaa Koosa wa fun nyɛ ba zim un.

¹⁷ Yesu fun pɛɛsi ba, “Yɛrɛ maa val nyinbaan ni a la sɛm nan?” Yesu funɛ sɛm chen, ba chiŋi a dɔri ba se.

¹⁸ Ba nidigi sɔn funɛ ya Klɛɔpas. O fun ŋɔ Yesu ni, “I ya hɔɔrrɛ a vɛ zim kinkin naa la ya bar nɔ wuzu bilɛ na tuhu nii?”

¹⁹ Yesu fun pɛɛsi un, “Baŋa ya?” O fun ŋɔ un, “Kin naa ba ya Yesu Nazarɛt nar. O funɛ ya witiin naa Koosa tum ya watɛɛ. Waa funɛ kpa o kpok a nyɛ o sɛm sɛm kpoka a la tum tum kpoka a nyɛ un. Chendaha nara maga nyɛ un jirima kinkan.

²⁰ Ya Koosa dam kɔkɔɔrsi ta awa ya nihɛɛti ta fun kpa un a la du Pailɔt nin ni di o di o sou sɛria a kpaasi un a mari daakakli ti ni o sou.

²¹ Ya funɛ kpak bambi bɛgimu waa la zi la Ju tim nyuuna a nyɛ ba. Wuzu butora gantɛl nɛɛ, kin nama maga fun ya.

²² Chɔɔsa funɛ wa pisi chɔsa, ya nihaan tima bɔnɛ fun kaali o hugil ti ni,

²³ amaa ba wa fun na o bara. Ba fun bur wa ŋɔ ya di ba la pu Koosa malaikasiwa a fun ŋɔ ba di o si o sou niu.

²⁴ Ya nibaal ta bɔnɛ gbanko fun la hugil ti a vɛ na un. Ba fun zim di chenani nihaan ta sɛm chen, o sir ya wutirɛ.”

²⁵ Yesu fun ŋɔ ba, “Yɛrɛ ma wom mak. Ma sɔɔnɛu wa ma zim Koosa witinsi ta sɛma naa ba fun sɔbi saha digi chen.

²⁶ Ba funɛ ŋɔ di, ‘Naa Koosa fun vɔu di o tum chen, waɛɛ, o zi namsiu a sou a si la zu Koosa tɔhɔn ti.’ O wa deŋli di o ya chenn?”

²⁷ Ba ha funɛ vɛɛn a val nyinbaan ni chene, Yesu fun biksi ba chenani Mosis awa Koosa witinsi ta maga fun sɔbi o wɛ saha digi chen a li Koosa sɛm tɔn ti ni.

²⁸ Ba fun wa dugli tɔ we naa ba la chen ka Yesu funɛ daŋni o ha vɛɛn gali kila.

²⁹ Ba wa funɛ daŋni o waligi ba ni a ŋɔ un, “Dusum daŋni o biriu, adaha nyɛn ya wati.” O fun la nɔɔni ka o wa ba fun la zu tɔ we ti a nyɛn dooni.

³⁰ Ba funɛ lagmi di ba di diwe, Yesu fun zer boroboro a sumi Koosa a du a chɔksi un a bɔni ba.

³¹ O funɛ zer boroboro a sumi Koosa a du a chɔksi a bɔni chene, ba fun vaan a zim un ka o nyuksi.

³² O funɛ kaali chene, ba ŋɔ dɔŋ ni, “Ya wa un funɛ nyɛn nyinbaan ni aa la ka o fun a biksi ya chenani ba sɔbi o wɛ a li Koosa sɛm tɔn ti ni, ya tusa sɔɔni ka yaa dɛɛsi.”

³³ Ba fun si dooni lalaga a bur kaali Jɛrusalɛm. Yesu gantɛl tiŋsa nara fi di nibɛgim awa ba naa tiŋ un chen, fun lagmi a kani dooni,

³⁴ a ŋɔ dɔŋ ni, “Ya kunyana sir siu o sou niu. Simɔn Pita funɛ na unu.”

