Jɔn 4 - Tampulma

Yesu Awa Samaria Tim Nihaan

^1-2 Farisi tim ta fun nu di nidamata liu a tiŋ Yesu a nyɛ o chaksi ba wa ni ni a kaali chenani ba li la Jɔn wati. Yesu titi wa fun a chaksi nara ta, amaa o funɛ nyɛ o gantɛl tiŋsi ta wa tum chen.

³ O funɛ zim chenani Farisi tim ta nuu, o wa o gantɛl tiŋsi ta fun si Judia ni a bur a la Galili pulum.

⁴ Yesu fun lisi di ba zi tiŋ nyinbaan naa la li Samaria pulum chenu a la tel Galili pulum.

⁵ Ba fun wa tel Samaria tɔhɔn naa ba yir Saika. Saika wa ŋmaha naa Ju tim ta nawaal, Jakɔb, fun kpa a nyɛ o be Josɛf ni saha digi wa fun bol dɔŋ ni.

⁶ Bugul naa Jakɔb fun hur, chen funɛ nyɛn dooni. Yesu val ti funɛ nyɛ o kuu kinkan. O fun la kani bugul ti nɔ ni nha sal baan nyuha di o hiisi.

^7-8 O gantɛl tiŋsi ta fun li kaali tɔhɔn ti di ba la yau diwe. O funɛ kani a hiisi chene, Samaria tim haan digi fun wa dooni di o dɔ ni. Yesu fun ŋɔ un di o nyɛ un ni o nyɔ.

⁹ Samaria tim haan ti fun ŋɔ un, “I ya Ju timwa ka mu ka ya Samaria tim haan. I zim di ya Samaria tima awa ma wa lɛm dɔŋ ni, ka yɛrɛ i sumi ni mu wati?”

¹⁰ Yesu fun ŋɔ un, “I fu zim chenani mu du, i fu zi sumi min di mu nyɛ hin niu i nyɔ. Mu wa zi dɔ ni bugul nɔ ni a nyɛ hin. Mu ka zi kpa ni paliu a nyɛ hin.”

¹¹ Haan ti wa fun zim o sɛm ta mun a ŋɔ, “Mu kunyana, i wa kpak guuga ka bugul nɔ luŋ. Leene i kaa la dɛu ni pali a wa nyɛ min?

¹² Ya nawaal, Jakɔb, funɛ hur bugul nɔ saha digi, chen ni o wa o walɛ awa o sela zi nyɔ o niu. Ya tiŋ gantɛlu a wa pu bugul ti a nyɔ un. I zen a kaali ya nawaal Jakɔbuu?”

¹³ Yesu fun ŋɔ un, “Ba naa maga nyɔ bugul ti ni, nyɔksa zi bu kpak bau.

¹⁴ Ba naa maga ka nyɔ ni naa n nyɛ ba, nyɔksi wa zi bu kpak ba. Mu daŋni mu kpa Koosa mi fali naa vɛ kpak bɔ a nyɛ nara ni. O mi fali ti chi nisire naa nyɛ ni pal ba tuhu ni saha maga.”

¹⁵ Haan ti funɛ nu Yesu sɛma, o fun ŋɔ un, “Mu kunyana, nyɛ min i ni ti, chen ni nyɔksa wa zi bu kpak min ka mu bur wa di mu wa dɔ ni.”

¹⁶ Yesu fun ŋɔ un, “Kila a la yir i baal ma wa.”

¹⁷ O fun ŋɔ un, “N wa kpak baal.” Yesu fun ŋɔ un, “Chenani i ŋɔ min, chen ya wutirɛ.

¹⁸ Nara banyuu funɛ kpa hin a burgi ba haan. Baal nɔ wati i nyɛn nan ya i samnɛ. Chenani i ŋɔ min, chen ya wutirɛ.”

¹⁹ Haan ti fun ŋɔ un, “Mu kunyana, i sɛm ta nyɛ mu zim di i ya Koosa witinsi ta digirɛ.

²⁰ Kina bi naa chiŋi doon nan. Ya nawaalsa funɛ jɛɛmi Koosa o nyuhu nee, amaa ma Ju tima ŋɔ ya di Jɛrusalɛm ya Koosa bar jɛɛmi.”

²¹ Yesu fun ŋɔ un, “Saha wau ba naa la jɛɛmi ya kunyan Koosa wa zi jɛɛmi un bi ti ni koo Jɛrusalɛm ni.

²² Ma Samaritan tima, ma wa zim naa ma jɛɛmi nɛnɛ. Ya Ju tima ka zim naa ya jɛɛmi nɛnɛ. Waa la zi wa nyɛ Ju tim nidigi yisi tɛɛnɛ nɔ maga nara tum tagna a li ba ni.

²³ Saha telu nara ba naa la jɛɛmi Koosa wa wuti ni, zi jɛɛmi un chenu, domi o siim weri ti nyɛn ba bambe ni. Chene ya kunyana Koosa daŋni nara kijɛɛmi un.

²⁴ Koosa ya siimne. Chendaha nara wa koti a jɛɛmi un wa wuti ni, see o siim weri ti te nyɛn ba bambe ni a suŋi ba.”

²⁵ Haan ti fun ŋɔ un, “N zimu di Kristo naa Koosa fun ŋɔ di o kaa wa tumu wuzu digi chen, zi wau. O wa wa, o zi biksi ya wɛ magau.”

²⁶ Yesu fun ŋɔ un, “N waa naa la sɛm hin nan, min chen.”

²⁷ O funɛ sɛm sɛm ta chene, o gantɛl tiŋsi ta fun bur wa. Alaazibu fun kpak ba kinkan o wa haan ti la sɛm sɛma dɔŋ wati chen daha. Ba nidigi wa fun pɛɛsi un di yɛrɛ o sɛm sɛma o wati koo kin naa nyuhu ni ba sɛm.

