Jɔn 12 - Tampulma

Haan Digi Fun Biti Tulale A Du Yesu Ni

¹ Wuzu bunɔra tuhu nɛɛ wuzu zen ti fun wa tel, Yesu fun bur kaali Bɛtani. Lazarus naa Yesu fun lɛli un a li o sou ni, funɛ nyɛn dooni.

² Ba fun ya diwe di ba wa Yesu di. Yesu fun wa o wa Lazarus fun lagmi kani. Marta fun kpa diwe ta a wa nyɛ ba ba di.

³ Ba funɛ di chene, Mɛri fun kpak tulale awa gbakme suha naa malɛ fun a kpok kinkan, a biti o maga a du Yesu naŋgere ni a fiisi a awa o nyuksi ni. Dam ti maga fun su wa tulale ti sɔɔra weri ni.

⁴ Yesu gantɛl tiŋsi ta digi funɛ nyɛn doon ba yir un Judas Iskariɔt. Waa funɛ ya naa kaa li Yesu gantɛl. O fun ŋɔ,

⁵ “Haan nɔ fu kpa tulale nɔ a yogli malɛ damata a fu kpa a a nyɛ fara tim ni, chen fu wa bɔɔ?”

⁶ Judas baga wa fun to di o suŋi fara tima. O funɛ nyini Yesu gantɛl tiŋsi ta malɛwa a la suŋi o titi a li malɛ ta ni.

⁷ Yesu fun ŋɔ un, “Gil haan ti. O funɛ te biti tulale nɔ a du mu bara ni di ba wa sogli min.

⁸ Saha maga fara tim ta yaa nyɛn ma watɛɛ, amaa mu wa ma zi nyɛn vusi.”

Chenani Ju Tima Funɛ Daŋni Ba Kpak Lazarus

⁹ Laaboor funɛ pisi a su di Yesu nyɛn Bɛtani ni, Ju tim ta nidamata fun si di ba la na un. Ba gbanko funɛ daŋni ba la na Lazarus, naa Yesu fun lɛli a li o sou ni chen.

¹⁰ Koosa dam kɔkɔɔrsa ba naa funɛ nyini nyinbaan di ba kpu Yesu, funɛ kpa Lazarus a gbaari un nɛɛ di ba kpu.

¹¹ Ju tim nidamata funɛ gil ba nihɛɛta a nyɛ ba se su Yesu o funɛ lɛli Lazarus a li o sou ni daha. Chendaha ba fun ya chen.

Yesu Fun La Zu Jɛrusalɛm

¹² Chɔɔsa funɛ wa pisi, zɛmɛ kinkan ba naa wa Jɛrusalɛm di ba wa di wuzu zen ti, fun nu di Yesu nyɛn nyinbaan ni aa wa.

¹³ Ba kpa bone kpachaga a li di ba la chem un. Ba funɛ la o bar chemi chene a la chɛɛmi a ŋɔ, “Tabarkala. I waa naa Koosa tum di i ya ya koora, yaa zaami hinu kinkan.”

¹⁴ Yesu funɛ na ka zɛmɛ ta wa, o fun nyɛ o gantɛl tiŋsi ta kpa kokum be pɔl a wa nyɛ un o zini a la.

¹⁵ Ba funɛ sɔbi a li Koosa sɛm tɔn ti ni a ŋɔ, “Ma Jɛrusalɛm tima, ma ta nyɛ hansura kpak ma. Ma koora zi wa zini kokum be pɔlu a wa ma wati.”

¹⁶ Yesu gantɛl tiŋsi ta funɛ kpa kokum be pɔl ti a nyɛ un, ba waa fun lisi chenani ba sɔbi o wɛ a du Koosa sɛm tɔn ti ni. O funɛ sou a si o sou ni a bu kaali Koosa tɔhɔn ti, doone ba fun zim chenani ba fun sɔbi chen mun.

