Luk 20 - Tampulma

Kpok Naa Nyɛ Yesu Tum O Tuma

¹ Wuzu digi Yesu funɛ biksi nara Koosa laaboor weri ti wɛ a li o bar jɛɛmi dam ti ni chene, Koosa dam kɔkɔɔrsi ta, Koosa chiksɛ nibiksɛ ta awa Ju tim nihɛɛti ta fun wa lagmi a pɛɛsi un,

² “Anti kpa kpok nɔ a nyɛ hin i koti aa tum tum na nan? Anti nyɛ hin nyinbaan di i val aa kiya nan?”

³ Yesu fun ŋɔ ba, “N gbanko kpak pɛɛsiu a zi pɛɛsi ma.

⁴ Jɔn naa funɛ chaksi nara wa ni ni chen, Koosa funɛ nyɛ un chen kpok ti akoo nibinsiwaa?”

⁵ O funɛ pɛɛsi ba chene, ba di dɔŋa wa amɔrɛ a ŋɔ, “Ya ŋɔ di Koosa funɛ nyɛ un chen kpok ti, o zi burgi a pɛɛsi yau, yɛrɛ ya se fun vɛ su un?”

⁶ Bɔnɛ fun ŋɔ, “Ya ka wa kiŋɔ di nibinsa funɛ nyɛ un chen kpok ti, zɛmɛ ta zi yaksi yau wa buŋkul ni, domi ba yir Jɔn Koosa witiinne.”

⁷ Ba fun ŋɔ Yesu ni, “Ya wa zim naa kpa kpok ti a nyɛ un.”

⁸ Yesu ka fun a ŋɔ ba, “N gbanko wa zi biksi ma naa nyɛ min kpok ti muu tum kin naa maga chenu.”

Yesu Fun Ŋɔ Ba Tumtumsa Ba Naa Il Ŋmaha Wɛ

⁹ Yesu fun bukoo jɛɛgi jɛɛgɛ a ŋɔ nara tima ni, “Baal digi funɛ nyɛn doon a par o ŋma we. O fun dɛu tumtumsa di ba wa il un, a li a kaali tɔha bar boli a la vusi kinkan.

¹⁰ Chɛɛnsa pini saha fun wa tel, o fun tum o dam be o tumtumsi ta wati di o la la chɛɛnsi ta bɔnɛ a wa. O fun kaali ba wati. Ba fun kpak un a tuk a vɔm un chɛɛnsi ta a duŋni un a ta. O fun bur a kaali.

¹¹ Ŋma we ti tiina fun bukoo a tum o dam be digi ba wati. Ba fun bukoo kpak un a tuk a du un hiisa a nyɛ o bur kaali huli.

¹² O fun bukoo tum bator tiina. Ba fun tuk un a huusi a kpa un a yo ta.

¹³ Nara bator ta tiina funɛ bur wa, ŋmaha ti tiina fun lisi o bambi ni a ŋɔ, ‘Min zim chenani n zi ya. N zi tum mu titi be daŋniu. O la doon, ba zi nyɛ un jirimau.’ O fun tum un. O kaali.

¹⁴ O tumtumsi ta funɛ na o be ti, ba fun ŋɔ dɔŋ ni, ‘Be nɔ nyana wa sou, o zi la o kina magau. Adaha ma nyɛ ya kpu un, chen ni ka o nyan ti wa sou, o kin ta zi burgi ya kinau.’

¹⁵ Ba fun la kpak un a kpu a lɛrgi un a li ŋma we ti ni. Ma zim chenani ŋma we ti tiina zi wa ya bauu?

¹⁶ O zi wa kpak bau a kpu a kpa o ŋmaha ti a bu nyɛ nara bɔnɛ ni.” Nara tima funɛ nu chenani Yesu sɛm o sɛm ta peti, ba fun ŋɔ un, “Wutirɛ ba wa zi tum chen.”

¹⁷ Yesu fun nyini ba a pɛɛsi, “Ma ha wa karimi Koosa sɛm tɔn ti a zim o muna doonani o ŋɔ di, ‘Buŋkul naa tɛsaalsa fun vɛ chen, waa ya buŋkul kpok a ya kibirigii?’

¹⁸ Buŋkul ti wa min ya kibɛgimnɛ. Ba naa vɛ nyɛ ba se su min chi ba naa val a wa mosi minnɛ. Ba naa se vɛ su min ka ba wa siti, o chi mu kaa wa chel ba nɛɛ a mɛrigi ba a du hɛɛra ni.”

Lampo Bɔɔli Wɛ

¹⁹ Koosa chiksɛ nibiksɛ ta awa Koosa dam kɔkɔɔrsa ta funɛ zimu di Yesu funɛ jɛɛgi jɛɛgi nɔu a nyɛ ba. Ba funɛ daŋni ba vaan kpak un, amaa ba funɛ ɔm nara timawa.

²⁰ Ba funɛ daŋni ba kpak un a du doon gɔbnati nyuhu tiina nin ni. Adaha ba fun tum nara ba naa la mur nibinsa di ba ya bambi timwa bɔnɛ di ba la mo Yesu lo a nu chenani o zi sɛm.

²¹ Ba fun ŋɔ Yesu ni, “Ya kunyana, ya zimu di i ya wuti tiinnɛ. I bak wa to chenani nibinsa sɛm i wɛ. I wara ɔm nibin zene se wa wuti ti sɛmi.

²² Ya yaa bɔ ya lampo a nyɛ koorsi ta nyuhu tiina Siiza ni, chen weru koo o wa wer?”

