Jɔn 7 - Tampulma

Yesu Awa O Walɛ

¹ A gantɛl nɛɛ Yesu fun a gba Galili pulum aa go. O funɛ zimu di Ju tima ba naa nyɛn Judia pulum ni, dɛu nyinbaannɛ di ba kpu un. Chendaha o fun vɛ daŋni o bur la dooni.

² Ju tim ta wuzu zene a naa ba yaa fun a yir lɛuwa chen, funɛ wa dugli.

³ O niinbisi ta fun wa ŋɔ un, “Li bar nɔ aa la Judia, chen ni i gantɛl tiŋsa ba naa nyɛn dooni, gbanko zi na i tum zene naa i tumu.

⁴ I soglee, yɛrɛ i kaa ya a ya nibin zen? Kila Jɛrusalɛm a la biksi ba naa maga lagmi dooni chenani ii tum.”

⁵ Yesu niinbisi ta se wa fun su un.

⁶ Yesu fun ŋɔ ba, “Mu si ha wa su di mu zi la lalaknɔu. Ma zi wa la saha naa ma tusa tɔɔriu.

⁷ Min la biksi nara ba yaa tum tum tagna. Chendaha ba ha min. Amaa ba ka wa ha ma.

⁸ Maa la a la di wuzu zene ta a li Jɛrusalɛm ni. Mu si ha wa su di mu zi la dooniu lalaknɔ.”

⁹ Yesu fun kpalimi Galili pulum ni.

Yesu Fun Di Wuzu Zene Ta Digi A Li Jɛrusalɛm Ni.

¹⁰ O niinbisi ta funɛ kaali di ba la di wuzu zene ta chen gantɛl nɛɛ, Yesu gbanko fun a sogli a tiŋ ba a kaali.

¹¹ Ju tima ba naa funɛ lagmi dooni, fun a dɛu Yesu a la pɛɛsi dɔŋa o bar nyɛni wɛ.

¹² Nidamata funɛ nyumsi a sɛm o wɛ. Bɔnɛ fun ŋɔ di o ya narrɛ. Bɔnɛ ka ŋɔ di o mur narawa.

¹³ Ba maga funɛ ɔm ba nihɛɛtiwa. Chendaha ba vɛ sɛm o wɛ a li gbampulim.

¹⁴ Wuzu zene ta funɛ wa purigi, Yesu fun la zu Koosa bar jɛɛmi dam ti a biksi nara.

¹⁵ O biksi ti fun ya Ju tima, ba naa funɛ nyɛn doon chen, alaazibu kinkan. Ba funɛ ŋɔ dɔŋ ni, “Baal nɔ ya nyu bilim tiinnɛ. Yɛrɛ o ya zim kin nama a biksi ya nan?”

¹⁶ Yesu fun ŋɔ ba, “Mu biksi ti ya Koosa naa tum min chen, kinnɛ. O wa ya mu titi kin.

¹⁷ Ba naa maga la daŋni ba tiŋ Koosa tutɔ ti zi zimu di mu biksi ti li mu watɛɛ koo o wati.

¹⁸ Naa sɛm o titi sɛma daŋni narawa kinyɛ un jirima. Nar ka daŋni o nyɛ naa tum un chen, jirima ya wuti tiinnɛ. Nusuna wa to un ni.

¹⁹ Koosa chiksɛ naa Mosis fun kpa nyɛ ma nawaalsi ta ni chen, ma wa tiŋ a nɛnɛ. Yɛrɛ ma lisi min a ŋɔ di mu chɔk au a la daŋni ba kpu min?”

²⁰ Zɛmɛ ta fun ŋɔ un, “I zu galɛŋwa. Anti ma la daŋni ba kpu hin?”

²¹ Yesu fun ŋɔ ba, “Mu funɛ tiibi baal digiu ma hiisi wuzu. O fun ya ma alaazibu kinkan.

²² Ma nawaalsi ta funɛ te teŋsi ma bisau a li ba hiisi wuzu saha digi ka Mosis fun biksi ba di ba ha vɛɛn kiya chen.

²³ Ma daŋni ma tiŋ Mosis chiksɛ ta, ma teŋsi ma bisa hiisi wuzu. Yɛrɛ ma na paan a du min ni mu tiibi nibine ma hiisi wuzu daha?

²⁴ Ma ta di nara sɛria dentil ni amaa maa di a li ba tuhu ni wa wuti.”

Yesu Funɛ Ya Naa Koosa Vɔu Di O Tum Chen

²⁵ Nara tima ba naa funɛ nyɛn Jɛrusalɛm ni, bɔnɛ funɛ ŋɔ dɔŋ ni, “Baal nɔ laata ba daŋni ba kpu chen?

²⁶ Maa na, o chiŋɛ gbampulim ni a biksi nara ka ya nihɛɛti ta vɛ ya un wu digi. Ami ba zimu di waa sir ya Kristo naa Koosa fun ŋɔ di o zi wa tumu chen.

²⁷ Ka yɛrɛ nan kaa ya? Ya zim doonani baal nɔ liu. Kristo wa wa, nandigi wa zi zim doonani o li.”

²⁸ Yesu yaa fun nyɛn Koosa bar jɛɛmi dam ti ni a biksi nara chene, a fun tɛsi a ŋɔ, “Ma ŋɔ di ma zim minu awa doonani mu li. Mu wa wa mu titi nyuhu nɛɛ. Naa tum min chen, ya wuti tiina ka ma vɛ zim un.

