Jɔn 6 - Tampulma

Yesu Fun Kpa Diwe A Dɛɛsi Nara Tusugsa Nyuu

¹ Ju tim ta funɛ kaali, Yesu awa o gantɛl tiŋsi ta fun si dooni a bur kaali a la ji Galili bɛɛn ti jibaŋ kinkin ti. O sɔn digi funɛ vɛɛn ya Tibɛrias bɛɛŋa.

² Ba funɛ la chene, zɛmɛ kinkan fun tiŋ ba. Ba fun na chenani Yesu fun tum tum zene a tiibi wichɔɔrsi ta.

³ Yesu wa o gantɛl tiŋsi ta funɛ la tel dooni, ba fun zini bi digi nyuha a kani.

⁴ Ju tim ta wuzu zen naa ba funɛ yir val la gali ti chen, fun dugli.

⁵ Yesu fun burgi a nyini aa go a na zɛmɛ kinkan ka ba wa o wati. O fun pɛɛsi Filip, “Leene ya kaa ya pu diwe a yau a nyɛ zɛmɛ naa maga ni ba di?”

⁶ O titi funɛ zim chenani o zi yau, amaa o funɛ daŋni o zaamsi Filiprɛ.

⁷ Filip fun ŋɔ un, “Ya yau boroboro sidi tusugsa nyuu, o wa zi tel ba hali ba di tama.”

⁸ Doone Andiru, Simɔn Pita niinbe, fun ŋɔ un,

⁹ “Nibabichɛl digi nyɛn bar nɔ a kpak boroborosa nyuu awa nyinsa lɛ. Yɛrɛ a nama kaa ya tel zɛmɛ na?”

¹⁰ Yesu fun ŋɔ, “Nyɛ nara tima kani tɛɛnɛ ni.” Zɛmɛ ta fun kani kɔ tota kinkan daha ni dooni. Ba nibaala duŋduŋ funɛ ya tusugsa nyuunwa.

¹¹ Doone Yesu fun zer boroborosi ta awa nyinsi ta a sumi Koosa a du a ni a kpa nyɛ o gantɛl tiŋsi ta ni ba bɔni zɛmɛ ta. Ba maga fun se puŋ.

¹² Ba fun se peti, Yesu fun ŋɔ o gantɛl tiŋsi ta ni, “Ma la pini kidikaalɛ ta, chen ni a wa zi chɔk.”

¹³ Ba fun pini diwe naa zɛmɛ ta fun se a ka a su chenchisa fidalɛ.

¹⁴ Zɛmɛ naa funɛ di diwe ta, fun na chenani Yesu tum tum zen a nyɛ ba, ba fun ŋɔ dɔŋ ni, “Wutirɛ baal nɔ sir ya witiina naa Koosa fun ŋɔ di o zi wa tumu tɛɛnɛ nɔ maga ni wuzu digi chene.”

¹⁵ Yesu funɛ nu chenani ba sɛm dɔŋ ni, o fun si dooni a kaali kuŋkule nyuha bar nyɛni a la nyɛn doon o duŋduŋ. O funɛ zimu di ba kpak unu ba bambe ni di ba kpak un wa kpok ni a la vɔu un ba koora.

Yesu Fun Val Ni Daha

¹⁶ Nha funɛ wa chel, o gantɛl tiŋsi ta fun a bur kaali bɛɛŋ ti nɔ,

¹⁷ a la zu arŋa a la ji jibaŋ kinkin ti aa la Kapɛrnaum. Dusum funɛ wa biri, Yesu ha wa fun wa ba wati.

¹⁸ Pe zenzen funɛ mo ba a la teŋ ni ti kinkan.

¹⁹ Ba funɛ dusi arŋ ti a la tel maalisa tora koo anaasi, ba fun a na Yesu ka o val ni ti daha a wa dugli arŋ ti. Hansura fun kpak ba kinkan.

