Jɔn 9 - Tampulma

Yesu Fun Tiibi Naa Ba Lul Wa Nyulumsa

¹ Wuzu digi Yesu funɛ val a la chene a la na baal naa ba fun lul wa nyulumsi ni chen.

² O gantɛl tiŋsi ta fun pɛɛsi un, “Ya kunyana, yɛrɛ ba fun lul un ka o nyulumi? O tum tagna daharɛ o nyulumi nan, koo o nyana awa o niin tum tagna daharɛɛ?”

³ Yesu fun ŋɔ ba, “O nyulumsi ti wa kpak wu digi wa o tum tagna ni koo o nyana awa o niin tum tagna ni. O nyulumu chen ni nara zi na chenani Koosa kpok zi tumu.

⁴ Lalaknɔwa nyinbaan puk a nyɛ ya di yaa tum tuma a nyɛ naa funɛ tum min ni chen. O wa zi vusi ka nyinbaan ti tɔ ya bu vɛ koti a tum wu digi.

⁵ Chenani mu nyɛn tɛɛnɛ nɔ maga ni nan, min chi fitina a chaani a nyɛ tɛɛnɛ nɔ tim maga ni.”

⁶ Yesu funɛ sɛm peti, o fun tɔsi nantɔsa a du hɛɛra ni a gɔɔri a kpa tiksi baal ti se,

⁷ a ŋɔ un, “Kila a la sɛm i se a li pul naa ba yir Sailom chen.” Sailom ti mun ya, ‘doonani mu fun tum hin’. Nyulum ti fun kaali a la sɛm o se ta dooni a lɛli. O fun bur wa.

⁸ Doone o kandɔŋsa awa ba naa funɛ na un ka o sumi sumi kina chen fun a pɛɛsi dɔŋa, “Baal nɔ, o laata yaa kani bar nɔ a sumi kina chenn?”

⁹ Bɔnɛ fun ŋɔ, “Warɛ,” amaa bɔnɛ ka fun ŋɔ, “O laata. O chillɛ.” Baal ti titi fun ŋɔ ba, “Min chen.”

¹⁰ Ba fun a pɛɛsi un, “Yɛrɛ i ya i se tima lɛli?”

¹¹ O fun ŋɔ ba, “Baal naa ba yir Yesu chen, waa funɛ tɔsi nantɔsa a du hɛɛra ni a gɔɔri a kpa tiksi mu se ni a ŋɔ min di mu la sɛm mu se ta a li Sailom pul ti ni. Mu fun la sɛm a dooni a puk.”

¹² Ba fun bukoo pɛɛsi un, “Leene baal ti ka?” O fun ŋɔ ba, “Mu wa zim.”

Farisi Tima Wa Fun Zim Chenani Yesu Tiibi Un Chen

¹³ Doone ba fun kpa baal naa ya nyulum chen a kaali Farisi tim ta wati.

¹⁴ A wuzu naa Yesu fun ya vɛri ti a du baal ti se ta ni di a puk chen funɛ ya Ju tim ta hiisi wuzurɛ.

¹⁵ Farisi tim ta fun pɛɛsi un, “Yɛrɛ o ya i se nama lɛli?” O fun ŋɔ ba, “Baal naa ba yir Yesu chen, kpa vɛri a du mu se ta ni. Mu fun la sɛm a aa na.”

¹⁶ Farisi tim ta funɛ nu o ta, ba bambe fun purigi. Ba bɔnɛ fun ŋɔ dɔŋ ni, “Naa ya chen wa li Koosa wati, domi o tum ya hiisi wuzurɛ.” Ba bɔnɛ ka fun ŋɔ dɔŋ ni, “Tum tagna nitumi wa koti a tum tum zene a chi nan.”

¹⁷ Ba fun bukoo pɛɛsi un, “Baal naa i ŋɔ di waa puk i se nan, yɛrɛ i lisi kpa la o wati?” O fun ŋɔ ba, “O ya Koosa witinsi ta digirɛ.”

¹⁸ Farisi tim ta se wa fun su di baal ti funɛ ya nyulumnɛ a bur a na. Adaha ba fun yir baal ti nyana awa o niina,

¹⁹ a pɛɛsi ba, “Ma be nɛɛ? Ma lul un nyulum, yɛrɛ o kaa ya a bur na?”

