Luk 15 - Tampulma

Yesu Fun Ŋɔ Ba Piisi Nyuksi Wɛ

¹ Wuzu digirɛ lampo nilalɛ awa ba naa la tum tum tagna damata fun wa Yesu wati di ba wa nu o sɛma.

² Farisi tim ta awa Koosa chiksɛ nibiksɛ ta bɔnɛ funɛ lagmi dooni. Ba funɛ na lampo nilalɛ ta awa tum tagna nitumɛ ta ka ba chiŋi dooni, ba zulimi a la ŋɔ dɔŋ ni, “Baal nɔ, o tuha funɛ sɔɔniu o na ba ka ba wa chen. Hali o wa ba lagmi a di diwe.”

³ Yesu funɛ zim chenani ba ŋɔ dɔŋ niu, o fun jɛɛgi jɛɛgɛ a ŋɔ ba,

⁴ “Nar kpak o piisisi kɔkwa ka a kibɛgim nyuksi, yɛrɛ ma lisi di o zi yau? O zi gil o dɔŋtim ta aa di diwe a la dɛu unu.

⁵ O wa la na un, o tuha zi sɔɔniu kinkan. O zi zer unu a baasi a la dama,

⁶ a yir o chɛnsa awa o dɔŋtima di ba wa lagmi o dam ni. Ba wa lagmi, o zi ŋɔ bau, ‘Mu na piisi nyuksi tiu, adaha ma nyɛ ma wa min tusa sɔɔni.’ ”

⁷ Doone Yesu fun ŋɔ Farisi tim ta awa Koosa chiksɛ nibiksɛ ta ni, “Tum tagna tiina gil o tum tagna yaali a burgi tiŋ Koosa nyinbaan, ba naa nyɛn o tɔhɔn ti ni, tusa zi sɔɔniu o daha a kaali nara kɔkwa di kibɛgim wa to ba naa piin bur tiŋ un.”

Nihaan Naa Nyuksɛ O Malɛ

⁸ Yesu fun jɛɛgi jɛɛgɛ digi a ŋɔ ba, “Nihaan digi funɛ kpak malɛ aniita kin fi. A kibɛgim nyuksɛɛ, yɛrɛ o kaa ya? O zi suk fitinau a chaasi o dɛ a doso a nyini o bar mak ni hali a wa na un.

⁹ O na o malɛ ti, o tuha zi sɔɔniu kinkan. O zi yir o chɛnsau awa o dɔŋtima di ba wa lagmi o dam ni. O zi ŋɔ bau di o na o malɛ tiu. Chendaha ba nyɛ ba tusa gbanko sɔɔni.”

¹⁰ Yesu fun ŋɔ ba, “Chen vɛɛna, tum tagna tiin digi wa gil o tum tagna yaali a burgi tiŋ Koosa nyinbaan, o malaikasi ta tusa ya sɔɔniu kinkan.”

Baal Naa Nyuksɛ O Be A Bu Na Un

¹¹ Yesu fun jɛɛgi jɛɛgɛ digi a gbaari a ŋɔ ba, “Baal digi funɛ nyɛn a kpak bisa lɛ.

¹² Wuzu digi bichɛl tiina fun wa o nyan ti wati a ŋɔ un, ‘Mu nyana, i wa sou, mu maana awa min zi purigi i kin tau, amaa purigi a lalaknɔ a nyɛ min n tori.’ O nyan ti fun la nɔɔni a purigi o kin tima a bɔni o bisa nara balɛ ta.

¹³ Wuzu bilɛ wuzu bichɛl tiin ti fun kpa o tori ti a yogli, a fun kpa o malɛ a li dam ti ni. O funɛ gbau a kaali tɔ bar boli a la di o malɛ ta maga womsini.

¹⁴ O funɛ di o malɛ ta womsini chen, lɔsa fun wa chel tɔhɔn ti ni. Kundɔŋ ka waa fun bu to o zi yau diwe a di.

