Jɔn 11 - Tampulma

Chenani Lazarus Fun Sou

¹ Baal digi funɛ nyɛn doon. Ba yir un Lazarus. O fun nyɛn tɔhɔn naa ba yir Bɛtani ni. O toosa, Mɛri awa Marta, gbanko funɛ nyɛn doonee.

² Mɛri funɛ ya naa kpa tulale naa sɔɔra weree a la biti a du ya kunyan naŋgere ni a kpa o nyuksa a fiisi a. Wuzu digi Lazarus fun wa wi.

³ O toosi ta fun tum di ba la ŋɔ Yesu ni, “Ya kunyana, i chɛn birigi la wi.”

⁴ Yesu funɛ nu laaboor ti, o fun ŋɔ ba naa kani o wati chen, “Lazarus fu kaa sou, o fu wa zi vusi nan. Chenani o du un ni chen zi nyɛ nara kinyɛ Koosa awa o be jirimau kinkan.”

⁵ Yesu funɛ daŋni Lazarus awa Marta wa ba niinbeu,

⁶ amaa o funɛ kpalimi doonani o nyɛn chenu wuzu bilɛ.

⁷ Wuzu bilɛ ta gantɛl nɛɛ, o fun ŋɔ o gantɛl tiŋsi ta ni, “Ma nyɛ ya bur a la Judia pulum.”

⁸ Ba fun ŋɔ un, “Ya kunyana, chenani i kaa ya chen wa deŋli. O wa fun vusi ka Ju tima ba naa nyɛn dooni, fun pini buŋkula di ba yaksi hin.”

⁹ Yesu fun ŋɔ ba, “Karifisa kin fidalɛ ya nha chela. Mu chi tɛɛnɛ nɔ tim maga fitinne. Mu nyɛn ma wati, ma wa zi tu bɔsi ni, domi ma nau nɛnɛ.

¹⁰ Amaa mu ka vɛ nyɛn ma wati ka ma gba birsi ni, ma zi tu a niu, domi ma wara na a.”

¹¹ Yesu fun bukoo ŋɔ, “Ya chɛn Lazarus chɔ dore. Mu zi la laasi unu.”

¹² O gantɛl tiŋsi ta fun ŋɔ un, “Ya kunyana, o chɔ do, o zi bu na alaafɛu.”

¹³ Ba fun lisi di o hiisiu, amaa Yesu sɛm ta mun funɛ ya di Lazarus sou.

¹⁴ Doone Yesu fun ŋɔ ba gbampulim ni, “Lazarus sou.

¹⁵ Mu tuha sɔɔnɛu mu vɛ la dooni, domi chenani o du un ni la zi nyɛ ma se su min a gbaari. Ma nyɛ ya la o wati.”

¹⁶ Yesu gantɛl tiŋsi ta nidigi naa funɛ nyɛn o wati, ba yir un Tɔmas. Ba funɛ vɛɛn a yir un leure. O fun ŋɔ o dɔŋtim ta ni, “Ma nyɛ ya tiŋ ya kunyana, chen ni ya wa un zi sowu.”

Yesu Zi Lɛli Narau A Li Ba Sou Ni

¹⁷ Yesu awa o gantɛl tiŋsi ta funɛ la tel Bɛtani, ba naa nyɛn dooni, fun ŋɔ un di ba huk Lazarus o zinan ya bunaasi.

¹⁸ Bɛtani awa Jɛrusalɛm funɛ ya maalisa lɛwa.

¹⁹ Nan daha, Ju tim ta nidamata funɛ piin nyɛn dooni di ba zaami Marta awa Mɛri ba maan ti luha.

²⁰ Marta funɛ nu di Yesu nyɛn nyinbaan ni aa wa, o fun si li di o la chem un. Mɛri duŋduŋ funɛ nyɛn ba dam ni.

²¹ Marta fun la chem Yesu a ŋɔ un, “Mu kunyana, i fu nyɛn bar nɔ, mu maan ti fu wa zi sou.

