Luk 22 - Tampulma

Chenani Ju Tima Funɛ Daŋni Ba Kpak Yesu

¹ Ju tim ta wuzu zen naa ba yir val la gali ti chen, funɛ wa dugli.

² Koosa dam kɔkɔɔrsi ta awa Koosa chiksɛ nibiksɛ ta funɛ dɛu nyinbaan di ba kpu Yesu, amaa ba wa funɛ daŋni ba kpak un zɛmɛ ta se ni.

Judas Fun La Nɔɔni Di O Li Yesu Gantɛl

³ Judas, naa ba yir Iskariɔt, funɛ ya Yesu gantɛl tiŋsi ta digirɛ. Saha tirɛ sintana fun wa zu o bambi ni.

⁴ O fun si a kaali Koosa dam kɔkɔɔrsi ta awa lanjima nihɛɛta ba naa la il Koosa bar jɛɛmi dam ti. O wa ba fun sɛm chenani o zi kpak Yesu a du ba nisa ni.

⁵ Ba funɛ nu o sɛm ta chen, ba tusa sɔɔni. Ba fun ŋɔ un di o koti tum chen, ba zi bɔ unu.

⁶ Judas wa ba fun ya nɔ bɛgim, o fun piili a dɛu nyinbaan di o li Yesu gantɛl. Amaa o wa ba wa funɛ daŋni ba kpak un zɛmɛ ta se ni.

Yesu Fun Saksi Di O Di Val La Gali Diwe

⁷ Ju tim ta wuzu zen ti funɛ wa tel, ba fun saksi di ba kpu val la gali ti piisisa.

⁸ Yesu fun ŋɔ Pita awa Jɔn ni, “Ma la a la saksi ya val la gali ti diwe ya wa di.”

⁹ Ba fun a pɛɛsi un, “Leene i daŋni ya la a la saksi a?”

¹⁰ O fun ŋɔ ba, “Maa nu nɛnɛ. Ma wa la zu tɔhɔn ti, ma zi chem nandigiu ka o chuŋi ni. Ma tiŋ un a la zu dam naa o kaa zu,

¹¹ a ŋɔ dam ti tiin ni, ‘Ya kunyana tum ya di ya wa pɛɛsi hin di, leene dɛ nyɛn o wa o gantɛl tiŋsi ta kaa wa di val la gali ti diwe ta?’

¹² O zi biksi mau dɛ zenzen bɛgim naa ba kɔɔri weru. Ba funɛ sa un a zɔŋ dɛ digi nyuhu nɛɛ. Ma la zu dɛ ti a saksi ya wa.”

¹³ Pita awa Jɔn fun kaali a la zu tɔhɔn ti tuha a fun na chenani Yesu fun ŋɔ ba. Ba fun la saksi val la gali ti diwe ta dooni.

Yesu Fun Sumi Koosa A Du Kidiili Ta Ni

¹⁴ Ba diili saha funɛ wa tel, Yesu wa o gantɛl tiŋsi ta fun wa kani aa di.

¹⁵ Ba funɛ di chene, Yesu ŋɔ ba, “Mu kpak unu mu bambi ni n wa ma te di val la gali ti diwe na ka ni zi wa namsi.

¹⁶ Diwe naa ya di val la gali ti wuzu zen biksi ya di wuzu digi Koosa zi wa dɔ tɛɛnɛ nɔ magau. N ŋɔ ma wutirɛ, n wa zi bu di un hali a wuzu ti wa tel.”

¹⁷ Doone Yesu fun zer gbakmi di o nyɔ kinyɔɔli a sumi Koosa a du un ni a kpa nyɛ ba a ŋɔ, “Ma kpa a purigi a nyɛ dɔŋ ni.

¹⁸ Mu ŋɔ ma wutirɛ, kinyɔɔli naa mu nyɔ nan, n wa zi bu nyɔ un hali Koosa koor ti waali wa tel.”

¹⁹ O fun bukoo zer boroboro a sumi Koosa a du a chɔksi a bɔni ba a ŋɔ, “Ma zer a di. Mu bara nɛɛnɛ n kpa a nyɛ ma. Ma ya chen aa kilisi mu wɛ.

²⁰ Kinyɔɔli naa ma purigi a bɔni dɔŋ chen, ya mu chɛllɛ. Chenani mu kpa nyɛ ma nan, biksi nara di Koosa wa ba ya nɔ bɛgimnɛ.

²¹ “Ma na, ma naa wa min lagmi a di diwe digi li mu gantɛl.

²² O ya Koosa tutɔrɛ n waa nibine be zi wa sou lalaga. Naa kaa wa li mu gantɛl nan, yɛrɛ o zi wa du un ni?”

²³ Ba funɛ nu chen, ba fun piili a pɛɛsi dɔŋa di ba anti kaa wa ya chen.

Anti Ya Ya Nihɛɛ?

²⁴ Wuzu digi o gantɛl tiŋsi ta funɛ di dɔŋa amɔrɛ anti ya ba nihɛɛ?

