Ju 3 - Tampulma

Yesu Ya Nizen A Kaali Mosis

¹ Mu niinbisa, Koosa funɛ yir ma a lisi a nyɛ o titi ni. Ma lisi Yesu naa ya se su wɛ. Koosa funɛ tum un di o wa ya ya Koosa dam kɔkɔɔra.

² Saha digi Mosis wa fun bur gantɛl di o suŋi Ju tima ba naa ya Koosa narau, nɛnɛ. Chen vɛɛna, Yesu naa Koosa fun lisi di o suŋi ya, wa fun bur gantɛl a li ya suŋi ni nɛnɛ.

³ Ju tim ta chi damnɛ. Mosis funɛ ya dam ti bar digi, amaa Yesu funɛ ya naa sa un. Chendaha o jirima kaali Mosis jirima kinkan.

⁴ Damsi maga kpak a nisalɛwa, amaa Koosa duŋduŋ funɛ naami kina maga.

⁵ Mosis funɛ nyini Koosa dam walɛ nɛnɛ, amaa o funɛ ya Koosa tumtumnɛ. O fun te biksi ba chenani Koosa zi wa tum wuzu digi.

⁶ Amaa Kristo naa ya Koosa be, waa ya dam ti tiina. Ya kpak un nɛnɛ a nyɛ chenani ya kpak bambi bɛgim un ni ya ya jirima kin, ya ya o dam walɛwa.

Koosa Fun Vɔu Di Ya Zi La Zu O Bar Hiisiu

⁷ Ba fun sɔbi a li Koosa sɛm tɔn ti ni di o siim weri ti funɛ ŋɔ, “Koosa sɛm sɛma ma wati zinan,

⁸ ma ta nyɛ ma se kpoki a chi ya nawaalsa ba naa funɛ nyɛn nyabaan ni saha digi. Chen saha ti ba funɛ zulimi un kinkan a zaamsi un.

⁹ Hali o fun nyini ba dooni bun fumnaasi, ka ba ha fun vɛɛna muksi un kinkan.

¹⁰ Chendaha o fun a na paan a du ba ni a ŋɔ, ‘Ba yaa tum tum tagniwa saha maga, a vɛ tiŋ mu wuti nyinbaan.

¹¹ Mu funɛ na paanu a ŋɔ nɔ a nyɛ ba a ŋɔ, ba wa zi wa zu mu bar hiisi.’ ”

¹² Mu niinbisa, ma doso. Ma ta nyɛ ma se suuli bur gantɛl ka ma tum tum tagna, a bur tiŋ Koosa naa nyɛnɛɛ, nyinbaan.

¹³ Chendaha maa kpami dɔŋa wuzu kama, chen ni ma nidigi wa zi nyɛ sintana nyɛ ma se kpok a kimur ma maa tum tum tagna. Koosa koti a suŋi ya lalaknɔ, amaa wuzu digi o wuzu suŋi ti wa peti.

¹⁴ Ma lisi chenani ma se fun te su Kristo, ka ma fun wa zim un. Ma kpak un chen nɛnɛ hali ma nyɛni maga wa peti, ma zi wa bɔni o kinau wuzu digi.

¹⁵ Ba fun sɔbi a li Koosa sɛm tɔn ti ni a ŋɔ, “Koosa sɛm sɛma ma wati zinan, ma ta nyɛ ma se kpoki a chi ma nawaalsa ba naa funɛ nyɛn nyabaan ni chen. Chen saha ti ba funɛ vɛ unu kinkan.”

¹⁶ Anti watɛɛ Koosa fun sɛm sɛma saha digi ka ba vɛ un chen? O funɛ sɛm sɛmwa a nyɛ ba naa maga Mosis fun kpa li Ijipt pulum ni. Ba waa ya ba naa funɛ vɛ un.

¹⁷ Yɛrɛ Koosa fun na paan a du ba ni bun fumnaasi? O funɛ ya chene, domi ba funɛ tum tum tagniwa saha maga. O fun a na ba galimsa a nyɛ ba siti a li nyabaan ti ni.

¹⁸ Yɛrɛ o fun ŋɔ nɔ a nyɛ ba a ŋɔ di ba wa zi wa zu o bar hiisi? Ba funɛ vɛ unu. Chendaha o fun ŋɔ nɔ a nyɛ ba a chi chen.

¹⁹ Yɛrɛ Koosa fun ŋɔ di ba wa zi zu o bar hiisi ti? O fun ŋɔ ba chene domi ba se wa fun su un.