Luk 2 - Tampulma

Chenani Ba Fun Lul Yesu Kristo

¹ A saha ti koor digi funɛ dɔ dooni. Ba funɛ yir un Ɔgastus. O funɛ daŋni o gur a zim nibinsa ba naa nyɛn o koor ti ni.

² O funɛ gur nara tima maga, baal digi funɛ ya nihɛɛ a li Siiriya pulum ni. Ba funɛ yir un Sairinius.

³ Nara tima maga funɛ kaali ba tɔsau di ba la sɔbi ba sɔna a du tɔn ni.

⁴ Josɛf fun li Nazarɛt naa nyɛn Galili pulum ni a kaali tɔhɔn naa ba yir Bɛtlihɛm a li Judia pulum ni. Ba fun lul koor Devid dooni saha digi. Josɛf funɛ ya koor Devid bi lulirɛ. Chendaha o fun kaali dooni.

⁵ Mɛri, naa la nɔɔni di o yu un, wa un fun kaali. O funɛ kpak lore.

⁶ Ba funɛ la tel Bɛtlihɛm, o saha fun wa tel di o lul,

⁷ amaa dam naa hɔɔra fun nyɛn chen funɛ su wa nara ni. Chendaha o fun lul o tol be nibabichɛla a li sel bar nyɛni nɛɛ. O fun kpa gar a fɔu un a sak a diwe bar diili ni.

Piisi Gbaŋsa Fun La Chem Koosa Malaikasa

⁸ Piisi gbaŋsa bɔnɛ funɛ nyɛn dooni a nyini piisisi ta dusum a li kɔha ni.

⁹ Koosa malaikasi ta digi fun wa li ba wati, ka Koosa chaani kinkan fun wa tɔ ba. Hansura fun kpak ba kinkan,

¹⁰ amaa malaika ti funɛ ŋɔ bau, “Ma ta ɔmi. Mu kpak laaboor weri naa la zi nyɛ nara maga tusa sɔɔni kinkan a kaa ŋɔ ma.

¹¹ Dusum nɔwa ba lul bichɛla a li Devid tɔha Bɛtlihɛm ni. Waa la zi wa yisi ma a li ma tum tagna ni maa tiŋ Koosa. Waa ya ya kunyan Kristo.

¹² Ma la dooni a la dɛu be ti. Ma zi na unu ka ba kpa gar a fɔu un a sak sela diwe bar diili ni. Chenani ma na dooni la biksi ma di mu sɛm ta ya wutirɛ.”

¹³ Malaika ti funɛ sɛm chen peti, malaika damata fun li buudaha a wa gbaari un ni. Ba funɛ lɔ boola a pɛɛsi Koosa a ŋɔ,

¹⁴ “Ma nyɛ ya nyɛ Koosa naa nyɛn o tɔha ni, jirima kinkan. Naa o fa tum zi nyɛ ba naa la ya Koosa lɛmlɛm ya nɔ bɛgim wa dɔŋ ni.”

¹⁵ Malaikasi ta funɛ lɔ bool ta peti, ba fun bur a kaali Koosa tɔhɔn ti. Piisi gbaŋsi ta fun ŋɔ dɔŋ ni, “Ma nyɛ ya la Bɛtlihɛm a la na be naa Koosa malaika ti ŋɔ ya o wɛ chen.”

¹⁶ Ba fun chɔ kaali a la na Josɛf awa Mɛri wa be ti ka o nyɛn sela diwe bar diili ti ni.

¹⁷ Piisi gbaŋsi ta funɛ na be ti, ba fun ŋɔ Josɛf awa Mɛri ni chenani Koosa malaika ti ŋɔ ba o wɛ.

¹⁸ Ba naa maga funɛ nyɛn dooni, piisi gbaŋsi ta sɛm ta funɛ ya ba alaazibu kinkan.

¹⁹ Mɛri fun lisi ba sɛm ta mun kinkan a kpa a a du o bambi ni.