²⁵ Yesu funɛ nu chen, o fun ŋɔ ba, “Koorsa ba naa vɛ zim Koosa, ba waa dɔ ba pulum nara ka ba nara tima yir ba nizenzene.

²⁶ Chen nyinbaan laata ma tiŋ chen. O lawa ma nihɛɛ kpa o titirɛ a burgi bichɛla ka naa ya ma koora ka kpa o titi a burgi tumtumna.

²⁷ Nar kanɛɛ di o di diwe waa ya nizenzen a kaali naa ya diwe ta a wa. N wa ma nyɛnɛɛ a chi diwe niyaali nɔ.

²⁸ “Nara tima biksi bɔmu ka ba bɔnɛ muksi min kinkan. Amaa ma se su min ka ma chiŋi mu gantɛl ni.

²⁹ Mu kunyana funɛ vɔu min koora di mu dɔ nara. Mu gbanko vɔu ma koora.

³⁰ Wuzu digi ma wa min zi wa di diweu a li mu koor ti ni ka ma kani koorsa bar kanɛ ni di ma di Ju tim buri fidalɛ ti sɛria.”

Yesu Fun Ŋɔ Pita Ni Chenani O Zi Vɛ Un

³¹ Saha tirɛ Yesu fun ŋɔ Pita ni, “Simɔn, kinu mu wati. Koosa funɛ nyɛ sintana nyinbaanu di o zaamsi ma maga a chi nihaan chɛɛrɛ munzɔta a li mɛ ni.

³² N funɛ sumi Koosa a nyɛ hinu di chenani i si su min wa zi bur gantɛl hali a wa peti. Sintana wa zaamsi hin, i zi chelu, amaa i burɛɛ a tiŋ min nɛnɛ, n daŋni i chiŋi i dɔŋtima gantɛl nɛɛ.”

³³ Pita fun ŋɔ un, “Mu kunyana, ba wa tɔ hin dɛ, nyɛ ba wa kpak mu gbanko a wa gbaari hin ni. Ba wa kpu hin, mu gbanko zi sou.”

³⁴ Yesu fun bukoo ŋɔ un, “Pita, kinu chenani mu kaa sɛm hin nan. Dusum nɔ i zi te tɔ butorau di i wa min wa zim dɔŋa, ka zimal zi yeli.”

Kin Nawara Yesu Gantɛl Tiŋsi Daŋni

³⁵ Doone Yesu fun ŋɔ o gantɛl tiŋsi ta ni, “Ma lisi chenani n fun tum ma di ma la biksi a kitiibi nara. N funɛ ŋɔ mau di ma ta zer kapursa awa bɔtɛ akoo natausa. Kundɔŋ nya kpak mauu?” Ba fun ŋɔ un, “Kundɔŋ nya wa kpak ya.”

³⁶ Yesu fun bu ŋɔ ba, “Chene mu fun ŋɔ ma saha ti. Amaa lalaknɔ nar kpak kapur awa bɔtɛ, o zer a a kpa la. Nar vɛ kpak chise zen, o kpa o takta a yogli a la yau digi.

³⁷ Ma nyɛ mu ŋɔ ma di chenani ba fun sɔbi mu wɛ a li Koosa sɛm tɔn ti ni, chen zi wa ya wutiu. Ba funɛ ŋɔ di, ‘Ba kpa min a gbaari ba naa la tum tum tagna chen ni.’ ”

³⁸ O gantɛl tiŋsi ta fun ŋɔ un, “Ya kunyana, kina. Ya kpak chise zene lɛwa.” O ŋɔ ba, “Chen weru.”

Yesu Fun Sumi Koosa A Li Gɛtsamanɛ Ni

³⁹ Yesu wa o gantɛl tiŋsi ta fun li dooni a kaali bi Ɔlif.

⁴⁰ Ba funɛ wa tel bar digi, o fun ŋɔ ba, “Ma chiŋi bar nɔ a sumi Koosa, chen ni sintana wa zi wa zaamsi ma.”

⁴¹ O duŋduŋ fun a kaali ba suwachak tama a la gbiri a sumi Koosa a ŋɔ,

⁴² “Mu kunyana, mu sumi hinu, lisi namsi nɔ a li mu nin ni. Nyɛ i tutɔ ti ya a kaali mu tutɔ.”

⁴³ Koosa malaika digi fun li buudaha a wa Yesu wati a nyɛ un kpok.

⁴⁴ O fun na bar wiha kinkan, a fun sumi Koosa wa si sɛm ni ka o wilim fun chi chɛl aa chesi tɛɛnɛ ni.

⁴⁵ O funɛ la sumi Koosa peti chen, o fun a bur wa o gantɛl tiŋsi ta wati ka ba chɔ do. Ba tu chɔk kinkan funɛ nyɛ ba bara yɔɔriu.

⁴⁶ O fun ŋɔ ba, “Yɛrɛ ma chɔ do? Ma si a sumi Koosa, chen ni sintana wa zi wa zaamsi ma.”

Chenani Ba Fun Kpak Yesu

⁴⁷ O ha funɛ vɛɛn a sɛm chene, Judas naa ya o gantɛl tiŋsi ta digi chen, fun wa te zɛmɛ ta suwachak a wa Yesu wati a wa mɔksi un.

