Luk 12 - Tampulma

Yesu Fun Ŋɔ Ba Di Ba Doso Wa Nusun Tim Ni

¹ Nara tusugsa funɛ lagmi dɔŋ ni aa zaksi dɔŋa, Yesu fun ŋɔ o gantɛl tiŋsi ta ni, “Farisi tim ta ya nusun timwa. Chendaha ma doso ba biksi ni.

² Kisogle zi wa li gbampulimu.

³ Chendaha o lawa ma biksi nara gbampulim ni chenani mu sogli a biksi ma.”

Naa Ma Zi Ɔm

⁴ “Ma ŋɔ mau, mu chɛnsa, ma ta ɔm ba nawara koti a kpu ma bara, amaa ba wa fun koti a tum chen a kaali.

⁵ Ma ka ɔm Koosa naa koti a chɔk ma bara a kpa kpok a zi kpak ma a du din dam ti ni. Wutirɛ mu ŋɔ ma, maa ɔm un.

⁶ “Ma koti a kpa kobosa lɛ a yau zimebisa nyuu a li yau ni. Koosa nin nyɛn a maga ni.

⁷ Ma wa wara hali Koosa funɛ gur ma nyuksau a li ma nyuhu ni. Adaha ma ta ɔm chenani nibinsa kaa ya ma. Ma wa kaali zimebisa kinkan Koosa wati.”

Chenani Ya Zi Ŋɔ Nara Ni Yesu Wɛ

⁸ “Nibine naa maga ŋɔ nara ni di min dɔ ba, n waa nibine be zi sɛm chenu a nyɛ Koosa malaikasi ta ni.

⁹ Nibine naa maga ka vɛ ŋɔ nara ni di min dɔ ba, n waa nibine be wa zi sɛm chen a nyɛ Koosa malaikasi ta ni.

¹⁰ “Nara pini n waa nibine be, Koosa zi koti a gil chen a nyɛ bau. Nara ka pini Koosa siim weri ti, Koosa wa zi koti a gil a nyɛ ba.

¹¹ “Nara zi wa kpa ma a la ba bar lagmi dɛɛna awa koorsa awa nihɛɛta suwachak di ba di ma sɛria. Chen wa ya, ma ta nyɛ chenani ma kaa wa sɛmi kimuksi ma.

¹² Koosa siim weri ti zi biksi ma chenani ma zi sɛmu.”

Yesu Fun Ŋɔ Ba Malɛ Tiin Naa Funɛ Ya Wom Wɛ

¹³ Baal digi funɛ nyɛn zɛmɛ ta ni. O fun ŋɔ Yesu ni, “Mu kunyana, ya nyana sou a ka o kina. Ŋɔ mu maan ni di o purigi a bɔnɛ a nyɛ min.”

¹⁴ Yesu fun ŋɔ un, “N chɛna, o wa deŋli wa mu di ma sɛria a purigi a a nyɛ ma.”

¹⁵ Yesu fun burgi a ŋɔ zɛmɛ ta ni, “Nibine kpak un o bambi ni di o ya kin tiina, o tuha wara sɔɔni. Chendaha ma doso a ta tiŋ chen.”

¹⁶ Doone Yesu fun jɛɛgi ba jɛɛgi a ŋɔ, “Malɛ tiin digi funɛ nyɛn dooni a kpak o ŋmaha. O ŋmaha ti kiparɛ fun wer. Saha naa kin kumi fun wa tel,

¹⁷ o fun lisi o tuhu ni, ‘N wa zim chenani mu kaa ya. N wa kpak bar chiŋsi a la zi koti a chiŋsi n kina magau.

¹⁸ N zim chenani n zi tumu. N zi chɔk n kin bar chiŋsɛ tau a bukoo kɔɔri kinkin naa zene a kaali a. N ya chen, n zi koti a chiŋsi mu kikumɛ ta awa mu kina magau.

¹⁹ Saha naa ba wa kpa n kina maga a chiŋsi dooni, n zi kpak diweu hali bun damata. N zi koti a hiisiu a kiya mu tutɔ.’

²⁰ O funɛ peti chenani o lisi o bambi ni, Koosa fun wa ŋɔ un, ‘I ya nibin womnɛ. Dusum nɔ i zi sowu. I kin naa maga i kpa chiŋsi nan, a wa zi kpak wu digi wa hin.’ ”

²¹ Yesu funɛ sɛm a wa mak o bɔ, o fun ŋɔ zɛmɛ ta ni, “Ba naa ya malɛ tima ba titi wati, amaa ba wa kpak wu digi Koosa wati, nannɛ o zi wa du.”

