Jɔn 1 - Tampulma

Yesu Ya Koosa Mi Fali Tiina

¹ O piili ti ni tɛɛnɛ awa buudaha wa fun to, amaa Yesu Kristo funɛ piin nyɛnu. O funɛ nyɛn Koosa se ni. Hali o wa un fun ya nibɛgim.

² O piili ti ni aa la, Yesu Kristo funɛ nyɛn Koosa se ni.

³ Koosa fun nyɛ o naami tɛɛnɛ awa buudaha awa kin naa maga nyɛn a ni. Kin magawa Koosa fun nyɛ o naami.

⁴ Koosa miisa naa vɛ kpak bɔ nyɛn un ni. Nara wa la o miisi ti, ba wa bu a nyɛn birsi ni. Ba zi nyɛn nha nɛɛ.

⁵ O miisi ti chi fitinne a chaani birsi ni. Birsi ti wa koti a dusi un.

⁶ Baal digi funɛ nyɛn doon. Ba yir un Jɔn.

⁷ Koosa fun tum un di o biksi nara fitin ti wɛ, chen ni ba zi na nyinbaanu a nu o sɛma a nyɛ ba se wa su un.

⁸ Jɔn laata fun ya fitin ti. Koosa funɛ tum un di o biksi nara Yesu Kristo naa ya fitin ti wɛ.

⁹ Waa funɛ ya fitin wuti naa funɛ wa tɛɛnɛ nɔ, chen ni nara maga zi na nyinbaanu a nyɛn nha ni.

¹⁰ Yesu Kristo funɛ wa nyɛn tɛɛnɛ nɔ nɛɛ. Koosa fun nyɛ o naami un awa kin naa maga nyɛn un ni, amaa tɛɛnɛ nɔ nara wa fun zim nibine naa ya un.

¹¹ O funɛ wa nyɛn o sɛmbiri nara watɛɛ, amaa ba nidamata wa fun la un.

¹² Bɔnɛ ka fun la un a nyɛ ba se su un. Ba naa funɛ la un chen, o fun nyɛ ba burgi Koosa bisa.

¹³ Chenani ba yaa lul ba bichɛsa, o wa nyɛ ba ya Koosa bisa. O wa fun ya nibinsa tutɔrɛ di o burgi ba nyana. O ka ya o tutɔrɛ di o burgi ba nyana.

¹⁴ Yesu Kristo ya ya kunyana Koosa duŋduŋ be. Koosa fun yisi o jirima awa o chaani kinkan a du un ni a nyɛ o burgi nibine a wa tɛɛnɛ nɔ maga di o wa ya lagmi nyɛn bunsa mɛna. Ya fun zim di Koosa jirima awa chaani kinkan nyɛn un ni awa chenani o sɛm maga ya wuti awa chenani o tuma suŋi nara.

¹⁵ Jɔn fun biksi nara o wɛ a tɛsi a ŋɔ, “Baal nɔwa mu sɛm ma o wɛ chen. Waa nyɛn mu gantɛl ni aa wa. O funɛ piin nyɛnu ka ba lul min. Chendaha o ya nihɛɛ a kaali min.”

¹⁶ Chenani o fun koti a suŋi nara a la gali, o funɛ ya chene a nyɛ ya. O yaa suŋi yau a saksi dɔŋ ni.

¹⁷ Koosa funɛ te kpa o chiksɛ a nyɛ Ju tim nawaal naa ba yir Mosis ni a zi tum Yesu Kristo di o wa biksi ya o wuti awa chenani o daŋni o suŋi ya.

¹⁸ Nandigi ha wa na Koosa, amaa o be bɛgim naa wa Koosa ya nibɛgim, waa funɛ biksi ya o wɛ.

Jɔn Fun Mɔɔli Nyabaan Ni

¹⁹ Wuzu digi Ju tim ba naa nyɛn Jɛrusalɛm ni, fun tum Koosa dam kɔkɔɔrsa awa ba naa ba yir Livait bɔnɛ di ba la pɛɛsi Jɔn, “Hin ya Kristo naa Koosa fun ŋɔ di o kaa tumu wuzu digi chenn?”