²⁸ Haan ti fun gil o ni kidɔɔli ti a bur kaali tɔhɔn tuha a la ŋɔ ba naa nyɛn dooni,

²⁹ “Mu wa a wa na baal naa ŋɔ min kin nawara mu fun tum. Waa ya Kristo naa Koosa fun ŋɔ di o kaa wa tumu wuzu digi chenn?”

³⁰ Ba fun chomsi a li tɔhɔn ti ni a kaali Yesu wati.

³¹ Haan ti funɛ nyɛn nyinbaan ni a la o tɔhɔn ti, Yesu gantɛl tiŋsi ta fun sumi un di o zer diwe a di.

³² O fun ŋɔ ba, “Ma wa zim diwe naa mu kpak a kaa di.”

³³ O gantɛl tiŋsi ta funɛ pɛɛsi dɔŋa, “Nandigi kpa diwe wa nyɛ un ka ya vɛ zimii?”

³⁴ Yesu fun ŋɔ ba, “Mu tiŋ Koosa naa tum min chen tutɔrɛ a tum tum naa o nyɛ min a peti, o chi diwe naa mu di chene.

³⁵ Ju tim ta nihɛɛta yaa ŋɔ di pɛnsa naasi gantɛl ni, ya zi kum kinau. Ma nyɛ mu ŋɔ ma, ma zer ma nyuuna a nyini ŋmaani ni. Kiparɛ ta piin biu a daŋni kumi.

³⁶ Ba naa kumɛɛ a kpa du napagsi ni, ba waa le la ba bɔta. Tumtumsi ta wa peti ba tum maga, ba naa du kin ta awa ba naa kumɛɛ, ba maga tusa zi sɔɔniu. Chen vɛɛna, ba naa kpa nara a wa mu wati chen ni Koosa zi kpa o mi fali naa vɛ kpak bɔ a nyɛ ba, o zi bɔ ba ba chimu.”

³⁷ Yesu fun bu ŋɔ o gantɛl tiŋsi ta ni, “Chenani Ju tim nihɛɛti ta yaa ŋɔ chen ya wutirɛ di nandigi yaa du ka nandigi kaa kum.

³⁸ O chi mu tum ma di ma la kum kiparɛ a li Koosa ŋmaha ni. Bɔnɛ funɛ du a a nyini a ka ma wa na nyɔɔra a li ba tum ni.”

³⁹ Samaria tim haan ti funɛ la ŋɔ o tɔhɔn ti nara ni, ma wa a wa na baal naa ŋɔ min kin nawara mu fun tum, ba nidamata se funɛ su Yesu.

⁴⁰ Ba funɛ wa o wati a wa sumi un di o nyɛn ba wati. Yesu fun la nɔɔni a nyɛn ba wati wuzu bilɛ.

⁴¹ O fun biksi ba Koosa wɛ ka nidamata se fun su un a gbaari ba naa se funɛ te su un chen ni.

⁴² Ba fun ŋɔ haan ti ni, “Ya se su un o biksi ti daha. A wa su un chenani i fun ŋɔ ya chen duŋduŋ daharɛ. Ya zimu di wutirɛ Koosa fun tum un di o wa yisi tɛɛnɛ nɔ maga nara tum tagna a li ba.”

Yesu Fun Tiibi Koor Hɛɛ Digi Be

⁴³ Wuzu bilɛ gantɛl ni, Yesu fun li dooni a kaali Galili pulum.

⁴⁴ O titi yaa ŋɔ nara niu di Koosa witinsi ta digi sɛmbiri nara wara nyɛ un jirima.

⁴⁵ Amaa Galili tim nidamata funɛ nyɛn Ju tim ta wuzu zen naa ba yir val la gali ti chen a li Jɛrusalɛm ni a na tum zene naa o tum dooni. Chendaha o funɛ tel Galili, ba fun la un du.

⁴⁶ O fun bur kaali Kena a li Galili pulum ni. Doonee o fun nyɛ ni ti burgi sin. Nihɛɛ digi funɛ nyɛn doon. O be fun nyɛn Kapɛrnaum ni a wi.

⁴⁷ O funɛ nu di Yesu li Judia pulumu a bur wa Galili, o fun la sumi un di o nyɛ ba la Kapɛrnaum a la tiibi o be naa la daŋni o sou.

⁴⁸ Yesu fun ŋɔ un, “Mu vɛ tum tum zene a nyɛ ma, ma se wa zi su min.”

⁴⁹ Nihɛɛ ti fun ŋɔ un, “Mu kunyana, i vɛ wa mu wati lalaga, mu be ti zi sowu.”

⁵⁰ Yesu fun ŋɔ un, “Kila dama. I zi na i be tiu ka o kpak alaafɛ.” Baal ti si fun su chenani Yesu sɛm chen a kaali.

⁵¹ O funɛ nyɛn nyinbaan ni aa la chene, o dam bisa fun wa chem un a ŋɔ un, “I be ti na alaafɛu.”

⁵² O fun pɛɛsi ba, “Nha funɛ mak yɛrɛ ka o na alaafɛ?” Ba fun ŋɔ un, “Nha dɛ jauu ka kabilima ti gil un.”

⁵³ Be ti nyana fun lisi di saha naa Yesu dɛ ŋɔ un di o be ti zi na alaafɛu chen, di nha jauu. O fun kaali dama a la na di chenani ba fun sɛm chen sir ya wutirɛ. O wa o walɛ maga se fun su Yesu chenani o tum chen daha.

⁵⁴ Chenani Yesu fun tiibi nihɛɛ ti be ti funɛ gbaari o tum zen ti bilɛ tiina a li Galili pulum ti ni.