Ju 11 - Tampulma

Chenani Ju Tim Nawaalsa Se Fun Su Koosa

¹ Ya naa se su Koosa, ya zimu di wuzu digi o zi wa lisiu a li o kina ni a nyɛ ya. Ya kpak bambi bɛgimu kin nama ya ha vɛ naaliu.

² Nidamata ba naa funɛ nyɛn saha digi, nyɛ ba se su Koosa a sɔɔni o tuha.

³ Koosa funɛ sɛm a naami tɛɛnɛ nɔ maga, o fun kpa kin nawara ya vɛ koti a naali, a naami kin naa ya koti a na. Chenani ya se su di Koosa funɛ ya nan, biksi ya di o ya wutirɛ.

⁴ Baal digirɛ ba funɛ yir Abɛl, o se fun su Koosa. Chendaha o kɔɔra naa o fun kpa nyɛ Koosa ni zen a kaali o niinbe Keen kɔɔra. Koosa fun a la o papaha a bu vɛ na o galimsa domi o se su un. Abɛl fun sou, amaa o tuma ha vɛɛn a biksi yau.

⁵ Baal digirɛ ba funɛ yir Inɔk, o se fun su Koosa. Chendaha Koosa wa fun nyɛ o sou. Wuzu digi Koosa fun wa kpa un a zini a zu o tɔhɔn ti. Nandigi wa fun koti a na un. Ba fun a sɔbi a li Koosa sɛm tɔn ti ni, di Inɔk funɛ nyɛn, o yaa fun sɔɔni Koosa tuhau kinkan.

⁶ Nibine si vɛ su Koosa, o wa zi sɔɔni Koosa tuha. Naa la daŋni o zim Koosa, o lawa o nyɛ o si su di o nyɛnu a wa bɔ ba naa dɛu un.

⁷ Baal digirɛ ba funɛ yir Nowa, o si fun su Koosa. Chendaha o fun koti a nu ka Koosa ŋɔ un di o kaa kpa nire a su tɛɛnɛ nɔ maga. Nowa fun tiŋ Koosa nɔ a koori arŋa. O funɛ kɔɔri un peti, o wa o walɛ fun zu o tuha ka Koosa yisi ba a li ni ti ni. Tɛɛnɛ nɔ tim maga fun siti, domi ba se wa fun su Koosa. Amaa Nowa si funɛ su unu. Chendaha Koosa bu vɛ na o galimsa.

⁸ Baal digirɛ ba funɛ yir Abraham, o si fun su Koosa. Koosa funɛ yir un, o fun a tiŋ o nɔ a gba a la pulum naa Koosa fun vɔu di o nyɛ un chen. O funɛ li o titi tɔhɔn ti ni, o wa fun zim doonani Koosa kpa un a la.

⁹ O funɛ la tel pulum naa Koosa fun vɔu di o nyɛ un chen, o funɛ ya hɔɔrrɛ dooni. O wa o bisa, Aizik awa Jakɔb, funɛ nyɛn lɛwa nɛɛ. Ba gbanko fun a bɔni chenani Koosa fun vɔu a nyɛ Abraham ni chen.

¹⁰ Amaa Abraham funɛ pɔu di o na tɔhɔn naa Koosa titi fun sa. O tɔhɔn ti kpak zɛchik weri a nyɛn hali saha naa vɛ kpak bɔ.

¹¹ Abraham haan, Sara, funɛ hɛɛsiu a vɛ koti a lul be. Amaa o si funɛ su di Koosa zi kpa o kpoku a nyɛ un o lul a tum chenani o fun vɔu chen.

¹² Hali Abraham funɛ dugli siwi, bi damata funɛ li un ni. Ba iiu a chi wula naa nyɛn buudaha ni awa hɛchɛ naa nyɛn mɔɔga nɔ ni, ka nara vɛ koti a guri.

¹³ Nara tima maga funɛ siti, ba se ha funɛ vɛɛn su Koosau. Ba funɛ nyɛn, ba wa fun koti a la kin nawara Koosa fun vɔu di o nyɛ ba chen. O chi ba funɛ na a a li bar boli nee a kpak bambe di ba la a. Ba funɛ nyɛn tɛɛnɛ nɔ maga ni, ba funɛ biksi narau di ba ya hɔɔrawa dooni.

