Ju 5 - Tampulma

¹ Saha digi Koosa fun a lisi o dam kɔkɔɔra a li Ju tim ta ni di o chiŋi ba bar chiŋi ni o suwachak ni. O fun kpa ba papaha a kɔɔri kɔɔra a nyɛ Koosa ni ba tum tagna daha.

² Ju tima Koosa dam kɔkɔɔra titi wa fun kpak kpok di o tum tum were saha maga. Chendaha o ya jɛrgɛ wa ba naa la tum tum tagna a vɛ koti a tiŋ Koosa chiksɛ ta nɛnɛ.

³ Domi o titi wa fun kpak kpok, o kɔɔri kɔɔra a nyɛ Koosa ni o tum tagna daha a gbaari nara kɔɔra ni.

⁴ Nandigi wa fun lisi o titi di o ya Koosa dam kɔkɔɔra, chen ni nibinsa zi nyɛ un jirimau. Koosa duŋduŋ lisi un, a chi chenani o fun te lisi Ɛrɔn saha digi chen.

⁵ Chen vɛɛna, Kristo wa fun lisi o titi di o ya ya Koosa dam kɔkɔɔra, chen ni ya zi nyɛ un jirimau. Ba fun a sɔbi a li Koosa sɛm tɔn ti ni di o ŋɔ un, “Zinan mu fa biksi narau gbampulim ni di mu ya i nyana.”

⁶ Ba fun bukoo sɔbi di o ŋɔ un, “Hin la zi ya mu dam kɔkɔɔra hali saha naa vɛ kpak bɔ, a chi Mɛlkizidɛk.”

⁷ Yesu funɛ nyɛn tɛɛnɛ nɔ maga ni a wa dugli siwi, o fun a sumi Koosa naa kpak kpok di o lisi un a li o sou ni. Koosa funɛ nu o sumiu, domi Yesu funɛ ya nibin jɛrgɛrɛ a la nyɛ un jirima.

⁸ Yesu ya Koosa bere, amaa Koosa funɛ biksi unu di o tiŋ o nɔ a li o namsi ni.

⁹ O funɛ biksi Koosa di o yaa kitiŋ o nɔ a li kina maga ni, Koosa fun koti a yisi ba naa maga tiŋ o nɔ a li ba tum tagna ni. Chenani o ya a nyɛ ba zi nyɛnu hali saha naa vɛ kpak bɔ.

¹⁰ Ma lisi di Koosa piin lisi un di o ya ba Koosa dam kɔkɔɔra a chi Mɛlkizidɛk.

Ba Naa Bur A Li Koosa Wuti Nyinbaan Ni Wɛ

¹¹ Mu daŋni mu ŋɔ ma wu damatiwa a gbaari chenani mu ŋɔ ma nan ni, amaa o bɔmu wa mu biksi ma, domi ma sɔɔnɛu wa ma zim.

¹² Ma ya Yesu nitiŋɛu a vusi, o fu lawa ma titirɛ kibiksi nara kin nama wɛ. Amaa ma ha vɛɛn a daŋni narawa kibiksi ma Koosa laaboor weri te tel kin timau. Ma chi bichɛsa ba naa la ɔsirɛ. Ma ha wa mak ku diili.

¹³ Yesu nitiŋɛ chi bichɛsa ba naa la ɔsirɛ, ba zim Koosa wuti biksi ti tamnɛ.

¹⁴ Yesu nitiŋɛ ba naa zim Koosa wuti biksi ti nɛnɛ, ba waa zim kiwere awa kitagna. Ba waa chi ba naa biee a di ku chen.