Jɔn 21 - Tampulma

Yesu Gantɛl Tiŋsa Nara Banɔpɛ Fun Bu Na Un

¹ A gantɛl nɛɛ Yesu fun bu pu o gantɛl tiŋsi ta a li Galili bɛɛŋ nɔ ni. Bɛɛŋ ti sɔn digi ya Tibɛrias. Nannɛ o ya.

² O gantɛl tiŋsa ba naa funɛ lagmi dooni, ya Simɔn Pita, Tɔmas ka o ya leu chen, Nataniɛl naa li Kena a li Galili pulum ni, Zɛbɛdi bisa lɛ awa nara balɛ.

³ Wuzu digi Simɔn Pita fun ŋɔ ba, “Mu la nyinsa bar kpaksirɛ.” Ba fun ŋɔ un, “Ya zi wa gbaari hin niu.” Ba fun vaan la zu arŋa a lɔrgi ni ti aa la. A wuzu ti dusum ba wa fun kpaksi nyinsa.

⁴ Chɔɔsa funɛ wa pisi, ba fun bur a wa. Yesu fun chiŋi ni ti nɔ ni a pɔ ba, amaa ba wa fun zim un.

⁵ Ba funɛ wa dugli, Yesu fun pɛɛsi ba, “Mu bisa, ma kpaksi nyinsauu?” Ba fun ŋɔ un, “Ya wa kpak kundɔŋ.”

⁶ O fun ŋɔ ba, “Ma kpa ma cham ti a yo nindil wati ma zi kpaksi nyinsau.” Ba fun ya chenani o ŋɔ ba a vɛ koti a lɛrgi cham ti wa nyinsi ta zini.

⁷ Yesu gantɛl tiŋna naa o daŋni kinkan chen, fun na chenani yɛɛ, o fun ŋɔ Pita ni, “Naa chiŋɛ dooni chen ya ya kunyannɛ.” Simɔn Pita funɛ nu o sɛm ta, o fun vɔu takta naa o kpa lɔrgi ni chen a mari o bara kpala a za chiksi ni ti ni a la zaami un.

⁸ Arŋ ti funɛ ya naŋgere kɔksa torawa ni ti nɔ ni. Yesu gantɛl tiŋsa ba naa funɛ ka a nyɛn arŋ ti tuhu ni, ba funɛ lɛrgi cham ti hali a wa li ni ti nɔ.

⁹ Ba funɛ li arŋ ti ni a chiŋi, ba fun na ka Yesu zɔŋ nyinsa a li dinhala ni a kpa boroborosa a dau dooni.

¹⁰ Yesu fun ŋɔ ba, “Ma la lisi nyinsi ta bɔnɛ a li cham ti ni a wa.”

¹¹ Simɔn Pita fun te la kpak cham ti ba wa gbaari a lɛrgi un wa ni ti nɔ. Ba fun lugsi a a dau a gur di a ya nyin zene kɔkwa awa fumnyuu datorawa. A funɛ ya kidamata chen maga di cham ti wa chɛɛsi.

¹² Yesu fun ŋɔ ba, “Ma wa di diwe”. Ba maga funɛ zimu di o ya ba kunyan tirɛ. Chendaha ba nidigi wa fun pɛɛsi naa ya un.

¹³ Yesu fun kpa nyinsi ta awa boroborosi ta a bɔni ba ba se.

¹⁴ O funɛ si o sou ni, butora tiin nɛ o gantɛl tiŋsi ta fun na un.

Chenani Yesu Fun Sɛm Pita Ni

¹⁵ Ba funɛ wa se peti, Yesu fun pɛɛsi Simɔn Pita, “Simɔn, Jonas be, hin la daŋni min a kaali i dɔŋtim taa?” Pita fun ŋɔ un, “Mu kunyana, i zimu di muu daŋni hinu a kaali ba.” Yesu fun ŋɔ un, “Kidɛɛsi ba naa la tiŋ min a chi chenani piisi gbaŋna dɛɛsi o piisi bisa.”

¹⁶ Yesu fun bu pɛɛsi un, “Simɔn, Jonas be, ii daŋni minuu?” Pita fun ŋɔ, “Mu kunyana, i zimu di muu daŋni hinu.” Yesu fun ŋɔ un, “Kidɛɛsi ba naa la tiŋ min a chi chenani piisi gbaŋna dɛɛsi o piisisa.”

¹⁷ Yesu fun bu pɛɛsi un butor tiina, “Simɔn, Jonas be, ii daŋni minuu?” Pita funɛ nu ka Yesu pɛɛsi un butor tiina, o tuha fun chɔk. O fun ŋɔ, “Mu kunyana, hin zim chenani mu bambi du. I zimu di muu daŋni hinu.” Yesu fun bu ŋɔ un, “Kidɛɛsi ba naa la tiŋ min a chi chenani piisi gbaŋna dɛɛsi o piisisa.

¹⁸ Kinu mu wati nɛnɛ. I ha funɛ ya bunɔɔn, i ya funɛ di bunɔɔtau a gba i tutɔ ni. I wa hɛɛsi, i zi kpa i nisa a tɛu ka ba laari hin takta a kpa hin a la doonani i vɛ daŋni.”

¹⁹ Chene Yesu fun sɛm Pita ni di o biksi un chenani o zi wa sou a nyɛ Koosa wa jirima. O funɛ sɛm nannɛ a fun ŋɔ un, “Kitiŋ min.”

Yesu Awa O Gantɛl Tiŋna O Daŋni Kinkan

²⁰ Yesu wa Pita fun gba a la, Pita fun burgi a na Yesu gantɛl tiŋna naa o daŋni kinkan chen, ka o tiŋ ba gantɛl. O waa funɛ ya naa tur la mari Yesu Ju tim ta wuzu zen wuzu ti a pɛɛsi un, “Anti kaa wa li i gantɛl chen?”

²¹ Pita funɛ na un ka o tiŋ gantɛl a wa, o fun ŋɔ Yesu ni, “Mu kunyana, baŋa kaa wa ya baal nɔ?”

²² Yesu fun ŋɔ un, “O ya mu tutɔ di o ha vɛɛn kpak miisa ka mu wa bur wa, o wa ya i wi. I waa tiŋ min.”

²³ Chenani Yesu fun sɛm nyɛ o gantɛl tiŋsi ta fun ŋɔ dɔŋ ni di naa o daŋni kinkan wa zi wa sou. Yesu wa fun sɛm o wɛ di o wa zi sou. O ka funɛ ŋɔ Pita ni, “O ya mu tutɔ di o ha vɛɛn kpak miisa ka mu wa bur wa, o wa ya i wi.”

²⁴ N waa, Jɔn, naa sɔbi tɔn nɔ nan, minnɛ Yesu daŋni kinkan. Mu funɛ na kin naa maga mu sɔbi a du tɔn nɔ tuha. Ya maga zimu di mu sɛm ya wutirɛ.

Doonani Jɔn Fun Sɔbi Mak

²⁵ Yesu funɛ tum tum damatau a gbaari chenani mu sɔbi a du bar nɔ ni. See mu sɔbi tɔn damata a nyɛ ma, mu wa kikoti a sɛm ma a maga.