Jɔn 18 - Tampulma

Chenani Ba Fun Kpak Yesu

¹ Yesu funɛ sumi o nyan ti peti, o wa o gantɛl tiŋsi ta fun li dooni a la ji pul we naa ba yir Kidrɔn a la zu ŋma we digi.

² Doone Yesu wa o gantɛl tiŋsi ta yaa la. Chendaha Judas, naa funɛ li Yesu gantɛl chen, zim dooni.

³ Koosa dam kɔkɔɔrsi ta awa Farisi tim ta fun lagmi lanjimasa awa ba naa la il Koosa bar jɛɛmi dam ti. Judas fun te ba suwachak a kpa ba kaali ŋma we ti di ba la kpak Yesu. Ba fun kpa chisi zene awa fitinsa a suksi kɔvɔtɛ wa din ni a kaali.

⁴ Yesu funɛ zim chenani kaa wa yau a fun kaali di o la chem ba a pɛɛsi, “Antirɛ maa dɛu?”

⁵ Ba fun ŋɔ un, “Ya dɛu Yesu Nazarɛt narrɛɛ.” O fun ŋɔ ba, “Minnɛ.” Judas naa funɛ li o gantɛl chen funɛ lagmi zɛmɛ ta ni.

⁶ Yesu funɛ ŋɔ di waa ya naa ba dɛu chen, hansura fun vaan kpak zɛmɛ ta kinkan. Ba fun tur gantɛla a chesi tɛɛnɛ ni.

⁷ Yesu fun bu pɛɛsi ba, “Antirɛ maa dɛu?” Ba fun vɛɛn ŋɔ un, “Ya dɛu Yesu Nazarɛt narrɛ.”

⁸ O fun ŋɔ ba, “Mu piin ŋɔ mau di min ya un. O ya di minnɛ ma kaa wa kpak, ma nyɛ mu gantɛl tiŋsi nama kila ka ma kpak min.”

⁹ Yesu fun te ŋɔ o nyan ti ni di ba naa o fun lisi nyɛ un chen, o wa nyuksi ba nibɛgim. Chendaha o fun sɛm chen.

¹⁰ Doone Simɔn Pita fun foŋ o chisi zen a teŋ Koosa dam kɔkɔɔrsi ta nihɛɛ ti yom digi nindil diŋna a toti. O sɔn funɛ ya Malkus.

¹¹ Yesu fun ŋɔ Pita ni, “Kpa i chisi ti a bur du o lɔk ni. Ta tɔ nyinbaan naa mu nyan ti ŋɔ di mu namsi.”

Ba Fun Kpa Yesu A Wa Anas Suwachak

¹² Doone lanjimasi ta, ba nihɛɛ awa ba naa la il Koosa bar jɛɛmi dam ti, ba fun kpak Yesu a vɔu o nisa a ta o gantɛl ni.

¹³ Ba fun kpa un a kaali baal naa ba yir Anas chen dama. Koosa dam kɔkɔɔrsi ta nihɛɛ ti sɔn funɛ ya Kaifas. Anas funɛ ya o hila.

¹⁴ Kaifas funɛ ya naa funɛ te ŋɔ Ju tim ta ni di o deŋlu wa Yesu chiŋi ba maga bar chiŋi ni a sou nyɛ ba.

Pita Fun Vɛ Di O Wa Zim Yesu

¹⁵ Anas funɛ zim Yesu gantɛl tiŋsi ta digiu nɛnɛ. O wa Pita fun tiŋ a la doonani zɛmɛ ta kpa Yesu a la, o fun la zu Anas dam sal.

¹⁶ Pita fun kpalimi bulzɔɔnɔ ni. O wa fun vusi ka Yesu gantɛl tiŋna naa Anas fun zim nɛnɛ, fun wa li sal ti bulzɔɔnɔ ti. O fun sumi nihabichɛl naa pɔ bulzɔɔnɔ ti chen di Pita zu sal ti. O fun la nɔɔni.

¹⁷ Pita funɛ si di o la zu sal ti, nihabichɛl ti fun ŋɔ un, “I wa ya baal ti gantɛl tiŋsi ta nidigirɛɛ?” Pita fun ŋɔ un, “Aai, n wa ya ba nidigi.”

¹⁸ Dam bisa awa ba naa la il Koosa bar jɛɛmi dam ti, ba fun zɔk dinhala a buksi din sal ti bambaan ni domi wa funɛ nyɛn. Ba fun chiŋi a go un aa weeri. Pita fun la gbaari ba ni.

Anas Fun Pɛɛsi Yesu O Biksi Ti Wɛ

¹⁹ Doone Anas fun pɛɛsi Yesu chenani o gantɛl tiŋsi ta awa o biksi ti du.

²⁰ Yesu fun ŋɔ un, “Mu ha wa biksi nara tima a sogli. Mu ka yaa funɛ biksi ba gbampulim nɛɛ a li ba bar lagmi dɛɛni ta awa Koosa bar jɛɛmi dam ti nɛɛ. Doon ma nɛɛ Ju tim ta yaa lagmi.

²¹ Ta pɛɛsi min. Pɛɛsi ba naa mu fun biksi chen. Ba waa zim chenani mu fun ŋɔ ba.”

