Ju 10 - Tampulma

¹ Koosa chiksɛ naa nyɛ Ju tim ta yaa fun kɔɔri kɔɔra a nyɛ Koosa ni bun kam, wa koti a yisi ba naa wa o wati, a li ba tum tagna ni hali a wa peti. Chendaha a waa ya kibirige naa Kristo zi ya nyɛ ya simsimsa duŋduŋ.

² Ju tim chiksɛ ta fu kote a yisi ba naa la jɛɛmi Koosa a li ba tum tagna ni hali a wa peti, yɛrɛ ba ha vɛɛn zim di ba galimsa nyɛn ba ni? Ba chiksɛ ta fu lisi ba galimsa, ba fu zi gil di ba kɔɔri kɔɔrau a nyɛ Koosa ni.

³ Amaa bun kam bu bɛgim ba Koosa dam kɔkɔɔrsa nihɛɛ ti yaa fun kɔɔri kɔɔrau a kpa nyɛ Koosa ni, chenani o yaa fun tum nyɛ ba lisi ba tum tagna wɛ.

⁴ Wutirɛ nuwal awa buun chɛl wa kikoti a chiŋi nibinsa tum tagna bar chiŋi ni.

⁵ Chendaha Kristo funɛ saksi di o wa tɛɛnɛ nɔ maga, o fun a ŋɔ Koosa ni, “Mu zimu di i wara daŋni nara kpa ba sela a kɔɔri kɔɔrsa a nyɛ hin. Chendaha i fun saksi bara di i nyɛ min di mu la chiŋi a bar chiŋi ni a sou.

⁶ Chenani ba yaa kpa ba sela a fu a li biŋbiŋ daha ni a kɔɔri kɔɔra a nyɛ hin, chen ni i zi yisi ba tum tagnau a li ba ni, o wara sɔɔni i tuha.”

⁷ O fun ŋɔ un dooni, “O Koosa, min nyɛn bar nɔ di mu tum chenani i daŋni, a chi chenani ba fun sɔbi mu wɛ a li i sɛm tɔn ti ni chen.”

⁸ Ma lisi chenani o sɛm bar nɔ chen wɛ. O fun ŋɔ Koosa ni, “I wara daŋni nara kpa ba sela a fu a li biŋbiŋ daha ni a kɔɔri kɔɔra a nyɛ hin, chen ni i zi yisi ba tum tagnau a li ba ni. Chenani ba ya chen wara sɔɔni i tuha.” Amaa chiksɛ naa Koosa fun kpa nyɛ Mosis ni chen, funɛ biksi ba di ba ya chen.

⁹ Kristo fun bukoo ŋɔ, “O Koosa, min nyɛn bar nɔ di mu tum chenani i daŋni.” Nan biksi ya di Koosa funɛ lisi Ju tim ta kɔɔra bunɛ tau a ta a kpa chenani Kristo fun sou a nyɛ ya a chiŋsi a bar chiŋi ni.

¹⁰ Domi Yesu Kristo funɛ tiŋ Koosa tutɔrɛ a wa sou bu bɛgim duŋduŋ ya daha, Koosa dɔ ya lalaknɔ.

¹¹ Wuzu kam Ju tima dam kɔkɔɔrsi ta yaa kɔɔri nara tima koorsau a nyɛ Koosa ni, amaa a wa nyɛ o yisi ba a li ba tum tagna ni hali a wa peti.

¹² Kristo funɛ sou ya daha, o fun a burgi ya kɔɔra a chiŋi ya tum tagna bar chiŋi ni bu bɛgim. O funɛ wa si o sou ni, o fun zini a zu Koosa tɔhɔn ti a la kani Koosa nihɛɛ bar kani ni. O kɔɔri nɔ zi chiŋiu hali saha naa vɛ kpak bɔ.

¹³ O pɔ dooni hali wuzu naa Koosa zi nyɛ o dɔma wa burgi o yosa.

¹⁴ O kɔɔri bɛgim ti daha, wuzu digi Koosa zi yisi ba naa maga o dɔu a li ba tum tagna ni hali a wa peti. Chenani o zi ya zi nyɛnu hali saha naa vɛ kpak bɔ.

¹⁵ Koosa siim weri ti ya kin nama sɛhɛra. Ba fun sɔbi a li Koosa sɛm tɔn ti ni di o ŋɔ,

¹⁶ “Nannɛ mu wa Ju tim ta zi bu ya nɔ bɛgimu. Mu zi wa kpa mu chiksɛ tau a du ba bambe ni, chen ni ba zi tiŋ a nɔu saha maga.”

¹⁷ Ba fun bukoo sɔbi di o ŋɔ, “Mu wa zi bu lisi ba tum tagna wɛ.”

¹⁸ Koosa yisɛ ya tum tagna a li ya ni. Ya kɔɔri kɔɔra a gbaari chenani o ya chen, a ya yɔrirɛ.

Lalaknɔ Ya Na Nyinbaan Di Ya Zu Koosa Lɛu

¹⁹ Mu niinbisa, domi Yesu funɛ sou a nyɛ ya, ya na nyinbaanu lalaknɔ di ya zu lɛu ti dɛ mun dɛ ti doonani Koosa nyɛn.

