2 Tim. 4 - Tampulma

¹ Mu chiŋe Koosa awa Yesu Kristo naa la zi wa di miisa tima awa nisitɛ sɛria a di o koor ti suwachak ni,

² Mu ŋɔ hinu di o lawa i biksi Koosa laaboor weri ti wɛ aa nyɛ nara ba naa la nu awa ba naa vɛ nuuli ni. I yaa la burgi ba naa la tum tum tagna nyuuna, aa kikpami ba a bur tiŋ Koosa nyinbaan. Saha maga ii biksi ba wa kanyita kinkan ni.

³ Saha wau nibinsa zi vɛ wa nu Koosa wuti biksi ti, amaa ba zi wa tiŋ ba titi daŋnɛu a lagmi ba naa la zi wa biksi ba chenani ba daŋni aa gbaari.

⁴ Ba zi wa buru a li Koosa wuti biksi ti ni, a kidaŋni baa nu mura.

⁵ Amaa ii kpak o wuti ti nɛnɛ saha maga. I di namsi aa kibiksi Koosa laaboor weri ti wɛ a nyɛ nara ni aa kitum i tuma nɛnɛ a nyɛ un.

⁶ Mu waa wara, saha naa mu zi wa sou duglɛu.

⁷ Mu miisa chi chɔchɔharɛ. Mu kpaŋu a chɔ peti ka mu si ha vɛɛn su Koosa.

⁸ Ya kunyan ti wa bur wa di o di ya sɛria wa wuti, o zi bɔ min mu chimu, domi mu tum tum werewa a nyɛ un. O zi wa ya chenu a nyɛ ba naa maga la daŋni un a la pɔ un di o bur wa.

Ta Vusi A Wa Kpami Min

⁹ Kpaŋi i titi a bur wa mu wati lalaga.

¹⁰ Dimas naa la daŋni tɛɛnɛ nɔ maga kina, funɛ gil minu a kaali Tɛsalɔnika. Krɛsɛns funɛ a gbau a kaali Galesia pulum. Taitus ka kaali Dalmesia pulum.

^11-12 Mu gbanko tum Tikikus Ɛfɛsus ni. Luk duŋduŋ nyɛn mu wati. I wa Maak kuwa mu wati, domi waa kote a suŋi min a li mu tum ni.

¹³ I wa wa, i zer mu kuntu naa mu kpa ta Karpus wati a li Troas ni a kpa un kuwa, a pa mu tɔna gbanko. Doso a naa ya sela tɔna chen ni.

¹⁴ Machɛrɛ naa ba yir Alɛzanda chen funɛ muksi min kinkan. Ya kunyan ti zi wa di o tum tagna sɛriau.

¹⁵ Doso kinyini un, domi ya funɛ nyɛn dooni, o yaa fun vɛ ya biksiu wa kpok ni.

¹⁶ Mu funɛ kok mu titi a li sɛria bar diili dɛ ti ni, nandigi wa fun chiŋi mu gantɛl ni. Mu si su di Koosa wa zi wa lisi chenani ba fun gil min.

¹⁷ Amaa ya kunyan ti funɛ nyɛn mu watiu a kpa o kpok ti a nyɛ min, a fun nyɛ mu koti a sɛm Koosa laaboor weri ti wɛ a nyɛ ba naa vɛ ya Ju tim ni a lisi min a li bar tagin kinkan ni.

¹⁸ O gbanko zi lisi minu a li tum tagin naa maga nibinsa zi wa tum a du min ni a nyɛ mu zu o koor naa nyɛn Koosa tɔhɔn ti ni. O la jirima kinkan hali saha naa vɛ kpak bɔ. Ami.

Pɔɔl Mak Tɔn Nɔ Bar Nɔwa

¹⁹ Mu zaami Akwila awa Prisila. Mu gbanko zaami Ɔnɛsifɔrɔs walɛ.

²⁰ Ɛrastus fun kpalimi Kɔrint ni ka mu fun gil Trofimus a li Mailitus ni, domi o wa fun kpak alaafɛ.

²¹ Kpaŋi i titi a wa ka wa saha wa tel. Yubulus, Pudɛns, Linus, ya towe Klɔdia, awa ya dɔŋtima ba naa maga nyɛn bar nɔ, zaami hinu.

²² Ya kunyan ti zi nyɛn i watiu. Koosa kisuŋi ma maga.