²² O funɛ sɛm chene, ba naa la il Koosa bar jɛɛmi dam ti digi fun mo un a ŋɔ, “Yɛrɛ i nyuha kpok i sɛm sɛma nan ni?”

²³ Yesu fun ŋɔ un, “Mu sɛm wi naa vɛ deŋli, sɛm nara nama maga ni chenani o du, amaa a deŋlee, yɛrɛ i mo min?”

²⁴ Yesu nisa ha funɛ vɛɛn vɔu a ta o gantɛl ni. Anas funɛ peti o sɛma, o fun tum un kaali Kaifas naa ya Koosa dam kɔkɔɔrsi ta nihɛɛ ti wati.

Pita Fun Bu Vɛ Di O Wa Zim Yesu

²⁵ Pita ha funɛ vɛɛn nyɛn sal ti nɛɛ aa weeri din. Ba naa wa un funɛ lagmi dooni chen nidigi fun pɛɛsi un, “I wa ya baal ti gantɛl tiŋsi ta nidigirɛɛ?” O fun tɔ a ŋɔ, “Aai, n wa ya ba nidigi.”

²⁶ Kaifas yom digi funɛ gbaari ba ni. O funɛ ya yom naa Pita fun teŋ o diŋna toti chen maannɛ. O fun ŋɔ Pita ni, “I wa baal ti laata mu na ŋma we ti ni chen?”

²⁷ O fun bu tɔ di o laata. O funɛ sɛm chene ka zimal vaan yeli.

Ba Fun Kpa Yesu A La Pailɔt Ni

²⁸ Chɔɔsa fininirɛ Kaifas awa Yesu fun na dɔŋa peti. Ju tim ta funɛ saksiu di ba di ba wuzu zen wuzu naa ba yir val la gali ti diwe. Lanjimasi ta funɛ kpa Yesu a kaali gɔbnati nyuhu tiina sɛria bar diili dɛ. Ju tim ta fun kpalimi sal ni, domi o funɛ chiu di ba tiŋ zu.

²⁹ Gɔbnati nyuhu tiin ti sɔn funɛ ya Pailɔt. O fun li sal ti a la pɛɛsi Ju tim ta, “Baŋ nyuhu nee ma fiksi baal nɔ?”

³⁰ Ba fun ŋɔ un, “O fu vɛ tum wu digi, ya fu wa zi kpa un a wa i wati.”

³¹ Pailɔt fun ŋɔ ba, “Ma kpa un kila a la di un sɛria a li chenani ma yaa di ma nara.” Ba fun ŋɔ un, “I wa nyɛ ya nyinbaan di ya di nara siwi sɛria.”

³² Chenani Ju tim ta funɛ daŋni Pailɔt kpa Yesu a kpaasi mari daakakli ni o sou nyɛ chenani o fun ŋɔ o gantɛl tiŋsi ta ni chen ya wuti.

³³ Doone Pailɔt fun bur kaali sɛria bar diili dɛ ti a ŋɔ o lanjimasi ta ni ba kpa Yesu wa nyɛ un. O fun ŋɔ un, “Hin ya Ju tim koor chenn?”

³⁴ Yesu fun burgi a pɛɛsi un, “Pɛɛsi nɔ li i watɛɛ koo nara ŋɔ hin di i wa pɛɛsi minn?”

³⁵ Pailɔt ŋɔ un, “Mu wa ya Ju tim nar ba ŋɔ min chenani mu zi pɛɛsi hin. I titi nara awa i Koosa dam kɔkɔɔrsi ta kpa hin a du mu nin ni. Tum tagna baŋwa i tum?”

³⁶ Yesu fun ŋɔ un, “Mu koor ti wa to tɛɛnɛ nɔ maga ni. O fu nyɛnɛɛ, mu nara fu zi you a kok min, chen ni Ju tim ta wa zi kpak min. Mu bura ŋɔ hinu, mu koor ti wa to tɛɛnɛ nɔ maga ni.”

³⁷ Pailɔt fun ŋɔ un, “Chenani i sɛm nan ya wuti, i sir ya koorree?” Yesu fun ŋɔ, “Chenani i kut ŋɔ chen. Ba funɛ lul minu mu wa tɛɛnɛ nɔ maga di mu waa biksi nara wuti ti wɛ. Ba naa la daŋni ba ya wuti tima nu mu sɛma.”

³⁸ Pailɔt fun pɛɛsi un, “Baŋa ya wuti ti?” O fun bur kaali sal ti a la ŋɔ Ju tim ta ni, “N wa na wu tagin naa o tum. O nin wa toli.”

Ju Tima Fun Di Yesu Siwi Sɛria

³⁹ Doone Pailɔt fun bu ŋɔ zɛmɛ ta ni, “Ma wuzu zen wuzu naa ba yir val la gali ti wa tel bun kam, mu yaa lisi ba naa mu tɔ dɛ chen nibɛgimu a nyɛ ma. Ma daŋni mu lisi naa ya Ju tim koor tirɛ a nyɛ maa?”

⁴⁰ Ba maga funɛ chɛɛmi a ŋɔ un, “Ya wara daŋni un. Ya daŋni baal naa ba yir Barabas chene.” Barabas funɛ ya nifuksirɛ. Chendaha Pailɔt fun tɔ un dɛ.