²² Mu zimu di kin naa maga i sumi Koosa wati, o zi nyɛ hinu.”

²³ Yesu fun ŋɔ un, “I maan ti zi si o sou niu.”

²⁴ Marta fun ŋɔ un, “Mu zim di tɛɛnɛ nɔ maga siili saha wa tel, o zi si o sou niu.”

²⁵ Yesu fun ŋɔ, “Min ya naa la zi koti a lɛli nara a li ba sou ni a nyɛ ba bu kpak miisa. Naa si su min ka o sou, mu zi ya chenu a nyɛ un.

²⁶ Mu yaa kpa Koosa mi fali naa vɛ kpak bɔ a nyɛ ba naa se su min ni, chen ni o wa zi bu na ba galimsa a ta ba yɔri. Marta, i si su chenuu?”

²⁷ O fun ŋɔ un, “Mu kunyana, mu si su chenu. Mu gbanko si su di hin ya Koosa be awa Kristo naa o fun ŋɔ di o zi tumu tɛɛnɛ nɔ maga ni saha digi chen.”

Yesu Funɛ Wi Lazarus Daha

²⁸ Marta funɛ sɛm nan peti, o fun bur la zu dam ti a ŋɔ Mɛri ni ba duŋduŋ, “Ya kunyana wau aa daŋni o na hin.”

²⁹ Mɛri fun vaan si a kaali o wati.

³⁰ Yesu ha wa fun wa zu tɔhɔn tuha a fun kpalimi cheŋi doonani Marta fun wa chem un.

³¹ Ju tima, ba naa funɛ wa zaami Mɛri, funɛ na unu ka o si lalaga a li, ba gbanko fun si a tiŋ un. Ba fun baa di o la hugil ti munnɛ o la wi dooni.

³² Meri fun la pu Yesu a gbiri o suwachak ni a ŋɔ un, “Mu kunyana, i fu nyɛn bar nɔ, mu maan ti fu wa zi sou.”

³³ Yesu funɛ na di o wa Ju tima ba naa funɛ tiŋ un chen, funɛ wiu, ba fun kpa ba tu chɔk ti a bu un o gbanko wi.

³⁴ O fun pɛɛsi ba, “Leene ma huk un?” Ba fun ŋɔ un, “Ya kunyana, kuwa a wa na.”

³⁵ Yesu fun a wi.

³⁶ Ju tim ta bɔnɛ fun ŋɔ dɔŋ ni, “Wutirɛ o daŋni un kinkan.”

³⁷ Ba bɔnɛ ka fun ŋɔ, “Baal nɔ funɛ te lɛli naa ba lul wa nyulumsa chen se, amaa o wa fun kok Lazarus a li sou ni. Yɛrɛ o fun ya chen?”

Yesu Fun Lɛli Lazarus A Li O Sou Ni

³⁸ Ba fun kpa Lazarus a du gbɛntɛl bɔ ni a zer buŋkul a tɔ o zɔɔnɔ. Yesu funɛ la tel hugil ti mun, ba fun bu kpa ba tu chɔk ti a bu un.

³⁹ Yesu fun ŋɔ un, “Ma zer buŋkul ti a ta.” Marta naa funɛ ya Lazarus towe, fun ŋɔ un, “Mu kunyana, ya funɛ huk un o zinan ya bunaasi ka o pɔ.”

⁴⁰ Yesu fun ŋɔ un, “Mu piin ŋɔ hinu di i si su min, i zi na chenani Koosa tum tum zenu.”

⁴¹ Ba fun zer buŋkul ti ta a li hugil ti nɔ ni, Yesu fun a nyini buudaha ni a ŋɔ, “Mu nyana, mu zaami hinu di i nu mu nɔ saha maga.

⁴² Mu titi zimu di i nu mu nɔu, amaa mu sɛm nan a nyɛ hin di ba naa nyɛn bar nɔwa se su di hin funɛ tum min.”

