Jɔn 2 - Tampulma

Kena Tim Baal Naa Funɛ Kpa Haan

¹ Wuzu bilɛ gantɛl nɛɛ, baal digi fun kpa haan a li tɔhɔn naa ba yir Kena a li Galili pulum ni. Yesu niina funɛ nyɛn dooni.

² Ba fun yir Yesu awa o gantɛl tiŋsa gbanko di ba wa haan fali dam ti.

³ Ba naa funɛ wa haan fali ti ba zaami chen fun nyɔ sin a peti, Yesu niina fun wa ŋɔ un di sin ti maga peteu.

⁴ Yesu fun ŋɔ un, “Yɛrɛ i wa min wati? Mu saha ha wa tel.”

⁵ Doone o niin ti fun burgi a ŋɔ dam ti bisi ni, “Maa tum chenani maga o ŋɔ ma.”

⁶ Dasisa nɔra funɛ nyɛn dam ti ni. Dasi bɛgim zi zu galɔŋsau a dugli fumtora. Ju tim ta wa kaa di diwe dam ti ni, ba yaa zɔk dasisi ta nire a sɛm ba nisa.

⁷ Yesu fun ŋɔ dam ti bisi ni, “Ma zɔk ni gbaari dasisi ta ni a su.” Ba fun zɔk ni a gbaari a maga ni a su.

⁸ Ba funɛ ya chen peti, o fun ŋɔ ba, “Tɔ, lalaknɔ ma zɔk a la nyɛ nihɛɛ naa la nyini hɔɔri ta ni o nyɔ.” Ba fun zɔk a la nyɛ un.

⁹ O fun lɛmsi ni naa funɛ burgi sin chen, a vɛ zim doonani o liili. Dam ti bisa ba naa funɛ zɔk a nyɛ un, ba waa funɛ zim doonani o li. O fun yir haan fali baal ti a ŋɔ un,

¹⁰ “Nara yir ba dɔŋtima di ba lagmi a di diwe, ba yaa te kpa sin lɛmnɛ a nyɛ ba di ba nyɔ. Ba wa nyɔ sin lɛm ti puŋ, dam ti bisa yaa kpa sin tagin tirɛ a wa gbaari ba. Amaa ba wa kpa sin lɛm tirɛ a tiŋ gantɛl.”

¹¹ Chenani Yesu fun nyɛ ni ti burgi sin Kena ni a li Galili pulum ni chen, funɛ te ya o tum zen. O tum zen ti funɛ biksi o gantɛl tiŋsi ta di Koosa kpok nyɛn un ni. O tum zen ti daha ba se fun su un.

¹² Kpaali ti saha funɛ wa gali, Yesu wa o niin ti awa o niinbisa awa o gantɛl tiŋsi ta fun si dooni a kaali tɔhɔn naa ba yir Kapɛrnaum a la nyɛn wuzu bilɛ.

Yesu Fun La Zu Koosa Bar Jɛɛmi Dama

¹³ Wuzu zen naa Ju tim ta funɛ yir val la gali chen saha funɛ wa dugli, Yesu awa o gantɛl tiŋsi ta fun kaali Jɛrusalɛm,

¹⁴ a la zu Koosa bar jɛɛmi dama. O fun na nidamata ka ba yogli nuhɛ, piisisa awa kosa. Malɛ nichɛrɛ gbanko funɛ kani ba tebulsi muni ni.

¹⁵ O fun a dɛu gagbasa a kɔɔri vurma a duŋni ba naa la yogli nuhɛ ta awa piisisi ta wa ba sela a ta. O fun a burgi malɛ nichɛrɛ tim ta tebulsa gbanko a ta a pisi ba malɛ ta.

¹⁶ Doone o fun ŋɔ ba naa la yogli kosi ta chen, “Ma kpa a a li bar nɔ. Yɛrɛ ma lisi di ma tumu nan a kpa mu nyan dam ti a burgi yawa?”

¹⁷ O gantɛl tiŋsi ta fun a lisi chenani ba fun a sɔbi a li Koosa sɛm tɔn ti ni a ŋɔ, “Chenani mu baga nyɛn Koosa dam ti ni zi chɔk minu.”

¹⁸ Chɛɛm ti funɛ wa gil, Ju tim ta bɔnɛ fun wa pɛɛsi Yesu, “Anti nyɛ hin nyinbaan di i val aa kiya nan? Tum tum zen ya zim di Koosa chiŋɛ i gantɛl niu.”

¹⁹ Yesu fun ŋɔ ba, “Mu zi tum tum zenu a nyɛ ma. Ma zak Koosa bar jɛɛmi dam nɔ a lɔ ka mu sa un wuzu butora wuzu.”

²⁰ Ba fun ŋɔ un, “Ya walɛ funɛ kpa bun fumnaasi danɔrawa a sa un. I wa kikpa wuzu butora a bukoo sa un.”

²¹ Amaa Yesu wa funɛ sɛm Koosa bar jɛɛmi dam naa nyɛn Jɛrusalɛm ni chen wɛ. O funɛ sɛm o titi bara wɛwa.

²² Yesu funɛ sou ka Koosa lɛli un a li o sou ni, o gantɛl tiŋsi ta fun lisi chenani o fun sɛm chen. Ba fun zim di o sɛma awa chenani ba fun sɔbi o wɛ a li Koosa sɛm tɔn ti ni chen, ya wutirɛ.

Yesu Zim Chenani Nibinsa Bambe Duu

²³ Yesu funɛ di Ju tim ta wuzu zen naa ba yir val la gali ti chen a li Jɛrusalɛm ni, nidamata fun na tum zene naa o tum ka ba se fun su un.

²⁴ Amaa Yesu funɛ zim chenani nibinsa lisiu kinkan. Chendaha o wa fun nyɛ o si su ba.

²⁵ O wa funɛ daŋni di nara biksi un chenani nibinsa bambe du.