¹⁷ Ba naa funɛ na chenani Yesu yir Lazarus di o si o sou ni a li gbɛntɛl bɔ ti ni a wa, ba fun bur kaali Jɛrusalɛm di ba la mɔɔli laaboora.

¹⁸ Chendaha zɛmɛ ta fun li di ba la chem Yesu. Ba funɛ daŋni ba na naa tum tum zen ti chen.

¹⁹ Farisi tim ta funɛ nu chenani zɛmɛ ta zaami un, ba funɛ ŋɔ dɔŋ ni, “O di yau. Ma nyini a na nidamata ba naa tiŋ un.”

Girik Tim Bɔnɛ Funɛ Daŋni Ba La Pu Yesu

²⁰ Girik tim bɔnɛ gbanko funɛ nyɛn Jɛrusalɛm ni di ba di wuzu zen ti.

²¹ Yesu gantɛl tiŋsi ta digi sɔn funɛ ya Filip. O tɔha funɛ ya Bɛtseida a li Galili pulum ni. Ba fun wa ŋɔ un, “Ya nihɛɛ, ya daŋni ya la pu Yesuu.”

²² Filip fun la ŋɔ Andiru ni chenani ba daŋni ba la pu Yesu. Nara balɛ ta fun tiŋ dɔŋa a kaali o wati.

²³ Yesu fun ŋɔ ba, “Saha telu di Koosa lisi a li o jirima awa chaani kinkan ni a nyɛ mu waa nibine be ni.

²⁴ Maa nu mu wati nɛnɛ. Ma zim di kiduha tiina yaa kpa kibɛgim bɛgimwa a du. Kiduha ti titi yaa pɔu ka kifali nyu a zini a nɔn kidamata. O vɛ pɔɔli, o wa zi nyu a zini a nɔn.

²⁵ Nibinsa chi kiduharɛ. Ba baga vɛ nyɛn ba miisa ni a li tɛɛnɛ nɔ maga ni, Koosa zi kpa o mi fali naa vɛ kpak bɔu a nyɛ ba. Ba baga ka nyɛn ba miisa ni di ba kpak o bar la peti ni, ba wa zi na kundɔŋ.

²⁶ Ma la ŋɔ Girik tim ta ni di ba daŋni ba wa min tum tuma, ba wa tiŋ min, chen ni ba zi nyɛn doonani mu nyɛnu. Ba ya chen, mu nyan ti zi nyɛ ba jirimau.”

Yesu Fun Sɛm O Sou Sɛma

²⁷ Doone Yesu fun burgi a ŋɔ ba naa nyɛn dooni, “Mu bambi bure min ni. Mu wa koti a sumi mu nyan ti di o lisi min a li kin naa kaa wa ya nan ni. O funɛ tum min di mu wa chem chene.”

²⁸ Doone o fun sumi Koosa a ŋɔ, “Mu nyana, nyɛ nara kinyɛ hin jirima chenani ba kaa ya min daha.” Ba fun vaan nu ta a li buudaha ni ka o ŋɔ, “Mu funɛ nyɛ nara nyɛ min jirima ka mu zi bu nyɛ ba ya chen.”

²⁹ Zɛmɛ ba naa funɛ chiŋi doon chen bɔnɛ fun nu ta ti a ŋɔ dɔŋ ni, “O chi nasɛha tɛsɛɛ.” Bɔnɛ ka ŋɔ, “Malaika ŋɔ un.”

³⁰ Yesu fun ŋɔ ba, “Ta naa ma nu chen, o ya ma kinnɛ. O wa ya mu kin.

³¹ Chenani Koosa zi di tɛɛne nɔ tim maga sɛria a nyaŋi sintana naa dɔ ba, duglɛu.

³² Ba wa kpaasi min a mari daakakli ni di mu sou, nidamata bambe zi nyɛn min niu.”

³³ Chenani o sɛm ba nan biksi ba nyinbaan naa o zi wa sou.

