2 Kɔr. 9 - Tampulma

Ba Naa La Nyɛ Awa Nin Fuŋsɛ Sɔɔni Koosa Tuha

¹ O wa lawa mu bu sɔbi a nyɛ ma di ma suŋi Koosa nara.

² Mu zim di ma daŋni ma suŋi bau. Mu funɛ ŋɔ Yesu nitiŋɛ ba naa nyɛn Masɛdonia pulum ni, di ba niinbisa ba naa nyɛn Girik tim pulum ni, funɛ piiliu a saksi ba papaha ti bunaani. Ba funɛ nu chenani ma kpak un ma bambe ni di ma tum nan, ba nidamata fun saksi ba papaha gbanko.

³ Lalaknɔwa mu tum ya niinbisa na ma wati, chen ni ma zi lagmi ma papaha tiu a peti. Mu funɛ ŋɔ bau di ma zi ya chenu. Ma ta du min hiisa.

⁴ Mu wa Masɛdonia nara tima bɔnɛ wa na di ma ha wa ya wu digi, chenani ya se su a li ma ni zi burgi hiisau. Ma gbanko zi na hiisau kinkan.

⁵ Chendaha mu fun te tum ya niinbisa na ya suwachak ni, chen ni ba zi wa suŋi mau ma saksi papaha naa ma fun vɔu di ma nyɛ ya chen a chiŋsiu. Ya wa pu ma, a zi vaan chiŋiu a pɔ ya. Chen la zi biksi ya di ma nisa wa zuk, amaa ma nisa ka fuŋsɛu wa ma nyɛ ya.

⁶ Ma zimu di niparɛ du kin tama, o zi kum tamau, amaa o du kidamata, o zi kum kinkanu.

⁷ Ma maga kpa chenani ma lisi di ma nyɛ ya. Ma ta nyɛ ma nisa zugi a li ma papaha ti nyɛɛli ni. Ba naa la nyɛ awa nin fuŋsɛ ni yaa sɔɔni Koosa tuha kinkan.

⁸ Ma ya chen, Koosa zi bu gbaari mau a i a kaali chen, chen ni saha maga ma zi kpaku a mak ma titi ka ma nyɛ nara ni.

⁹ Ba funɛ sɔbiu a li o sɛm tɔn ti ni a ŋɔ, “Naa tiŋ Koosa tutɔ, o lisi a li o kin ni a nyɛ fara tim ni a kaali chenani o fu zi nyɛ. O tum were zi nyɛnu hali saha naa vɛ kpak bɔ.”

¹⁰ Koosa kpa kiduha aa nyɛ niparɛ ni di ba du, chen ni a zi nyɛ ba diweu. Chen vɛɛna, o yaa lisiu a li o kin ni a nyɛ ma a gbaari, chen ni ma zi kotiu a suŋi ma dɔŋtima.

¹¹ O yaa daŋni ma lisi a li kidamata a naa o fun nyɛ ma ni di ma suŋi ma dɔŋtima. Ya kpa ma papaha ti a nyɛ ba naa la daŋni un ni, ba zi pɛgi Koosau ma daha.

¹² Kina lɛ wa liɛɛ a li chenani ma tum ni. Ma suŋi bau a li ba wu muksi ni ka ba pɛgi Koosa kinkan.

¹³ Ma suŋi ba kinkan chen ni, ma biksi narawa di maa tiŋ Koosa laaboor weri ti Yesu Kristo wɛ nɛnɛ. Ba zi nyɛ Koosa jirimau, domi ma waa la suŋi ba awa nara maga kinkan.

¹⁴ Ba zi daŋni mau a sumi Koosa a nyɛ ma, domi o suŋi mau kinkan di ma suŋi ba.

¹⁵ Koosa funɛ kpa o beu a nyɛ ya. Wuti waa kaali a maga kinkan. Chendaha ma nyɛ yaa zaami un.