²⁰ O chi gar naa ba fun kpa a purigi Koosa lɛu ti bilɛ ya Kristo barawa. Saha naa o fun sou chen, o fun puk nyinbaan fali di ya tiŋ un a la pu Koosa a la o mi fali ti.

²¹ Yesu naa ya ya Koosa dam kɔkɔɔra zen ya naa la nyini ba naa maga la tiŋ un.

²² Ma nyɛ ya la zu doonani Koosa nyɛn. Ya se su un nɛnɛ ka ya kpak tu bɛgim, o zi la ya duu. O chi o funɛ kpa Kristo chɛllɛ a misi ya di o chaksi ya bambe, chen ni ya wa zi bu kpak galimsa o suwachak ni. O gbanko chi o kpa ni a sɔ ya bara.

²³ Ya se su di chenani o fun vɔu a nyɛ ya chen, zi ya wutiu. Ma nyɛ ya kpak chenani ya ŋɔ nara ni di ya kpak bambi bɛgim un niu nɛnɛ.

²⁴ Ma nyɛ ya kpami ya dɔŋtima di ya maga kidaŋni dɔŋa a kitum tum were a nyɛ dɔŋ ni.

²⁵ Ya bɔnɛ wara lagmi dɔŋ ni a chi chenani ya fu zi du. Ma ta nyɛ ya tiŋ chenani ba tiŋi. Ya kunyan ti zi bur wa lalaga. Chendaha o lawa yaa kpami dɔŋau kinkan a gbaari.

²⁶ Ya funɛ nu Koosa wuti sɛmau a kpa ya nyuuna a vɔu tum tagna tumi, kɔɔri digi wa to a la zi nyɛ Koosa yisi ya a li a ni.

²⁷ Ya tiŋ chen nyinbaan, ya zi ɔmu kinkan chenani Koosa zi kpa ya a gbaari ba naa maga vɛ un ni a na ya galimsa a ta ya yɔri. Chenani o zi na paan a du ya ni zi chi chenani din yaa di kina chene.

²⁸ Koosa chiksɛ naa o fun kpa a nyɛ Mosis ni, funɛ biksi Ju tim ta di ba nidigi vɛ kpak wu digi wa chiksɛ ta ni, ba yir sɛhɛra tima nara balɛ akoo nara batora. Ba na o galimsa, ba ta kpak un siki a kpa un a kpu.

²⁹ Nan funɛ du Ju tim ta ni chen saha digi, yɛrɛ o fu zi du ba naa kpa Koosa be a dau gbampulim ni a nɔsi? Ba kpa o chɛl naa chaksi ba bambe a nyɛ Koosa wa ba ya nɔ bɛgim a ŋɔ di o ya yɔrirɛ a pini Koosa siim weri naa la suŋi ba, zoma, ma wa lisi di Koosa zi wa lɛrgi ba diŋsau a kaali chenani Ju tim ta fun lɛrgi ba naa funɛ vɛ kpak wu digi wa Koosa chiksɛ saha digi chen diŋsauu?

³⁰ Ya zim chenani Koosa bambi du awa chenani ba fun sɔbi a li o sɛm tɔn ti ni di o ŋɔ, “Mu zi bɔ ba naa la tum tum tagnau.” Ba fun bukoo sɔbi di o ŋɔ, “Mu titi zi wa di mu nara sɛriau.”

³¹ Ba naa wa zu Koosa naa nyɛnɛɛ, nin ni, yɛrɛ hansura zi kpak ba a mak.

³² Maa lisi chenani ma se fun te su Koosa ka ma tiŋ un nɛnɛ. Ma funɛ na namsiu kinkan, amaa ma tiŋi wa fun chɛrgi.

³³ Nara fun a pini ma zoma a nyɛ ma bara bora bu damata a li gbampulim ni. Ma na ka ma dɔŋtima namsi, ma gbanko ya namsi a nyɛ ba.

³⁴ Ma baga funɛ nyɛn ba naa ba fun tɔ dɛ chenu. Ba funɛ wa fuksi ma kina maga a li ma wati, ma tusa ha funɛ vɛɛn sɔɔniu, domi ma funɛ zimu di ma dɔ kin nawara kaali au a li Koosa tɔhɔn ti ni. Kin ta nyɛn hali saha naa vɛ kpak bɔ.

³⁵ Maa tiŋ nɛnɛ a chi chenani ma fun a tiŋ saha digi chen a ta bur gantɛl. Ma ya chen, Koosa zi wa bɔ ma ma chimu kinkan.

³⁶ Maa tiŋ o tutɔ wa kanyita ni, chen ni ma zi na kin nawara o vɔu di o nyɛ ma chenu.

³⁷ Ba fun sɔbi a li Koosa sɛm tɔn ti ni a ŋɔ, “O wa zi vusi ka naa kaa wa chen wa.

³⁸ Nara se su Koosa, o wa zi bu na ba galimsa o wati a kpa o mi fali a nyɛ ba. O tuha wa zi sɔɔni a li ba naa bur ba se suuli ni.”

³⁹ Ya wa ya chen tima. Ya waa wa zi bur gantɛl a li Koosa ni o na ya galimsa a ta ya yɔri. Ya waa se ka zi su unu a la, chen ni wuzu digi o zi wa yisi yau a li ya tum tagna ni hali a wa peti.