Luk 21 - Tampulma

Luhaan Fara Tiina Fun Kpa O Kin Maga A Nyɛ Koosa Ni

¹ Wuzu digirɛ Yesu funɛ nyini malɛ tima ka ba kpa ba male a dau a li Koosa bar jɛɛmi dam ti bar dawi ni.

² O funɛ nyini ba chen, o fun na luhaan fara tiina ka fun wa a wa kpa kobosa lɛ a dau.

³ Yesu fun ŋɔ o gantɛl tiŋsi ta ni, “Maa nu. Luhaan fara tiin nɔ kobosa lɛ kaali kin tim na malɛ.

⁴ Ba lisɛ ba malɛ damata tuhu nɛɛ a wa dau, amaa o waa kpa o malɛ magwa a wa dau.”

Chenani Nara Zi Chɔk Koosa Bar Jɛɛmi Dama

⁵ O gantɛl tiŋsi ta bɔnɛ funɛ sɛm chenani salmasa awa papaha naa nara fun kpa nyɛ chen nyɛ Koosa bar jɛɛmi dam ti di bunɔtau. Yesu fun ŋɔ ba,

⁶ “Saha zi wa wau kin naa maga maa na nan zi vɛ wa nyɛni. Ba wa zi wa gil buŋkul bɛgim o sak o dɔŋtiin ni.”

Tɛɛnɛ Nɔ Siili Saha Namsi

⁷ Ba nidigi fun pɛɛsi un, “Mu kunyana, saha leemawa chen kaa wa ya? Baŋa kaa wa te a ya a biksi ya di saha ti telu?”

⁸ Yesu fun ŋɔ ba, “Ma doso ma ta wa nyɛ nandigi wa mur ma. Nidamata zi wa wau a kpa mu sɔn a yir ba titi a ŋɔ di ba ya minnɛ. Ba gbanko zi wa ŋɔ mau di saha ti telu. Ma fiɛŋ ma wa tiŋ ba.

⁹ Ma wa nu laal wɛ awa chenani nara yo dɔŋa di ba la kina maga a du ba nin ni, ma ta ɔmi. Chen wa biksi di tɛɛnɛ maga siili ti saha duglɛu.”

¹⁰ O fun bukoo ŋɔ ba, “Tɛɛnɛ nɔ maga nara awa ba koorsa zi wa siu a chem dɔŋa wa laal.

¹¹ Tɛɛnɛ zi wa jimu kinkan ka lɔsa zi wa chel pulumsi ta maga ni, ka wichɔɔr kpok zi wa kpu nidamatau. Nara zi wa na daani zenzenu a li buudaha gbanko ni. Hansura zi wa kpak bau kinkan a daha.

¹² Kin naa mu ŋɔ ma nan wa zi te ya. Ba zi wa te kpak mau kpok ni a muksi ma kinkan. Ba zi wa kpa mau a kaali ba bar lagmi dɛɛna di ba di ma sɛria a tɔ ma dɛ. Ba gbanko zi wa kpa ma la koorsa suwachaku ba di ma sɛria min daha.

¹³ Ba wa kpa ma a la sɛria bar diili, ma zi na nyinbaanu a ŋɔ ba naa nyɛn dooni Koosa laaboor weri ti wɛ.

¹⁴ Ma ta nyɛ chenani ma kaa wa la sɛm sɛria nidiile ta wati kimuksi ma.

¹⁵ Min kaa wa biksi ma chenani ma kaa wa la sɛm awa nɛha ni, chen ni ma dɔma wa zi wa koti a vɛ ma sɛma a tɔ di laaboor weri ti wa deŋli.

¹⁶ Ma nyama awa ma numa, ma niinbisa, ma walɛ awa ma chɛnsa zi wa kpa mau a du ba naa la zi kpu ma bɔnɛ nisa niu.

¹⁷ Nara maga zi wa ha mau n sɔn daha.

¹⁸ Chenani maga ba ya ma, Koosa zi nyɛn ma watiu.

¹⁹ Ma di kanyita a vusi hali namsi ti wa peti, Koosa zi wa la ma nyuunau a nyɛ ma.”