²⁰ O wa fun pɔ a ŋɔ ba gbampulim ni, “Mu laata.”

²¹ Ba fun bukoo pɛɛsi un, “I ya antirɛ? I ya Koosa witiina Ɛlaijarɛɛ?” Jɔn fun ŋɔ ba, “Mu laata.” Ba fun bu pɛɛsi un butora tiina, “Hin ya Koosa witiina naa Koosa fun ŋɔ di o zi wa tumu ya wati chen?” Jɔn fun bukoo ŋɔ ba, “Mu laata.”

²² Ba fun ŋɔ un, “Ya wa bur la ba naa tum ya i wati, ba zi daŋni ya ŋɔ bau. O lawa i ŋɔ ya chenani i duu.”

²³ Jɔn fun ŋɔ ba, “Mu zi ŋɔ ma chenani mu duu. Koosa witiina Azaaya funɛ sɔbiu a li Koosa sɛm tɔn ti ni saha digi a ŋɔ di Koosa ŋɔ, ‘Mu nitumi nyɛn nyabaan ni a mɔɔli. Ba zi nu o tau ka o ŋɔ, ya kunyana wau. Maa kɔɔri o nyinbaan o weru.’ ”

²⁴ Ju tim ba naa funɛ tum Koosa dam kɔkɔɔrsi ta awa Livait tima Jɔn wati, ba funɛ ya Farisi timwa.

²⁵ Ba fun bukoo pɛɛsi Jɔn, “I vɛ ya Kristo naa Koosa fun ŋɔ di o kaa tumu a vɛ ya Ɛlaija koo Koosa witiin ti, yɛrɛ i chaksi nara wa ni ni?”

²⁶ Jɔn fun ŋɔ ba, “Mu chaksi nara wa ni ni a saksi ba a pɔ baal naa la wa chen. Ma ha wa zim un. Hali o wa ya lagmi zinan.

²⁷ Waa nyɛn mu gantɛl ni aa wa. N purɛu wa mu ur o natausa a nyɛ un.”

²⁸ Jɛrusalɛm tim ta funɛ wa Jɔn wati, waa funɛ chaksi nara wa ni ni a li tɔhɔn naa ba yir Bɛtani ni chen. O nyɛn Jɔɔdan mɔɔga ti jibaŋ bar boli nɛɛ.

Yesu Chi Koosa Piisi Bere

²⁹ Chɔɔsa funɛ pisi Jɔn fun na Yesu ka o wa o wati. O fun ŋɔ ba naa funɛ nyɛn dooni, “Maa na, baal nɔ chi piisi be naa Ju tima yaa kpa kɔɔri kɔɔra a nyɛ Koosa ni chene. Waa nyɛ Koosa bu vɛ na tɛɛnɛ nɔ maga nara galimsa.

³⁰ Ma lisi chenani mu fun ŋɔ ma o wɛ. Mu funɛ ŋɔ mau di nandigi nyɛn mu gantɛl ni aa wa. O funɛ piin nyɛnu ka ba lul min. Chendaha o ya nihɛɛ a kaali min.

³¹ N wa fun zim naa o kaa wa ya. N funɛ te o suwachakrɛ a wa bar nɔ di mu chaksi Ju tim ta wa ni ni, chen ni mu zi kotiu a biksi ba o wɛ.”

³² Doone Jɔn fun ŋɔ ba, “Mu funɛ na Koosa siim weri ka o li buudaha. O funɛ chi komne a tu wa a zɔŋ Yesu nyuhu ni.

³³ Koosa naa funɛ tum min di mu wa chaksi nara wa ni ni chen fun te ŋɔ min, ‘Naa i na ka mu siim weri ti tu wa a zɔŋ un ni chen, waa kaa wa kpa mu siim weri ti a du nara ni.’

³⁴ Yesure mu fun na ka Koosa siim weri ti tu wa a zɔŋ o nyuhu ni. Wutirɛ mu ŋɔ ma di o ya Koosa bere.”

