Ju 2 - Tampulma

Koosa Daŋni O Yisi Yau A Li Ya Tum Tagna Ni

¹ Chendaha o lawa ya kpaku nɛnɛ a li wuti biksi naa ya fun a nu a gbaari ni. Ya ya chen, ya wa zi a bur Koosa wuti nyinbaan ti ni.

² Ma zim chenani Koosa malaikasi ta fun a kpa o wuti chiksɛ a nyɛ Mosis ni saha digi. Ba naa maga tum tum tagna a vɛ tiŋ o nɔ, Koosa fun na ba galimsa a lɛrgi ba diŋsa. O funɛ deŋliu di o ya chen.

³ Ya kunyan Yesu titi funɛ te biksi nara chenani Koosa daŋni o yisi ba a li ba tum tagna ni baa tiŋ un. Ba naa funɛ nu o biksi ti, ba waa funɛ wa ŋɔ ya di o ya wutirɛ. Ya vɛ o wuti biksi naa ya kibirigi nan, yɛrɛ ya kaa ya a chɔɔli chenani Koosa zi na ya galimsa a lɛrgi ya diŋsa?

⁴ Koosa funɛ nyɛ ba tum tum zene awa alaazibu tuma a tiŋ o tutɔ a kpa o siim weri ti papaha a nyɛ ba di o biksi nara di o sɛm ta ya wutiu.

Chenani Yesu Sou Nyɛ O Burgi Ya Nyuhu Tiina

⁵ Lalaknɔ tɛɛnɛ nɔ maga wa chɔk ka Koosa kɔɔri kifali, o wa zi nyɛ o malaikasi ta dɔ un.

⁶ Ba funɛ sɔbi a li o sɛm tɔn ti ni di ba biksi ya di sɛm na ya wutiu. Ba fun ŋɔ, “Koosa, hin funɛ naami nibinsa a nyɛ ba kpok tama, amaa i baga nyɛn ba niu ka i nyini ba.

⁷ Saha naa la zi vɛ vusi, i funɛ nyɛ i malaikasi ta zenu a kaali ba, a kpa jirima awa chaani a nyɛ ba.

⁸ Hali i funɛ nyɛ ba dɔ kin naa maga i naamiu.” Ba funɛ sɔbi di nibinsa dɔ kina maga, o mun ya Koosa wa kpa kundɔŋ a ta. Amaa ya zimu di chenani Koosa sɛm chen ha wa ya,

⁹ amaa ma lisi Yesu wɛ. Koosa funɛ tum unu tɛɛnɛ nɔ maga ni a nyɛ o malaikasi ta zen a kaali un wuzu bilɛ, a nyɛ o sou nara maga daha, chen ni Koosa zi kotiu a suŋi ba. O funɛ sou chene, Koosa fun lɛli un a li o sou ni a nyɛ un o jirima awa o chaani kinkan.

¹⁰ O funɛ deŋliu di Koosa naa funɛ naami kina maga di a nyɛ un jirima, nyɛ o be Yesu namsi a sou a peti o tuma a chi chen, chen ni Koosa zi koti a yisi nidamatau a li ba tum tagna ni a nyɛ ba burgi o bisa ba naa wa Yesu la zi wa bɔni o jirima awa o chaani kinkan. Chenani Yesu sou funɛ nyɛ o burgi ba nyuhu tiina birigi.

¹¹ Naa funɛ nyɛ Koosa yisi ya a li ya tum tagna ni, o nyana awa ya nyana ya nibɛgimnɛ lalaknɔ. Chendaha Yesu vɛ kpak hiisa di o yir ya o niinbisa.

¹² Ba fun sɔbi a li Koosa sɛm tɔn ti ni di o ŋɔ, “O Koosa, mu zi biksi mu niinbisau i wɛ. Mu wa ba zi lagmi dɔŋ niu a lɔ boola a pɛgi hin.”

¹³ Ba fun bukoo sɔbi di o ŋɔ, “Mu zi nyɛ mu si su Koosau.” Ba fun bukoo sɔbi butora tiina di o ŋɔ, “Mu wa bisa naa Koosa fun kpa a nyɛ min, nyɛn bar nɔ.”

¹⁴ Ba naa o funɛ yir Koosa bisa, ba waa ya nibinsa. Chendaha Yesu fun burgi nibine naa kpok purɛɛ a chi ya, chen ni o zi sou a kpa sintana awa o sou kpoku a ta,

¹⁵ a yisi ba naa la ɔm sou a li un ni nidamatau a ta. Ba funɛ chi yosiwa ba ɔmi ti daha.

¹⁶ Yesu wa fun burgi Koosa malaikasi ta digi di o suŋi ba. O ka funɛ burgi Ju tima ba naa ya Abraham bi lulɛ, digirɛ.

¹⁷ Ju tim ta bɔnɛ funɛ ya Koosa dam kɔkɔɔrsa ba naa yaa kɔɔri kɔɔra a nyɛ Koosa ni, chen ni o zi lisi o nara tum tagnau a li ba ni. Yesu fun burgi a chi ya naa ya o niinbisa, chen ni o zi ya ya Koosa dam kɔkɔɔrau a kpak ya siki a nyɛ ya wa Koosa ya nɔ bɛgim. O wa fun bur gantɛl a li chenani Koosa funɛ daŋni o tum ni.

¹⁸ Sintana fun a zaamsi Yesu a nyɛ o na namsi kinkan. Chendaha o koti a suŋi ba naa sintana zaamsi lalaknɔ.