Luk 23 - Tampulma

Ba Fun Kpa Yesu A La Nyɛ Pailɔt Ni

¹ Ba maga fun si a kpa Yesu a kaali Pailɔt naa ya gɔbnati nyuhu tiin wati.

² Ba fun fiksi Yesu o suwachak ni a ŋɔ, “Baal nɔ yaa mur ya narawa a ŋɔ ba di ba ta bɔ lampo a nyɛ koorsi ta nyuhu tiina Siiza ni. O titi fun ŋɔ di waa ya koor zen naa ba yir Kristo chen.”

³ Ba funɛ sɛm peti, Pailɔt fun pɛɛsi Yesu, “Hin ya Ju tim koor chenn?” O fun ŋɔ, “Chenani i kut ŋɔ chen.”

⁴ Doone Pailɔt fun burgi a ŋɔ Koosa dam kɔkɔɔrsi ta awa zɛmɛ ba naa tiŋ un a la Pailɔt dama, “Baal nɔ nisa wa to.”

⁵ Ba fun a fiksi un a kaali chenani ba fun te fiksi a ŋɔ un, “Chenani baal nɔ yaa biksi nara tima zi nyɛ ba damu. O fun piili a biksi ba a li Galili pulum ni a la gali Judia pulum ni hali a wa li bar nɔ.”

Ba Fun Kpa Yesu A La Nyɛ Hɛrɔd Ni

⁶ Pailɔt funɛ nu sɛm ta, o fun pɛɛsi ba, “Baal nɔ ya Galili tim baallɛɛ?”

⁷ Ba fun ŋɔ, “O ya Galili tim baallɛ.” Hɛrɔd funɛ ya Galili tim koora a fun gba la Jɛrusalɛm chen saha ti. Pailɔt funɛ nu di Yesu li o pulum nɛ, o fun ŋɔ o lanjimasi ta ni di ba kpa un a la Hɛrɔd wati.

⁸ Ba funɛ kpa Yesu a la tel o dama, Hɛrɔd tuha funɛ sɔɔniu kinkan. O yaa funɛ nyini o nyinbaan niu di o na un, chen ni o zi tum alaazibu tumau o na.

⁹ Hɛrɔd fun pɛɛsi Yesu wu damata, amaa o wa fun ŋɔ wu digi.

¹⁰ Koosa dam kɔkɔɔrsi ta awa Koosa chiksɛ nibiksɛ, ba naa funɛ tiŋ Yesu a la Hɛrɔd dam ti chen, ba fun bukoo fiksi Yesu kinkan.

¹¹ Hɛrɔd awa o lanjimasa fun a mɔmsi Yesu a la pini o zoma a kpa gar weri a laari un. Ba funɛ ya chen peti, ba kpa un a bur kaali Pailɔt wati.

¹² Hɛrɔd awa Pailɔt funɛ ya dɔmwa hali a wuzu ti. A wuzu naa ba fun kpa Yesu a wa Hɛrɔd wati, o wa Pailɔt fun bu ya nɔ bɛgim.

Ju Tima Fun Di Yesu Siwi Sɛria

¹³ Saha tirɛ Pailɔt fun yir Koosa dam kɔkɔɔrsi ta awa tɔhɔn nihɛɛti ta awa zɛmɛ ta ba lagmi o wati.

¹⁴ O fun ŋɔ ba, “Ma funɛ kpa baal nɔu a wa mu wati a fiksi un di o daŋni nara tima damu. Mu zaamsɛ unu ma suwachak ni a zim di o nisa wa to chenani ma fiksi un chen ni.

¹⁵ Hɛrɔd gbanko funɛ sɛmu di o nisa wa to a nyɛ o bur wa mu wati. O wa tum kinkin naa la zi nyɛ o sou.

¹⁶ N zi nyɛ mu lanjimasi ta tuk un wa vurmsi niu a nyɛ o la.” ((

¹⁷ Ba wuzu zen wuzu Pailɔt yaa fun puk dɛ naa ba yaa tɔ nara chen zɔɔnɔ a nyɛ nibɛgim li.))

