2 Tim. 2 - Tampulma

Timoti Chi Yesu Kristo Lanjimarɛ

¹ Mu be, ya wa Yesu Kristo ya nibɛgimnɛ. Chendaha Koosa la zi suŋi hin i kpak kpok.

² I funɛ nu ka muu biksi nara bu damata. I gbanko tiŋ mu nɔ sɛma aa kibiksi ba naa ya wuti tima ba zi kotiu a la biksi ba dɔŋtima.

³ I chi Yesu Kristo lanjimarɛ. Adaha i saksi a na namsi o daha.

⁴ Lanjima la laal ni, o yaa gil o kina magau a ta gantɛl ni. O yaa daŋni o tuma sɔɔni o nyuhu tiina tuhau.

⁵ Nar awa o dɔŋtima chɔ chɔchɔha a daŋni o di, o lawa o tiŋ ba nihɛɛti nɔu.

⁶ Niparɛ naa la tum kinkan a li o ŋmaha ni, o zi na kiparɛ naa ba te kum chenu.

⁷ Kilisi chenani mu sɛm hin nan. Koosa zi suŋi hinu ii zim mu sɛm ta muna.

⁸ Kilisi Yesu Kristo naa funɛ ya koor Devid lul be, a si a li o sou ni. Mu yaa ŋɔ nara niu Koosa laaboor weri ti wɛ, o wɛwa mu yaa ŋɔ ba.

⁹ Koosa laaboor weri ti daha ba fun kpak min a la tɔ dɛ di mu namsi a chi tum tagna nitumi. Amaa ba wa koti a kpa o laaboor weri ti a tɔ dɛ.

¹⁰ Chendaha mu di mu namsi maga, chen ni Koosa zi wa yisi ba naa o fun lisiu a li ba tum tagna a kpa o jirima zen naa vɛ kpak bɔ a nyɛ ba. Ya wa Yesu Kristo ya nibɛgimnɛ. Chendaha Koosa koti a ya chen.

¹¹ Ba funɛ sɛm wutirɛ, “Ya wa un siwɛɛ, wuzu digi ya wa un zi nyɛnu.

¹² Ya di ya namsi maga, wuzu digi ya wa un zi wa ya koorsau. Ya vɛ un, o gbanko zi vɛ yau.

¹³ Ya vɛ ya wuti tima, o waa ya wuti tiinnɛ saha maga. O wa koti a vɛ o titi.”

Kpaŋi I Titi A Kitum Koosa Tuma Nɛnɛ.

¹⁴ Kibiksi kin nama a nyɛ Yesu nitiŋɛ ta ni aa kitɛ ba nin Koosa suwachak ni di ba ta di dɔŋa wa amɔrɛ yɔri yɔri. Ba naa la di amɔrɛ chen ni, ba sɛma zi nyɛ ba naa la nu a chen bur Koosa tiŋi niu.

¹⁵ Kpak un i bambi ni aa kitum Koosa tuma nɛnɛ, chen ni o wa zaamsi hin a peti, o zi ŋɔ di i kpaŋi i titiu. I biksi Koosa laaboor weri ti a nyɛ nara ni wa wuti ni, i wa zi wa na hiisa.

¹⁶ Ta lagmi ba naa yaa biksi womsi mura a naa vɛ ya Koosa wɛ, a nyɛ nara ni. Ba naa la biksi chen ni, duŋni narawa a li Koosa wati a gbaari.

¹⁷ Chenani ba yaa biksi nara chi chɔ naa la di nibine barawa. Nara balɛ naa ba yir Haiminius awa Failitus, nyɛn ba ni.

¹⁸ Nara balɛ na funɛ gil Koosa wuti nyinbaanu a nyɛ ba naa se su Kristo bɔnɛ bur o tiŋi ni, domi ba biksiu di ya piin siu a li ya sou ni.

¹⁹ Amaa Koosa laaboor weri ti chi dam zɛchikrɛ. O kpoku kinkan. Chendaha nandigi wa kiziigi un. O funɛ sɔbiu a sak zɛchik ti ni, “Ya kunyan ti zim ba naa o dɔu.” O gbanko funɛ sɔbiu a sak, O gbanko funɛ sɔbiu a sak, “Ba naa maga ŋɔɛɛ di ya kunyan ti dɔ ba, ba gil ba tum tagna aa tiŋ un.”

²⁰ Kidamata nyɛn sal zen ni. Ba kpa aniita awa salmasiwa a kɔɔri bɔnɛ a kpa daasa awa choha a kɔɔri bɔnɛ. Ba kpa aniita awa salma kin tau a chiŋsi a pɔ wuzu zene wuzu. Ba ka kpa daasa awa choha kin tau a tum tuma wuzu kam.

²¹ Ba naa maga gil ba tum tagna, ba chi aniita awa salma kin nawara ba kpa chiŋsi a pɔ wuzu zene chene. Ba saksi ba titiu di ba tum tum were a nyɛ un.

²² Ta tiŋ i titi daŋni a chi ba naa ya bunɔɔna, amaa kpak un i bambi ni a tum tum were kinkan a nyɛ i si su Yesu aa kidaŋni nara awa bara sɔɔni ni. Kilagmi ba naa kpak bambi chaanɛ a la sumi Koosa di o suŋi ba.

²³ Ta lagmi nibin womni ba naa yaa di dɔŋa wa amɔrɛ kin nawara ba vɛ zimi wɛ. I zimu di ba yaa di amɔrɛu hali o wa peti dɔŋ yooli ni.

²⁴ Ya kunyan ti tumtumna fiɛŋ o daŋni yo. O lawa o ya jɛrgiu a koti a biksi nara nɛnɛ awa kanyita ni.

²⁵ Saha naa o wa burgi womna nibiksɛ na nyuuna, o ta na paan a du ba ni. Ami Koosa zi nyɛ ba nyinbaanu di ba gil ba tum tagna a bur tiŋ un a wa zim o wuti ti.

²⁶ Ba ya chen, ba zi bur wa ba nɛsa niu a koti a chɔ a li sintana naa funɛ kpak ba a mo ba lo di ba tiŋ o nɔ ni.