Ju 1 - Tampulma

Yesu Kristo Fun Biksi Ya Koosa Wɛ

¹ Saha digi Koosa fun nyɛ o witinsa biksi ya nawaalsa o tutɔ wɛ. Nyinbaan damatiwa o fun kpa a biksi ba a gbaari tamtama.

² Amaa bunsa nama nɛɛ o fun nyɛ o be Yesu Kristo biksi ya o wɛ. Koosa funɛ nyɛ o naami tɛɛnɛ nɔ maga awa buudaha, a fun lisi un di tɛɛnɛ nɔ maga awa buudaha siili saha wa tel, o zi wa dɔ kina magau.

³ Koosa funɛ kpa o jirima awa o chaani kinkan a nyɛ un. O bɔni chenani Koosa du, a kpa o kpok kinkan a sɛm a kpak tɛɛnɛ nɔ maga awa buudaha a lagmi dɔŋ ni. O funɛ sou, chen ni Koosa zi koti a chaksi nibinsa tum tagnau a li ba bambe ni baa tiŋ un. O funɛ si o sou ni a zini a zu Koosa tɔha, a fun la kani Koosa naa kpak kpok kinkan a kaali a maga, nihɛɛta bar kani ni.

Yesu Ya Nizen A Kaali Koosa Malaikasa

⁴ Chenani o fun ya nan biksi ya di waa zenee a kaali Koosa malaikasa. Sɔn naa Koosa fun kpa nyɛ un chen, zenee a kaali a sɔna kinkan.

⁵ Ba funɛ sɔbi a li Koosa sɛm tɔn ti ni di o ŋɔ, “Zinan mu fa biksi narau gbampulim ni di mu ya i nyana.” Ba gbanko fun sɔbi di o ŋɔ, “Mu zi ya o nyanau ka o kaa ya mu be.” Koosa wa fun ŋɔ nan o malaikasi ta digi daharɛ. O ka funɛ ŋɔ nan o be ti daharɛ.

⁶ Koosa funɛ tum o be bɛgim tɛɛnɛ nɔ maga ni, a fun ŋɔ o wɛ, “Nyɛ mu malaikasi ta maga kijɛɛmi un.”

⁷ Ba gbanko fun sɔbi a li o sɛm tɔn ti ni di o funɛ sɛm o malaikasi ta wɛwa, “A chi peha awa dinne a saksi di a tum chenani mu daŋni lalaga.”

⁸ Amaa Koosa funɛ ŋɔ o be ti wɛwa, “I waa naa ya Koosa, i koor ti zi nyɛnu hali saha naa vɛ kpak bɔ. I dɔɔli maga deŋlu.

⁹ I si yaa sɛriu di i tum tum were a vɛ kpak wu digi wa tum tagna ni. Chendaha mu waa naa ya i Koosa, funɛ lisi hin di i kpak jirima kinkan awa tu sɔɔna a kaali kina maga.”

¹⁰ Ba gbanko fun a sɔbi di Koosa funɛ ŋɔ o be ti wɛwa, “I waa naa zen kaali kina maga, min funɛ nyɛ i naami tɛɛnɛ nɔ maga a li o piili ni. Hali min nyɛ i kpa i nisa a naami buudaha gbanko.

¹¹ Wuzu digi a maga zi wa chɔku, amaa i zi nyɛnu hali saha naa vɛ kpak bɔ. A maga chi takta naa vusɛɛ a la kusirɛ.

¹² Wuzu digi i zi wa guti unu a ta a kpa digi a chiŋsi o bar chiŋi ni. I ka wa zi kut chɛrgi a nyɛn hali saha naa vɛ kpak bɔ.”

¹³ Ba gbanko fun sɔbi di Koosa ŋɔ, “Kuwa a wa kani mu nihɛɛta bar kani ni, ka mu nyɛ i dɔma burgi i yosa.” Koosa wa fun ŋɔ nan o malaikasi ta digi daharɛ. O ka funɛ ŋɔ nan o be ti daharɛ.

¹⁴ Baŋnɛ Koosa malaikasi ta ya? A maga ya siimsa a naa ya Koosa tumtumsa. O tum au di a wa suŋi ya, chen ni wuzu digi o zi wa lisi yau a li ya tum tagna ni hali a wa peti.