2 Tɛs. 1 - Tampulma

¹ Mu waa, Pɔɔl, awa Sailas wa Timoti zaami mau. Min, Pɔɔl, la sɔbi tɔn nɔ a nyɛ ma naa tiŋ Yesu a li Tɛsalɔnika ni. Ya kunyan Koosa awa ya kunyan Yesu Kristo dɔ ma.

² Ba suŋi ma a kinyɛ ma bara sɔɔna.

Ya Kunyana Wa Wa, O Zi Di Nara Sɛriau

³ Mu niinbisa, ya yaa zaami Koosau ma daha saha maga. O weru di yaa zaami un chen, domi ma se suuli gbaariu kinkan ka maa daŋni dɔŋa.

⁴ Chendaha ya yaa ŋɔ Yesu nitiŋɛ doonani maga ya nyɛn di ma ya ya jirima narawa. Hali nara namsi ma kinkan, ma se ha vɛɛn su Koosau kinkan ka maa di ma namsi.

⁵ Koosa wa wa di o wa di tɛɛnɛ nɔ tim maga sɛria wa wuti, o zi wa ŋɔ di ma wa zu o koor ti, domi namsi naa ma namsi nan daha.

^6-7 Koosa ya wuti tiina. Ya kunyan Yesu awa o malaikasa ba naa chi di a kpak kpok, wa li Koosa tɔhɔn ti a wa, o zi nyɛ ma namsi ti awa ya namsi petiu a kpa namsi ti a du ba naa la namsi ma chen ni.

⁸ Ba naa vɛ zim Koosa awa ba naa se vɛ su o laaboor weri ti ya kunyan Yesu wɛ, Koosa zi wa lɛrgi ba diŋsau a ta ba yɔri.

⁹ Koosa wa yisi ba a li o bar nyɛni awa o jirima zen ti ni, ba zi wa namsiu a ta yɔri hali saha naa vɛ kpak bɔ.

¹⁰ A wuzu naa ya kunyan ti kaa wa bur wa, ba naa maga se su un zi nyɛ un jirimau kinkan. Ma gbanko zi wa nyɛn dooniu a ya chen, domi ma se funɛ su Koosa laaboor weri naa ya fun wa biksi ma chen.

¹¹ Chendaha ya yaa sumi un ma daha. Waa funɛ lisi ma di ma la o mi fali ti. Yaa sumi unu di o nyɛ ma o kpok ti yaa tiŋ o mi fali ti nɛnɛ. Ya vɛɛn a sumi unu di o suŋi ma ma kitum tum were a naa maga ma daŋni ma tum hali a wa peti, domi ma se su un.

¹² Ma tiŋ chen nɛnɛ, ya kunyan Yesu sɔn ti zi na jirimau ma daha, ka ma gbanko kaa na jirima, domi ma wa un ya nibɛgimnɛ. Ya Koosa awa ya kunyan Yesu Kristo kisuŋi ma ma nyɛn chen.