³⁵ Nara balɛ naa funɛ na Yesu nyinbaan ni chen, fun la tel Jɛrusalɛm. Ba fun ŋɔ ba chenani o biksi ba nyinbaan ni awa chenani o fun zer boroboro a sumi Koosa a du a chɔksi a bɔni ba ka ba zim un.

Yesu Gantɛl Tiŋsa Fun Bu Na Un

³⁶ Nara balɛ ta funɛ sɛm chene, Yesu fun vaan wa chiŋi ba bambaan ni a zaami ba.

³⁷ Hansura fun kpak ba hali a la gali. Ba funɛ baa di Yesu ya lɛlɛrɛ.

³⁸ O fun ŋɔ ba, “Yɛrɛ ma nyɛ hansura kpak ma a la gali? Yɛrɛ maa beeli di o ya minnɛ?

³⁹ Ma nyini mu nisa awa mu naŋgere a zim di minnɛ. Ma gbaŋsi min ma zi zimu ma bambe ni di mu wa ya lɛlɛ. Lɛlɛ wa kpak bara a chi mu bara na.”

⁴⁰ O funɛ sɛm chene, a kpa o nisa awa o naŋgere a biksi ba.

⁴¹ Alaazibu funɛ kpak ba ka ba tusa sɔɔni kinkan a la gali, chen ni ba wa kikoti a nyɛ ba se su di o bur wau. Yesu fun pɛɛsi ba, “Ma kpak diwe nɔ a la zi kpa a nyɛ minuu?”

⁴² Ba fun zer nyin zɔŋi a nyɛ un.

⁴³ O fun se un ba suwachak ni.

⁴⁴ Yesu fun ŋɔ ba, “O deŋlu di kin naa maga Mosis awa Koosa witinsi ta awa ba naa sɔbɛ boola funɛ sɔbi mu wɛwa saha digi a li Koosa sɛm tɔn ti ni, a ya wutirɛ. Ma wa lisi di saha naa mu fun nyɛn ma wati chen, mu fun biksi ma a wɛɛ?”

⁴⁵ Doone o fun puk ba diŋsa di ba zim kinkin naa nyɛn Koosa sɛm tɔn ti ni,

⁴⁶ a ŋɔ ba di ba sɛm di naa Koosa vɔu di o tum chen zi wa namsiu a sou ka Koosa lɛli un a li o sou ni wuzu butora wuzu.

⁴⁷ O fun ŋɔ ba, “Koosa laaboor weri ti biksi nara gil ba tum tagna a bur a tiŋ Koosa, o zi gil ba tum tagnau a nyɛ ba chen tiin sou daha. Ba fun bukoo sɔbi di o lawa o gantɛl tiŋsi ta te biksi laaboor nɔ a li Jɛrusalɛm ni a zi biksi bawu maga ni.

⁴⁸ Ma waa ya mu sou awa mu siili sɛhɛra tima. Ma piili chen tuma.

⁴⁹ Mu kunyana Koosa funɛ vɔu di o zi kpa o kpoku a nyɛ ma. Mu wa waligi ma ni, ma la zu tɔhɔn ti tuha a pɔ. Mu zi nyɛ o kpok ti wa ma watiu.”

Chenani Yesu Fun Si A Bu Ziŋi Koosa Tɔha

⁵⁰ Doone Yesu fun te ba suwachak a kaali a la tel Bɛtani. O fun a zer o nisa buudaha ni a sumi Koosa a du ba ni.

⁵¹ O funɛ sumi Koosa a du ba ni chene, a zini kaali buudaha Koosa wati.

⁵² Ba fun jɛɛmi un dooni a bur li kaali Jɛrusalɛm wa tu sɔɔni kinkan ni.

⁵³ Ba yaa fun la pɛgi Koosau a li o bar jɛɛmi dam ti ni o daha.