²⁰ Piisi gbaŋsi ta fun bur a kaali ba piisisi ta wati. Ba funɛ nyɛn nyinbaan ni a la chene, ba fun lɔ boola a la pɛgi Koosa. Malaika ti sɛma awa be ti naali nyɛ ba tusa sɔɔni. Chenani malaika ti fun ŋɔ ba sir ya wutirɛ.

Chenani Yesu Nyana Fun Du O Sɔn

²¹ Wuzu bunɔpɛ gantɛl nɛɛ, ba fun teŋ be ti ka o nyan du o sɔn Yesu. Sɔn nɔwa malaika ti fun te du un ka o niin zi kpak o lo.

Ba Fun Kpa Yesu A Nyɛ Koosa Ni A Li Jɛrusalɛm Ni

²² Ju tim chiksɛ funɛ biksi ba di nar lulɛɛ, o kpa o wa be ti a la Jɛrusalɛm ba chaksi o lul chen doŋa a ta. Saha ti wa tel di Josɛf awa Mɛri ya chen, ba fun la kpa be ti a nyɛ Koosa ni dooni.

²³ Nannɛ ba fun sɔbi a li Koosa sɛm tɔn ti ni a ŋɔ, “Nibabichɛla naa ma te lul, ma zi kpa unu a la nyɛ Koosa ni, chen ni o zi dɔ unu.

²⁴ Ma gbanko zi kɔrigi kambugilsa lɛ a nyɛ Koosa ni.” Chendaha Josɛf awa Mɛri funɛ daŋni ba ya chen.

²⁵ Baal digi funɛ nyɛn Jɛrusalɛm ni. Ba yir un Simiɔn. O funɛ ya narrɛ a la tiŋ Koosa nɛnɛ. O funɛ pɔ di Koosa tum naa kaa wa yisi Ju tim tum tagna. Koosa siim weri ti nyɛn un ni.

²⁶ Waa funɛ vɔu a nyɛ un di o wa zi wa sou, see o wa na Kristo naa Koosa fun ŋɔ di o zi wa tumu wuzu digi chen.

²⁷ Josɛf awa Mɛri wa be ti funɛ wa tel Jɛrusalɛm, ba fun la zu Koosa bar jɛɛmi dam ti a tum chenani Koosa sɛm tɔn ti biksi ba. Ba funɛ la zu dooni, Koosa siim weri ti fun nyɛ Simiɔn gbanko fun zu pu ba.

²⁸ Simiɔn fun zer be ti a pɛgi Koosa a ŋɔ,

²⁹ “Mu kunyana, zinan nɔ i tum i vɔwi tiu. Lalaknɔ i zi nyɛ n waa naa ya i tumtumna, sou awa tu sɔɔn ni.

³⁰ Mu funɛ na naa la zi yisi nara tima tum tagna a tau awa mu se ni.

³¹ I funɛ tum unu di o wa suŋi tɛɛnɛ nɔ maga nara.

³² Be nɔ zi nyɛ Ju tima ba naa i lisi a nyɛ i titi ni chen burgi i jirima narau. O gbanko zi chi i fitinau. Waa la zi biksi ba naa vɛ ya Ju tima ba tiŋ i nyinbaan.”

³³ Josɛf awa Mɛri funɛ nu sɛm naa Simiɔn fun sɛm ba be ti we chen, alaazibu fun kpak ba kinkan.

³⁴ Simiɔn fun a sumi Koosa di o suŋi ba, a ŋɔ be ti niin ni, “Koosa funɛ tum i be nɔu di o wa chɔk Ju tim ba naa vɛ un a yisi ba naa la un a li ba tum tagna ni. Lalaknɔwa o nyɛn, Koosa zi muksi nara magau ba lisi chenani ba daŋni. Nidamata zi vɛ unu,

³⁵ ka ba wu lise naa sogli li gbampulim. I titi bambi zi botiu ka i na namsi kinkan. O zi chi ba kpa chise zenne di ba tau hin.”