Chenani Nara Zi Wa Chɔk Jɛrusalɛm.

²⁰ “Ma wa na ka lanjima damata go Jɛrusalɛm, ma zim di ba zi chɔk unu lalaga.

²¹ Nan wa ya, ka ba naa la zi nyɛn Judia pulum ni, ba si chɔ lalaga a la sogli kuŋkule nyuuna bar nyɛni ni. Ba naa nyɛn Jɛrusalɛm ni, o lawa ba wa liu. Ba naa la zi nyɛn tɔ wisi naa go dooni ta bu zu tɔhɔn ti.

²² Koosa kaa wa di Ju tim ta sɛria chene, sɛm naa maga ba fun sɔbi a du o sɛm tɔn ti ni, chen zi wa ya wutiu.

²³ Nihaan naa kpak lo awa ba naa kpak bi pilimsa, o zi wa bɔmu kinkan ba wati chen saha. Koosa zi wa na paanu a du nara nama ni kinkan a lɛrgi ba diŋsa. Chen la zi wa nyɛ ba na namsi kinkan.

²⁴ Ba nidamata zi wa sitiu a li yo ti ni. Ba zi wa kpaksi ba bɔnɛu kpok ni a kaali bar boli pulumsa. Ba naa vɛ zim Koosa zi wa chɔk Jɛrusalɛmu a kpalimi dooni hali Koosa wa ŋɔ di ba li.”

N Waa Nibine Be Bur Waali

²⁵ “Mu waa nibine be waali saha wa dugli, daanɛ zi wa nyɛn nha awa pɛna awa wula niu. Teku zi damu a chɛɛmi kinkan. Hansura zi wa kpak tɛɛnɛ nɔ maga narau kinkan a la gali.

²⁶ Kpok kin naa nyɛn buudaha ni zi wa na muksiu kinkan. Tɛɛnɛ nɔ maga nara wa pɔ chenani kaa wa ya, hansura zi wa kpak bau ba hɔɔgi.

²⁷ Pɔɔli ti saha wa gali, ba zi wa na n waa nibine beu ka mu li dobaal tuha a wa awa kpok awa n jirima ni a kichaani kinkan.

²⁸ Ma wa na min, ma si chiŋi a zer ma nyuuna buudaha ni. Saha naa mu kaa la ma nyuuna a nyɛ ma duglɛu.”

Chenani Totoha Bugil Biksi Ya

²⁹ Doone Yesu fun ŋɔ ba jɛɛgi nɔ, “Ma nyɛ totoha bugil awa bugil naa maga nyɛnɛɛ biksi ma nɛha.

³⁰ Ma wa na a kpachak falɛ, ma yaa zimu di pari duglɛu.

³¹ Chen vɛɛna, ma wa na kin nama ka a wa ya, ma zi zimu di Koosa koor ti duglɛu.

³² “Ma nyɛ mu ŋɔ ma, zinan nara wa zi wa siti hali kin naa maga wa ya.

³³ Buudaha awa tɛɛnɛ zi wa petiu wuzu digi, amaa mu sɛma wa zi kut peti.”

Ya Daŋni Ya Ilu

³⁴ “A wuzu naa mu kaa wa zi pirigi ma niu. Adaha ma doso ma ta vaan kpa ma bambe a tiŋ lalaknɔ yaali. Ma ta nyɛ ma wa ma dɔŋtima lagmi a diili a kinyɔ sin kpoka.

³⁵ Ma bur waali zi pirigi tɛɛnɛ nɔ maga nara niu.

³⁶ Ma doso a kiil saha maga. Maa sumi Koosa di o nyɛ ma o kpok ma di namsi naa kaa wa chen a wa chiŋi n waa nibine be suwachak ni.”

³⁷ Yesu funɛ nyɛn Koosa bar jɛɛmi dam ti nɛɛ a biksi nara wuzu bilɛ. Dusum yaa fun a biriu, o li tɔhɔn ti ni a la chɔ Ɔlif bi nyuhu ni.

³⁸ Chɔɔsa yaa fun pisi, o wa nara ta bu lagmi Koosa bar jɛɛmi dam ti di o la biksi ba.