Jɔn 5 - Tampulma

Yesu Fun Tiibi Wichɔɔrta A Li Pul Ni

¹ A funɛ ya tama, Yesu fun si a bur kaali Jɛrusalɛm di o la di Ju tim wuzu zene ta digi dooni.

² Bɛɛn we funɛ nyɛn dooni a dugli tɔsi ta digi bulzɔɔnɔ naa ba yir piisisa bulzɔɔnɔ. Ju tim ta funɛ yir doon a li ba sɛm ni, Bɛtzata. Zaŋa nyuu funɛ go bɛɛŋ we ti nɔ.

³ Wichɔɔrsa nidamata funɛ nyɛn zaŋ ta tuhu ni saha maga. Ba bɔnɛ funɛ ya nyulumwa, bɔnɛ chel chɛrsa, bɔnɛ nisa awa naŋgere ka siti. ((

⁴ Ba fun a pɔ niiti ta pali. Saha wau Koosa malaika wa tu wa a nyɛ nii ti pali. A gantɛl ni nar ka te tu bɛɛŋ ti chen, chen tiina wichɔɔta ti zi wa tibiu.))

⁵ Baal digi funɛ nyɛn dooni. Wichɔɔrta fun kpak un bun fumnaasi alɛ wa to.

⁶ Yesu fun wa li dooni a na un ka o chɔ. O funɛ zim di wichɔɔr ti vusi un niu a pɛɛsi un, “I daŋni i na alaafɛuu?”

⁷ Wichɔɔr ti fun ŋɔ un, “Mu kunyana, ni ti funɛ viigi, n wa kpak nandigi naa la zi kpa min a la du bɛɛŋ ti ni lalaga. Mu funɛ nyɛn nyinbaan ni aa wa, nandigi funɛ te min dooni.”

⁸ Yesu fun ŋɔ un, “Kisi a guti i kichɔɔli a la.”

⁹ Baal ti fun vaan na alaafɛ a si a guti o kichɔɔli ti a la. A wuzu ti funɛ ya Ju tim hiisi wuzurɛ.

¹⁰ Ju tim ta bɔnɛ fun na chenani Yesu tiibi baal ti a la ŋɔ un, “O ya ya chire wa i chuŋi i kichɔɔli ya hiisi wuzu.”

¹¹ O fun ŋɔ ba, “Baal naa tiibi min chen, waa ŋɔ min di mu chuŋi.”

¹² Ba fun pɛɛsi un, “Anti ŋɔ hin di i guti i kichɔɔli a la?”

¹³ Baal ti funɛ nyini di o na Yesu, amaa o funɛ li zɛmɛ ta niu a kaali. O fun ŋɔ Ju tim ta ni, “O kaalu. Mu ka wa zim nibine naa ya un.”

¹⁴ A gantɛl nɛɛ Yesu fun wa na un Koosa bar jɛɛmi dam ti ni a ŋɔ un, “Lalaknɔ i na alaafɛu. Ta bu tum tum tagna. I tum a, chenani i zi du zi taginiu a kaali o piili ti ni.”

¹⁵ Doone baal ti fun li kaali a la ŋɔ Ju tim ta ni di Yesu funɛ ya naa tiibi un chen.

¹⁶ Ba funɛ nu di Yesu tiibi baal ti ba hiisi wuzu ti, ba fun wa muksi un kinkan.

¹⁷ O fun ŋɔ ba, “Mu kunyana Koosa tum o tuma saha maga. Mu gbanko tum a chi chenani o tum chene.”

¹⁸ Yesu funɛ ŋɔ di o nyana ya Koosa, o duuti o wa un ya nibɛgimnɛ. O sɛm na awa chenani o fun a chɔk ba hiisi wuzu ti, nyɛ Ju tim ta se sɛriu di ba kpu un.

Yesu Fun Zer Koosa Ninnɛ A Li O Tum Maga Ni

¹⁹ Doone Yesu fun ŋɔ ba, “Chenani mu kaa sɛm ma nan ya wutirɛ. Mu waa Koosa be, wa kikoti a tum wu digi mu titi nyuhu ni. Mu zer mu nyan ninne a li mu tum maga ni.

²⁰ O daŋni minu a biksi min tum maga chenani o titi tum. Ma fa na chenani mu tiibi baal tiu. Mu kunyana Koosa zi nyɛ mu tum tum zeneu a kaali chen, ka alaazibu kpak ma.

²¹ Waa lɛlɛ siwɛ a li ba sou ni. Mu waa naa ya o be gbanko lɛlɛ siwɛ naa mu yisi a li ba sou ni.

²² O wara di nara tum tagna sɛria. O funɛ kpa chenani o di nara sɛriau a du mu nin ni,

²³ chen ni nara maga zi nyɛ min jirimau a chi chenani ba yaa nyɛ un jirima. Nara vɛ nyɛ min jirima, ba wara nyɛ mu kunyana Koosa naa tum min chen gbanko wa jirima.