²⁰ Yesu fun ŋɔ ba, “Ma ta ɔmi. Minnɛ.”

²¹ Ba tusa funɛ sɔɔniu o lagmi ba ni a zu arŋ ti chen. Ba fun vaan la tel ba val ti bɔ.

Zɛmɛ Fun Dɛu Yesu Bar Nyɛni

^22-23 Chɔɔsa funɛ wa pisi, zɛmɛ naa funɛ kpalimi jibaŋ kinkin ti ni chen, fun a dɛu Yesu bar nyɛni. Yesu funɛ te wa dooni awa arŋ ni ka o nyɛ ba diwe ba di, ba funɛ na o wa o gantɛl tiŋsi tau. O gantɛl tiŋsi ta funɛ bu arŋ ti a kaali, zɛmɛ ta funɛ zimu di Yesu wa to ba wati.

²⁴ Arŋ bɔnɛ fun li tɔhɔn naa ba yir Tibɛrias a wa. Zɛmɛ ta fun la zu arŋsi ta a kaali Kapɛrnaum di ba la dɛu Yesu dooni.

Yesu Wa Koosa Mi Fali Diwe Ya Kibɛgimnɛ

²⁵ Ba funɛ na un, ba fun pɛɛsi un, “Ya kunyana, yɛrɛ i ya a wa bar nɔ?”

²⁶ Yesu fun ŋɔ ba, “Wutirɛ n sɛm ma, diwe naa mu dɛ kpa nyɛ ma di ma di puŋ chen, nyɛ ma dɛu mu bar nyɛni. Mu tum zene laata nyɛ ma dɛu mu bar nyɛni.

²⁷ Ma ta kpa ma bambe a du diwe naa la zi wa chɔk, amaa ma ka kpa ma bambe a du Koosa mi fali naa vɛ kpak bɔ ni. Koosa naa ya mu nyan ti chiŋɛ mu gantɛl ni di mu ya nibine be. Chendaha mu koti a kpa chen mi fali ti a nyɛ ma.”

²⁸ Ba fun pɛɛsi un, “Yɛrɛ ya kaa ya a sɔɔni Koosa tuha?”

²⁹ Yesu fun ŋɔ ba, “Ma nyɛ ma se su n waa naa o fun tum ma wati. Chene Koosa daŋni maa tum.”

³⁰ Ba fun ŋɔ un, “Te tum tum zen a nyɛ ya ka ya se su hin.

³¹ I zimu di ya nawaalsa funɛ nyɛn nyabaan ni a gba saha digi, ba nihɛɛ Mosis fun kpa diwe naa ba funɛ yir ‘mana’ a nyɛ ba ba di. Ba funɛ sɔbiu a li Koosa sɛm tɔn ti ni a ŋɔ, ‘Mosis funɛ kpa diweu a li buudaha ni a nyɛ ba ba di.’ ”

³² Yesu fun bu ŋɔ ba, “Wutirɛ mu ŋɔ ma, Mosis wa fun kpa diwe ta a li buudaharɛ a nyɛ ma nawaalsi ta ni. Mu kunyan Koosa ka funɛ kpa a a nyɛ ba. Lalaknɔ waa la nyɛ ma diwe titi maa di.

³³ Waa funɛ tum min a li o tɔhɔn ti ni di mu wa tɛɛnɛ nɔ maga, chen ni nara maga zi na nyinbaanu a la o mi fali naa vɛ kpak bɔ.”

³⁴ Ba fun ŋɔ un, “Ya kunyana, i yaa kpa mi fali diwe ta a nyɛ ya.”

³⁵ Yesu fun ŋɔ ba, “Mu wa mi fali diwe ta ya kibɛgimnɛ. Lɔsa wa zi bu kpak ba naa wa mu wati. Nyɔksa ka wa zi kpak ba naa nyɛ ba se su min.

³⁶ Ya funɛ piin lagmiu ka ma se ha vɛ su min. Mu funɛ ŋɔ mau di nannɛ o du ya ni.

