Luk 17 - Tampulma

Ma Doso Ba Naa La Mur Nara Di Ba Tiŋ Wu Tagna Nyinbaan

¹ Yesu fun bukoo biksi o gantɛl tiŋsi ta a ŋɔ ba, “Nibin bɔnɛ yaa daŋniu di ba mur nara ba tiŋ wu tagna nyinbaan. Yɛrɛ o kaa wa du nibinsa ba naa la tum chen ni?

² Nar mur bichɛla di o tiŋ wu tagna nyinbaan, ba kpa ŋmɛn a vɔu nam a zer laari o baŋna a kpa la yo du mɔɔga ni, chen fu zi bɔ o nyɛniu.

³ Ma doso. Ma niinbisa tum tum tagna a nyɛ ma, ma ŋɔ ba di ba ta bu wa tum chen. “Ba gil ba tum tagna ma gil a nyɛ ba.

⁴ O tum tum tagna nɔpɛ a nyɛ ma wuzu bɛgim. Saha naa maga o wa ŋɔ ma di ma gil nyɛ un, ma gil a nyɛ un.”

Chenani Si Suuli Tama Nyɛ Ma Tum Tum Zene Kinkan

⁵ Doone Yesu nitumɛ ta digi fun ŋɔ un, “Ya daŋni chenani ya se su hin iiu a gbaari.”

⁶ Yesu fun ŋɔ ba, “Ma lisi ŋmaga be wɛ. Ma se suuli iiee a chi a kibɛgim, ma zi koti a ŋɔ koom bugil niu di o si a la chiŋi teku ni. O nu ma nɔ.”

Chenani Ya Chi Koosa Dam Bisa

⁷ “Ma nyɛ n ŋɔ di ma nidigi kpak tumtumna ka o par i ŋmaha ni koo o nyini i piisisiwa. O wa tum peti a bur zu i dama, i zi ŋɔ un di o la ya diwe a di o titiuu?

⁸ Aai. Ma ya nyɛ o ya diwe a te nyɛ ma. Ma wa di diwe ta peti, o kaa zi na nyinbaanu a la di o diwe.

⁹ Tumtumna zim tum naa o tum, o wa bur a daŋni zaami.

¹⁰ Ma tum ma tuma a nyɛ Koosa ni a chi tumtum ti. Ma tum chen peti, ma lisi ma tusa ni, ‘Ya duŋduŋ ya o tumtumsa. Ya tum chenani o daŋni ya tumu.’ ”

Yesu Fun Tiibi Zaguma Nara Fi

¹¹ Yesu funɛ nyɛn nyinbaan ni a li Jɛrusalɛm chene, o fun la gali Samaria pulum awa Galili pulum ni.

¹² Wuzu digirɛ o fun la zu tɔ digi ka zaguma nara fi fun la chiŋi bar boli ni,

¹³ a tɛsi a ŋɔ, “Ya kunyana Yesu. Ɔm ya siki.”

¹⁴ Yesu fun na ba a ŋɔ, “Ma la Koosa dam kɔkɔɔrsi ta digi wati o la nyini ma.” Ba fun burgi a kaali. Ba funɛ nyɛn nyinbaan ti ni a la chene, ba maga fun na alaafɛ.

¹⁵ Ba nidigi funɛ na di o na alaafɛu, o fun bu kaali Yesu wati a la pɛgi Koosa kinkan.

¹⁶ O fun a gbiri a kpa o tila a gbaŋ tɛɛnɛ Yesu suwachak ni a zaami un kinkan. O funɛ ya Samaria tim baallɛ.

¹⁷ Yesu fun ŋɔ un, “Mu tiibi nara fire. Leene nara dikto ti kaali a vɛ bu waali?

¹⁸ Hɔɔr nɔ duŋduŋ bur wa di o wa pɛgi Koosa.”

¹⁹ Doone Yesu fun bukoo ŋɔ un, “Si a la. Chenani i si su min nyɛ i na alaafɛu.”

Saha Naa Koosa Koor Ti Kaa Wa Wa

²⁰ Wuzu digi Farisi tim ta bɔnɛ fun wa pɛɛsi Yesu, “Saha leemawa Koosa koor ti kaa wa?” O fun ŋɔ ba, “Ma wa kikoti a na un wa ma se ni.

²¹ O nyɛn nibinsa bambe nee. Chendaha nandigi wa kiŋɔ, ‘Ma na un bar nɔ koo dooni.’ ”

²² Doone Yesu fun burgi a ŋɔ o gantɛl tiŋsi ta na, “Namsi saha wa pu ma, ma zi daŋni ma na n waa nibine beu, amaa ma wa zi na min.

²³ Chen saha ka nandigi wa ŋɔ, ‘Kina waa nyɛn bar nɔ.’ Nandigi ka wa ŋɔ, ‘Waa nyɛn dooni,’ ma ta tiŋ o nɔ.

²⁴ Mu waa nibine be wa kaa bur wa, n zi wa chi nasɛha din ya nyiksi a su buudaha maga chenu.

²⁵ Amaa o zi wa te a namsiu kinkan ka tɛɛnɛ nɔ maga nara zi vɛ un.

²⁶ Mu waali ti zi wa chi chenani o fun du Nowa saha tirɛ.

²⁷ Saha naa Nowa funɛ kɔɔri o arŋ zen chen, nara maga funɛ nyɛn ba tutɔ nyɛnirɛ. Ba yaa funɛ di diweu a la nyɔ kinyɔɔlɛ ka nibaali kpa haanasa.

²⁸ Mu waali ti zi wa chi chenani o fun du Lɔt saha tirɛ. Nara maga yaa funɛ di diweu a la nyɔ kinyɔɔlɛ a yau kina a la yogli bɔnɛ a chɔɔsi kina a la sa dɛɛna.

²⁹ A wuzu naa Lɔt fun li Sɔdɔm ni, Koosa fun nyɛ din awa buŋkula li buudaha ni a chel ba ni. Ba maga fun siti.

³⁰ N waa nibine be waali zi wa chi chen saharɛ.

³¹ “Ba naa duglɛ dama a nu di mu bur wau, ba ta zu ba dɛɛna a pa ba kina. Ba naa nyɛn ŋmaana ni, ba ta bur la tɔhɔn ti.

³² Ma lisi chenani funɛ ya Lɔt haan.

³³ Nar la daŋni o si sɛrɛ wa o titi nyɛni, o zi wa chelu. Nar kpa min a te o tutɔ nyɛni, o zi wa na Koosa mi fali tiu.

³⁴ Nara balɛ zi wa chɔ dɛ bɛgim niu. Ba zi wa zer digiu a ka digi.

³⁵ Nihaana nara balɛ kaa wa nam sau. Ba zi wa zer digiu a ka digi.” ((

³⁶ A wuzu ti nara balɛ zi wa par ŋmaha niu. Koosa malaikasi ta zi wa zer digiu a ka digi.))

³⁷ Doone Yesu gantɛl tiŋsi ta fun a pɛɛsi un, “Ya kunyana, yɛrɛ o kaa wa du ba naa ka chen ni?” Yesu fun ŋɔ ba, “Ma zim chenani zuugsa yaa wa go kisiweu. Chen vɛɛna, kin nama maga wa ya, ma zi zim di mu wau.”