2 Tim. 1 - Tampulma

¹ Mu waa, Pɔɔl, naa Koosa fun lisi di mu ya Yesu Kristo nitumi a tum di mu la ŋɔ nara ni o miisa naa o piin kpa nyɛ ya wɛ, domi ya wa Yesu Kristo ya nibɛgimnɛ.

² Mu la sɔbi tɔn nɔ a nyɛ mu be daŋni Timoti naa si funɛ su Yesu a li mu biksi ni. Ya kunyana Koosa awa ya kunyan Yesu Kristo suŋi hin a kpak hin siki aa nyɛ hin bara sɔɔna.

Pɔɔl Fun Zaami Koosa Timoti Daha

³ Min la tum Koosa tuma awa tuha bɛgim ni a chi chenani mu nawaalsa fun tum chen. Mu yaa sumi Koosa a la zaami un i daha nha awa dusum.

⁴ Mu lisu chenani i fun li mu watiu ka i tuha chɔku kinkan. Mu daŋni mu bu na hinu kinkan, chen ni i zi nyɛ mu tuha sɔɔniu hali a la gali.

⁵ Mu lisu di i niina, Yunis, awa i naha, Lois se su Yesu wuti ni. Mu zimu di i gbanko si su unu a chi ba.

⁶ Chendaha mu daŋni i lisi saha naa mu fun wa kpa mu nisa a sak hin ni, ka Koosa kpa o papaha a nyɛ hin chen. Ta tɔ un, amaa kitum un nɛnɛ.

⁷ Siim weri naa Koosa fun kpa nyɛ ya chen, o wa nyɛ ya ɔm wa bambi kpaki ni, amaa o nyɛ ya o kpok ti, chen ni ya zi kotiu a daŋni nara a ya bambi tima.

⁸ Ta nyɛ hiisa kpak hin a li chenani i ŋɔ nara ni ya kunyan ti wɛ. Ta nyɛ hiisa gbanko kpak hin a li chenani ba tɔ min dɛ Kristo wɛ daha. Kpa kpok naa Koosa nyɛ hin aa saksi a na namsi o laaboor weri ti daha.

⁹ Koosa funɛ yir ya di ya ya o titi nara a fun yisi ya a li ya tum tagna ni yaa tiŋ un. O wa fun ya chen di ya ya nibin werewa daha. Ya wa Yesu Kristo ya nibɛgimnɛ. Chendaha o funɛ ya Koosa tutɔrɛ a li o piili ni o suŋi ya chen.

¹⁰ Doone o fun tum o be Yesu Kristo di o wa lisi ya a li ya tum tagna ni yaa tiŋ un. Nan biksi ya di o ya Koosa tutɔrɛ o suŋi ya. Kristo funɛ sou a li o daakakli ti ni, o fun a nyaŋi sou. Waa funɛ kpa Koosa laaboor weri naa funɛ sogli chen a biksi ya o mi fali naa vɛ kpak bɔ, wɛ.

¹¹ Koosa fun lisi min di mu ya o nitumi a la biksi nara o laaboor weri ti wɛ.

¹² Chendaha ba fun kpak min a la tɔ dɛ ka mu namsi nan. Amaa mu ha vɛɛn kpak bambi kpoku, domi mu zim naa mu si suu. Mu zimu di o zi il o kin nawara o fun kpa a du mu nin ni hali saha naa o wa bur wa.

¹³ I funɛ nyɛn mu wati, mu fun a biksi hin Koosa wuti wɛ di ii tiŋ un. Lalaknɔ kpak mu wuti biksi nɔ nɛnɛ. Nyɛ i si yaa su Yesu Kristo aa kidaŋni nara nɛnɛ, domi o wa ya ya nibɛgimnɛ.

¹⁴ Koosa siim weri naa nyɛn ya ni nan, zi kpa o kpoku a nyɛ hin di i kpak Koosa papaha naa o fun kpa a du i nin ni chen nɛnɛ.

¹⁵ I zimu di ba naa maga funɛ nyɛn mu wati a li Azia pulum ni kaalu a ka min. Hali nara balɛ naa ba yir Figɛlus awa Hɛmɔjɛnis, ba gbanko funɛ kaaliu.

¹⁶ Ɔnɛsifɔrɔs funɛ kpami minu bu damata. Chendaha mu sumi ya kunyan ti di o kpak o walɛ siki. O wa kpak hiisa a du min ni domi ba funɛ kpak min a tɔ dɛrɛ daha.

¹⁷ O funɛ wa tel Room, o fun vaan piili a dɛu mu bar nyɛni hali a wa na min.

¹⁸ I gbanko zimu nɛnɛ a li chenani o fun suŋi min kinkan a li Ɛfɛsus ni. Ya kunyan ti wa bur wa, o zi kpak un sikiu kinkan.