Ju 12 - Tampulma

Koosa Buksi Ya Naa Ya O Bisa

¹ Ba naa maga se funɛ su Koosa ka ba vɛ bur gantɛl, iiu kinkan. O chiu di ba baga nyɛn ya ni ka ba go ya. Chendaha o lawa ya kpa tum tagna a naa bɔm wa ya gil a ta. Ya nyɛni chi chɔchɔharɛ. Ma nyɛ ya chɔ a tiŋ nyinbaan naa Koosa fun kpa nyɛ ya wa kanyita ni.

² Yesu duŋduŋ si funɛ su Koosa hali o wa peti. Chendaha o lawa ya nyini o se niu a kpaŋi ya titi a tiŋ chenani o tiŋ saha maga. Domi o funɛ zim di o tiŋ Koosa tutɔ ka o tuha wa sɔɔni kinkan, o fun nyɛ ba kpaasi un a mari daakakli ti ni a sou a na hiisa kinkan. Lalaknɔwa o kani Koosa nihɛɛ bar kani ni a li o tɔhɔn ti ni.

³ Ma kuɛɛ a daŋni ma bur gantɛl, ma lisi chenani tum tagna tima fun ha un awa chenani o fun di o namsi.

⁴ Ma funɛ kpak unu a li ma bambe ni di ma vɛ tum tagna, amaa hali wa zinan nandigi wara daŋni o kpu ma chen daha.

⁵ Ma nyɛ mu lisi ma chenani ba fun a sɔbi a li Koosa sɛm tɔn ti ni di o kpami ma naa ya o bisa. O fun ŋɔ, “Mu be, mu wa buksi hin, i nu mu sɛma nɛnɛ. Mu zulimi hin, ta nyɛ i tuha chɔki.

⁶ Mu biksi ba naa maga mu daŋnirɛ a la zulimi ba naa maga ya mu bisa.”

⁷ Ma tiŋ chenani o buksi ma chen, domi o wa o bisa kpak dɔŋa. Nyama wara buksi ba bisaa?

⁸ Koosa wara buksi ma a chi chenani bisa nyama yaa buksi ba chen, ma wa ya o bisa.

⁹ Ya titi nyama funɛ buksi ya ka ya nyɛ ba jirima. Koosa naa ya ya nyana gbanko a kpa o mi fali ti a nyɛ ya, buksi ya, o lawa ya nyɛ un jirimau a kaali chenani ya nyɛ ya nyama wa jirimau.

¹⁰ Ya nyama funɛ buksi ya tama, a tiŋ ba titi tutɔ. Chenani Koosa buksi ya a la suŋi ya kaali chen, chen ni wuzu digi ya zi wa burgi tu chaan timau a chi un.

¹¹ Ya nyama funɛ buksi ya akoo Koosa la buksi ya, chen nyɛ ya tusa chɔku tama. O wa peti, ya zimu di o funɛ wer a nyɛ yau, domi o funɛ nyɛ ya tum tum werewa a kpak bara sɔɔna aa gbaari.

Ma Doso A Kinu Chenani Koosa Sɛm Ma

¹² Kin nama daha, ma kpak bambe a tum tum naa kaɛɛ.

¹³ Maa tiŋ Koosa wuti nyinbaan naa weree a chaani, chen ni ma dɔŋtima ba naa vɛ kpak kpok kinkan a tiŋ ma gantɛl, wa zi chel.

¹⁴ Maa kpak un ma bambe ni a kpak bara sɔɔna awa dɔŋ ni, a ya tu chaan tima. Tu chaan tima duŋduŋ la zi wa na ya kunyana.

¹⁵ Koosa la suŋi ma di ma ya tu chaan tima aa gbaari. Ma doso ma ta nyɛ ma nandigi wa tɔ o nyinbaan. O bambe vɛ nyɛn un ni, chenani o lisi zi bu ma magau. Chen yɛɛ, yɛrɛ o zi wa du ma ni?

