Jɔn 14 - Tampulma

Yesu Ya Koosa Tɔhɔn Ti Nyinbaan

¹ Doone Yesu fun ŋɔ o gantɛl tiŋsi ta ni, “Ma ta nyɛ ma bambe bure. Ma se su Koosa. Ma ta nyɛ ma se suuli bur gantɛl a li min ni.

² Damsi kinkan nyɛn doonani mu nyan ti nyɛn. Mu wa la dooni, mu zi kɔɔri bɔnɛu a chiksi ma. Nan vɛ yaali, mu fu wa zi ŋɔ ma.

³ Mu wa kɔɔri a peti, mu zi bur wa kpa ma lau, chen ni ma wa min zi bu lagmi nyɛnu.

⁴ Ma waa zim doonani mu la awa doon nyinbaan.”

⁵ Tɔmas fun ŋɔ un, “Mu kunyana, ya ha wa kpak doonani i la chen ya bambe ni. Yɛrɛ ya kaa ya zim doon nyinbaan?”

⁶ Yesu fun ŋɔ un, “Min ya doon nyinbaan ti. Mu ya wuti tiina awa Koosa mi fali tiina. Nandigi wa kila mu nyan ti wati aa vɛ na min.

⁷ Ma fun zim chenani mu sir du, ma fu zi zim chenani mu nyan ti gbanko duu. Zinan kpa la ma na unu a zim un.”

⁸ Filip ha wa fun vɛɛn zim o sɛm ta mun a ŋɔ un, “Mu kunyana, ma nyɛ ya pu i nyan ti. Chen duŋduŋnɛ ya daŋni.”

⁹ Yesu fun ŋɔ un, “Filip, yɛrɛ i pɛɛsi min chen ni? Ma wa min nyɛn vusiu. I ha wa vɛɛn zim nibine naa ya minn? Nara maga na min, mu nyan tirɛ ba na chen.

¹⁰ Nyɛ i si su di mu nyan ti nyɛn min nɛɛ ka mu ka nyɛn un ni. Chenani mu biksi ma a la tum chen wa li min ni. A maga li mu nyan naa nyɛn min ni watɛɛ.”

¹¹ Doone Yesu fun ŋɔ o gantɛl tiŋsi ta ni, “Ma nyɛ ma se su di mu nyan ti nyɛn min nɛɛ ka mu ka nyɛn un ni. Nan bɔm ma ni, ma lisi tum zene naa ma na ka mu tum chen. A waa la zi suŋi ma ma se su.

¹² Wutirɛ mu ŋɔ ma, ba naa se su min, ba zi tum chenani mu tumu. Hali ba zi tumu tum zene a kaali chenani mu tum, domi mu zi wa bur la mu nyan ti watiu.

¹³ Mu waa naa ya Koosa be, n daŋni narawa yaa kinyɛ mu nyan ti wa jirima. Chendaha kin naa maga ma ŋɔ di mu tum a nyɛ ma a li mu sɔn ni, n zi tum au.

¹⁴ Ma nyɛ mu bu ŋɔ ma, kin naa maga ma ŋɔ di mu tum a nyɛ ma a li mu sɔn ti ni, n zi tum au.”

Koosa Kpa O Siim Weri A Nyɛ Ya

¹⁵ “Maa daŋni min, ma zi tiŋ chenani mu ŋɔ mau.

¹⁶ Mu zi sumi mu nyan tiu o kpa o siim weri, naa ya wuti tiina, a du ma bambe ni. O zi nyɛn dooniu hali saha naa vɛ kpak bɔ aa suŋi ma ma tiŋ chenani mu ŋɔ ma.

¹⁷ O wa zi wa nyɛn tɛɛnɛ nɔ tim maga bambe ni, domi ba wa zim di o nyɛnu. Ma ka zim di o nyɛnu, domi o zi wa nyɛn ma bambe niu.

¹⁸ “Mu wa zi gil ma duŋduŋ. Mu zi bur wa ma watiu.

¹⁹ Saha naa tɛɛnɛ nɔ tim maga vɛ kaa wa na min chen duglɛu, amaa ma waa ka zi bu na minu. Domi mu zi wa si mu sou niu, ma gbanko zi wa si ma sou niu.

²⁰ A wuzu naa mu wa si mu sou ni, ma zi zimu di mu nyɛn mu nyan ti nɛɛ ka ma nyɛn min ni ka mu gbanko nyɛn ma ni.

²¹ “Ba naa la nu mu sɛma a la tiŋ a, chen biksi di ba daŋni minu. Mu gbanko zi daŋni bau a kpa mu titi a biksi ba. Ba la daŋni min chen daha, mu nyan ti gbanko zi daŋni bau.”

²² Baal digi funɛ nyɛn doon. O sɔn ya Judas, amaa o laata fun ya Judas Iskariɔt. O fun ŋɔ Yesu ni, “Mu kunyana, yɛrɛ i kaa ya a kpa i titi a biksi ya a ta kpa i titi a biksi tɛɛnɛ nɔ tim maga?”

²³ Yesu fun ŋɔ un, “Ba naa la daŋni min zi tiŋ mu nɔ sɛmau. Mu nyan ti gbanko zi daŋni bau, ka mu wa un wa nyɛn ba bambe ni.

²⁴ Ba naa vɛ daŋni min wa zi tiŋ mu nɔ sɛma. Chenani mu biksi ma wa li min ni. A maga li mu nyan naa tum min chen watɛɛ.

²⁵ “Mu wa ma funɛ nyɛn ka mu sɛm ma kin nama.

²⁶ Mu nyan ti wa tum o siim weri ti di o wa chiŋi mu bar chiŋi ni. Waa la zi biksi ma kin nama maga ma daŋni ma zim aa lisi ma chenani maga mu fun ŋɔ ma.

²⁷ “Mu zi nyɛ ma bar sɔɔnau a chi chenani mu bara du. A wa kaali tɛɛnɛ nɔ tim maga bar sɔɔnau kinkan. Ma ta nyɛ ma bambe bure a ta ɔmi.

²⁸ Mu piin te ŋɔ mau di mu zi la mu nyan ti watiu a bur wa. Ma sir a daŋni min, ma tusa zi sɔɔniu domi mu nyan ti zen kaali min.

²⁹ Mu te ŋɔ ma kin nama wɛwa ka a zi wa ya, chen ni a wa ya, ma se zi su minu a gbaari.

³⁰ Mu wa bura daŋni mu sɛm kinkan ma wati, domi sintana naa dɔ tɛɛnɛ nɔ tim maga wau. Mu wa un wa kpak wu digi wa dɔŋ ni.

³¹ Mu nyan ti funɛ ŋɔ min chenani mu zi tum. Mu zi tiŋ o nɔu a tum a, chen ni tɛɛnɛ nɔ tim maga zi zimu di muu daŋni unu. Ma nyɛ ya si a la bar digi.”