Yesu Fun Te Yir O Gantɛl Tiŋsa

³⁵ Chɔɔsa funɛ wa pisi Jɔn awa o gantɛl tiŋsa nara balɛ funɛ bu wa nyɛn dooni,

³⁶ a na Yesu ka o val wa kaali. Jɔn fun ŋɔ ba, “Ma na baal nɔ, o chi Koosa piisi be tire.”

³⁷ O gantɛl tiŋsa nara balɛ ta funɛ nu o sɛm ta chen, ba fun la tiŋ Yesu.

³⁸ Ba funɛ nyɛn nyinbaan ni aa la chene, Yesu fun burgi a na di ba tiŋ un. O fun chiŋi a pɛɛsi ba, “Antirɛ ma daŋni?” Ba fun ŋɔ un, “Ya kunyana, ya dɛu hinnɛ. Leene i nyɛn?”

³⁹ O fun ŋɔ ba, “Ma wa a wa na.” Ba fun tiŋ un a la na doonani o nyɛn. Ba funɛ wa tel o bar nyɛni ti di o ya zazɔɔnnɛ. Adaha ba wa un nyɛn dooni hali dusum fun wa biri.

⁴⁰ Nara balɛ naa funɛ nu Jɔn sɛm ta chen nidigi a tiŋ Yesu, o sɔn funɛ ya Andiru. O funɛ ya Simɔn Pita niinbere.

⁴¹ Andiru funɛ bur a kaali o dama, o fun vaan kaali Simɔn wati a ŋɔ un, “Ya fa na Kristo naa Koosa fun ŋɔ di o zi wa tum wuzu digi chenu.”

⁴² O fun kpa Simɔn a wa Yesu wati. Yesu fun a nyini un a ŋɔ, “Hin ya Simɔn, Jɔn be ti. Mu nyɛ hin sɔn faliu ba yir hin Sifas.” Sɔn ti mun ya ‘gbɛntɛl’.

Yesu Fun Yir Filip Awa Nataniɛl Ba Wa Tiŋ Un

⁴³ Chɔɔsa funɛ pisi Yesu fun kaali Galili pulum a la na baal naa ba yir Filip. O fun ŋɔ un, “Tiŋ min.” Filip fun si a tiŋ un.

⁴⁴ Filip tɔhɔnnɛ ba funɛ yir Bɛtseida. Doonee Andiru awa Pita gbanko fun nyɛn.

⁴⁵ Filip fun na baal naa ba yir Nataniɛl chen a ŋɔ un, “Mosis awa Koosa witinsa funɛ sɔbi a li Koosa sɛm tɔn ti ni saha digi Kristo naa Koosa fun ŋɔ di o zi wa tumu wuzu digi chen wɛ. Ya zim unu. Waa ya Yesu, Josɛf be, a li tɔhɔn naa ba yir Nazarɛt ni chen.”

⁴⁶ Nataniɛl fun ŋɔ un, “Nibin weri wa kili dooni.” Filip fun ŋɔ, “Wa na un.”

⁴⁷ Ba funɛ wa dugli Yesu, o fun ŋɔ ba naa nyɛn o wati, “Maa na Ju tim baal nɔ la wa di o wa na min. O ya wuti tiinnɛ kinkan.”

⁴⁸ Nataniɛl fun wa tel Yesu wati a pɛɛsi un, “Yɛrɛ i ya a zim chenani mu bambi du?” Yesu fun ŋɔ un, “I kanɛ i bugil barsɔn nɛɛ mu te na hin a zim chenani i bambi du ka Filip zi yir hin.”

⁴⁹ Nataniɛl funɛ nu Yesu sɛma, o fun ŋɔ, “Mu kunyana, hin ya Koosa be. Hin vɛɛn ya Ju tim koora naa Koosa fun ŋɔ di o zi tumu ya wati.”

⁵⁰ Yesu fun ŋɔ un, “Mu ŋɔ hinu di i funɛ kani i bugil barsɔn nɛɛ, mu zim chenani i bambi du ka i si su min. I wa wa na kizeneu a kaali nan.”

⁵¹ Doone Yesu fun burgi a ŋɔ ba naa nyɛn dooni, “Wutirɛ mu sɛm ma, ma zi na buudahau ka o puk ka Koosa malaikasa tu wa n waa nibine be wati a bur a zini kaali.”