¹⁶ Ma doso ma ta tum chɔkumsa tuma akoo a tiŋ a chi Isɔ funɛ tiŋ saha digi chen. Waa funɛ ya o nyan bi hɛɛ a vɛ zim Koosa a yogli o nyan kin naa maga a kpa malɛ a la yau diwe bɛgim.

¹⁷ O nyana funɛ wa dugli siwi, Isɔ funɛ daŋni o sumi Koosa a kpa un a du Koosa nin ni. Amaa o nyana wa fun koti a ya chen, domi o funɛ yogli o nyan ti kina magawa. Hali o fun a wi kinkan, o wa fun koti a chɛrgi chenani o tum.

¹⁸ Ma wa chi Ju tima ba naa funɛ dugli bi naa ba yir Sainai saha digi. Doonee ba fun na kina awa ba se ni a fun koti a kpa ba nisa a gbaŋsi a. Ba waa funɛ na din zen awa birsa awa dobaal zen,

^19-20 a fun nu kaabul chɛɛma ka Koosa ta fun a ŋɔ ba. Ta ti fun ŋɔ ba, “Doonani mu chiŋi nan chiu. Nibine akoo sel nɔsi bi nɔ ni, ma kpa buŋkula a yaksi un a kpu.” Hansura fun kpak ba kinkan, ka ba fun sumi un di ta ti ta bu sɛm gbaari.

²¹ Chenani ba na wa fun ya nyini hali tama. Mosis bara fun jigiri ka o ŋɔ, “Hansura fun kpak min hali a vɛ weri.”

²² Ma wa chi ba. Ma funɛ dugli bi naa ba yir Zaiyɔn ka o nyɛn Koosa tɔhɔn ti ni. Doonee Koosa naa nyɛnɛɛ, awa o malaika damata ka ba vɛ koti a gur a, nyɛn. Ba funɛ yir dooni Jɛrusalɛm titi.

²³ Ma funɛ dugli Koosa nara ba naa lagmi dooni ka ba sɔbi ba sɔna a du Koosa tɔn naa nyɛn dooni. Waa bu vɛ na ba galimsa a yisi ba a li ba tum tagna ni hali a wa peti. O gbanko zi di nara maga sɛriau.

²⁴ Ma funɛ wa zim Yesu naa funɛ nyɛ Koosa wa nibinsa bukoo ya nɔ bɛgim. O chi o kpa o chɛl tirɛ a misi ma bambe ni di o chaksi a. O chɛl ti zenee a kaali Abɛl naa o maana Keen fun kpu, chɛl.

²⁵ Ma doso a kinu chenani Koosa sɛm ma. O funɛ sɛm Ju tim ta ni a li bi Sainai ni, ka ba vɛ un, ba wa fun koti a chɔ a li o nin ni. Ya vɛ di ya wa zi nu chenani o sɛm a li o tɔhɔn ti ni, chenani o zi lɛrgi ya diŋsa zi kaali chenani o ya bau.

²⁶ Koosa funɛ sɛm a li bi Sainai ni, o ta ti fun nyɛ tɛɛnɛ nɔ maga zigsi. Ba fun a sɔbi a li o sɛm tɔn ti ni di o funɛ vɔu a ŋɔ, “Wuzu digi mu zi bu wa nyɛ tɛɛnɛ nɔ maga zigsiu a wa peti. Mu zi wa zigsi buudaha gbankou a wa peti.”

²⁷ O fun ŋɔ di o zi bu wa nyɛ tɛɛnɛ nɔ maga zigsiu. Chen biksi ya di o zi wa zigsi kin nawara o fun naamiu a ta a yɔri. Kin nawara o zi vɛ wa zigsi, zi nyɛnu.

²⁸ Ya waa le la o koor naa kundɔŋ vɛ nyɛni a la zi zigsi un. Ma nyɛ ya pɛgi un chen daha. Ma nyɛ ya gbanko yaa kiɔm un a kinyɛ un jirima aa kijɛɛmi un, chen ni o tuha zi sɔɔniu.

²⁹ Wuti ya Koosa chi din naa koti a wa kpa kina maga a ta a yɔri.