Jɔn 16 - Tampulma

¹ “Mu ŋɔ ma kin nama wɛu, chen ni ma wa zi bur a ni.

² Ju tim ta zi wa duŋni mau a li ba bar lagmi dɛɛni ta ni. Hali saha zi wa wau, ba naa kpu ma lisi di ba tiŋ Koosa tutɔrɛ.

³ Ba zi tum nanu a nyɛ ma, domi ba wa zim min koo mu nyan ti.

⁴ Mu ŋɔ ma kin nama wɛu, chen ni saha wa tel di ba ya nan nyɛ ma, ma zi lisi chenani mu ŋɔ mau. Ma wa min lagmi nyɛn nan, o wa deŋli di mu ŋɔ ma a wɛ.”

Chenani Koosa Siim Weri Ti Suŋi Ya

⁵ “Lalaknɔwa mu saksi di mu bur la naa funɛ tum min ma wati. Ma nidigi ha wa wa pɛɛsi min di leene mu la.

⁶ Mu ŋɔ ma kin nama wɛu ka a nyɛ ma tusa chɔk kinkan.

⁷ Ma nyɛ mu sɛm ma wuti. O deŋlu di mu gil ma a bur la mu nyan ti wati, chen ni mu zi nyɛ o siim weri ti wa suŋi mau. Mu vɛ laali, o wa zi koti a wa.

⁸ O wa wa, o zi nyɛ tɛɛnɛ nɔ tim maga zim di ba tum tum tagnau. O zi wa biksi ba di Koosa daŋni ba deŋliu o suwachak ni, chen ni o wa zi bu na ba galimsa.

⁹ Ba se wa su min. Chendaha ba yaa tum tum tagna.

¹⁰ Chenani mu zi chiŋi ba bar chiŋi ni a sou a nyɛ ba a bur la mu nyan ti wati, nan duŋduŋ la zi nyɛ ba deŋli Koosa suwachak ni.

¹¹ Koosa fun piin na sintana naa dɔ tɛɛnɛ nɔ tim maga, galimsa a ha vɛ ta un yɔri. Kin namawa Koosa siim weri ti kaa wa biksi ba.

¹² “Mu kpak wu damatau a kaa ŋɔ ma, amaa ma wa kikoti a chiŋi a nu a maga.

¹³ Koosa siim weri naa ya wuti tiina, wa nyɛn ma bambe ni, o zi nyini mau a li wuti nyinbaan ni. O biksi ti wa zi wa li o titi ni. Sɛm naa o zi wa nu mu wa mu nyan ti wati, o zi kpa au a sɛm ma. O gbanko zi biksi ma kin nawara zi wa yau wɛ.

¹⁴ O zi nyɛ min jirima kinkanu, domi o zi nu mu sɛmau a kpa a a sɛm ma.

¹⁵ Mu nyan ti sɛma awa mu sɛma ya kibɛgimnɛ. Chendaha mu ŋɔ ma di o siim weri ti zi nu mu sɛmau a kpa a a sɛm ma.”

Yesu Gantɛl Tiŋsa Tu Chɔk Zi Burgi Tu Sɔɔnau

¹⁶ “Mu wa zi nyɛn ma wati a vusi a bur la mu nyan ti wati. Mu wa la o wati, o wa zi vusi ka ma nu na min.”

¹⁷ Yesu funɛ sɛm ba peti, o gantɛl tiŋsi ta bɔnɛ fun ŋɔ dɔŋ ni, “O fa ŋɔ ya di o wa zi nyɛn ya wati a wusi a bur la o nyan ti wati. O wa la o wati, o wa zi vusi ka ya bu na un. O sɛm ta mun ya baŋa?

¹⁸ Ya wa zim chenani o fa ŋɔ ya di o wa zi vusi chen mun.”

¹⁹ Yesu funɛ zimu di ba daŋni o suŋi bau. O fun ŋɔ ba, “Ma na dɔŋwa a li chenani mu fa sɛm ma chen, mu wa zi nyɛn ma wati a vusi a bur na ma lalaga.

²⁰ Wutirɛ mu ŋɔ ma, mu bu vɛ wa nyɛn ma wati, tɛɛnɛ nɔ tim maga tusa zi wa sɔɔniu kinkan, amaa ma tusa ka zi wa chɔku kinkan. Ma tu chɔk ti wa zi wa vusi, amaa a zi wa ya tu sɔɔnau lalaga.

²¹ Nihaan wa duurɛ, o tuha ya chɔk. O wa lul peti, o ya sugliu wiili tiu ka o tuha sɔɔni o be ti daha.

²² Ma tusa chɔku lalaknɔ. Ma bu wa na min, ma tusa ka zi bu sɔɔniu kinkan. Nandigi wa kilisi ma tu sɔɔn ti a li ma ni.

²³ “Chen saha ti ma wa zi wa mu wati di ma wa pɛɛsi min kundɔŋ wɛ. Wutirɛ mu ŋɔ ma, ma zi kotiu a sumi mu nyan ti kin naa ma daŋni mu sɔn daha o nyɛ ma.

²⁴ Hali wa zinan ma ha wa sumi un kundɔŋ mu sɔn daha. Maa sumi un o zi nyɛ mau ka ma tusa sɔɔni hali a la gali.”

Yesu Kpok Ya Zen A Kaali Tɛɛnɛ Nɔ Tim Maga Kpok

²⁵ “Kin naa mu ŋɔ ma a wɛ nan, o bɔmu wa ma zim a mun. Saha wau di mu zi wa biksi ma mu nyan ti wɛ gbampulim ni ka o ta bu bɔm ma ni.

²⁶ Saha ti wa tel, ma wa zi bu nyini mu se ni di mu nyɛ mu nyan ti nyɛ ma kin naa ma daŋni. Ma zi wa sumi o titi watiu a li mu sɔn ti ni o kpa a a nyɛ ma.

²⁷ Mu nyan ti daŋni mau kinkan a la zi ya chen a nyɛ ma. Ma daŋni minu ka ma se su di mu funɛ li o watɛɛ. Chendaha o daŋni ma a chi chen.

²⁸ Mu funɛ li o watɛɛ a wa tɛɛnɛ nɔ maga. Lalaknɔ mu saksi di mu li a bur a la o wati.”

²⁹ Doone o gantɛl tiŋsi ta fun ŋɔ un, “Lalaknɔwa ya zim chenani i sɛm ya chen mun. O wa bu bɔm ya ni.

³⁰ Ya gbanko zimu di i zim kina magau, hali chenani ya lisi ya bambe ni. Chendaha ya se su di i li Koosa watɛɛ a wa ya wati.”

³¹ Yesu fun ŋɔ ba, “Ma se sir su minuu?

³² Ma nu n wati. O wa zi vusi ka ma maga chɔ kaali ma damsa a ka min duŋduŋ, amaa mu nyan ti wa zi ya chen. O wa min zi nyɛnu.

³³ Chenani ma nyɛn tɛɛnɛ nɔ maga ni zi nyɛ ma na namsiu kinkan. Chenani ma wa min ya nibɛgim a nyɛn ka zi nyɛ ma bara sɔɔniu. Chendaha mu fun ŋɔ ma kin nama. Ma kpak ma bambe. Mu kpok ti ya kizen a kaali tɛɛnɛ nɔ tim maga kpok.”