Ju 7 - Tampulma

Mɛlkizidɛk Funɛ Ya Koosa Dam Kɔkɔɔra Nizen

¹ Mɛlkizidɛk funɛ ya Koosa naa zenee, dam kɔkɔɔra a nyɛn saha digi. O funɛ ya tɔhɔn naa ba yir Selɛm, koorre. Wuzu digi Abraham fun la chem laal a kpu koorsa. O funɛ nyɛn nyinbaan ni a la dama chen, Mɛlkizidɛk fun la chem un a sumi Koosa a du un ni.

² Abraham fun purigi o kina maga fi fi a lisi a digi a nyɛ un. Mɛlkizidɛk sɔn, o mun ya, ‘koor naa tum o tuma a deŋli’. O gbanko funɛ ya Selɛm tim koorre. Sɔn ti mun ya, ‘koor naa kpak bara sɔɔna awa nara ni’.

³ Nandigi wa zim doonani o nyan awa o niina akoo o nawaalsa nyɛn. Nandigi wa zim saha naa ba fun lul un akoo saha naa o fun sou. Waa ya Koosa dam kɔkɔɔra hali saha naa vɛ kpak bɔ, a chi Yesu naa ya Koosa be chen.

⁴ Ma na chenani nibine zen mak. Abraham funɛ la chem laal a kpu koorsi ta a pa ba kina a bur wa, hali o fun a purigi au fi fi a lisi a digi a nyɛ un.

⁵ Koosa funɛ kpa o chiksɛ ta a nyɛ Mosis ni, o fun ŋɔ di Ju tim ta purigi ba kina fi fi a lisi a digi a nyɛ Koosa dam kɔkɔɔrsa ba naa ya Livai bi lulɛ ni. Hali ba wa nara tima maga funɛ ya Abraham bi lulɛwa, Koosa funɛ ŋɔ ba di ba ya chen.

⁶ Mɛlkizidɛk wa fun ya Livai bi lulɛ digi, amaa Abraham funɛ purigi o kina maga fi fi a lisi a digi a nyɛ un. Doone Mɛlkizidɛk fun sumi Koosa a du Abraham naa funɛ la chenani Koosa fun vɔu di o nyɛ un ni.

⁷ Naa sumi Koosa a du nara ni, waa zen a kaali ba naa o sumi a du chen ni.

⁸ Ju tim ta funɛ purigi ba kina fi fi a lisi a digi a nyɛ Koosa dam kɔkɔɔrsa, ba fun kpa un a nyɛ ba naa funɛ siti ni. Abraham funɛ lisi a li o kin ta ni a nyɛ Mɛlkizidɛk ni, o fun kpa a nyɛ naa ha vɛɛn nyɛn ni a chi chenani ba fun sɔbi a li Koosa sɔn tɔn ti ni chen.

⁹ Abraham funɛ lisi a li o kin ta ni a nyɛ Mɛlkizidɛk ni, o chi Livai gbanko funɛ lisi a nyɛ un.

¹⁰ Abraham be luli ha wa fun lul Livai, amaa o funɛ chi o ha nyɛn Abraham bara nɛɛ chen saha ti.

¹¹ Koosa chiksɛ ta awa Ju tim ta Koosa dam kɔkɔɔrsa funɛ lagmi dɔŋ ni. Ba wa fun koti a yisi Ju tima a li ba tum tagna ni hali a wa peti. Chendaha Koosa fun tum Yesu Kristo. O wa fun ya Ɛrɔn bi lulɛ digi. O ka funɛ ya Koosa dam kɔkɔɔrrɛ a chi Mɛlkizidɛk.

¹² Yesu funɛ wa di o wa chiŋi Ju tima Koosa dam kɔkɔɔrsa bar chiŋi ni, Koosa fun chɛrgi o chiksɛ a naa o fun kpa a nyɛ Mosis ni chen.

^13-14 Ya zimu di Yesu wa fun ya ba naa Koosa fun lisi ba ya o dam kɔkɔɔrsa bi lulɛ digi. O ka funɛ ya Juda bi lulɛ digirɛ. Mosis wa fun ŋɔ di Koosa lisɛ Juda walɛ di ba ya Koosa dam kɔkɔɔrsa. Chen saha ti hali wa zinan, Juda bi lulɛ digi wa toli a tum chen tuma.

