Jɔn 13 - Tampulma

Yesu Fun Sɛm O Gantɛl Tiŋsa Naŋgere

¹ O funɛ ka wuzu bɛgimnɛ di val la gali wuzu zen ti tel. Yesu funɛ zimu di o kpaki saha ti duglɛu di o li tɛɛnɛ nɔ maga ni a bur kila o nyan ti wati. Chenani o funɛ daŋni ba naa o dɔ wa funɛ bur gantɛl.

² Yesu wa o gantɛl tiŋsi ta funɛ di dusum diwe ka sintana fun lisi di Judas Iskariɔt, Simɔn be, zi li Yesu gantɛlu.

³ Yesu funɛ zimu di o nyan naa tum un tɛɛnɛ nɔ maga ni, funɛ kpa kina maga a du o nin ni. O gbanko funɛ zimu di o nyɛn nyinbaan nɛɛ a bur a la Koosa wati.

⁴ A saha ti Yesu fun si diwe bar diili ti ni a ur o takta a zer bara kifiisi a niŋi.

⁵ Doone o fun yoli ni a du katɛsa ni a funɛ sɛm o gantɛl tiŋsi ta naŋgere a kpa bara kifiisi ti a fiisi ba naŋgere ta.

⁶ O fun wa pu Simɔn Pita. O fun pɛɛsi un, “Mu kunyana, o wa deŋli wa i sɛm mu naŋgere.”

⁷ Yesu fun ŋɔ un, “I wa zim chenani mu kaa ya nyɛ hin nan mun lalaknɔ, amaa o gantɛl ni i zi wa zimu.”

⁸ Pita fun ŋɔ un, “Mu wa zi kut nyɛ i sɛm mu naŋgere.” Yesu fun ŋɔ, “I vɛ nyɛ mu sɛm a, i wa zi bu ya mu gantɛl tiŋsi ta digi.”

⁹ Simɔn Pita fun fɛti a ŋɔ, “O ya di chene, ta chaksi mu naŋgere duŋduŋ. Chaksi mu nisa awa mu nyuha gbanko.”

¹⁰ Yesu fun ŋɔ un, “Nar sɔ ni, chene i bara maga wer, amaa i ka val la bar digi, i naŋgere duŋduŋnɛ i yaa sɛm.” Doone o fun burgi a ŋɔ o gantɛl tiŋsi ta ni, “Lalaknɔwa ma maga bambe wer, amaa ma nibɛgim bambi vɛ weri.”

¹¹ Yesu funɛ piin zim naa kaa li o gantɛlu. Chendaha o fun ŋɔ di ba nibɛgim bambi wa wer.

¹² Yesu funɛ sɛm ba naŋgere peti chen, o fun bur kaali o bar kani ti a la laari o takta ti a ŋɔ ba, “Mu zi ŋɔ ma chenani mu tum nyɛ ma nan munu.

¹³ Ma yaa yir min ma kunyana naa la biksi ma Koosa wɛ. Chen deŋlee, domi mu sir ya ma kunyannɛ.

¹⁴ Mu waa naa ya ma kunyan ti a biksi ma Koosa wɛ, fa chaksi ma naŋgere ta. Ma gbanko kichaksi dɔŋa naŋgere.

¹⁵ Maa tiŋ chenani mu biksi ma di ma tiŋ chen.

¹⁶ Ma nu mu sɛma nɛnɛ. Yom wa to a zen a kaali o kunyana. Nitumi wa to a zen a kaali naa tum un.

¹⁷ Ma zim chenani mu daŋni ma tumu. Ma ya chen, ma tusa zi sɔɔni kinkan.

¹⁸ “Sɛm naa mu sɛm ma nan, mu wa sɛm a a nyɛ ma maga nɛɛ. Min zim ba naa mu lisi a li ma tuhu niu. Ba funɛ sɔbiu a li Koosa sɛm tɔn ti ni a ŋɔ, ‘Mu wa naa di diwe nan zi li mu gantɛlu.’ Chenani ba sɔbi, sɛm nama nan zi ya wutiu.

