Luk 18 - Tampulma

Yesu Fun Ŋɔ Ba Luhaan Awa Sɛria Nidiili Wɛ

¹ Doone Yesu fun biksi ba jɛɛgi nɔ, chen ni ba zi sumi Koosa saha maga a ta bur gantɛl.

² O fun ŋɔ ba, “Sɛria nidiili funɛ nyɛn tɔ digi ni. O wara nyɛ Koosa awa nara jirima.

³ Luhaan digi gbanko funɛ nyɛn tɔhɔn ti ni. O yaa funɛ wa sɛria nidiili ti wati di o suŋi un o di o dɔŋtiina a li sɛria bar diili ni.

⁴ O funɛ vusiu ka o vɛ suŋi un. A gantɛl nɛɛ o fun lisi o tuhu ni, ‘Mu wara nyɛ Koosa awa nara jirima,

⁵ amaa luhaan nɔ muksi minu kinkan. Chendaha mu zi suŋi unu o di o dɔŋtiin ti a li sɛria bar diili ti ni. N vɛ suŋi un, o zi muksi minu saha maga hali n wa ku.’ ”

⁶ Yesu funɛ ŋɔ jɛɛgi ti peti, o fun ŋɔ ba, “Ma lisi chenani sɛria nidiili tagin ti tum.

⁷ Koosa wa chi un. Ba naa o fun lisi a nyɛ o titi ni yaa sumi unu di o suŋi ba, o wa zi vusi a ya chen.

⁸ Ma nyɛ mu ŋɔ ma, o zi di ba sɛria tiu a nyɛ ba lalaga. Hali n waa nibine be wa vusi tɛɛnɛ nɔ bur waali ni, ma doso a ta nyɛ ma se suuli bur gantɛl.”

Yesu Fun Ŋɔ Ba Farisi Tim Baal Awa Lampo Nilali Wɛ

⁹ Yesu gbanko funɛ ŋɔ jɛɛgi nɔ a nyɛ ba naa funɛ baa di ba yaa tum tum werewa aa nyini ba dɔŋtima a chi bichɛsa.

¹⁰ O fun ŋɔ ba, “Nara balɛ funɛ nyɛn doon. Wuzu digi ba fun kaali Koosa bar jɛɛmi dam ti di ba la sumi Koosa. Digi funɛ ya Farisi tim ta baallɛ. Digi ka ya lampo nilali.

¹¹ Farisi tim ta baal ti fun la chiŋi o duŋduŋ a sumi Koosa a ŋɔ, ‘Mu kunyana Koosa, mu zaami hinu di n wa nara wa ya kibɛgim. Ba waa la daŋni malɛ ka ba se vɛ su ba dɔŋtima, ka ba daŋni nihaana yɔri yɔri. N zaami hinu n wa chi lampo nilali naa chiŋi dooni chen.

¹² N yaa vɔu nɔ bilɛwa wuzu bunɔpɛ tuhu ni, aa lisi kin nawara maga n la chen fi a nyɛ hin.’

¹³ Lampo nilali naa funɛ kpak o titi a chiŋi gantɛl ni, fun gur o nyuha a du tɛɛnɛ ni a mo o bambi a ŋɔ, ‘Mu kunyana Koosa, mu ya tum tagna nitumirɛ. Mu sumi hinu, ɔm min siki.’ ”

¹⁴ Yesu funɛ sɛm jɛɛgi ti peti, o fun ŋɔ nara tima ni, “Nara balɛ ta funɛ kaali ba damsa, Koosa wa fun bu na lampo nilali ti galimsa ka Farisi tim ta baal ti galimsa kpalimi un ni. Nar la zer o titi buudaha, Koosa zi nyɛ o chelu. Nar ka kpa o titi a burgi gantɛl tiŋna, Koosa zi zer un buudahau.”

Yesu Fun Sumi Koosa A Nyɛ Bichɛsi Ni

¹⁵ Nara fun kpa ba bisa a wa Yesu wati di o kpa o nisa a gbaŋsi ba a du ba alaafɛ. O gantɛl tiŋsi ta fun a nyiigi ba.

¹⁶ Amaa Yesu fun yir bisi ta di ba wa, a ŋɔ o gantɛl tiŋsi ta ni, “Ma ta duŋni ba. Ma wa zim di ba naa se su min a chi bichɛsa, ba waa nyɛn Koosa koor ti nii?

¹⁷ Ma nyɛ mu ŋɔ ma, nar la nɔɔni a chi bichɛla di Koosa dɔ un, Koosa zi wa dɔ unu.”

Ju Tim Nihɛɛ Naa Funɛ Ya Kin Tiina

¹⁸ Chen saha ti Ju tim ta nihɛɛ digi fun wa pɛɛsi Yesu, “Mu kunyan weri, yɛrɛ n kaa ya a wa na Koosa miisa naa vɛ kpak bɔ?”

