2 Tɛs. 3 - Tampulma

Tɛɛnɛ Nɔ Maga Siili Saha Wɛ

¹ Mu niinbisa, maa sumi Koosa a nyɛ ya di ya koti a mɔɔli Koosa laaboor weri ti bawu maga ni, chen ni nidamata se zi su unu a chi chenani maa ya chen.

² Ma vɛɛn kisumi un di o yisi ya a li ba naa la tum tum tagna nisa ni, domi nara kinkan se wa su laaboor weri ti.

³ Amaa ya kunyan ti ya wuti tiina. O zi kpa o kpoku a nyɛ ma a yisi ma a li tum tagna naa sintana tum a du ma ni.

⁴ Ya kunyan ti nyɛ ya se su ma di ma zi tiŋ kin naa maga ya fun biksi mau a chi ma la tiŋ lalaknɔ nan.

⁵ O suŋi ma ma daŋni Koosa nɛnɛ a kpa o kpok ti a nyɛ ma, chen ni ma zi kotiu a di ma namsi.

Ma Nyɛ Ma Se Sɛri Ya Kunyan Tum Ni

⁶ Mu niinbisa, ya kunyan Yesu Kristo ŋɔ ya di ya ŋɔ ma kin nama wɛ. Ma ta nyɛ ma wa ba naa kpak zanyɛrka lagmi, domi ba wara tiŋ ya biksi ti.

⁷ Ma titi zimu nɛnɛ chenani ya nyɛni fun du ma watiu. Ma gbanko kinyɛn chen. Ya wa ma funɛ nyɛn, ya wa fun kpak zanyɛrka.

⁸ Ya ka funɛ tum nha wa dusumu kinkan, chen ni ya zi diu a li ya bara wilim ni. Ya wa fun a daŋni di ma suŋi ya wa diwe ni. Kin naa maga ma yaa fun a nyɛ ya, ya yaa bɔ a nyuuniu.

⁹ O funɛ deŋliu wa ya ŋɔ ma di ma suŋi ya wa diwe ni, amaa ya bara wilim nee yaa di a la biksi ma chenani ma zi tiŋ.

¹⁰ Ya funɛ nyɛn ma wati, ya yaa fun a ŋɔ mau di nara vɛ daŋni tum tumi, o wa lawa ba di diwe.

¹¹ Ya funɛ nu di ma bɔnɛ ya zanyɛrka timwa a la zu ba dɔŋtima wɛ ni. Chendaha ya sɔbi nan a nyɛ ma.

¹² Ya ŋɔ bau ya kunyana Yesu Kristo sɔn daha ba nyɛ ba se sɛrɛ ka ba di ba titi bara wilim aa kitum ba tuma balimm.

¹³ Mu niinbisa, ma ta wa ku wa tum were tumi ni.

¹⁴ Nandigi nyɛn dooni a vɛ daŋni o tiŋ chenani ya sɔbi tɔn nɔ nan, ma ta nyɛ o lagmi ma ni, chen ni o zi na hiisau.

¹⁵ Ma ta ya un a chi o ya ma dɔmnɛ, amaa ma kpaŋi a burgi o nyuha o tiŋ nyinbaan ti a chi ma niinbe.

Pɔɔl Mak Tɔn Nɔ Bar Nɔwa

¹⁶ Ya kunyana naa ya bara sɔɔn tiina, waa la zi nyɛ ma bara sɔɔna saha maga, a nyɛn ma wati.

¹⁷ Min, Pɔɔl, zaami mau. Mu titi la sɔbi sɛm na. Mu tɔna maga ni nannɛ mu yaa sɔbi mu sɔn.

¹⁸ Ya kunyana Yesu Kristo suŋi ma maga.