³⁶ Koosa witinsi ta digi funɛ nyɛn doon a ya nihaan hɛɛ. Ba funɛ yir un Ana. O nyɛn baal dama ni bun fu nɔpɛwa ka o baal sou. O nyan sɔn funɛ ya Fanuɛl a li Asa lul ni.

³⁷ O funɛ ya luhaannɛ bun fummɛnasa danaasiwa. O funɛ nyɛn Koosa bar jɛɛmi dam ti nɛɛ a vɛ la bar digi. Nha wa dusum maga, o yaa funɛ jɛɛmi Koosarɛ a la sumi un a la vɔu nɔ.

³⁸ Saha naa Josɛf awa Mɛri funɛ sɛm Simiɔn wati, Ana fun wa gbaari ba ni dooni. O funɛ na be tiu, o fun a zaami Koosa o daha. O fun kaali a la ŋɔ Jɛrusalɛm tima ba naa maga funɛ pɔ di Koosa wa la ba nyuuna a nyɛ ba be ti wɛ ni.

Yesu Awa O Walɛ Fun Bur Kaali Nazarɛt

³⁹ Josɛf awa Mɛri funɛ tum chen peti chenani Koosa sɛm tɔn ti fun biksi ba, ba fun li Jɛrusalɛm ni a bur kaali ba tɔha Nazarɛt a li Galili pulum ni.

⁴⁰ Be ti funɛ biu a kpak kpok a gbaari. Koosa fun a suŋi un kinkan aa kpa o zima a nyɛ un.

Yesu Fun Nu Ju Tim Nibiksɛ A Li Koosa Bar Jɛɛmi Dam Ni

⁴¹ Bun maga Yesu nyan ti awa o niin ti yaa la Jɛrusalɛm di ba la di wuzu zen naa ba funɛ yir val la gali.

⁴² Yesu funɛ ya bun fidalɛ, ba fun la di wuzu zen wuzu ti dooni.

⁴³ Wuzu zen wuzu ti funɛ wa peti, o nyan ti awa o niin ti fun li dam nyinbaan. Ba wa fun zim di ba be Yesu ti ka kpalimi Jɛrusalɛm nɛɛ.

⁴⁴ Ba funɛ lisi di o lagmi nara nɛɛ. Ba funɛ val hali nha wa chɛl, ba fun gba ba dɔŋtima wati a dɛu o bar nyɛni.

⁴⁵ Ba wa fun na un, a bur kaali Jɛrusalɛm di ba la dɛu o bar nyɛni dooni.

⁴⁶ Wuzu butora gantɛl nɛɛ, ba fun la na un Koosa bar jɛɛmi dam ti ni. O wa Ju tim nibiksɛ funɛ kani a nu ba sɛma aa la pɛɛsi ba sɛma.

⁴⁷ Ba naa maga funɛ nyɛn dooni a nu chenani o sɛm ba wa nɛha sɛm ni, alaazibu fun kpak ba kinkan.

⁴⁸ O nyan ti awa o niin ti funɛ na un, alaazibu fun kpak ba gbanko kinkan. O niin ti fun ŋɔ un, “N be, yɛrɛ i ya ya nan? I nyana awa min nyini i bar nyɛni a vusi. I namsi yau kinkan.”

⁴⁹ O fun ŋɔ ba. “Yɛrɛ ma dɛu n bar nyɛni? Ma wa zim di o deŋlu wa mu fu nyɛn mu kunyan dam nii?”

⁵⁰ Amaa ba wa fun zim chenani o ŋɔ ba.

⁵¹ Yesu wa ba fun a bur kaali Nazarɛt. Dooni o fun tiŋ ba nɔ. O niin ti fun kpa chenani maga yɛɛ a du o bambi ni.

⁵² Yesu funɛ bi a kpak Koosa zima a gbaari. O fun ya Koosa awa nara tima lɛmlɛm kinkan a gbaari.