Jɔn 8 - Tampulma

Nihaan Naa La Daŋni Nibaala Yɔri Yɔri

¹ Yesu gbanko fun li dooni a kaali bi naa ba yir Ɔlif nyuhu daha.

² Chɔɔsa funɛ wa pisi chɔsa, o fun si a bur kaali Koosa bar jɛɛmi dam ti. O funɛ la tel dooni, zɛmɛ ta fun wa lagmi a go un. O fun kani a biksi ba.

³ Koosa chiksɛ nibiksɛ awa Farisi tim ta fun kpak nihaan naa la daŋni nibaala yɔri yɔri. Ba fun kpa un wa Yesu wati a nyɛ o chiŋi ba maga suwachak ni.

⁴ Ba nidigi fun ŋɔ un, “Mu kunyana, ya na unu ka o chɔ nibaal wati.

⁵ Ya nawaalsi ta nihɛɛ, Mosis, fun a biksi ya a li Koosa sɛm tɔn ti ni di nihaan naa la ya chen, ya yaksi un wa buŋkula ni a kpu. Yɛrɛ i lisi o sɛm ti?”

⁶ Ba funɛ daŋni ba mo o lo a na o galimsa. Amaa Yesu funɛ gur o nyuhau a la piigi tɛɛnɛ awa o nin ni.

⁷ Ba ha funɛ pɛɛsi un chene, o zer a nyuha a nyini ba a ŋɔ, “Naa vɛ tum tum tagin, waa la zi te yak un wa buŋkul ni.”

⁸ O fun bu gur o nyuha a la piigi tɛɛnɛ awa o nin ni.

⁹ Ba funɛ nu o sɛm ta, nihɛɛti ta fun te a li nibɛgim bɛgima hali ba wa bichɛsi ta maga wa li. Yesu wa nihaan ti duŋduŋ funɛ kpalimi dooni.

¹⁰ Yesu fun bukoo zer o nyuha a nyini un a ŋɔ, “Leene ba naa la fiksi hin chen kaali? Nandigi wa to a ŋɔ di i kpak galimsauu?”

¹¹ Haan ti fun ŋɔ Yesu ni, “Mu kunyana, nandigi wa to.” O fun ŋɔ un, “Mu gbanko wa sɛm di i kpak galimsau. Kila dama. Ta bu tum tum tagna.”))

Yesu Chi Tɛɛnɛ Nɔ Tim Maga Fitina

¹² A saha tirɛ Yesu fun bukoo biksi zɛmɛ ta a ŋɔ ba, “Min chi tɛɛnɛ nɔ tim maga fitinne. Ba naa maga tiŋ min wa zi bu val birsi ni. Mu zi chaani ba nyinbaan niu a kpa Koosa mi fali naa vɛ kpak bɔ a nyɛ ba.”

¹³ Farisi tim ta bɔnɛ funɛ nyɛn dooni a ŋɔ un, “I sɛm ta wa ya wuti. I daŋni sɔnnɛ a nyɛ i titi ni.”

¹⁴ Yesu fun ŋɔ ba, “Mu zim doonani mu fun liu a zim doonani mu la. Chendaha sɛm naa mu sɛm mu titi wɛ nan ya wuti. Ma wa zim doonani mu fun li a zim doonani mu la.

¹⁵ Ma yaa di nara sɛria dentil nee. Mu ka wara di nandigi sɛria.

¹⁶ Mu di nara sɛria, mu duŋduŋ wa zi di un. Mu kunyan Koosa naa funɛ tum min chen, zi gbaari min niu a di sɛria ti. Chendaha mu sɛria ti ya wutiu.

¹⁷ Ba funɛ sɔbiu a li ma chiksɛ ta ni saha digi di nara balɛ la nɔɔni chenani yɛɛ, ka nara ŋɔ di ba sɛm ta ya wutirɛ.

¹⁸ Mu sɛm mu titi wɛwa ka mu nyan naa tum min chen, gbanko sɛm mu wɛ. Chendaha ya sɛma ya wuti.”

¹⁹ Ba fun pɛɛsi un, “Leene ya i nyan ti bar nyɛni?” Yesu fun ŋɔ ba, “Ma wa zim chenani mu du. Chendaha ma vɛ zim chenani mu nyan ti duuli. Ma fu zim min, chen fu zi nyɛ ma nyinbaanu ma zim mu nyan ti.”