¹⁸ Zɛmɛ ta funɛ nu chenani Pailɔt sɛm, ba fun tɛsi, “Kpu un. Puk dɛ naa ba tɔ chen zɔɔnɔ a lisi baal naa ba yir Barabas chen, a nyɛ ya.”

¹⁹ Barabas funɛ nyɛ nara tima dam chene ka o kpu baal ti. Chendaha ba fun kpak un a tɔ dɛ.

²⁰ Pailɔt funɛ daŋni o nyɛ Yesure la. O fun bukoo kpaŋi o titi di o ŋɔ zɛmɛ ta ni,

²¹ amaa ba funɛ tɛsiu kinkan a ŋɔ, “Nyɛ ba kpa un a la kpaasi a mari daakakli daha ni o sou.”

²² Chɛɛm ti funɛ sɔɔni, Pailɔt fun ŋɔ zɛmɛ ta ni butora a pɛɛsi ba, “Yɛrɛ? Tum tagna baŋnɛ o tum? Mu zimu di o wa tum kinkin naa la zi nyɛ o sou. N zi nyɛ mu lanjimasi ta tuk un wa vurmsi niu a nyɛ o la.”

²³ Ba funɛ chɛɛmi ta zaŋa a ŋɔ, “Kpaasi un a mari daakakli ti daha ni o sou.” Ba funɛ chɛɛmi chene,

²⁴ hali Pailɔt wa la nɔɔni chenani ba daŋni.

²⁵ O fun lisi naa nyɛ nara tima dam chen a kpu a nyɛ ba, a kpa Yesu a du ba nisa ni.

Ba Fun Kpak Yesu A Kpaasi A Mari Daakakli Ni

²⁶ Zɛmɛ ta awa lanjimasi ta fun kpa Yesu a kaali. Ba funɛ nyɛn nyinbaan ni a la chene, ba fun la chem baal naa ba yir Simɔn a li Sairini pulum ni. O fun li kɔha bar boli aa wa. Ba fun lɛrgi un a nyɛ o zer Yesu daakakli ti a baasi a tiŋ ba kaali.

²⁷ Zɛmɛ kinkan fun tiŋ Yesu gantɛl. Nihaan bɔnɛ funɛ nyɛn zɛmɛ ta ni aa wi kinkan chenani ba zi wa la ya un.

²⁸ Yesu fun burgi a ŋɔ ba, “Ma Jɛrusalɛm nihaana, ma ta wi n daha. Maa wi ma titi awa ma bisa nyuhu ni.

²⁹ Saha wau nara zi wa ŋɔ di yɛrɛ nyusumnɛ ba naa vɛ luli nan dɛɛsi bisa.

³⁰ A wuzu ti wa tel, nara tima zi chɔ a la sogli kuŋkule nyuuna bar nyɛni niu a daŋni bɛ tɔ ba.

³¹ Ba naa nisa vɛ nyɛn tum tagna ni zi wa chɔ a sogli a chi chen ni, yɛrɛ o kaa wa du ba naa yaa tum tum tagna ni?”

³² Lanjimasi ta gbanko funɛ kpak ŋmɛɛrsa lɛwa ba naa wa Yesu zi wa siti.

³³ Ba funɛ la tel bar digi ba yir nyukɔkri bar. Ba fun kpaasi Yesu a mari daakakli ti ni dooni. Ba fun kpaasi ŋmɛɛrsa lɛ ta gbanko a marigi ba daakaklɛ a kpa digi a baŋ Yesu nindil ni, digi o ningal ni.

³⁴ Ba funɛ tum chene, Yesu fun sumi Koosa a ŋɔ, “Nara nama wa zim chenani baa tum. Gil ba tum tagna a nyɛ ba.” Ba funɛ tum peti, ba fun kpa o gata a dau di ba yo walɛ di ba na anti kaa di a.

³⁵ Zɛmɛ ta maga fun chiŋi a go aa nyini. Ju tim nihɛɛta ba naa funɛ nyɛn zɛmɛ ta ni, mɔmsi un a ŋɔ dɔŋ ni, “O laata fun yisi nara chen. O ya Kristo naa Koosa fun lisi a nyɛ o titi ni chen, ma nyɛ o lisi o titi.”