¹⁹ Yesu fun burgi a pɛɛsi un, “Yɛrɛ i yir min i kunyan weri? Nandigi wa to a koti a ya nibin weri hali o wa peti see Koosa duŋduŋ.

²⁰ I piin zim Koosa chiksɛ tau. Koosa funɛ ŋɔ di, ‘Ma gil chɔkumsi tuma a ta kpuuli a ta ŋmɛɛli a ta suni wɛ. Maa nyɛ ma nyama awa ma numa jirima.’ ”

²¹ O fun ŋɔ, “Mu kunyana, kin naa maga n fun tiŋ n bichɛsi ni hali wa zinan.”

²² Yesu funɛ nu o sɛm ta, o fun ŋɔ un, “Wu bɛgim kaɛɛ i ha vɛ yaali. Kila a la kpa i kina maga a yogli a kpa malɛ ta a nyɛ fara tim ni. I ya chen, i zi wa na kinau a li Koosa wati a wa tiŋ min.”

²³ Ju tim ta nihɛɛ ti funɛ ya kin tiinnɛ kinkan. O funɛ nu Yesu sɛm ta chen, o tuha fun chɔk kinkan.

²⁴ Yesu funɛ na o sewa a zim di o tuha chɔku, o fun ŋɔ ba naa chiŋi dooni chen, “Ba naa ya kin tima, o zi bɔm ba watiu hali ba wa koti a zu Koosa koor ti.

²⁵ Bɔla koti zu nɛɛsi bɔ, kin tima gbanko zi koti a wa zu Koosa koor ti.”

²⁶ Ba nidigi fun pɛɛsi un, “Anti la zi koti a zu Koosa koor ti?”

²⁷ Yesu fun ŋɔ, “O li nibinsa wati, ba wa kikoti a zu Koosa koor ti. O ka li Koosa wati, ba zi koti a zu dooni.”

²⁸ Doone Pita fun ŋɔ un, “Kina, ya gil ya damsau a tiŋ hin.”

²⁹ Yesu fun ŋɔ un, “Wutirɛ n kaa ŋɔ ma nan. Nar gil o dama, o haan, o niinbisa, o nyana, o niina awa o bisa Koosa koor ti daha,

³⁰ Koosa zi wa bɔ un o chimu a bukoo gbaari un kinkan lalaknɔ a kpa o miisa naa vɛ kpak bɔ a nyɛ un.”

Yesu Fun Bukoo Sɛm O Sou Ti Wɛ

³¹ Yesu awa o gantɛl tiŋsa nara fidalɛ funɛ nyɛn nyinbaan nɛɛ aa la, o fun kpa ba a kaali ba duŋduŋ a ŋɔ ba, “Yaa la Jɛrusalɛmnɛ. Ya wa tel dooni, chen naa maga Koosa witinsi ta fun sɔbi mu waa nibine be wɛ zi wa ya wutiu.

³² Ba zi wa kpak min a du ba naa vɛ ya Ju tima nisa niu. Ba zi wa mɔmsi minu a pini mu zoma a tɔɔsi nantɔsa a du min ni,

³³ a tuk min wa vurmsi ni a kpu min. Wuzu butora wuzu Koosa zi lɛli minu a li mu sou ni.”

³⁴ Yesu gantɛl tiŋsi ta wa fun zim o sɛm ta mun. A muna funɛ sogliu ba wati.

Yesu Fun Tiibi Nyulum

³⁵ Ba funɛ wa dugli Jɛriko, baal digi fun nyɛn doon a kani nyinbaan nɔ ni. O funɛ ya nyulumnɛ a la sumi kina.

³⁶ O funɛ nu zɛmɛ ta la kaali chen, o fun pɛɛsi ba bɔnɛ, “Anti la wa?”

³⁷ Ba fun ŋɔ un, “Yesu naa ya Nazarɛt narrɛ.”

³⁸ O funɛ nu di Yesu la wa, o fun a tɛsi a yir un a ŋɔ, “Yesu, hin koor Devid bi luli. Ɔm min siki a suŋi min.”

³⁹ Ba naa funɛ val Yesu suwachak ni chen, fun nyiigi un a tɛsi di o gil chɛɛma. Amaa o fun vɛ a tɛsi kinkan a kaali chenani o fa tɛsi chen a yir un a ŋɔ, “Yesu, hin koor Devid bi luli. Ɔm min siki a suŋi min.”

⁴⁰ Yesu fun a chiŋi a ŋɔ di ba yir un o wa. Yesu fun pɛɛsi un,

⁴¹ “Baŋnɛ ii daŋni mu ya nyɛ hin?” O fun ŋɔ, “Mu kunyana, muu daŋni i lɛli mu sewa a nyɛ min.”

⁴² Yesu fun ŋɔ un, “Kina. I si suuli nyɛ i se ta lɛliu.”

⁴³ O se ta fun vaan lɛli. O fun tiŋ Yesu a la pɛgi Koosa. Zɛmɛ ta funɛ na chenani yɛɛ, ba gbanko funɛ pɛgi Koosa.