¹⁴ Ba naa funɛ biksi nara chen, funɛ nyini ba bar nyɛni.

¹⁵ Ba wa fun bura lisi pulum naa ba li chen wɛ. Ba funɛ lisi o wɛ, ba fu zi na nyinbaanu a bur la dooni.

¹⁶ Amaa ba funɛ daŋni ba zu tɔhɔn naa Koosa titi fun sarɛ. Tɔhɔn ti zen kaali pulum naa ba li chen ni kinkan. Koosa tuha sɔɔni di ba yir un ba Koosa. Chendaha o fun saksi ba bar nyɛni a li o tɔhɔn ti ni a nyɛ ba.

¹⁷ A gantɛl nɛɛ Koosa fun tiŋ chenani o fun vɔu a nyɛ Abraham ni a nyɛ o lul be, a du un Aizik, o fun zaamsi un a ŋɔ un di o kpa o be a la kɔɔri kɔɔra a nyɛ un. Abraham funɛ saksi di o kpu o be ti, o si ha fun vɛɛn su Koosa.

¹⁸ Ba fun a sɔbi a li Koosa sɛm tɔn ti ni di o funɛ ŋɔ Abraham ni, “Aizik daha i zi na be damatau.”

¹⁹ Abraham funɛ zimu di Koosa funɛ kotiu a lɛli Aizik a li o sou ni. Hali o fun wa dugli sou kinkan, o chi Koosa funɛ lɛli un a li o sou ni.

²⁰ Aizik gbanko si funɛ su Koosa. Chendaha o fun kpa o bisa, Jakɔb awa Isɔ, a du Koosa nin ni di oo suŋi ba.

²¹ Jakɔb si funɛ su Koosa. Chendaha o funɛ wa dugli siwi o fun kpa Josɛf bisa a du Koosa nin ni di oo suŋi ba. Chen saha ti o fun a huuni o daŋkpal ni a jɛɛmi Koosa.

²² Josɛf si funɛ su Koosa. Chendaha o funɛ wa dugli siwi, o fun a ŋɔ Ju tim ta ni chenani Koosa zi lisi ba a li Ijipt pulum ni. O gbanko fun a ŋɔ ba doonani ba zi sogli un.

²³ Mosis nyana awa o niina se funɛ su Koosa. Chendaha ba funɛ lul un, ba fun a kpa un a sogli bar digi ni pɛnsa tora. Ba funɛ na di be ti weru, a vɛ tiŋ chenani Ijipt pulum koor fun sɛm. Ba wa funɛ ɔm un.

²⁴ Mosis si funɛ su Koosa. Chendaha o funɛ wa bi, o wa fun la nɔɔni di nara tima yir un Ijipt pulum koor be.

²⁵ O funɛ daŋni di o wa Koosa nara lagmi a namsi a kaali chenani o funɛ daŋni o tum tum tagna wuzu bilɛ a na tu sɔɔna.

²⁶ O funɛ zimu di wuzu digi Koosa zi wa bɔ un o chimu. Chendaha o fun lisi di Ijipt tima pini o zoma a nyɛ o na namsi naa Koosa zi wa tum wuzu digi daha, chen fu bɔɛɛ wa o dɔ Ijipt tim wu were maga.

²⁷ Chenani o si fun su Koosa nyɛ o vɛ ɔm Ijipt tim koora a yisi Ju tim ta a li dooni. O wa fun a bur nyinbaan ti ni. O funɛ chi o na Koosa naa nandigi vɛ koti a naalirɛ.

²⁸ Chenani o si fun su Koosa nyɛ o tiŋ Koosa nɔ a ŋɔ Ju tim ta ni di ba kpu sela a kpa a chɛl a misi ba dɛ zɔɔnɔsa ni, chen ni o malaika naa kpa sou a wa chen, o zi wa valu a gali ba bichɛsa ba naa ba te lul chen niu.