²⁹ Mu waa zim unu. O wa min funɛ te lagmi nyɛn ka o fun tum min ma wati.”

³⁰ Ju tim ta funɛ nu o sɛm ta, ba funɛ daŋni ba kpak un, amaa o kpaki saha ha wa fun tel. Chendaha nandigi wa fun gbaŋsi un.

³¹ Zɛmɛ ta nidamata se fun su un. Ba funɛ ŋɔ dɔŋ ni, “Kristo wa wa, o tum zene zi kaali baal nɔ tum zeneuu?”

Lanjimasa Fun Wa Di Ba Wa Kpak Yesu

³² Farisi tim ta funɛ nu chenani zɛmɛ ta nyumsi Yesu wɛ, ba wa Koosa kɔkɔɔrsi ta fun a na dɔŋa a tum lanjimasa di ba la kpak Yesu a wa.

³³ Ba funɛ kaali doonani Yesu nyɛn chen, o fun ŋɔ ba naa maga funɛ nyɛn dooni, “Mu zi nyɛn ma watiu wuzu bumɛna a bur la naa tum min chen wati.

³⁴ Ma zi wa dɛu mu bar nyɛniu, amaa ma ka wa zi bu wa na min. Ma wa kitiŋ min la doonani mu nyɛn.”

³⁵ Ju tim ta wa fun zim o sɛm ta mun a la pɛɛsi dɔŋa, “Leene o kaa gba la ka ya vɛ na un? O zi la Ju tim ba naa wa hɔɔra nyɛnɛɛ a la biksi ba chenuu?

³⁶ Waa funɛ ŋɔ ya di ya zi dɛu o bar nyɛniu ka ya ka wa zi na un. O gbanko funɛ ŋɔ yau di ya wa kitiŋ un a la doonani o nyɛn. O mun ya yɛrɛ?”

Yesu Fun Kpa Ni A Nyɛ Ba Naa Nyɔksa Kpak Ni

³⁷ Wuzu zene ta gantɛl tiŋna funɛ ya a kilɛmlɛm. A wuzu tirɛ Yesu fun si chiŋi zɛmɛ ta suwachak ni a tɛsi a ŋɔ, “Ba naa maga nyɔksa kpak, ma nyɛ ba wa mu wati mu kpa ni a nyɛ ba ba nyɔ.

³⁸ Ba funɛ sɔbiu a li Koosa sɛm tɔn ti ni saha digi a ŋɔ, ‘Ni pali zi li ba naa se su min bambe niu saha maga.’ ”

³⁹ Yesu funɛ sɛm ba ni pali ti wɛ chen, o funɛ ya Koosa siim weri ti wɛwa o sɛm. Yesu ha wa fun bur la Koosa tɔhɔn ti. Chendaha Koosa ha wa kpa o siim weri ti a nyɛ ba naa se su Yesu ni.

Zɛmɛ Funɛ Waligiu Yesu Biksi Ti Daha

⁴⁰ Zɛmɛ ta funɛ nu o sɛm ta, ba bɔnɛ fun ŋɔ, “Baal nɔ sir ya witiina naa Koosa ŋɔ di o zi tum ya wati wuzu digi chenu.”

⁴¹ Bɔnɛ fun ŋɔ, “Waa ya Kristo naa Koosa fun ŋɔ di o zi tumu chen.” Bɔnɛ ka fun bukoo ŋɔ, “Kristo wa zi ya Galili tim baal.

⁴² Ba funɛ sɔbiu a li Koosa sɛm tɔn ti ni a ŋɔ, ‘Ba zi lul Kristo a li tɔhɔn naa ba yir Bɛtlihɛm ka o nyɛn Judia pulum ni. O zi wa ya koor Devid bi luliu. Chendaha ba kaa wa lul un a li o tɔhɔn ti ni.’ ”

⁴³ Zɛmɛ ta funɛ waligiu Yesu daha.

⁴⁴ Bɔnɛ funɛ daŋni ba kpak un, amaa nandigi wa fun gbaŋsi un.

Ju Tim Nihɛɛta Fun Vɛ Yesu

⁴⁵ Lanjimasa ba naa Koosa dam kɔkɔɔrsi ta awa Farisi tim ta fun tum di ba la kpak Yesu, fun bur wa wa nin hulɛ ni. Ju tim nihɛɛti ta fun pɛɛsi ba, “Yɛrɛ ma vɛ kpak un waali?”

⁴⁶ Lanjimasa ta fun ŋɔ ba, “Baal nɔ sɛma kaali chen naa maga ya nu.”

⁴⁷ Farisi tim ta fun ŋɔ ba, “Wutirɛ o gbanko fun mur ma.

⁴⁸ Ma nihɛɛti ta awa Farisi tim ta nidigi wa to o si su un.

⁴⁹ Zɛmɛ ba naa la nu o biksi ti wa zim Koosa chiksɛ ta ka Koosa fun ŋɔ nɔ a nyɛ ba.”

⁵⁰ Nikɔdimus, naa funɛ te la sɛm sɛma Yesu wati, o wa ba funɛ lagmi. O fun ŋɔ ba,

⁵¹ “Ya chiksɛ ta biksi ya di ya wa kina nar galimsa see ya nu a li o titi nɔ ni chenani o tum.”

⁵² Ba fun pɛɛsi un, “I gbanko ya Galili tim narrɛɛ? Koosa sɛm tɔn ti bar digi wa to ba fun sɔbi di o witinsi ta digi ya Galili narrɛ.” ((

⁵³ Ba maga fun si a pisi kaali ba damsa.