¹⁹ Mu te ŋɔ mau, chen ni ka nan wa ya, ma se zi su di min ya naa ba fun sɔbi chen wɛ.

²⁰ Ma bu nu mu wati nɛnɛ. Ba naa maga la naa mu tum a du, minnɛ ba la du chen. Ba naa maga la min a du, naa tum min chene ba la du.”

Yesu Fun Ŋɔ Chenani Judas Zi Li O Gantɛl

²¹ Yesu funɛ sɛm nan peti, o bambi buri un ni kinkan. O fun ŋɔ ba, “Wutirɛ mu ŋɔ ma, ma nidigi a li ma tuhu ni zi li mu gantɛlu.”

²² O gantɛl tiŋsi ta fun nyini dɔŋ se ni a la lisi, antirɛ o zi bi nan?

²³ Naa Yesu funɛ daŋni kinkan a li ba ni funɛ kani a mari un.

²⁴ Simɔn Pita fun baasi o nin di o nyɛ Yesu ŋɔ un chenani o du.

²⁵ Naa Yesu funɛ daŋni kinkan fun tur la mari un a pɛɛsi, “Mu kunyana, anti chen?”

²⁶ Yesu fun ŋɔ un, “Mu kaa kpa diwere a suk disa a nyɛ un. Waa ya naa mu bi chen.” O fun kpa diwe ti a suk disa a nyɛ Judas Iskariɔt, Simɔn be, ni.

²⁷ Judas funɛ la boroboro ti, sintana fun vaan zu o bambi ni. Yesu fun ŋɔ un, “Kila lalaga a la tum chenani i kaa tum.”

²⁸ Ba naa funɛ lagmi di ba di diwe chen wa fun zim chenani Yesu sɛm un chen mun.

²⁹ Ba maga malɛ funɛ nyɛn Judas nin nee. Ba bɔnɛ fun lisi di Yesu ŋɔ un di o la yau wuzu zen ti diwe. Bɔnɛ ka fun lisi di Yesu ŋɔ un di o lisi malɛ ta bɔnɛ a la nyɛ fara tim ni.

³⁰ Judas funɛ la boroboro ti, o fun vaan si a li. O funɛ ya dusum saharɛ.

Yesu Chiksi Fali Wɛ

^31-32 Judas funɛ kaali, Yesu fun ŋɔ o gantɛl tiŋsi ta ni, “Nidamata zi pɛgi Koosa kinkan a li chenani ba kaa ya min. Chenani Koosa zi kpa o jirima awa chaani kinkan a nyɛ n waa nibine be ni duglɛu. O wa zi vusi ka o ya chen.

³³ Mu bisa, mu wa ma wa zi nyɛn vusi. Mu wa kaali, ma zi dɛu mu bar nyɛniu. Ma lisi chenani mu fun ŋɔ Ju tim ta ni di ba wa kikoti a tiŋ min la doonani mu la chen. Chenani mu ŋɔ ba chen, ya ma gbanko kinnɛ.

³⁴ Chiksi fali nyɛnɛɛ mu daŋni ma tiŋ. Ma zimu di mu daŋni mau kinkan. O lawa ma gbanko kidaŋni dɔŋau a chi chen.

³⁵ Ma daŋni dɔŋa nan ni, nara maga zi zimu di ma ya mu gantɛl tiŋsiwa.”

Yesu Fun Ŋɔ Pita Ni Chenani O Zi Vɛ Un

³⁶ Simɔn Pita fun pɛɛsi un, “Mu kunyana, leene i la?” Yesu fun ŋɔ un, “I wa kitiŋ min a la doonani mu la chen lalaknɔ. O zi ya tamnɛ i koti a tiŋ min.”

³⁷ Pita fun bu pɛɛsi un, “Mu kunyana, yɛrɛ mu vɛ ka koti a tiŋ hin lalaknɔ? Mu saksɛu di mu sou a nyɛ hin.”

³⁸ Yesu fun burgi a pɛɛsi un, “I sir saksɛ di i sou a nyɛ minuu? Nu mu wati nɛnɛ. I zi te ŋɔ nara niu dusum nɔ di i wa zim min nɔ butora ka zimal zi yeli.”