2 Kɔr. 8 - Tampulma

Ma Lisi A Li Ma Kidamata Ni A Nyɛ Ma Dɔŋtim Ni

¹ Mu niinbisa, ya daŋni ma zimu chenani Koosa fun a suŋi Yesu nitiŋɛ ba naa nyɛn Masɛdonia pulum ni.

² Ba funɛ na namsi kinkan, amaa chenani ba funɛ na namsi, chene ba fun vɛɛn a na tu sɔɔna kinkan. Ba ya fara timwa kinkan, amaa ba funɛ lisiu a li ba kina tam ni a wa nyɛ nara ni.

³ Min ya ba sɛhɛra tiina hali ba funɛ kpa ba kina a nyɛu ka a bu vɛ tel ba. Nandigi wa fun muksi ba di ba ya chen.

⁴ Ba fun sumi ya di ya la ba papaha, chen ni ya zi kotiu a suŋi Koosa nara ba naa nyɛn bar dumsi ni.

⁵ Ba papaha ti funɛ kaali chenani ya lisi. Ba fun te kpa ba titi a nyɛ ya kunyan ti ni a tiŋ Koosa nɔ a lisi ba kin ta a nyɛ ya.

⁶ Chendaha yaa sumi Taitus naa piin piili di o la ma papaha ti, di o suŋi ma a kpa o maga a nyɛ un. Mu zimu di maa ya nannɛ, domi maa daŋni ma suŋi ma dɔŋtimwa kinkan.

⁷ Koosa wa fun lisi a li o kidamata nɛɛ a nyɛ maa? Ma se su un kinkan ka ma koti a sɛm o sɛma a nyɛ nara ni nɛnɛ a kpak zima kinkan. Ma kpak un ma bambe ni di maa suŋi dɔŋa ka maa daŋni ya kinkan. Ma nyɛ ya gbaari bɔnɛ a li kin nama ni. Ma biksi ya chenani ma zi lisi a li ma kin ta ni a nyɛ nara nama ni a kaali chenani ma fu zi nyɛ.

⁸ Mu wara daŋni mu ŋɔ ma chenani ma zi ya, amaa mu piin ŋɔ mau chenani ba naa nyɛn Masɛdonia pulum ni fun kpak un ba bambe ni ba suŋi ba dɔŋtima kinkan. Mu daŋni mu zaamsi mau a na ma daŋni ma dɔŋtim tau a chi chenani ba daŋni ba.

⁹ Ma zimu chenani ya kunyan Yesu Kristo funɛ daŋni ya a la suŋi ya kinkan. O funɛ kpa o kidamatiwa a ta, a fun a ya fara tiina ma daha, chen ni ma zi lau a li o kidamati ta ni.

¹⁰ Ta lɛm nɛɛ mu ŋɔ ma kin nama wɛ. Bunaani ma kpak un ma bambe ni a piili a pa ma kin ta a nyɛ Taitus ni. Lalaknɔ ma pa a petiu. Ma waa funɛ ya nitele a lisi a vɛɛn piili.

¹¹ Ma la a la peti chenani ma fun piili. Ma funɛ piili wa si sɛm nɛ. Ma vɛɛn peti un wa si sɛm ni a nyɛ chenani ma zi koti.

¹² Ma daŋni kinkan di ma lisi a li ma kin ta ni a nyɛ nara ni, Koosa zi la ma papahau. O bak wa to kin naa ma vɛ koti a nyɛ ba. O baga nyɛnu di ma kpa nyɛ ba chenani ma koti.

¹³ Mu wara daŋni mu nyɛ o bɔm ma wati, a vɛ bɔm ba naa ma suŋi chen wati.

¹⁴ Lalaknɔ ma kpak kidamatau. Chendaha o weru di ma lisi a li a ni a suŋi ba naa la daŋni a. Ba kpak kidamata ka ma wa daŋni a, ba zi suŋi mau. Nan ni ma wa chel a li kundɔŋ ni.

¹⁵ Ba funɛ sɔbiu a li Koosa sɛm tɔn ti ni chenani o fun kpa diwe a nyɛ o nara ni a li nyabaan ni a ŋɔ, “Nibine naa funɛ na diwe kinkan funɛ bɔni a nyɛ naa na tam nɛɛ. Ba maga fun ya kibɛgim.”

¹⁶ Ya pɛgi Koosau di Taitus fun kpak un o bambi ni a suŋi ma a chi chenani ya kpak un a li ya bambe ni nan.

¹⁷ Mu funɛ ŋɔ Taitus ni di o bu wa zaami ma, o tuha funɛ sɔɔniu kinkan. O daŋniu kinkan di o bu na ma hali o wara daŋni mu ŋɔ un.

¹⁸ Ya funɛ tum ya niinbe digirɛ awa un di ba wa ma wati. Yesu nitiŋɛ ta maga nyɛ un jirima kinkan, domi o funɛ biksi nidamatiwa Koosa laaboor weri ti wɛ.

¹⁹ Ba funɛ lisi unu di o wa ya kpa ma papaha ti a la nyɛ Yesu nitiŋɛ ba naa nyɛn Judia pulum ni. Nan la zi nyɛ ya kunyan ti wa jirima a biksi nara di yaa daŋni ya suŋi bau.

²⁰ Ya daŋni ya dosou a li ya tum nama ni di nandigi wa zi koti a na ya galimsa a daha. Chendaha o wa ya kaa gba.

²¹ Ya daŋni ya ya chenani deŋli ya kunyan ti awa nara maga suwachak niu.

²² Ya gbanko tum nara balɛ tiina di o wa ma wati. O wa ba lagmi a kaali. Ya funɛ zaamsi unu bu damata a zim di o kpak unu o bambi ni di o suŋi ya a li ya tum ni. O zimu di mu si su mau kinkan. Chendaha o kpak un o bambi ni a gbaari di o wa suŋi ma kinkan.

²³ Nandigi wa pɛɛsi ma nara nama wɛ, ŋɔ ba di mu wa Taitus la tum tum bɛgim. Ma bu ŋɔ ba di Yesu nitiŋɛ ba naa nyɛn bar kurgɛ ni, funɛ lisi nara balɛ ta di ba wa chiŋi ba bar chiŋɛ ni. Ba tuma la nyɛ Yesu Kristo wa jirima kinkan.

²⁴ Ba wa tel, ma la ba a du a nyɛ ba zim di maa daŋni bau. Ma ya chen, Yesu nitiŋɛ ba naa funɛ tum ba, zi la nɔɔniu di ma waa ya ya jirima nara.