Koosa Nyɛ Ya Kin Naa Maga Ya Daŋniu

²² Yesu fun bukoo ŋɔ o gantɛl tiŋsi ta ni, “Nan nyinbaan nɛɛnɛ n sɛm ma. Saha maga maa daŋni diwe awa kilaarɛ. Ma ta nyɛ kin nama muksi ma.

²³ Ma miisa wa kaali ma diwe taa? Ma bara wa kaali kilaarɛ ta ma laarɛ chenn?

²⁴ Ma nyini kosi naa la za buudaha ni. A wara par ŋmaana koo a kum kiparɛ koo a kpa a a du napagsi ni. Koosa la nyini a. Ma wa kaali kosi ta kinkann?

²⁵ O muksi ma a li bunsa naa ma zi nyɛn ni, chen wa zi gbaari a ni.

²⁶ O muksi ma chenani ma zi nyɛn ka chen vɛ gbaari ma bunsi ni, yɛrɛ ma nyɛ kizenzen wɛ muksi ma?

²⁷ Maa nyini chenani kɔsa yeligisa du. A wara tum tuma koo a ar kilaarɛ a nyɛ a titi ni. Amaa n ŋɔ mau, ma lisi koor naa ba funɛ yir Solomon chen. O funɛ ya malɛ tiinnɛ saha digi a kaali ba maga, amaa o wa fun laarɛ kilaarɛ a wer a chi kɔsa yeligisa na.

²⁸ Koosa la nyɛ kɔsa wa kilaarɛ. A wa bi a vusi ka limaŋ wa pisi, din yaa di a. O wati ma wa kaali kɔsa kinkan. O wa zi bu koti a nyɛ ma kilaarɛɛ? Ma se wa su un nɛnɛ.

²⁹ “Ma ta muksi ma titi a ŋɔ, ‘Yɛrɛ ya kaa ya na diwe a di? Yɛrɛ ya kaa ya na kilaarɛ a laarɛ?’

³⁰ Kin namawa ba naa vɛ ya Ju tima yaa daŋni chen, amaa ma kunyana Koosa zimu di maa daŋni kin ta magau.

³¹ O lawa ma nyɛ chenani Koosa dɔ ma te nyɛ ma bambe ni. Maa lisi nan, o zi kpa kin naa maga ma daŋniu a nyɛ ma.”

Chenani Ya Zi Chiksi Kidamata A Li Koosa Tɔhɔn Ni

³² “Ma naa chi mu piisisa, ma ta ɔmi. Chenani ma kunyana Koosa dɔ ma ya un lɛmlɛmu kinkan.

³³ Ma kpa ma kina maga a suŋi ba naa la daŋni a. Ma ta chiŋsɛ kidamata a li tɛɛnɛ nɔ maga ni. Ma ka chiŋsɛ kidamata a li Koosa tɔhɔn ti ni. Chau wa zi wa chɔk a ka ŋmɛɛrsa wa chɔk dɛ ti a ŋmɛ a dooni.

³⁴ Ma bambe zi nyɛn doonani ma kidamata nyɛnu.”

O Lawa Ya Chi Tumtumsa Ba Naa Yaa Pɔ Ba Kunyana

³⁵ “Ma saksi a kirsi ma kilaarɛ aa suksi ma fitina,

³⁶ a chi chenani tumtumsa yaa pɔ ba kunyana di o li haan fali dama a bur wa chene. O wa tel a yir, ba zi koti a puk zɔɔnɔu lalaga.

³⁷ Ba kunyan ti na ba ka ba si a saksi a pɔ un chen, o tumtumsi ta tusa zi sɔɔniu. O zi saksi o titiu a kpa diwe a wa nyɛ ba.

³⁸ O wa bur a wa tɔhɛɛsa koo saha naa zimal hɛɛta yaa yeligi chen ka o tumtumsi ta saksi a pɔ un, ba tusa zi sɔɔniu kinkan.

³⁹ Maa nu mu sɛm na. Dam tiin zimɛɛ di ŋmɛɛr kaa wa zu ŋmɛ un, o zi saksiu a pɔ un, chen ni ŋmɛɛr ti wa kiwa koti a zu.

⁴⁰ Saha naa ma vɛ wa lisi di n waa nibine be zi bur wau. Chendaha maa saksi saha maga.”