²⁰ Yesu funɛ nyɛn doonani nara tima yaa kpa ba malɛ a dau a nyɛ Koosa ni a la biksi ba kin nama. O kpaki saha ha wa fun tel. Chendaha nandigi wa fun gbaŋsi un.

Ju Tima Wa Kitiŋ Yesu A La Doonani O La

²¹ Yesu fun bu ŋɔ ba, “Mu saksi di mu la bar digi. Mu wa la, ma wa kikoti a tiŋ min. Ma zi wa dɛu minu, amaa ma wa zi gil tum tagna tumi hali a wuzu naa ma wa siti.”

²² Ju tim ta funɛ nu nan, ba fun ŋɔ dɔŋ ni, “O fun ŋɔ ya di ya wa kikoti a tiŋ un a la doonani o la chen. O sɛm nɔ mun ya di o kaa kpu o titirɛɛ?”

²³ Yesu fun ŋɔ ba, “Ma wa li tɛɛnɛ nɔ maga ni. Mu ka li Koosa tɔhɔn tirɛ. Ma ya tɛɛnɛ nɔ maga nibinsa. Mu wa ya tɛɛnɛ nɔ maga nibine.

²⁴ Mu piin ŋɔ mau di ma wa zi gil tum tagna tumi hali a wuzu naa ma wa siti. Ma vɛ nyɛ ma se su min, chene ma kaa wa siti.”

²⁵ Ba fun ŋɔ un, “Anti ya hin i sɛm nan sɛma a du ya ni?” Yesu fun ŋɔ ba, “Mu piin ŋɔ ma nibine naa ya minu.

²⁶ Naa funɛ tum min chen ya wuti tiinnɛ. Mu biksi tɛɛnɛ nɔ tim magawa chenani o fun ŋɔ min duŋduŋ. Chendaha mu koti a di ma sɛria a biksi ma chenani ma bambe du.”

²⁷ Ba ha wa fun vɛɛn zim di Yesu ŋɔ ba o nyan Koosa wɛwa.

²⁸ Doone Yesu fun bukoo ŋɔ ba, “Ma zi wa kpak mu waa nibine beu a kpaasi mari daakakli mu sou, ma zi wa zimu di min ya naa Koosa fun ŋɔ di o zi wa tumu wuzu digi chen. Ma gbanko zi wa zimu di sɛm na wa li mu wati. A ya sɛm naa mu nyan ti fun kpa nyɛ min nɛ.

²⁹ Naa funɛ tum min chen, wa gil mu duŋduŋ. Waa nyɛn min ni. Mu yaa tiŋ o tutɔu a la sɔɔni o tuha.”

³⁰ Yesu fun sɛm peti, Ju tim ba naa funɛ nu o sɛm ta chen, nidamata se fun su un.

Yesu Yisi Ya A Li Ya Yosi Ni

³¹ Doone Yesu fun ŋɔ ba, “Ma tiŋ mu biksi nɔ, ma waa la zi ya mu gantɛl tiŋ wutɛ.

³² Ma tiŋ nan, ma zi nu wuti tiu ka wuti ti yisi ma a li yosi ni.”

³³ Ba fun ŋɔ un, “Ya waa ya Abraham bi lulɛ a ha vɛ ya nara yosa. I ŋɔ di wuti ti la zi yisi ya a li yosi ni. Nan mun ya yɛrɛ?”

³⁴ Yesu fun ŋɔ, “Mu ŋɔ ma, naa la tum tum tagna ya tum tagna yomne.

³⁵ Yosa wa kpak nyinbaan wa wu digi ni, amaa be ka kpak nyinbaan wa o nyan kin ni.

³⁶ Mu waa Koosa be koti a nyɛ ma hiisi wuti.

³⁷ Mu zim di ma ya Abraham bilulɛwa, amaa ma bɔnɛ daŋni ma kpu minu, domi mu biksi ti wara zu ma diŋsi ni.

³⁸ Mu wa mu nyan ti funɛ nyɛn, o funɛ biksi min wu damatiwa. Mu ŋɔ ma a wɛu lalaknɔ. Maa tum chenani ma nyan fun biksi marɛ.”

³⁹ Ba fun ŋɔ un, “Abraham ya ya nyan ti.” Yesu fun ŋɔ ba, “Ma nyan ti sir ya Abraham, ma fu zi zer o naŋgeri weriu.