²⁴ “Sɛm naa mu kaa sɛm nan ya sɛm birigewa, adaha maa nu a nɛnɛ. Ba naa maga nu mu biksi nɔ a nyɛ ba se su Koosa naa tum min chen, o zi nyɛ ba o mi fali naa vɛ kpak bɔu. O gbanko wa zi bu na ba galimsa ba tum tagna daha a ta ba yɔri.

²⁵ Maa nu mu wati nɛnɛ. Saha ti piin telu di ba naa chi siwɛ ba tum tagna daha zi wa nu min, Koosa be, tau, ka mu zi wa lɛli bau a li ba sou ni.

²⁶ Mu nyan ti kpak o mi fali naa vɛ kpak bɔ kpok. O funɛ kpa o mi fali kpok tiu a nyɛ mu gbanko ni.

²⁷ Mu ya nibine be. Chendaha o fun kpa chenani o di nara sɛria a du mu nin ni.

²⁸ Ma ta nyɛ chenani mu sɛmi chen jɛri ma. Saha wau ba naa maga ba fun huk chen zi nu mu tau a li wa.

²⁹ Ba naa funɛ tum tum were chen, mu kunyana zi lɛli bau a li ba sou ni a kpa o mi fali naa vɛ kpak bɔ a nyɛ ba. Ba naa ka funɛ tum tum tagna chen, o zi lɛli bau a li ba sou ni a na ba galimsa a ta ba yɔri.”

Kin Nawara Biksi Nara Yesu Wɛ

³⁰ “Mu wa kikoti a tum wu digi mu titi nyuhu ni. Koosa yaa biksi min chenani mu zi di nara sɛria. Chendaha mu sɛria diili ya wuti saha maga. Mu wara daŋni mu tiŋ mu tutɔ, amaa naa tum min chen tutɔrɛ mu daŋni n tiŋ.

³¹ “O fu ya di mu duŋduŋ ŋɔ ma chenani mu du, ma fu zi ŋɔ di mu sɛm ta wa ya wuti.

^32-33 Amaa Jɔn naa chaksi nara wa ni ni chiŋɛ mu gantɛl ni. Chenani maga o sɛm nara ni mu wɛ ya wutirɛ. Ma titi funɛ tum nara di ba nu o sɛm ta a bur wa ŋɔ ma.

³⁴ Mu wara nyini chenani nibinsa sɛm mu wɛ se ni. Ma lisi chenani Jɔn sɛm mu wɛ di o suŋi ma, chen ni Koosa zi la ma nyuuna a nyɛ ma.

³⁵ Jɔn funɛ chi fitin chaanirɛ ka ma tusa fun sɔɔni di ma kani o mun ni tama.

³⁶ Jɔn funɛ biksi nara mu wɛ, amaa kundɔŋ biksi nara mu wɛ a kaali chenani Jɔn fun biksi. Tum zene naa mu nyan ti fun nyɛ mu tum, a waa biksi nara di waa funɛ tum min.

³⁷ Ma ha wa nu o ta koo a na un, amaa o yaa biksi ma mu wɛu.

³⁸ Waa funɛ tum min ma wati, amaa ma wa nyɛ ma se su min. Chendaha o biksi ti vɛ nyɛn ma bambe ni.

³⁹ Ma yaa karimi Koosa sɛm tɔn ti saha maga. Ma karimi ti nyɛ ma se su di ma zi na mi fali naa vɛ kpak bɔu. Amaa o sɛm tɔn ti biksi ma mu wɛ.

⁴⁰ Ma ka wara daŋni ma wa mu wati a wa la mi fali ti.

⁴¹ “Ma vɛ nyɛ min jirima nan daha mu baga wa to,

⁴² amaa mu baga nyɛnu di ma wa kpak Koosa daŋni ma bambe ni.

⁴³ Mu kunyana Koosa funɛ tum min di mu wa chiŋi o bar chiŋi ni, amaa ma wa la min du. Nandigi ka wa ma wati o titi nyuhu ni, ma ya la un duu.

⁴⁴ Ma daŋni ma nyɛ dɔŋ wa jirimarɛ, amaa ma wara daŋni jirima naa Koosa bɛgim ti koti a nyɛ ma. O wa ya beelire ma se vɛ su min.

⁴⁵ Ma ta lisi di mu zi fiksi mau a li mu kunyan ti suwachak ni. Ma kpak bambi bɛgim a li ma nawaal Mosis awa chenani o fun biksi ma ni. Waa la zi fiksi ma,

⁴⁶ amaa ma se wa su un. O funɛ sɔbi mu wɛu a li Koosa sɛm tɔn ti ni saha digi. Ma se su un, ma zi nyɛ ma se su minu.

⁴⁷ Ma se vɛ su chenani o fun sɔbi mu wɛ chen. O wa ya beelire ma se vɛ su chenani mu biksi ma.”