³⁷ Ba naa mu nyan ti fun kpa nyɛ min chen, zi wa mu watiu n la ba du. Mu wa zi kut vɛ ba naa maga wa mu wati.

³⁸ Waa funɛ tum min a li o tɔhɔn ti ni di mu wa tɛɛnɛ nɔ maga a wa tum o tutɔ. Mu wa wa di n wa tum mu tutɔrɛ.

³⁹ Naa tum min chen tutɔ ti chi nɛɛnɛ. Mu zi nyini ba naa o kpa nyɛ min chenu ka ba digi ta nyuksɛ. O wa wa di o di tɛɛnɛ nɔ tim maga sɛria, mu zi lɛli ba a li ba sou ni a nyɛ ba o mi fali naa vɛ kpak bɔ.

⁴⁰ Mu nyana tutɔ ti chi nɛɛnɛ. O wa wa di o di tɛɛnɛ ŋɔ tim maga sɛria, mu zi nyɛ ba naa maga se su minu o mi fali naa vɛ kpak bɔ.”

⁴¹ Ju tim ta funɛ nu chenani Yesu sɛm di o wa mi fali diwe naa Koosa fun tum a li o tɔhɔn ti ni chen ya kibɛgimnɛ, ba funɛ zulimi un.

⁴² Ba fun ŋɔ dɔŋ ni, “Baal nɔ, laata ya Yesu, Josɛf be ti, chenn? O nyana awa o niina laata ya zim chenn? Ka yɛrɛ o sɛm di o funɛ li Koosa tɔhɔn tirɛ?”

⁴³ Yesu fun ŋɔ ba, “Ma gil mu zulimi.

⁴⁴ Nandigi wa kikoti a wa mu wati see mu nyana naa tum min chen gbaŋ un wa mu wati. O wa wa di o wa di tɛɛnɛ nɔ tim maga sɛria, mu zi nyɛ ba o mi fali naa vɛ kpak bɔ.

⁴⁵ Ba funɛ sɔbiu a li Koosa sɛm tɔn ti ni saha digi a ŋɔ, ‘Koosa zi wa biksi nara magau.’ Ba naa maga wa nu mu nyan ti sɛma a tiŋ o biksi ti, o zi wa gbaŋ bau a wa mu wati.

⁴⁶ Nandigi ha wa na mu nyan ti. Mu waa naa o tum ma wati chen duŋduŋ funɛ na un.

⁴⁷ Wutirɛ mu sɛm ma, ba naa maga se su min piin na o mi fali naa vɛ kpak bɔu.

⁴⁸ Mu wa mi fali diwe ta ya kibɛgimnɛ.

⁴⁹ Ma nawaalsi ta funɛ di diwe naa ba funɛ yir ‘mana’ nyabaan ti ni saha digi chen a siti.

⁵⁰ Amaa ba naa maga di mi fali diwe naa li mu nyan ti tɔhɔn ti, ba wa zi siti.

⁵¹ Mu wa mi fali diwe naa funɛ li mu nyan ti tɔhɔn ti chen ya kibɛgimnɛ. Ba naa maga di diwe na zi na miisa naa vɛ kpak bɔu. Diwe naa mu kaa nyɛ ba ba di ya mu barawa. Nara zi wa kpu kinu chen ni tɛɛnɛ nɔ tim maga zi na nyinbaanu a la miisa naa vɛ kpak bɔ.”

⁵² Ju tim ta funɛ nu chenani Yesu sɛm, ba fun a di dɔŋa amɔrɛ kinkan o sɛm ta mun daha a ŋɔ, “Yɛrɛ baal nɔ kaa ya a kpa o bara a nyɛ ya di ya di?”

⁵³ Yesu fun ŋɔ ba, “Wutirɛ mu ŋɔ ma, see ma se n waa nibine be bara a kinyɔ mu chɛl, Koosa mi fali naa vɛ kpak bɔ wa zi nyɛn ma bambe ni.

