2 Tɛs. 2 - Tampulma

Tum Tagna Tiina Naa La Zi Wa Wɛ

¹ Mu daŋni mu bu ŋɔ mau lalaknɔ saha naa ya kunyan Yesu wa bur wa ka ya wa un wa lagmi wɛ. Mu niinbisa, mu sumi mau di,

² nara ŋɔ ma di ya kunyan ti piin bur wau, ma ta nyɛ o jɛri ma a li ma lise ni a ta nyɛ ba sɛma kimuksi ma. Nara nama ŋɔ ma di ba ya Koosa witinsiwa akoo ba karimɛ tɔnnɛ a ŋɔ di min sɔbɛɛ, ma ta nu ba sɛm ta.

³ Ma fiɛŋ ma nyɛ nara kimur ma, domi tum tagna tiina la zi wa te a wa. Tɛɛnɛ nɔ tima ba naa vɛ zim Koosa hali a wuzu ti, zi wa siu aa tiŋ tum tagna tiin ti. O saha wa peti, Koosa zi kpa unu a du din dam ni.

⁴ Tum tagna tiin nɔ zi wa ŋɔu di kinkin naa nibinsa jɛɛmi ya yɔrirɛ, a ŋɔ di o ya nibin zenne a kaali ba maga. Hali o zi la zu Koosa bar jɛɛmi damau a kani a ŋɔ di o ya Koosarɛ.

⁵ Ma wa lisi saha naa mu fun nyɛn ma wati chenn? Mu funɛ ŋɔ ma a nama maga wɛu.

⁶ Lalaknɔ wu digi nyɛ a vɛ yaali, ka ma zim chen kin ti. Koosa wa lisi wu digi ti, tum tagna tiin ti zi wau.

⁷ Nibinsa piin sogli a vɛ Koosa. Chen kin ti tɔ ba nyinbaan di ba vɛ Koosa gbampulim ni chen, hali o saha wa tel o kaali.

⁸ Doone tum tagin tiin ti zi na nyinbaan a wa. Ya kunyan Yesu wa bur wa, o zi wa kpa o kpoku awa o jirima wa o hiisa a hiisa a du un niu o sou.

⁹ Tum tagin tiin ti wa wa, o zi kpa sintana kpoku a tum tum zene awa alaazibu tuma kinkan,

¹⁰ di o mur nara ba naa Koosa zi wa na ba galimsa a ta ba yɔri. O zi wa na ba galimsa chenu, domi ba wara daŋni wuti ti, chen ni o fu zi kotiu a yisi ba a li ba tum tagna ni ba tiŋ un.

¹¹ Chendaha Koosa zi nyɛ sintana kpa o kpok tiu a tum tum tagna, chen ni ba se zi su kinkin naa ya nusunau.

¹² Ba naa maga vɛ nyɛ ba se su wuti ti amaa a ka nyɛ ba tusa sɔɔni tum tagna tumi ni, Koosa zi di ba sɛriau a na ba galimsa.

Koosa Funɛ Lisi Ya A Nyɛ O Titi Ni

¹³ Mu niinbisa, ya yaa zaami Koosau ma naa o daŋni nan daha. Ma se funɛ su o wuti ti. Chendaha o fun te kpa o siim weri kpok ti a yisi ma a li ma tum tagna ni a nyɛ o titi ni.

¹⁴ Ya funɛ wa biksi ma Koosa laaboor weri ti wɛ, o fun a yir ma, chen ni wuzu digi ma zi wa bɔni ya kunyan Yesu Kristo jirima awa o chaaniu kinkan.

¹⁵ Mu niinbisa, chen daha, maa kpak nɛnɛ aa tiŋ wuti biksi naa ya fun biksi ma saha naa ya fun nyɛn ma wati awa chenani ya fun sɔbi tɔn ni a nyɛ ma.

¹⁶ Ya kunyana Koosa la daŋni ya a fun suŋi ya, a kpami ya ya kpak bambi bɛgim un ni.

¹⁷ O wa ya kunyan Yesu Kristo la kpami ma di ma tum tum were a kisɛm wu were duŋduŋ.