Ju 4 - Tampulma

¹ Chenani Koosa fun vɔu di ya zi wa zu o bar hiisi ti ha vɛɛn chiŋiu. Ma nyɛ ya doso a ta nyɛ ya se suuli bur gantɛl, chen ni Koosa zi nyɛ ya zu dooniu.

² Ba funɛ wa biksi ya Koosa laaboor weri ti wɛ a chi chenani Mosis gbanko fun biksi ba chen. Amaa ba wa fun na nyɔɔra a li un ni, domi ba se wa fun su un.

³ Ba fun a sɔbi a li Koosa sɛm tɔn ti ni di o ŋɔ, “Mu funɛ na paanu a ŋɔ nɔ a nyɛ ba a ŋɔ ba wa zi wa zu mu bar hiisi ti.” O funɛ naami tɛɛnɛ nɔ maga peti, Koosa fun zu doon. Saha ti kpa la, o funɛ pɔ ba naa se su un di ba wa gbaari un ni dooni.

⁴ Ba fun a sɔbi a li o sɛm tɔn ti ni a ŋɔ, “Wuzu bunɔpɛ wuzure Koosa fun naami tɛɛnɛ nɔ maga a peti a zu o bar hiisi ti.” Chendaha ya zim di o pɔ nannɛ.

⁵ Amaa ba funɛ sɔbiu di o ŋɔ, “Ba wa zi wa zu mu bar hiisi ti.”

⁶ Mosis funɛ biksi Ju tim ta Koosa laaboor weri ti wɛ a li nyabaan ti ni saha digi, ba se wa fun su un. Chendaha ba fun vɛ zu o bar hiisi ti. Nara bɔnɛ zu doon, domi Koosa vɔwi ti ha vɛɛn chiŋiu.

⁷ Hali o chiŋɛu zinan. Saha naa Mosis awa Ju tim ta fun nyɛn nyabaan ti ni ka Koosa vɔu koor Devid di o ya Ju tim koora, chen vusu kinkan. Ba funɛ sɔbiu a li Koosa sɛm tɔn ti ni di Devid ŋɔ, “Koosa sɛm sɛma ma wati zinan, ma ta nyɛ ma se kpoki ka ma vɛ a.”

⁸ Jɔsua funɛ chiŋi Mosis bar chiŋi ni a kpa ba a zu pulum naa Koosa fun vɔu di o kpa nyɛ ba chen, doon laata fun ya Koosa bar hiisi ti. O fu nyɛn dooni, o vɔu ti fu wa zi chiŋi zinan a chi chenani Devid fun sɔbi chen.

⁹ Wuzu bunɔpɛ wuzurɛ Koosa fun naami tɛɛnɛ nɔ maga a peti a zu o bar hiisi ti. Doonee ba naa maga se su un zi zu.

¹⁰ Ba naa zu dooni zi hiisiu a li ba tum ni, a chi chenani Koosa gbanko fun a hiisi a li o tum ni chen.

¹¹ Ma nyɛ ya kpak un a li ya bambe ni di ya zu dooni. Ma ta nyɛ ya vɛ o nɔ a chi ba naa funɛ tiŋ Mosis chen, chen ni Koosa wa zi wa nyɛ ya zu dooni.

¹² Koosa kpak miisa awa kpok kinkan. Chendaha o sɛm maga tum. A diu a kaali chi nɔsa lɛ a zu nara bambe ni a zim chenani ba lise maga du.

¹³ Kin naa maga Koosa fun naami chen, puku a li gbampulim ni Koosa se ni. Wuzu digi o zi wa pɛɛsi ya magau chenani ya tumu.

Yesu Ya Ya Koosa Dam Kɔkɔɔra Nizen

¹⁴ Ya kpak naa ya Koosa dam kɔkɔɔra nizenu. O ya Koosa be, Yesu ti. O fun bur a zini a zu Koosa suwachak ni ya daha. Nan daha, o lawa ya kpak chenani ya se su unu nɛnɛ.

¹⁵ Ya Koosa dam kɔkɔɔra ti zim chenani sintana ya wa zaamsi yau awa chenani ya vɛ kpak kpok a la daŋni ya chel. O funɛ nyɛn tɛɛnɛ nɔ maga ni, sintana fun zaamsi un a chi chenani maga o zaamsi ya lalaknɔ, amaa o wa fun chel hali tama. Chendaha o zim nan.

¹⁶ Domi ya Koosa dam kɔkɔɔr ti chiŋɛ ya bar chiŋi ni Koosa suwachak ni, ma nyɛ ya kpak bambi. Koosa zi wa kpak ya sikiu a kisuŋi ya saha naa maga ya daŋni un.