³⁶ Lanjimasi ta gbanko fun mɔmsi un a zɔk kinyɔɔli haasi a nyɛ un,

³⁷ a ŋɔ, “I ya Ju tim koora, yisi i titi.”

³⁸ Ba gbanko funɛ sɔbi a ŋɔ di, “Ju tim koor ti nɛɛnɛ,” a mari o nyuha daha ni.

³⁹ Ŋmɛɛrsi ta nidigi funɛ pini Yesu zoma a ŋɔ un, “I sir ya Kristo naa Koosa ŋɔ di o kaa wa tumu chen, yisi ya maga.”

⁴⁰ O dɔŋtiin ŋmɛɛr ti fun a zulimi un a ŋɔ, “I sɛm chen, i wara nyɛ Koosa jirima. O wa zi vusi ka ya maga siti.

⁴¹ Ya wu tagna daha, o deŋlu wa ya siti, amaa baal nɔ ha wa fun tum tum tagin.”

⁴² Doone o fun ŋɔ Yesu ni, “Yesu, i wa di i koor ti, i lisi mu wɛ.”

⁴³ Yesu fun ŋɔ un, “Mu ŋɔ hinu wuti ni, i wa min zi zu Koosa koor ti niu zinan.”

Chenani Yesu Fun Sou

⁴⁴ Nha funɛ wa tel sal baan nyuha, doon fun wa biri a vusi hali saha naa niparɛ yaa par a si chen.

⁴⁵ Saha naa o fun biri chen, gar zen naa ba fun kpa purigi Koosa bar jɛɛmi dam ti chen, o fun chɛɛsi a li buudaha ni hali a wa peti tɛɛnɛ ni.

⁴⁶ Doone Yesu fun tɛsi kinkan a ŋɔ, “Mu kunyana, n kpa mu siima a du i nin niu.” O fun sɛm sɛm ta peti a sou.

⁴⁷ Lanjimasa kɔkwa nihɛɛ naa funɛ chiŋi dooni a na chenani Yesu sou, o funɛ pɛgi Koosa a ŋɔ, “Wuti baal nɔ sir ya nibin werire.”

⁴⁸ Zɛmɛ naa funɛ lagmi a chiŋi dooni a na chenani la zi ya, ba nidamata fun na galimsa a li chenani ba tum ni. Ba fun kaali dama a la mosi ba bambe.

⁴⁹ Yesu chɛnsa awa nihaana ba naa funɛ tiŋ un a li Galili a wa chen, ba waa funɛ chiŋi bar boli ni a nyini chenani yɛɛ.

Ba Fun Kpa Yesu A La Sogli Un

^50-51 Ju tim baal digi funɛ nyɛn doon a li tɔhɔn naa ba funɛ yir Arimatia. O sɔn funɛ ya Josɛf. O funɛ ya tum were tiinnɛ a kpak sɔn weri nara wati a nyini di o wa na saha naa Koosa zi wa dɔ nara. O funɛ ya sɛria nidiile ta nidigirɛ, amaa o tuha wa fun sɔɔni chenani ba di Yesu sɛria chen.

⁵² O fun si a kaali Pailɔt wati a la ŋɔ di o kpa Yesu bara a nyɛ un.

⁵³ Pailɔt fun nyɛ un nyinbaan. Josɛf fun la lisi Yesu a li o daakakli ti ni, a kpa gar a mɛɛsi un a kpa un a la du gbɛntɛl bɔ fali naa ba yaa sogli ba nara ni.

⁵⁴ O funɛ ya chene ka hiisi wuzu ti kaa wa piili dusum.

⁵⁵ Nihaana ba naa funɛ tiŋ Yesu a li Galili ni chen, ba wa Josɛf funɛ tiŋ dɔŋa a la na chenani Yesu bara fun chɔ hugil ti ni.

⁵⁶ Ba fun kaali dama a la kɔɔri kin nawara sɔɔra weree di ba kpa la du o bara ni. Hiisi wuzu ti funɛ wa tel, ba funɛ hiisiu a chi chenani Koosa fun chiŋsi chen.