³⁴ Zɛmɛ ta nidigi fun ŋɔ un, “Ba funɛ sɔbi a li Koosa sɛm tɔn ti ni di Kristo naa Koosa fun vɔu di o tum chen zi nyɛnu hali saha naa vɛ kpak bɔ. Yɛrɛ i sɛm ya di nara zi kpak nibine beu a kpaasi mari daakakli ti ni o sou? Ya wa zim nibine naa ya un.”

³⁵ Yesu fun ŋɔ ba, “Mu chi fitinne a nyɛn ma wati. O wa zi vusi ka birsi wa tɔ min. Ma kpak fitina a val doonani ma daŋni ma val. Birsi ti wa tɔ un, ma zi nyuksi nyinbaanu.

³⁶ Mu ha nyɛn ma wati wuzu bilɛ nan, ma nyɛ ma se su min, chen ni ma nyinbaan zi chaaniu saha maga.” Yesu funɛ sɛm peti, o fun la sogli o titi.

Chenani Ju Tim Ta Bɔnɛ Se Fun Vɛ Su Yesu

³⁷ O funɛ tum tum zeneu kinkan a li ba suwachak ni, amaa ba nidamata se wa fun su un.

³⁸ Chendaha Koosa witiina Azaaya sɛma naa o fun sɔbi a li Koosa sɛm tɔn ti ni saha digi chen zi ya wutiu. O fun ŋɔ, “Koosa funɛ tum tum zeneu ba suwachak ni, amaa ba se wa fun su o laaboor weri naa ya fun sɛm ba.”

³⁹ Azaaya fun bu sɔbi ba naa se vɛ su Yesu wɛ a ŋɔ,

⁴⁰ “Koosa funɛ nyɛ ba se tɔ a nyɛ ba bambe ya bambe sitɛ, chen ni ba wa zi koti a na aa zim chenani o ya. O vɛ ya chen, ba bambe zi chɛrgiu chen ni o gil ba tum tagna a nyɛ ba.”

⁴¹ Azaaya funɛ na Yesu jirima awa chaani kinkanu a chi o deesi. Chendaha o fun sɔbi nan.

⁴² Ju tim nihɛɛ damata funɛ nyɛ ba se su Yesu, amaa ba wa fun nyɛ ba se su un a li gbampulim ni, domi ba funɛ ɔm Farisi tim tawa. Farisi tim ta zim chenani ba ya, ba zi duŋni bau a li ba bar lagmi dɛɛni ni.

⁴³ Ba daŋni narawa kinyɛ ba jirima a kaali chenani ba daŋni Koosa kinyɛ ba jirima.

Sɛm Nawara Yesu Fun Sɛm Zi Wa Di Nara Sɛriau

⁴⁴ Doone Yesu fun zer o ta buudaha a ŋɔ zɛmɛ ta ni, “Naa si su min, o si su Koosa naa tum min chen gbanko.

⁴⁵ Naa na min, o na Koosa naa tum min chen gbanko.

⁴⁶ Mu funɛ wa tɛɛnɛ nɔ magau di ba naa maga se su min wa zi val birsi ni. Mu chi fitinne a chaani ba nyinbaan.

⁴⁷ Mu wa zi di ba naa maga nu mu sɛma a vɛ tiŋ a nɔ sɛria. Mu wa fun wa di mu wa di tɛɛnɛ nɔ tim maga sɛria. Mu ka funɛ wa di mu wa lisi ba a li ba tum tagni nɛɛ.

⁴⁸ Tɛɛnɛ nɔ maga siili saha wa tel, sɛm nawara mu fun sɛm zi wa di ba naa funɛ vɛ min awa mu sɛma sɛriau.

⁴⁹ Chenani mu sɛm ma nan wa ya mu titi sɛma. Mu nyan naa tum min chen, kpa sɛm ta nyɛ min di mu wa sɛm ma.

⁵⁰ Sɛm naa maga o fun kpa nyɛ min, mu kpa biksi mau. Ba naa maga nu o sɛm ta, o zi kpa o mi fali naa vɛ kpak bɔu a nyɛ ba.”