Ju 13 - Tampulma

Chenani Ya Zi Sɔɔni Koosa Tuha

¹ Ma maga ya niinbisawa. Chendaha o lawa maa daŋniu saha maga.

² Ma ta suglɛ di ma la hɔɔra aa du ma damsi ni. Bɔnɛ funɛ ya chene saha digi, ba wa fun zim di ba la Koosa malaikasiwa a du.

³ Maa lisi ba naa ba fun kpa la tɔ dɛ a chi ma nyɛn ba watɛɛ dooni wɛ. Maa gbanko kilisi ba naa la na namsi a chi ma titi la na namsi wɛ.

⁴ Nibaala awa ba haanasa kinyɛ dɔŋa awa jirima saha maga. Ba naa la daŋni nihaana yɔri yɔri a la tum chɔkumsa tuma, Koosa zi wa na ba galimsau.

⁵ Ma ta daŋni ma ya malɛ tima. Ma nyɛ kin naa ma kpak sɔɔni ma tusa. Ba fun a sɔbi a li Koosa sɛm tɔn ti ni di o ŋɔ, “Mu wa zi kut gil ma a ta.”

⁶ Chendaha ya kpak bambi di ya sɛm, “Koosa zi suŋi yau. Ya wa zi ɔm chenani nibinsa zi ya a du ya ni.”

⁷ Maa lisi ba naa funɛ te wa biksi Koosa laaboor weri ti a nyɛ ma, a siti. Ma zim chenani ba funɛ tiŋ un nɛnɛu. Ma nyɛ ma se su Koosa a chi chenani ba se fu su un.

⁸ Yesu Kristo naa funɛ nyɛn ba ni a nyɛn ya ni, ya nibɛgimnɛ. O wa zi chɛrgi hali saha naa vɛ kpak bɔ.

⁹ Nara wa biksi ma a kurgɛ a li chenani ma nihɛɛta fun te biksi ma, ma ta bur wuti nyinbaan ti ni a tiŋ ba. Chiksɛ naa la biksi ma diwe diili wɛ, a wa suŋi ba. Chendaha a vɛ suŋi ma. Chenani Koosa kpa o kpok a nyɛ ma a la suŋi ma, chen kaali ba chiksɛ ta maga kinkan.

¹⁰ Ju tim dam kɔkɔɔrsa ba naa la tum Koosa lɛu tuma saha digi, ba waa funɛ kpak nyinbaan di ba di kɔɔrisi ta a li biŋbiŋnɛɛ. Daakakli naa Yesu fun sou chi ya biŋbiŋnɛ. Ba wa kpak nyinbaan di ba di a li un ni.

¹¹ Ju tim dam kɔkɔɔrsi ta nihɛɛ funɛ kpu sela a kpa a chɛl a la zu doonani Koosa fun lisi kinkan a nyɛ un di a chiŋi nibinsa tum tagna bar chiŋi ni. O funɛ nyɛ ba kpa sel timau a li ba bar nyɛni ti ni a li fu.

¹² Chendaha Yesu gbanko fun namsi kinkan a li Jɛrusalɛm gantɛl ni, chen ni o chɛl ti zi chiŋi ya tum tagna bar chiŋi niu.

¹³ Ma nyɛ ya la pu un dooni ya wa un bɔni o hiisa.

¹⁴ Ya wa kpak bar nyɛni a la zi nyɛn tɛɛnɛ nɔ maga ni a vusi. Ya pɔ Koosarɛ di o wa kpa ya a la zu o tɔhɔn ti.

¹⁵ Yesu yaa suŋi ya yaa pɛgi Koosa a la ŋɔ nara o wɛ. Chenani ya ya chen chi kɔɔrrɛ ya kpa a nyɛ un.

¹⁶ Ma ta suglɛ di ma tum tum were a kisuŋi dɔŋa saha maga. Chenani ya ya chen gbanko kɔɔr naa sɔɔni Koosa tuha kinkan.

¹⁷ Maa tiŋ ma nihɛɛti ta nɔɔna saha maga. Wuzu digi Koosa zi wa daŋni ba wa ŋɔ un chenani ba fun tum a nyɛ unu. Chendaha ba vɛ koti a hiisi a la nyini ma. Ma tiŋ ba nɔɔna, ba zi tum ba tuma wa tu sɔɔniu. Ma vɛ tiŋ ba nɔɔna, ma zi chɔk ba tusau ka o vɛ suŋi ma.

¹⁸ Maa sumi Koosa ya daha saha maga. Ya zimu di ya tiŋ unu wa tu bɛgim ni. Ma Koosa sumi ti zi nyɛ ya kotiu a tum chenani o daŋni ya tum saha maga.

¹⁹ Amaa nɔnɔ ya kibirigi a kaali chen. Maa sumi Koosa o nyɛ min nyinbaan mu bur wa ma wati lalaga.

Sɛm Ta Mak Bar Nɔwa

²⁰ Koosa funɛ lɛli ya kunyan Yesu a li o sou ni. Ya chi o piisisiwa ka o ka ya ya nigbaŋi. O funɛ sou, o fun nyɛ Koosa wa nara bukoo ya nɔ bɛgim. Chenani o fun tum zi nyɛnu hali saha naa vɛ kpak bɔ.

²¹ Koosa naa ya bara sɔɔna tiina, zi yisi kin naa maga ma daŋniu a nyɛ ma, chen ni ma zi kotiu a tiŋ o tutɔ nɛnɛ. Yesu Kristo la suŋi ya di ya tum tum were a sɔɔni Koosa tuha. Ma nyɛ ya nyɛ Yesu wa jirima kinkan hali saha naa vɛ kpak bɔ. Ami.

²² Mu niinbisa, mu tɔn naa sɔbi a nyɛ ma nan, o wa ziŋ. Mu sumi mau di ma nu mu sɛma a naa la zi kpami ma, wa kanyita ni.

²³ Ma zimu di ba funɛ kpa Timotiu a tɔ dɛ. Ma nu laaboor weriu di ba lisi unu a li dooni. O wa mu wati lalaga, o wa min zi wa lagmi a wa ma watiu.

²⁴ Ma zaami ma nihɛɛta awa Koosa nara ba naa maga nyɛn ma ni, a nyɛ ya. Ma niinbisa ba naa nyɛn Itali pulum ni, ba gbanko zaami mau.

²⁵ Koosa suŋi ma maga.