Yesu Ya Koosa Dam Kɔkɔɔra Nifali

¹⁵ Lalaknɔwa ya piili a zim kin nama wɛ tama. Koosa dam kɔkɔɔra nifali a chi Mɛlkizidɛk funɛ wa ya wati.

¹⁶ Nibinsa wa fun lisi un di o ya Koosa dam kɔkɔɔra. Kpok naa li o miisa naa vɛ kpak bɔ ni nyɛ o du chen.

¹⁷ Ba fun a sɔbi a li Koosa sɛm tɔn ti ni di o ŋɔ Yesu ni, “Hin la zi ya mu dam kɔkɔɔra hali saha naa vɛ kpak bɔ a chi Mɛlkizidɛk”.

¹⁸ Lalaknɔ Koosa dam kɔkɔɔra nifali ti chiŋɛ Ju tima Koosa dam kɔkɔɔrsa bar chiŋi ni. Chenani ba fun tum wa kpak kpok a ya yɔri.

¹⁹ Chenani ya fun tiŋ Ju tim ta chiksɛ wa fun nyɛ Koosa bu vɛ na ya galimsa. Amaa lalaknɔ ya kpak bambi bɛgim a li naa nyɛ ya wa dugli Koosa.

²⁰ Ju tim ta funɛ lisi ba Koosa dam kɔkɔɔrsa, o wa fun hɛɛsi di chenani ba ya chen chiŋi.

²¹ Koosa funɛ nyɛ Yesu burgi ya Koosa dam kɔkɔɔra, o fun hɛɛsi di chenani o ya chen chiŋi. Ba fun sɔbi a li o sɛm tɔn ti ni di o ŋɔ un, “Hin ya mu dam kɔkɔɔra fali hali saha naa vɛ kpak bɔ. Mu fun hɛɛsi di mu wa zi chɛrgi mu bambi.”

²² Nan daha, ya zimu di chenani Yesu nyɛ ya wa Koosa ya nɔ bɛgim kaali chenani Ju tim ta wa un fun ya nɔ bɛgim.

²³ Ju tim dam kɔkɔɔrsi ta funɛ iiu, domi nihɛɛta funɛ sitiu ka bɔnɛ chiŋi ba bar chiŋɛ ni.

²⁴ Yesu ka ya ya Koosa dam kɔkɔɔra hali saha naa vɛ kpak bɔ. Nandigi wa kuwa chiŋi o bar chiŋi ni.

²⁵ Chendaha o koti a yisi ba naa maga se su un di ba wa Koosa wati, a li ba tum tagna ni hali a wa peti. O nyɛnu hali saha naa vɛ kpak bɔ a la sumi Koosa saha maga ba daha.

²⁶ Yesu ya Koosa dam kɔkɔɔra naa ya daŋni. Waa ya tu chaan tiina, a vɛ tum tum tagna hali tama. Koosa funɛ waligi unu a li nibinsa ba naa la tum tum tagna ni a kpa un a zini o zu Koosa tɔha di o kani o jirima bar kani ni.

²⁷ O wa Ju tima Koosa dam kɔkɔɔrsi ta wa ya nibɛgim. Ba waa yaa fun te kɔɔri kɔɔra a nyɛ Koosa ni di a chiŋi ba tum tagna bar chiŋi ni, a zi kɔɔri kɔɔra a nyɛ Koosa ni di a chiŋi nara tum tagna bar chiŋi ni. Yesu wa zi daŋni o ya chen. O funɛ sou chen, o fun kpa o titi a kɔɔri kɔɔra a nyɛ Koosa ni bu bɛgim duŋduŋ.

²⁸ Ju tim ta yaa funɛ tiŋ Koosa chiksɛu a la lisi ba Koosa dam kɔkɔɔrsa ba naa vɛ kpak kpok. Koosa ka fun lisi o be ti di o ya ya Koosa dam kɔkɔɔra a hɛɛsi di o wa zi wa chɔk chenani o lisi chen. O funɛ biksi Koosa di o yaa kitiŋ o nɔ a li kina maga ni a nyɛn hali saha naa vɛ kpak bɔ.