⁴³ O funɛ sɛm peti, o fun yir ta zaŋa a ŋo, “Lazarus, li wa.”

⁴⁴ O fun si a li wa. Ba naa funɛ sogli un chen funɛ kpa gar pilimnɛ a mɛɛsi o nisa awa o naŋgere a tɔ o se a gbaari. Yesu fun ŋɔ ba, “Ma pur un a nyɛ o la.” Ba fun pur un a nyɛ o kaali.

Chenani Ju Tima Funɛ Daŋni Ba Kpak Yesu

⁴⁵ Ju tim nidamata ba naa funɛ wa di ba wa zaami Mɛri awa Marta, fun na chenani Yesu tum a nyɛ ba se su un.

⁴⁶ Ba bɔnɛ ka fun kaali Farisi tim ta wati a la ŋɔ ba chenani Yesu tum.

⁴⁷ Doone Farisi tim ta fun yir Koosa dam kɔkɔɔrsi ta ba lagmi a na dɔŋa a zim chenani ba zi ya. Ba fun ŋɔ dɔŋ ni, “Baal nɔ tum tum zene kinkannɛ.

⁴⁸ O lawa ya ya wu digiu o wati. Ya gil un o kaali, nara ta maga zi bur a tiŋ un. Ba ya chen, Roman tima ba naa dɔ ya, zi wa chɔk Koosa bar jɛɛmi dam tiu a kpu ya maga.”

⁴⁹ Baal naa Koosa dam kɔkɔɔrsi ta fun lisi a li ba tuhu ni di o ya ba nihɛɛ, o sɔn funɛ ya Kaifas. O fun ŋɔ ba, “Ma nidigi wa kpak nɛha.

⁵⁰ Ya wara daŋni di Roman tim ta wa kpu ya maga. Ma nyɛ baal nɔ chiŋi ya maga bar chiŋi ni a sou nyɛ ya.”

⁵¹ Chenani o fun sɛm chen wa li o titi ni. Domi waa funɛ ya Koosa dam kɔkɔɔrsi ta nihɛɛ ti a bun ti, o funɛ chi Koosa witinsi ta digirɛ a sɛm di Yesu zi sou Ju tim ta daharɛ.

⁵² O sɛm ta mun funɛ zen a kaali chenu. Yesu sou daha, Koosa bisa maga, ba naa pisi a go tɛɛne nɔ maga zi wa lagmi dɔŋ niu a ya nibɛgim.

⁵³ Farisi tim ta awa Koosa dam kɔkɔɔrsi ta fun la nɔɔni a nyɛ Kaifas ni. Chen saha ti kpa la, ba funɛ nyini nyinbaan ni di ba kpu Yesu.

⁵⁴ Yesu funɛ nu chenani ba daŋni ba ya, o wa fun bura gba gbampulim ni a li Judia pulum ti ni. O wa o gantɛl tiŋsi ta fun li doon pulum ti ni a la nyɛn tɔhɔn naa ba yir Ifreem ka o dugli nyabaan chen.

⁵⁵ Ju tim ta wuzu zen naa ba yir val la gali ti chen funɛ wa dugli. Nidamata fun li ba tɔsa a kaali Jɛrusalɛm di ba te la chaksi ba tusa a li ba tum tagna ni ka wuzu zen ti zi tel.

⁵⁶ Ba funɛ nyini di ba na Yesu dooni. Ba bɔnɛ fun lagmi a li Koosa bar jɛɛmi dam ti ni a ŋɔ dɔŋ ni, “Ma lisi di o zi wa lagmi ya ni a di wuzu zen tiu koo o wa zi wa lagmi?”

⁵⁷ Farisi tim ta awa Koosa dam kɔkɔɔrsi ta fun mɔɔli di naa zim doonani Yesu nyɛn, ba wa ŋɔ ba, chen ni ba zi la kpak unu.