⁴⁰ Ma bɔnɛ daŋni ma kpu minu, domi mu la ŋɔ ma wuti naa Koosa fun biksi min chen daha. Chen laata Abraham fun du.

⁴¹ Ma ya chen, nyan digi naŋgerire ma zer.” Ba fun ŋɔ un, “Ya wa ya sambisa a chi nibin bɔnɛ. Ya nyan wuti ya Koosa titi.”

⁴² Yesu fun ŋɔ ba, “Ma nyan ti sir ya Koosa, ma fu zi daŋni minu domi mu li o watɛɛ. Mu wa wa bar nɔ n titirɛ, amaa waa tum min.

⁴³ Ma wara koti a nu mu biksi ti, domi ma nyinbaan tɔu.

⁴⁴ Ma waa ya sintan bisa aa daŋni ma tiŋ o tutɔ. Saha naa Koosa fun naami tɛɛnɛ nɔ maga hali a wa tel lalaknɔ, sintana funɛ ya nara nikpuuli. O wa zim chenani wuti du. Waa ya nusun koora. O kaa suni wɛ, o wara bɔm un ni.

⁴⁵ Mu waa ka ŋɔ ma wuti ti wɛwa, amaa ma wa nyɛ ma se su chenani mu sɛm ma.

⁴⁶ Nandigi nyɛn ma ni a la zi biksi min di mu tum galimsi tumauu? Nandigi wa to. Mu yaa ŋɔ ma wuti tiu, ka yɛrɛ ma se vɛ su chenani mu ŋɔ ma?

⁴⁷ Ba naa ya Koosa bisa yaa nu o sɛmau. Ma waa wara daŋni ma nu a. Chen biksɛɛ di ma wa ya o bisa.”

Yesu Awa Ju Tima Nawaal Abraham

⁴⁸ Doone Ju tim ta fun ŋɔ Yesu ni, “Ya ŋɔɛɛ di i ya Samaria tim nidigirɛ ka alizin tagin kani i nyuhu ni, wuti laata ya sɛm?”

⁴⁹ Yesu fun ŋɔ ba, “Alizin tagin wa kani mu nyuhu ni. Mu nyɛ mu nyan ti jirimarɛ, amaa ma waa ka wara nyɛ min jirima.

⁵⁰ Mu bak wa to di ma nyɛ min jirima, amaa Koosa waa baga nyɛnu di nara nyɛ min a kidi ba naa vɛ min sɛria.

⁵¹ Ma cheŋi ma diŋsa a nu chenani mu kaa sɛm ma. Ba naa maga yaa tiŋ mu nɔ, ba wa zi wa sou.”

⁵² Ju tim ta fun ŋɔ, “Lalaknɔwa ya zim di i kpak alizin taginu. Hin ŋɔ ya di ba naa maga tiŋ i nɔ wa zi sou, amaa ya nawaal, Abraham, awa Koosa witinsi ta maga funɛ sitiu saha digi.

⁵³ I lisi di hin kaali baa? I lisu di baŋa ya hinn?”

⁵⁴ Yesu fun ŋɔ ba, “Mu wara nyɛ n titi wa jirima. Mu titi jirima nyɛɛli ya yɔrirɛ. Mu nyan ti ka yaa kpa o jirima a nyɛ min. O wa naa ma yir Koosa chen ya nibɛgimnɛ.

⁵⁵ Ma wa zim un, amaa mu waa ka zim unu. Mu fu ŋɔ di mu wa zim un, mu fu zi ya nusun tiinau a chi ma ya nusun tim chen. Mu zim unu aa tiŋ o nɔ.

⁵⁶ Ma nawaal Abraham tuha funɛ sɔɔniu di mu zi wa tɛɛnɛ nɔu.”

⁵⁷ Ju tim ta fun ŋɔ un, “I ha wa tel bun fumnyuu, ka yɛrɛ i ya zim Abraham?”

⁵⁸ Yesu fun ŋɔ ba, “Maa nu chenani mu kaa sɛm ma. Mu funɛ piin nyɛnu ka ba zi lul Abraham.”

⁵⁹ Ju tim ta funɛ nu o sɛm ta, ba fun pini buŋkula di ba yaksi un, amaa Yesu funɛ sogliu a la li Koosa bar jɛɛmi dam ti ni.