²⁰ Ba fun ŋɔ, “Ya be ya un. Ya waa lul un nyulum,

²¹ amaa ya wa zim chenani o ya a na koo naa lɛlɛ o se ta. Ma la pɛɛsi un chenani o ya o se ta lɛli. O ya nihɛɛu a la zi sɛm ma.”

²² Ba funɛ sɛm chene, domi hansura funɛ kpak ba Farisi tim ta daha. Ba funɛ piin ŋɔ di nandigi la nɔɔni di Yesu ya naa Koosa fun vɔu di o zi tumu wuzu digi chen, ba wa zi nyɛ ba bu jɛɛmi Koosa a li ba bar lagmi dɛ ni.

²³ Chendaha ba fun ŋɔ, “O ya nihɛɛu a la zi sɛm ma. Ma la pɛɛsi un chenani o ya o se ta lɛli.”

²⁴ Farisi tim ta fun bu yir baal naa bu vɛ nyulumi chen a ŋɔ un, “Baal naa lɛlɛ i se chen ya tum tagna nitumirɛ. Ta nyɛ un jirima, amaa ka nyɛ Koosa wa jirima.”

²⁵ Baal ti fun ŋɔ ba, “O ya tum tagna nitumi koo o wa ya, mu wa zim. Mu zim di mu funɛ ya nyulumnɛ, amaa lalaknɔ mu nau.”

²⁶ Ba fun bu pɛɛsi un, “Yɛrɛ o ya i se na lɛli?”

²⁷ O fun ŋɔ ba, “Mu piin ŋɔ mau ka ma vɛ nuuli. Ma bur a daŋni mu ŋɔ ma a gbaariuu? Ma gbanko daŋni ma tiŋ unuu?”

²⁸ Ba funɛ nu o sɛm ta chen, ba funɛ zulimi un a ŋɔ, “Hin ya o gantɛl tiŋsi ta digi. Ya waa ka ya ya nawaal Mosis gantɛl tiŋsa.

²⁹ Ya zim di Koosa funɛ sɛm sɛma a nyɛ Mosis ni, amaa naa lɛlɛ i se ta chen, ya wa zim doonani o li.”

³⁰ Baal ti fun ŋɔ ba, “Ma wa zim doonani baal nɔ li a wa lɛli mu se na. Baŋ alaazibu wɛnɛ.

³¹ Nara maga zim di Koosa wara nu tum tagna tiin nɔ. O ka nu ba naa la nyɛ un jirima aa tiŋ o tutɔ nɔrɛ.

³² Tɛɛnɛ nɔ maga piili ni kpa la hali wa zinan, nandigi ha wa lɛli naa ba lul wa nyulumsa, se.

³³ Chenani o tum chen biksi di o li Koosa watɛɛ.”

³⁴ Ba fun ŋɔ un, “Ba funɛ lul hin di i yaa kitum tum tagniwa. I kpa i nyuhurɛ a mo yaa?” Ba fun zaksi un a li ba bar jɛɛmi dɛ ti ni a ta.

Farisi Tima Wa Fun Koti A Nu Yesu Biksi Ti

³⁵ Yesu funɛ nu chenani ba ya un, o fun wa ŋɔ un, “I si su mu waa nibine beuu?”

³⁶ Baal ti fun ŋɔ un, “Mu kunyana, ŋɔ min chenani o du, chen ni mu gbanko si zi su unu.”

³⁷ Yesu fun ŋɔ un, “N waa naa la sɛm nan ya un. Hali i koti a na minu lalaknɔ.”

³⁸ Baal ti fun gbiri Yesu suwachak ni a jɛɛmi un a ŋɔ, “Mu kunyana, mu si su hinu.”

³⁹ Doone Yesu fun ŋɔ, “Mu funɛ wa tɛɛnɛ nɔ maga di mu wa nyɛ ba naa se vɛ lɛlirɛ lɛli a biksi ba naa ŋɔɛɛ di ba se lɛlɛu ka a vɛ lɛli.”

⁴⁰ Farisi tima ba naa funɛ dugli dooni, bɔnɛ fun nu ka o sɛm. Ba fun ŋɔ un, “Hin la daŋni i ŋɔ di ya se wa lɛli.”

⁴¹ Yesu fun ŋɔ ba, “Ma se fu vɛ lɛli, mu fu wa zi na ma galimsa. Domi ma ŋɔ di ma se lɛlɛu ka a vɛ lɛli, mu zi na ma galimsau.”