¹⁵ Adaha o fun kaali di o la tum tuma baal digi wati tɔhɔn ti ni. Baal ti fun kpa un a kaali o ŋmaha di o la nyini o kurchusa.

¹⁶ Lɔsa funɛ kpak un kinkan, o daŋni o gbaari kurchusi ta ni a di sinpire ta. Nandigi wa fun nyɛ un diwe di o di.

¹⁷ O fun ya chen wuzu bilɛ a kpak o titi. O fun lisi o tuhu ni, ‘Mu nyana tumtumsa maga yaa di diweu a puŋ aa ka. Amaa min ka nyɛn bar nɔ, lɔsa daŋni o kpu min.

¹⁸ N zi siu a la mu nyan wati a la ŋɔ un di n tum wu taginu a du o wa Koosa ni.

¹⁹ O wa bu deŋli di o yir min o be, amaa o kpa min a burgi o tumtumsi ta digi.’

²⁰ O fun lisi o tuhu ti ni peti, o fun si a bur kaali o nyan dama. “O funɛ wa dugli o nyan dam ti chen, o nyan ti fun na un ka o wa. O be ti wɛ fun ya un siki kinkan. O fun chɔ a la chem un nyinbaan ni a kpa o nisa a kur un a mɔksi un.

²¹ Be ti fun ŋɔ o nyan ti ni, ‘Mu nyana, mu funɛ tum wu taginu a du i wa Koosa ni. O wa bu deŋli di i yir min i be.’

²² Amaa o nyan ti funɛ burgiu a yir o tumtumsi ta a ŋɔ ba, ‘Ma val lalaga a la zer mu gar weri a kuwa a wa laari un a la zer gbin gbanko a wa du o nin awa natausa a wa du o naŋgere.

²³ Ma wa ya nan a peti, ma la kpak mu nuchamsi a kpu a ya diwe ya wa lagmi a di awa tu sɔɔni.

²⁴ N funɛ baa di n be nɔ sowu, amaa o ha vɛɛn nyɛnu. Mu funɛ nyuksi unu, amaa lalaknɔ mu na unu.’ O fun kpa o be ti wa di ba lagmi a di diwe.

²⁵ “Be ti nyan ti funɛ zaami un nyinbaan ti ni, bi hɛɛ ti waa funɛ nyɛn ŋmaha nɛɛ. O funɛ li ŋmaha ti a wa dugli dama, o fun nu kimuse awa boola a li o nyan ti dam ni.

²⁶ O fun a yir o nyan ti tumtumsi ta digi a pɛɛsi un, ‘Baŋa la ya dam ni nan?’

²⁷ Tumtum ti fun ŋɔ un, ‘I niinbe ti bur wa dama awa alaafɛ ni. I nyan ti kpu o nuchamsi a nyɛ un o bur wa dam daha.’

²⁸ O funɛ nu sɛm ta, o fun na paan kinkan di o wa zi la zu dam ti. O nyan ti funɛ nu di o bi hɛɛ ti na paannɛ, o fun li a wa sumi un di o wa gbaari ba ni.

²⁹ Amaa o fun ŋɔ o nyan ti ni, ‘Kunu mu wati. Bunsa naa maga n tum a nyɛ hinu a chi yoma a la nu i nɔ. I wa nyɛ min hali buun di n wa mu chɛnsa kɔɔrigi a di diwe.

³⁰ Amaa i be nɔ funɛ di i malɛ magwa womsini a kpa a a daŋni nihaana yɔri yɔri. O funɛ wa bur wa dama, i funɛ kpu i nuchamsirɛ a nyɛ un.’

³¹ O nyan ti fun ŋɔ un, ‘N be, i waa nyɛn dam nɛɛ saha maga. Kin naa maga n kpak ya i kinawa,

³² amaa n funɛ baa di i niinbe ti sowu, amaa o ha vɛɛn nyɛnu. N funɛ nyuksi unu amaa lalaknɔ n na unu. Chendaha ya kpu mu nuchamsi ti a lagmi a di diwe wa tu sɔɔni ni.’ ”