2 Tim. 3 - Tampulma

Tɛɛnɛ Nɔ Maga Siili Saha Wɛ

¹ Kinu mu sɛma. Tɛɛnɛ nɔ maga saha wa dugli o peti, o zi wa bɔmu kinkan nara wati.

² Nara zi wa nyɛn dooniu a kpak si a kidaŋni malɛ a zer ba titi aa ya diŋ vɛ nuulisi tima. Ba zi wa pini nara zomau a kivɛ ba nyama awa ba numa nɔɔna a ta zaami nara aa vɛ tiŋ Koosa.

³ Ba zi vɛ ba dɔŋtimau a ya bambi kpok tima a ya tuha sa tima a chɔk ba sɔna a kitum chi garaŋzur tuma aa du ba ni. Ba zi ha tum wereu,

⁴ a li nara gantɛl a ya wu zene tima aa lisi di ba ya nibin zenewa. Ba zi ya kidaŋni ba titi daŋnɛu a kaali chenani ba fu zi daŋni Koosa.

⁵ Ba zi jɛɛmi Koosa wa ba nyina niu aa vɛ kpak o kpok ti. Ta lagmi ba naa la tum chen ni.

⁶ Ba bɔnɛ la zu damsa a mur nihaana ba naa vɛ kpak nɛha. Ba banchisa la yaali ba tum tagna daha. Hali ba titi daŋnɛ la lɛrgi ba di ba ya chen.

⁷ Nihaan nama yaa kpaŋi di ba buksi wu digi, amaa ba ka wa fun koti a zim un nɛnɛ.

⁸ Nibiksɛ nama burgi ba gantɛlwa a chak Koosa wuti ti a chi nara balɛ naa ba funɛ yir Janis awa Jambrɛs, burgi ba gantɛlwa a chak Mosis saha digi. Nibiksɛ nama ya lise tagin timwa a nyuksi Koosa nyinbaan.

⁹ Ba wa zi wa na nyɔɔra kinkan a li ba tum ni. Nara maga zi wa zimu di nibiksɛ na gbanko ya womniwa a chi ba funɛ zim di Janis awa Jambrɛs ya womniwa saha digi.

Ta Bur Gantɛl A Li Koosa Wuti Nyinbaan Ni

¹⁰ Amaa i chau chenani muu biksi nara nɛɛ awa chenani mu nyɛni du wa chenani mu kpak un a li mu bambi ni di muu tiŋ Koosa. I gbanko zimu di mu si yaa su Koosau ka mu daŋni mu dɔŋtima awa kanyita ni wa chenani mu di mu namsi.

¹¹ I gban zimu chenani mu dɔma muksi minu kinkan a li tɔsi a naa ba yir Antiɔk, Ikonium awa Listira ni, ka mu di namsi dooni. Amaa Koosa funɛ bu wa lisi minu a li mu namsi maga ni.

¹² Nibinsa zi yaa wa muksi ba naa la daŋni ba tiŋ Koosa nɛnɛ, domi ba wa Yesu Kristo ya nibɛgim.

¹³ Amaa nimurɛ ba naa la tum tum tagna zi wa tumu aa gbaari. Ba wa la mur nara awa ba titi.

¹⁴ Amaa ii ka tiŋ Koosa nyinbaan wuti ti. I zimu nɛnɛ ba naa funɛ te biksi hin o wɛ chen, di i si su un kinkan.

¹⁵ I gban funɛ zim Koosa sɛm tɔn tiu a li i bichɛsi ni. Waa funɛ koti a nyɛ i si su Yesu Kristo, chen ni o zi yisi hinu a li i tum tagna ni.

¹⁶ Koosa titi fun nyɛ ba naa funɛ sɔbi a li o sɛm tɔn ti ni saha digi chen di ba sɛm ta ya wutiu. O nitiŋɛ ta koti a kpa o sɛm tɔn ti a biksi nara o wuti ti wɛ. Ba gbanko koti a biksi ba chenani baa tum tum tagna awa chenani ba zi gil a a kitum tum were,

¹⁷ chen ni o tumtumsa zi saksiu di ba tum tum were maga.