⁴⁸ Yesu fun ŋɔ un, “Judas, i wau di i wa mɔksi min a li n waa nibine be gantɛll?”

⁴⁹ Yesu gantɛl tiŋsi ta funɛ na di zɛmɛ ta daŋni ba kpak unu, ba nidigi fun pɛɛsi un, “Ya kunyana, ya foŋsi ya chise zene a chem baa?”

⁵⁰ Baal ti funɛ sɛm chene, ba nidigi fun foŋ o chise zen a kpa ŋmɛn Koosa dam kɔkɔɔrsi ta nihɛɛ yom digi nindil diŋna.

⁵¹ Yesu fun ŋɔ un di o gil chen tumi a kpa o nin a gbaŋsi baal ti diŋna a tiibi un.

⁵² Doone Yesu fun ŋɔ Koosa dam kɔkɔɔrsi ta awa lanjimasa nihɛɛta ba naa la il Koosa bar jɛɛmi dam ti awa tɔhɔn nihɛɛta, ba naa wa di ba kpak un ni, “Mu ya ŋmɛɛrrɛ ma kpa chise zene awa daasa di ma wa kpak minn?

⁵³ N yaa fun kaniu a biksi nara a li Koosa bar jɛɛmi dam ti ni ka ma vɛ wa kpak min. Sintana, naa nyɛn birsi ni, kpok ma kpa wa di ma wa kpak min.”

Pita Fun Vɛ Di O Wa Zim Yesu

⁵⁴ Ba fun kpa Yesu a kaali Koosa dam kɔkɔɔrsi ta nihɛɛ ti dama. Pita fun sogli gantɛl ni a tiŋ ba.

⁵⁵ Ba fun la tel dooni, Pita la zu sal a la gbaari a kani ba naa funɛ weeri din wati bambaan ni.

⁵⁶ Nihabichɛl digi funɛ nyɛn doon a ya Koosa dam kɔkɔɔrsi ta nihɛɛ ti dam be. Waa funɛ na un ka o weeri di dooni. O fun a nyini un hali a vusi, a ŋɔ ba naa kani dooni, “Baal nɔ ya Yesu gantɛl tiŋsi ta digirɛ.”

⁵⁷ Pita fun tɔ a ŋɔ un, “N wa zim naa i bi chen.”

⁵⁸ O fun a ya tama, baal digi fun na un a sɛm, “I ya Yesu gantɛl tiŋsi ta digirɛ.” Pita fun bu tɔ a ŋɔ un, “N wa zim baal nɔ.”

⁵⁹ O fun a vusi tama, baal digi fun bu ŋɔ wa kpok ni ba naa nyɛn dooni, “Baal nɔ ya Galili narrɛ. Mu si su di o ya Yesu gantɛl tiŋsi ta digirɛ.”

⁶⁰ Amaa Pita fun ŋɔ un, “Baal naa maa sɛm nan, n wa zim un.” Pita ha funɛ vɛɛn a sɛm chene, ka zimal yeli.

⁶¹ Yesu fun burgi a nyini Pita. O fun vaan lisi chenani Yesu fun ŋɔ un di o zi wa tɔ butorau di o wa un wa zim dɔŋa, ka zimal yeli zinan.

⁶² Chenani maga o fun lisi zu o nyuha. O fun si li a la wi kinkan.

Lanjimasa Fun Mɔmsi Yesu A Tuk Un

⁶³ Lanjimasa ba naa funɛ il Yesu chen funɛ mɔmsi unu a la tuk un.

⁶⁴ Ba fun kpa gar a vɔu o se a pɛɛsi un di o zim naa tuk un nanu.

⁶⁵ Ba fun pini o zoma gbanko a du un ni.

Ba Fun Kpa Yesu A La Nihɛɛta Bar Lagmi

⁶⁶ Chɔɔsa funɛ pisi, Koosa dam kɔkɔɔrsi ta awa Koosa chiksɛ nibiksɛ, ba naa funɛ ya Ju tim sɛria nidiile, fun a lagmi dɔŋ ni. Ba fun kpa Yesu a chiŋsi ba suwachak ni.

⁶⁷ Ba nidigi fun pɛɛsi un, “Hin ya Kristo naa Koosa fun ŋɔ di o kaa tumu chenn?” O fun ŋɔ ba, “N ŋɔ ma, ma se wa zi su chenani mu ŋɔ ma.

⁶⁸ N pɛɛsi ma wu digi, ma wa zi ŋɔ min.

⁶⁹ O wa zi vusi ka n waa nibine be wa kani Koosa naa kpak kpok a kaali kina maga nihɛɛ bar kani ni.”

⁷⁰ Ba bɔnɛ fun ŋɔ un, “I ya Koosa beree?” O fun ŋɔ ba, “Min ya un.”

⁷¹ Ba funɛ nu ka o sɛm chen, ba fun ŋɔ dɔŋ ni, “Yɛrɛ ya bukoo o dɛu sɛhɛra tima? O fun chel a li o titi sɛm ni.”