Juud 1 - Tampulma

¹ Mu waa, Juud, naa ya Yesu Kristo tumtumna awa Jems niinbe, min la sɔbi tɔn nɔ a nyɛ ma. Ya kunyana Koosa fun lisi ma a la daŋni ma ka Yesu Kristo kok ma.

² Koosa zi kpak ma sikiu a kidaŋni ma a nyɛ ma bara sɔɔna aa gbaari.

Chenani Nara Bɔnɛ Daŋni Ba Mur Nara

³ Mu bi daŋnɛ, mu funɛ daŋni mu sɔbi a sɛm ma chenani Koosa fun a yisi ma awa ya a li ya tum tagna ni yaa tiŋ un. Lalaknɔ o lawa mu sɔbiu a kpami ma ma kpak laaboor weri naa ya fun biksi ma Koosa wɛ chen nɛnɛ. Waa funɛ kpa o wuti nɔ a nyɛ o nara ni bu bɛgim.

⁴ Amaa ba naa vɛ tiŋ Koosa, bɔnɛ fun sogli a wa gbaari ma ni. Ba funɛ chɛrgi Koosa laaboor weri naa biksi ya chenani Koosa fun a suŋi ya, a vɛ Yesu Kristo naa ya ya kunyana bɛgim. Ba funɛ ya chene di ba tum chɔkumsa tuma. Ba fun sɔbi a li Koosa sɛm tɔn ti ni saha digi di Koosa zi wa di ba sɛriau a na ba galimsa.

⁵ Ma piin zim kin nama wɛu nɛnɛ. Mu daŋni mu lisi mau saha naa Koosa fun a lisi Ju tima a li Ijipt pulum ni saha digi. A gantɛl nɛɛ o fun a kpu ba naa se vɛ su un.

⁶ Koosa malaikasa ba naa funɛ vɛ o nɔ a li ba bar nyɛni ni, Koosa fun kpak ba a vɔu birsi bar nyɛni ni wa kpok ni hali wuzu zen naa o zi wa di ba sɛria.

⁷ Ma gbanko lisi tɔsi naa ba yir Sɔdɔm awa Gamɔra awa tɔsi naa go a saha digi. Ba naa funɛ nyɛn dooni yau a chi Koosa malaikasi ta yaali. Ba fun a tum chɔkumsi tuma ka nibaala daŋni nibaala. Koosa fun kpa din naa vɛ kpak bɔ a kpa ba du a lɛrgi ba diŋsa kinkan. Nan la biksi ya di ya ta tiŋ chenani ba tiŋi.

⁸ Chen vɛɛna, nara nama la na kina a naa nyɛ ba tum tum tagna a du ba titi bara ni a chi ba deesi. Baa tiŋ ba tutɔrɛ a la pini Koosa malaikasa zoma.

⁹ Hali Koosa malaikasa nyuhu tiina naa ba yir Maikil, wa tun nan. O wa sintana funɛ di amɔrɛ di anti maa wa dɔ Mosis bara, o titi wa fun pini sintana zoma a di un sɛria, amaa o funɛ ŋɔ di Koosa la zi zulimi un.

¹⁰ Amaa nara nama pini kin nawara ba vɛ zimi zomwa. Tum naa baa tum a wa kpak nɛha a chi sela, a zi chɔk bau.

¹¹ Yɛrɛ o kaa wa du ba ni? Ba tiŋ chenani Keen fun tiŋ saha digirɛ. Ba waa la tum tum tagna di ba na nyɔɔra a chi Beelim funɛ tum saha digi chen. Ba zi sowu a chi chenani Kɔɔra fun sou chen, domi o funɛ burgi o gantɛlu a chak Mosis saha digi.

¹² Ba wa ma lagmɛɛ di ma di diwe, ba nyini ba duŋduŋnɛ a la di a la nyɔ kinkan. Chen la chɔk ma lagmi ti. Ba chi dobaala naa peha ya a vɛ mi doone. Ba chi bugili naa vɛ koti a nɔɔnirɛ, chen ni nara wa hur a luta a chɛsi a siti.

¹³ Ba chi chenani peha yaa wa mo ni chene ka ba tum tagna naa nyɛ ba na hiisa a chi ni fukla. Ba chi wula naa nyɛn buudaha ni a gba chene. Koosa zi kpa au a du birsi ni hali saha naa vɛ kpak bɔ.

¹⁴ Baal digi funɛ nyɛn doon ba yir un Inɔk. O funɛ ya Adam bi lulɛ nidigirɛ a sɛm ba wɛ saha digi a ŋɔ, “Kina, Koosa wa o malaika damata wa wa,

¹⁵ ba zi wa di nara maga sɛriau. Ba naa maga la tum tum tagna a sɛm sɛm tagna aa du Koosa ni, o zi na ba galimsau a ta ba yɔri.”

¹⁶ Nara nama yaa zulimi a la na nara galimsa saha maga. Ba yaa tiŋ ba titi daŋnirɛ a la daŋni sɔna a la pɛgi nara wa ba nyina ni di ba tiŋ ba a nyɛ ba malɛ.

Maa Tiŋ Koosa Nɛnɛ Aa Gbaari

¹⁷ Mu bi daŋnɛ, ma lisi chenani ya kunyan Yesu Kristo nitumɛ fun te biksi ma,

¹⁸ a ŋɔ, “Tɛɛnɛ nɔ maga siili saha wa dugli, ba naa la tiŋ ba titi daŋnɛ, zi wa mɔm mau a li ma Koosa nyinbaan tiŋi ni.”

¹⁹ Nara nama wara tiŋ Koosa siim weri ti nyinbaan, amaa baa ka tiŋ tɛɛnɛ nɔ tim maga nyinbaannɛ. Chendaha ba nyɛ nara purigi dɔŋ ni.

²⁰ Amaa, mu bi daŋnɛ, maa tiŋ Koosa nɛnɛ a gbaari, domi ma se su un. Ma nyɛ o siim weri ti suŋi ma maa sumi Koosa.

²¹ Koosa daŋni mau. Chendaha maa tiŋ un nɛnɛ a ta gil o nyinbaan. Maa pɔ ya kunyan ti Yesu Kristo. O wa bur wa, o zi kpak ma sikiu a nyɛ ma o mi fali naa vɛ kpak bɔ.

²² Maa kpak ba naa la beeli wa siki,

²³ a yisi ba a li bar tagin ni. Ma gbanko kpak ba naa bur Koosa nyinbaan tiŋi ti ni siki. Amaa ma doso wa ba tum tagna ni a ha a.

Ma Nyɛ Ya Pɛgi Koosa Naa Kpak Jirima Kinkan

²⁴ Koosa kote a kpak ma di ma ta bur gantɛl. Wuzu digi o zi nyɛ ma tu chaanau awa tu sɔɔna hali a wa peti a kpa ma a du o suwachak ni.

²⁵ Waa funɛ tum ya kunyana Yesu Kristo di o wa yisi ya a li ya tum tagna ni. Koosa naa ya nibɛgim duŋduŋ kpak jirima kinkan awa kpok a kaali kina maga a li o piili ni a wa zinan kpa la hali saha naa vɛ kpak bɔ. Ami. Ma zaami ba naa maga nyɛn ma wati a nyɛ min.