²³ Yesu fun a zim di ba daŋni ba mo o lore a ŋɔ ba,

²⁴ “Ma kpa malɛ ta a wa n na.” Ba fun kpa a a wa o wati. O pɛɛsi ba, “Anti nyuha awa o sɔn sak a ni nan?”

²⁵ Ba fun ŋɔ, “Koor Siiza nyuha awa o sɔnnɛ.” O fun ŋɔ ba, “Tɔ, ma kpa koor Siiza kina a nyɛ un a ka kpa Koosa kina a nyɛ un.”

²⁶ Ba funɛ nu chen, o fun ya ba alaazibu kinkan. Ba wa fun bukoo koti a mo o lo nara tima suwachak ni. Ba fun moori.

A Wuzu Naa Nara Maga Zi Wa Si Ba Sou Ni

²⁷ Doone nara bɔnɛ ba naa ba yir Sajusi wa o wati. Ba yaa fun a ŋɔ di nara siwɛɛ, ba wa zi bu koti a si ba sou ni. Ba fun ŋɔ Yesu ni,

²⁸ “Ya nawaalsa nihɛɛ, Mosis, funɛ biksi ya a li Koosa sɛm tɔn ti ni, ‘Nandigi kpa haan ka o wa o haan ti vɛ luli ka o sou, ya nyɛ o niinbe kpa o maan ti haan ti a lul bisa a nyɛ o maan ti ni, chen ni o sɔn wa zi sou.’

²⁹ Nibaala nara banɔpɛ funɛ nyɛn dooni a ya niin bɛgim awa nyan bɛgim bisa. Ba nihɛɛ fun a si a kpa haan. O wa o haan ti wa fun lul be ka o baal ti sou.

³⁰ Doone nara funɛ sak un ni chen ka kpa o haan ti, o wa o gbanko wa fun lul be ka o gbanko sou.

³¹ Ba tora tiin ti gbanko funɛ ya chene. Ba nara banɔpɛ ta maga fun kpa luhaan ti. Ba nidigi wa un wa fun lul be, ka ba maga siti.

³² Haan ti gbanko fun wa sou.

³³ Tɔ. A wuzu naa nara maga zi wa si ba sou ni, haan nɔ, anti kaa wa dɔ un? Ba nara banɔpɛ ta maga funɛ kpa unu.”

³⁴ Yesu fun ŋɔ ba, “Lalaknɔ nyɛni nɔ, nibaala kpa haanasiwa.

³⁵ Ba wa siti, Koosa zi wa lɛli ba naa o fun lisi a nyɛ o titi niu a li ba sou ni a nyɛ ba o mi fali naa vɛ kpak bɔ. Chen nibaali ta wa zi kpa chen nihaani ta.

³⁶ Ba zi wa chi o malaikasi tawa a ta bu siwi. Koosa zi wa lɛli bau a li ba sou ni ba ya o bisa.

³⁷ Ma ha wa karimi a li Koosa sɛm tɔn ti ni a zim o muna doonani Mosis fun la na ka din di bugil pum chenn? Chen biksi ya di Koosa zi lɛli nisitɛu a nyɛ ba o miisa. Mosis funɛ na bugil pum ti, Koosa fun ŋɔ un, ‘Min ya Koosa naa ma nawaalsa Abraham, Aizik awa Jakɔb yaa jɛɛmi.’

³⁸ Ba naa sitɛɛ laata la jɛɛmi Koosa, amaa ba naa kpak miisa. Nara maga kpak miisa o suwachak ni.”

³⁹ Koosa chiksɛ nibiksɛ ba naa funɛ chiŋi dooni bɔnɛ fun ŋɔ, “Ya kunyana, i sɛm ta ya wutirɛ.”

⁴⁰ Sajusi tim ta funɛ nu chenani Yesu sɛm, ba wa bu kpak nyinbaan di ba pɛɛsi wu digi.

Naa Koosa Fun Ŋɔ Di O Zi Tumu Chen Wɛ

⁴¹ Saha tirɛ Yesu fun ŋɔ Koosa chiksɛ nibiksɛ ta ni, “Yɛrɛ ma yaa sɛm di Kristo ya koor Devid lullɛ?

⁴² Devid titi funɛ sɔbiu a li Koosa sɛm tɔn ti bar digi naa ba yir Saams chen ni a ŋɔ, ‘Mu kunyana Koosa funɛ ŋɔ mu kunyan ni, kani mu nihɛɛti bar kani ni,

⁴³ ka mu nyɛ i dɔma burgi i yosa.’

⁴⁴ Devid titi funɛ yir un o kunyana chen ni, yɛrɛ o bu kaa ya a zen a kaali un?”

Yesu Fun Tɛ Ba Nin A Du Ju Tim Nibiksɛ Ta Ni

⁴⁵ Zɛmɛ ta maga funɛ nu Yesu biksi ti chene, Yesu fun ŋɔ o gantɛl tiŋsi ta ni,

⁴⁶ “Ma doso ma ta nyɛ Koosa chiksɛ nibiksɛ ta yaa kimur ma. Baa daŋni takta ziŋɛ laarɛ kinkan a la daŋni ba val yau ni, chen ni nara zi nyɛ ba jirimau a kizaami ba. Ba yaa daŋni ba kani kor were ni a li ba bar lagmi dɛɛni ni. Ba wa lagmi a di diwe wuzu zen wuzu, ba yaa daŋni ba di nihɛɛta bar diili nɛɛ.

⁴⁷ Ba yaa zaami Koosa wa ba zaamirɛ a vusi a bu ŋmɛ luhaana kina. Koosa wa di ba sɛria, ba zi wa na namsiu kinkan a kaali ba dɔŋtima.”