²⁹ Chenani o si fun su Koosa nyɛ o purigi ni naa ba yir ni sɛm chen, bilɛ, chen ni Ju tim ta zi koti a ji jibaŋ kinkin tiu. Ijipt tim lanjimasa fun tiŋ ba a la tu ni ti, ka o wa tɔ ba a di ba maga.

³⁰ Ju tim ta funɛ wa tel tɔhɔn naa ba yir Jɛriko chen, ba fun na di Jɛriko tim ta sa chechepure ziŋziŋirɛ a go tɔhɔn ti maga. Koosa fun ŋɔ Ju tim ta ni di ba valɛɛ a go tɔhɔn ti wuzu bunɔpɛ, o zi chelu. Ba se fun su o sɛm ti. Chendaha tɔhɔn ti chechepure ti fun chel wuzu bunɔpɛ wuzu ti.

³¹ Sakaal tiin digirɛ ba funɛ yir Rehab, funɛ nyɛn dooni. Ju tim nihɛɛ fun tum nara di ba la sogli a nyini tɔhɔn ti ni a bur wa, Rehab fun a la ba du. O si fun su Koosa. Chendaha Ju tim ta fun vɛ kpa un a gbaari Jɛriko tim ba naa funɛ vɛ Koosa nɔ, a kpu.

³² Mu wa koti a sɔbi a ŋɔ ma lalaknɔ Gidiɔn, Berak, Jɛfta, Devid, Samuɛl, awa Koosa witinsa ba naa maga se su Koosa, wɛ.

³³ Ba fun la chem laal a nyaŋi koor zene. Ba yaa funɛ tum tum werewa a la kin nawara Koosa fun vɔu di o nyɛ ba. Nara fun kpa ba a du doonani gbogumtisa nyɛn,

³⁴ awa doonani din pɔ di o di ba, ka a vɛ ya ba kundɔŋ. Nara fun kpa chisi zene di ba kpu ba, amaa ba funɛ li ba nisi niu. Ba wa fun kpak kpok, amaa Koosa funɛ kpa o kpoku a nyɛ ba. Ba funɛ ya lanjima kpokwa a li laal ni a nyaŋi lanjimasa ba naa funɛ ya hɔɔra.

³⁵ Koosa funɛ lɛli nihaana ba naa se su un, nisitɛ a li ba sou ni. Ba fun kpaksi bɔnɛ a ŋɔ ba di ba vɛ Koosa, ba zi na nyinbaanu a chɔ li. Ba ka funɛ na namsiu kinkan a sou, chen ni Koosa zi lɛli bau a du nyɛni naa weri a kaali chenani ba fun te nyɛn ni.

³⁶ Ba fun a mɔmsi bɔnɛ a kpa vurmsa a tuksi ba. Ba ka fun kpaksi bɔnɛ a vɔti ba a la tɔ dɛ.

³⁷ Ba fun kpa buŋkula a ka yaksi bɔnɛ a kpu. Ba gbanko fun kpa chisi zene a ka kpu bɔnɛ. Hali ba ka fun teŋsi a purigi ba bɔnɛ bara bilɛ a ta. Ba fun duŋni bɔnɛ a ka li ba damsi ni di ba kpa piisi awa buun tɔna a laari aa gba. Nara funɛ muksi ba kinkan a nyɛ ba na namsi a nyɛ ba buuri kɔha ni yɔri.

³⁸ Ba funɛ ya nibirigewa, amaa tɛɛnɛ nɔ tim maga baga wa fun to di ba nyɛ ba jirima. Ba yaa funɛ gba nyabaan awa kuŋkule nyuuna bar nyɛni ni a nyɛn gbɛntɛl bɔsa awa sela bar chɔɔli ni.

³⁹ Koosa la biksi ya a li o sɛm tɔn ti ni di chenani ba se su un sɔɔni o tuha kinkan. Hali ba fun a namsi a kaali nara maga, amaa ba wa fun la kin naa maga Koosa fun vɔu di o nyɛ ba.

⁴⁰ O funɛ ya o tutɔrɛ di ba pɔ hali ba wa lagmi ya ni ka o zi yisi ya maga a li ya tum tagna ni hali a wa peti.