Tumtumna Weri Awa Tumtumna Tagin Wɛ

⁴¹ Pita fun ŋɔ Yesu ni, “Mu kunyana, i biksi nan jɛɛgi nɔ a nyɛ ya nɛɛ koo nara maga ni?”

⁴² Yesu fun ŋɔ un, “Ma anti la zi ya wuti tima awa ninɛɛgɛ a li kin nama maga ni? O chi dam tiin naa lisɛ o tumtumsa nidigi di o nyini o dam nara a kinyɛ ba diwe diili saha.

⁴³ O kunyan ti wa la a bur wa a na di o tum chenani o ŋɔ un, o tumtum ti tuha zi sɔɔniu.

⁴⁴ N ŋɔ ma wutirɛ, o kunyan ti zi nyɛ o nyini o kina magau a nyɛ un.

⁴⁵ Amaa tumtum naa o lisɛ chen vɛ ya wuti tiina, o titi niu di o kunyan ti zi vusiu. Adaha o zi tuk o daŋ tumtumsi ta. O gbanko zi la lagmi ba naa nyɔ sin a dɛɛsiu a di diwe.

⁴⁶ A wuzu naa o vɛ lisi di o kunyan ti zi wau, o zi wau. O kunyan ti zi wa na paanu kinkan a kpa un a gbaari ba naa vɛ tum chenani ba ŋɔ ba a ta un yɔri. Dooni o zi wa wiu kinkan a se o nyina.

⁴⁷ “Tumtum zim chenani o kunyana daŋni o tum, ka o baga vɛ nyɛni di o tum chen, o kunyan ti zi tuk unu wa vurmsi niu kinkan.

⁴⁸ Tumtum naa vɛ zim chenani o kunyana daŋni o tum ka o kunyan ti tu vɛ sɔɔni wa chenani o tumi, o zi tuk unu wa vurmsi ni tama. Koosa zi pɛɛsi ba naa zim chenani o daŋni ba tum a kaali ba naa vɛ zim chenani o daŋni.”

Chenani Nara Zi Purigi Dɔŋ Ni

⁴⁹ Yesu fun bukoo ŋɔ ba, “Ma zimu chenani din yaa di ka tɛɛnɛ weru. Mu biksi ti chi chene. Mu daŋni kinkan di tɛɛnɛ nɔ maga nara zi wa na nyinbaanu a nu un.

⁵⁰ O lawa mu namsiu kinkan. Mu tuha wa sɔɔni hali mu namsi saha wa peti.

⁵¹ Ma ta lisi di mu biksi nɔ zi nyɛ nara lagmi a nyɛn wa bar sɔɔni. O ka zi nyɛ nara purigi dɔŋ niu.

⁵² Nan saha nɔ a kpa la, n zi wa lisi nibaal awa o haan wa bisa nara banyuunu a purigi ba. N zi purigi nara baturau a du nara balɛ ni.

⁵³ N zi wa burgi nyama a du ba nibabichɛsa ni, nihabichɛsa a du ba num ni, awa ba bisa haanasa a du ba hilsa ni.”

Ju Tima Wa Zim Ba Saha Ti Mun

⁵⁴ Yesu gbanko fun ŋɔ zɛmɛ ta ni, “Ma na dobaala ka a li nha bar yɛli a la nha bar cheli, ma zim di doon kaa mi. Ma sɛm wutirɛ.

⁵⁵ Ma ya na ka fufuk wa ya, ma yaa zimu di limaŋ saha pisu. O sir ya wuti.

⁵⁶ Ma ya nusun timwa. Ma zi nyini buudahau awa tɛɛnɛ aa zim chen mun. Yɛrɛ ma vɛ zim chenani mu duuli?”

Ma Nyɛ Ma Wa Ma Dɔma Ya Chɛnsa

⁵⁷ “Yɛrɛ ma titi vɛ lisi chenani were a tumi?

⁵⁸ Nar kpa ma la sɛria bar diili dɛ, nyɛ ma wa un ya chɛnsa a la nyinbaan ni. Ma vɛ ya chen ka ma la tel, o zi kpa mau a du sɛria nidiile tima digi nin ni. Nidiili ti ka kpa ma a nyɛ lanjima ni o tɔ ma dɛ.

⁵⁹ N ŋɔ mau, ma zi nyɛn dooniu hali ma wa bɔ ma chim maga.”