⁵⁴ Ba naa maga wa di mu bara aa la nyɔ mu chɛl ti, na o mi fali naa vɛ kpak bɔu lalaknɔ. O wa wa di o di tɛɛnɛ nɔ tim maga sɛria, mu zi lɛli bau a li ba sou ni.

⁵⁵ Mu bara ya diwe titi. Mu chɛl ti ya kinyɔɔli titi.

⁵⁶ Ba naa maga di mu bara aa la nyɔ mu chɛl ti nyɛn min ni ka mu gbanko nyɛn ba ni.

⁵⁷ Mu nyan naa ya mi fali ti tiina, funɛ tum min ma wati. O daharɛ mu nyɛn. Chen vɛɛna, ba naa maga di min nyɛn mu daharɛ.

⁵⁸ Mi fali diwe ta awa diwe naa Mosis fun kpa nyɛ ma nawaalsi ta ni saha digi ka ba siti chen, wa ya kibɛgim. Koosa funɛ tum o mi fali diwe tau a li o tɔhɔn ti ni, chen ni ba naa maga di un zi na miisa naa vɛ kpak bɔu.”

⁵⁹ Yesu funɛ nyɛn Ju tim ta bar lagmi dɛ nɛɛ a li Kapɛrnaum ni a biksi ba sɛm na maga.

Koosa Mi Fali Naa Vɛ Kpak Bɔ Wɛ

⁶⁰ O gantɛl tiŋsi ta bɔnɛ gbanko funɛ nu o biksi tiu a ŋɔ dɔŋ ni, “O biksi ti bɔmu. Anti kaa tiŋ un?”

⁶¹ Yesu funɛ zimu di ba lɔ o gantɛllɛ, o fun pɛɛsi ba, “Mu biksi ti daŋni o bur ma gantɛllɛɛ?

⁶² Ma wa na n waa nibine be ka mu bur a la zu Koosa tɔhɔn ti, yɛrɛ ma zi lisi?

⁶³ Ba funɛ lul ma, ma wa fun kpak Koosa miisa naa vɛ kpak bɔ. Koosa siim weri ti wa nyɛn nar ni, o fun kpa Koosa mi fali naa vɛ kpak bɔ a du o bambi ni. Mu ŋɔ ma lalaknɔwa chenani ma zi na o mi fali ti,

⁶⁴ amaa ma bɔnɛ se wa su mu sɛma.” (Saha naa Yesu fun te a biksi o gantɛl tiŋsi ta, o fun zim ba naa se vɛ su un awa naa la zi wa li gantɛl.)

⁶⁵ Doone Yesu fun bu ŋɔ ba, “Chendaha mu fun piin ŋɔ ma di nandigi wa kikoti a wa mu wati see mu nyan ti gbaŋ un a wa mu wati.”

⁶⁶ O gantɛl tiŋsi ta funɛ nu chen, ba nidamata fun bur gantɛl a bu vɛ tiŋ un.

⁶⁷ Doone Yesu fun burgi o gantɛl tiŋsa nara fidalɛ ta wati a pɛɛsi ba, “Ma gbanko zi buru a ka minn?”

⁶⁸ Simɔn Pita fun ŋɔ un, “Mu kunyana, anti watɛɛ ya kaa la? Hin kpak Koosa mi fali naa vɛ kpak bɔ sɛma,

⁶⁹ ka ya se su a. Ya zimu di i ya Koosa tu chaan tiinnɛ.”

⁷⁰ Yesu fun ŋɔ ba, “Mu funɛ lisi ma nara fidalɛwa a li mu gantɛl tiŋsi ta ni, amaa ma nidigi ya sintana nibinere.”

⁷¹ O funɛ sɛm Judas Iskariɔt, Simɔn be, wɛwa. Yesu funɛ zimu di o zi li o gantɛlu.